Dahaka Dainai Idia be mai Edia Natudia Lasi?

DELE bona ena adavana Fola, * be Watch Tower Society ena brens opesi Nigeria dekenai idia noho bona gaukara. Nega sisina unuseniai idia gaukara murinai, Fola ena sinana ia vadivadi. Ia be gabu daudau amo ia mai, ia laloa momo gauna, ia dainai hanuaboi ai ia mahuta diba lasi gauna ia herevalaia totona.

Idia dekenai ia gwau: “Lau totona gau namodia umui karaia. Harihari gaudia umui siaia, bona lau umui vadivadi henia. Unai bamona lalokau karadia lau laloa bada. To unai ese lau ia hahisia danu, badina nega momo lau laloa umui be lauegu lagani bamona neganai daika ese umui totona unai bamona gaudia do ia karaia? Umui be hari lagani rua umui headava vadaeni, bona umui be natudia lasi. Umui laloa lasi hari be nega namona Betele umui rakatania bona ruma bese umui hamatamaia, a?”

Sinana ena lalohadai be: Dele bona Fola be Betele ai idia noho ena nega be hegeregere vadaeni. Hari edia vaira negana idia laloa be namo. Momokani, ma haida ese edia gaukara idia karaia diba. Dele bona Fola ese edia ful-taim hesiai gaukara do idia rakatania lasi, to hesiai gaukara ma ta idia karaia diba, unai amo natudia do idia abia diba bona tama sina edia moale ena mamina do idia diba.

Sinana Ena Lalo-Hekwarahi

Sinana ena lalo-hekwarahi ita lalo-parara. Idaunega amo ema bona hari, bese ibounai dekenai natudia havaraia urana ia noho bona ia be vaia taunimanima idia laloa bada karana. Natudia havaraia ese moale bona helaro mamina ia henia. Baibel ia gwau, “natudia be Dirava ena harihari gauna.” Oibe, natudia havaraia karana be harihari gauna namo hereana ta iseda lalokau Havaraia Tauna amo.​​—⁠Salamo 127:⁠3.

Gabu momo dekenai, headava taudia idia doria natudia idia havaraia totona. Hegeregere, Nigeria dekenai, hahine ta ta ese idia havaraia natudia edia averes be 6, bona headava negadiai, nega momo lalo-namo taudia ese inai hanamoa herevadia idia henia headava matamata taudia dekenai: “Hua 9 idia ore neganai, ai ura beibi ena tai ai kamonai emui ruma dekenai.” Headava ena harihari gauna ta be, headava matamata tau bona hahine dekenai beibi ena bedi maragina idia henia. Ravana hahinedia ese edia kalenda idia itaia loulou. Bema lagani ta bamona murinai headava matamata hahine ia rogorogo lasi, do idia tahua bema hekwakwanai ta ia noho bona idia durua diba.

Sinadia momo dekenai tau bona hahine idia headava ena badina be natudia do idia havaraia bona bese ena ladana do idia abia lao noho. Fola ena sinana be ia dekenai ia gwau: “Dahaka dainai oi headava bema oi ura lasi natudia oi havaraia? Ta ese oi ia havaraia; namona be sibona emu natudia oi havaraia.”

Unai sibona lasi, kara ma haida ita laloa be namo. Africa besedia momo dekenai, buruka taudia naria totona gavamani ese dala momo ia hegaegaelaia lasi. Vaia, natudia ese edia buruka tama sina do idia naria, idia maragi neganai edia tama sina ese idia naridia hegeregerena. Unai dainai Fola ena sinana ia laloa bema iena natudia be mai edia natudia lasi, gabeai idia sibodia do idia noho, ta ese do ia ura henidia lasi, do idia ogogami, bona idia mase neganai ta do ia noho lasi idia ia guria totona.

Africa ena gabu momo dekenai, ta be natudia ia havaraia lasi neganai idia laloa unai be gau dikana. Gabu haida dekenai, idia laloa kekeni idia do headava lasi negana lalonai namona be idia hahedinaraia natudia idia havaraia diba. Natudia idia havaraia diba lasi hahine momo be natudia havaraia siahuna idia henia muramura  bona hanamoa daladia idia tahua goadagoada.

Unai lalohadai dainai, taunimanima momo idia laloa idia ura lasi natudia idia havaraia headava taudia be gau namona ta idia haboioa. Idia laloa idia be idau momokani, vaira gaudia idia laloa namonamo lasi, bona edia kara idia lalohisihisilaia.

Moale Bona Maduna

Iehova ena taunimanima idia diba natudia naria karana be mai ena moale, to maduna ia noho danu. Baibel be 1 Timoteo 5:8 ai ia gwau: “Bema tau ta ese iena varavara ia naria lasi, o iena ruma taudia ia ubua lasi neganai, ia ese iena abidadama Keriso dekenai ia negea vadaeni. Iena dika ese abidadama lasi murimuri tauna ena dika ia hanaia vadaeni.”

Tama sina ese edia ruma bese ena tauanina gaudia bona lauma gaudia idia henia be namo, bona unai idia karaia totona nega bada idia halusia bona idia hekwarahi. Idia laloa lasi Dirava ese natudia ia henia dainai, idia rakatania Dirava ese ia naridia totona. Idia lalo-parara Baibel ena hakaua herevadia hegeregerena, natudia naria karana be Dirava ese tama sina dekenai ia henia ful-taim gaukarana; bona unai gaukara be ma haida dekenai do idia henia lasi.​​—⁠Deuteronomi 6:​6, 7.

Hari inai “dina gabedia ai, nega aukadia mai edia hekwarahi” lalonai, natudia naria gaukarana be mai ena hekwarahi. (2 Timoteo 3:​1-5, NW ) Hari, moni davaria dalana ia dika ia lao sibona lasi, to tanobada taudia edia Dirava badinaia lasi karadia danu ese natudia naria karana ena hekwarahi idia habadaia. To, tanobada ibounai lalonai, Keristani headava taudia momo idia hekwarahi noho bona mai kwalimu ida edia natudia idia naria “Iehova ena matahakani bona lalona biagua karana ai” bona Dirava badinaia natudia ai idia lao. (Efeso 6:​4, NW ) Unai tama sina idia gaukara goadagoada dainai, Iehova ese ia lalokau henidia bona ia hanamodia.

Haida ese Natudia Idia Havaraia Lasi Ena Badina

To, Keristani headava taudia momo be mai edia natudia lasi. Haida be natudia idia havaraia diba lasi, to heubu natudia idia abia lasi danu. Natudia idia havaraia diba headava taudia haida be edia lalona idia hadaia natudia do idia havaraia lasi. Unai bamona headava taudia be natudia idia abia lasi ena badina be idia ura lasi maduna idia huaia eiava tama sina idia abia hekwarahi idia ura lasi, a? Lasi. Edia lalona idia hadaia edia goada ibounai do idia gaukaralaia ful-taim hesiai gaukara idauidau idia karaia totona, bema natudia idia naria unai idia karaia diba lasi. Haida be misinari gaukara idia karaia. Ma haida be loaloa gaukarana idia karaia eiava Betele dekenai Iehova idia hesiai henia.

Keristani taudia ibounai bamona, idia lalo-parara mai anina bada gaukara ia noho. Iesu ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.” Unai gaukara be hari idia karaia noho. Unai be mai anina bada gaukarana, badina “dokona” ena anina be sivarai namona idia kamonai lasi taudia do idia hadikaia ore.​​—⁠Mataio 24:14; 2 Tesalonika 1:​7, 8.

Iseda nega be Noa ena nega bamona, ia bona ena ruma bese ese lagatoi bada herea idia karaia Abata badana amo idia roho mauri totona. (Genese 6:​13-​16; Mataio 24:37) Ena be Noa ena natudia memero toi idia headava vadaeni, to idia ese natudia idia havaraia lasi ela bona Abata murinai. Reana unai ena badina ta be unai headava taudia idia ura ia noho gaukarana be mai edia lalona bona goada ibounai ida idia karaia. Reana ma badina ta be idia ura lasi lalohadai dikadia bona dagedage tanobadana, ‘taunimanima edia kara dika be bada herea bona edia laloa be nega ibounai ia dika sibona mo’ gabuna lalonai edia natudia idia havaraia.​​—⁠Genese 6:​5.

Ena be unai ese ia hahedinaraia lasi natudia havaraia be dika, to Keristani headava taudia momo ese natudia idia havaraia lasi badina unai amo idia be Iehova ese ena taunimanima dekenai ia henia mai anina bada gaukarana idia karaia goadagoada diba. Headava taudia haida be nega sisina idia naria bena natudia idia havaraia; ma haida be edia lalona idia hadaia natudia do idia havaraia lasi bona idia laloa Dirava ena kara maoromaoro tanobada matamatana ai natudia do idia havaraia diba. Gabeai do idia vara gaudia idia laloa lasi, a? Edia mauri lalonai gau namona ta idia reaia, a? Edia kara dainai idia ita hebogahisi henia be namo, a?

Noho Namo Bona Moale Maurina

Guna ai gwauraia taudia, Dele bona Fola, be lagani 10 idia headava vadaeni, bona edia lalona idia  hadaia vadaeni natudia do idia abia lasi. Dela ia gwau: “Aiemai varavara ese ai idia doria noho natudia ai havaraia totona. Idia laloa bada gauna be emai vaira negana dekenai do ai noho namo. Ai idia laloa dainai nega momo idia ai tanikiu henia, to mai hemataurai bada ida ai gwau ai moale bada ai karaia noho gaudia dekenai. Noho namo totona, ai hahedinaraia aiemai abidadama be Iehova dekenai, ia idia abidadama henia bona badinai noho taudia edia namo ia laloa. Ai hahedinaraia danu natudia idia abia taudia idia diba momokani lasi bema idia buruka neganai edia natudia ese do idia naridia eiava. Taunimanima haida be edia tama sina idia laloa bada lasi, ma haida be idia durua diba lasi, bona ma haida be edia tama sina idia do mase lasi lalonai idia mase. To, ai diba Iehova be aiemai vaira negana dekenai noho namo do ia henia.”

Dele bona ia bamona taudia ma haida, ese Iehova ena gwauhamata ena abidadama hesiai taudia dekenai idia abia dae momokani: “Lau ese umui do lau negea lasi, bona umui do lau rakatania lasi. Lasi bona lasi momokani.” (Heberu 13:⁠5) Idia abia dae danu Iehova ena imana ia kwadogi lasi, taunimanima ia hamauria diba; bona ena taiana ia kudima lasi, noinoi ia kamonai diba.​​—⁠Isaia 59:​1.

Iehova ita abidadama henia ena badina ma ta be ita itaia ia ese iena abidadama hesiai taudia ia durua noho. King Davida ia gwau: “Gunaguna lau be mero, harihari lau be buruka, to nega ta kara maoromaoro tauna ta be Dirava ese ia rakatania, a? Lasi momokani, nega ta lau itaia lasi.” Unai oi laloa. Iehova ese ia “rakatania” abidadama hesiai tauna ta oi diba, a?​​—⁠Salamo 37:⁠25.

Edia mauri idia henia Iehova bona edia Keristani tadikaka hesiai henia totona taudia idia moale bona unai nega idia lalohisihisilaia lasi. Tadikaka Iro Umah be lagani 45 lalonai ful-taim hesiai gaukara ia karaia bona hari Nigeria dekenai loaloa naria gaukarana ia karaia. Ia gwau: “Ena be lau bona egu hahine be natudia lasi, ai laloa diba Iehova be hanaihanai lauma dalanai bona tauanina dalanai ai ia naria. Gau ta dekenai ai dabu lasi. Ai buruka neganai ia ese ai do ia rakatania lasi. Unai ful-taim hesiai laganidia be moale negadia emai mauri lalonai. Ai moale emai tadikaka ai hesiai henidia diba, bona emai tadikaka ese aiemai gaukara idia laloa bada, bona ai idia durua.”

Ena be headava taudia momo ese sibodia edia natudia idia havaraia lasi, to idia ese natudia idaudia idia havaraia: Iehova idia tomadiho henia Keristani hahediba taudia. Aposetolo Ioane ena mauri lagani be 100 bamona neganai, ia gwau: “Bema lau kamonai, egu natuna Keristani taudia ese Dirava ena hereva momokani ena dala dekenai idia raka noho, vadaeni lau moale bada herea. Moale ta ese unai moale ia hereaia diba lasi.” (3 Ioane 4) Ioane ena ‘natudia’​—⁠ia dainai “hereva momokani” idia diba taudia​—⁠edia abidadama ese moale bada ia mailaia ia dekenai.

Hari unai bamona moale ia noho. Bernice, Nigeria hahinena, be lagani 19 lalonai ia headava vadaeni, bona ia abia hidi natudia do ia havaraia lasi. Lagani 14 lalonai, painia gaukara ia karaia. Ena mauri lalonai natudia do ia havaraia diba lasi negana ia mai kahirakahira, to ena mauri ia henia hahediba taudia halaoa gaukara dekenai dainai ia lalo-hisihisi lasi. Ia gwau: “Egu lauma natudia edia tubu daekau dalana lau itaia bona lau moale. Bema lau be mai egu natudia, edia hetura karana ese lau durua hereva momokani idia dibaia totona taudia edia hetura karana do idia hereaia diba lasi. Lau idia kara henia hegeregere lau be edia sinana korikorina bamona, lau dekenai edia moale bona hekwakwanai gaudia idia kikilaia bona sisiba totona lau idia noia. Revareva idia torea, bona ai vadivadi heheni.

“Haida idia laloa ia dika bema oi be mai emu natudia korikori lasi. Idia gwau oi buruka neganai hisihisi bada do oi abia. To lau be unai bamona lau laloa lasi. Lau diba bema mai egu goada ibounai ida Iehova lau hesiai henia, davana do ia henia bona lau do ia naria. Lau buruka neganai lau do ia negea lasi.”

Dirava ese Ia Lalokau Henia Bona Ia Laloa Bada

Natudia idia havaraia bona idia ubua taudia ese Dirava idia tanikiu henia bada bema edia natudia be “hereva momokani ena dala dekenai idia raka noho.” Ita hoa lasi Baibel ia gwau: “Kara maoromaoro tauna ena tamana, be do ia moale bada, bona bema iena natuna be mai aonega danu, unai tamana ese do ia moalelaia. Oiemu tamana bona sinana do oi hamoalea. Oi ia havaraia hahinena, be oi dekenai do ia moale bada be namo!”​​—⁠Aonega Herevadia 23:​24, 25.

Natudia havaraia ena moale idia mamia lasi Keristani  taudia be dala ma haida ai hahenamo idia abia. Unai headava taudia momo be dala badana ai Basileia durua gaukarana idia karaia noho. Lagani momo lalonai, gaukara idauidau idia karaia, aonega, bona diba idauidau idia abia dainai, idia ese Basileia gaukara idia durua bada. Momo be unai gaukara idia karaia goadagoada.

Ena be Basileia gaukarana dainai natudia idia havaraia lasi, to Iehova ia henia hahenamo ta be lauma dalanai lalokau ruma besena idia abia, bona idia ese edia ura dadaraia karana idia laloa bada. Unai be Iesu ena hereva bamona: “Bema tau ta ese iena ruma ia rakatania, o iena tadikakana, o taihuna, o sinana, o tamana, o natuna, o tano, bema lau dainai bona Sivarai Namona dainai inai gaudia ia rakatania, hari inai mauri neganai, iena gau do ia habadaia nega 100 bamona, ruma, tadikakana, taihuna, sinana, natuna, bona tano . . . to gabeai, vaira neganai, mauri hanaihanai do ia abia.”​​—⁠Mareko 10:​29, 30.

Iehova ese ia idia abidadama henia noho taudia ia laloa bada! Ia idia badinaia taudia ibounai, mai edia natudia bona mai edia natudia lasi taudia, be Paulo ese ia hagoadaia, ia gwau: “Dirava ena kara be gagevagageva lasi, ia be maoromaoro momokani. Unai dainai ia ese emui kara namodia do ia laloaboio lasi. Umui ese Dirava umui lalokau henia. Inai lalokau ese laloa namodia umui dekenai ia havaraia, vadaeni umui ese Dirava ena taudia umui durua vadaeni, bona do umui durua noho danu.”​—⁠Heberu 6:⁠10.

[Footnotes]

[Pictures on page 23]

Natudia idia havaraia lasi taudia edia hahenamo ta be lauma dalanai lalokau ruma besena idia abia