Dahaka Dainai Iseda Ura Gaudia Ita Laloa Maoromaoro be Namo?

ISEDA helaro ia guguru neganai bona ita ura ita abia gauna ita abia neganai, iseda lalona ia hegeregere momokani. To ita diba, ita ura bona ita laloa gaudia momo be iseda ura hegeregerena idia guguru lasi. Reana iseda mauri lalonai gau momo ita karaia diba lasi dainai sibona dekenai o ma haida dekenai ita badu. Aonega tauna ese unai ia itaia bona ia herevalaia, ia gwau: “Bema tau ta ia laloa gau namona ta do ia abia, to unai gau totona nega daudau ia naria kava, unai be lalohisihisi ia davaria noho.”​—⁠Aonega Herevadia 13:⁠12.

Edena gaudia dainai lalohisihisi ia vara diba? Edena dala ai iseda ura gaudia ita laloa maoromaoro diba? Danu, bema unai ita karaia, dahaka dainai namo do ita davaria?

Iseda Ura Gaudia Bona Ita Karaia Diba Lasi Gaudia

Hari iseda mauri lalonai nega be lasi bamona, ita hekwarahi gaukara ita haorea totona to toana be gaukara bada herea ia do noho. Iseda nega bona goada ania gaudia be idia ore lasi, bona ita ura ita karaia gaudia ita haorea lasi neganai, nega momo sibona ita gwauraia dika. Reana ita abia hemami be ma haida edia ura gaudia ita karaia lasi dainai idia moale lasi ita dekenai. Cynthia, adavana bona sinana ta, be tama sina edia maduna ena metau ia diba. Ia gwau: “Lau lalohisihisi bada badina egu hemami be egu natudia edia kerere lau hamaoromaoroa hanaihanai lasi bona lau laloa idia lau hadibaia namonamo lasi.” Kekeni ta, Stephanie, ese sikuli ia herevalaia, ia gwau: “Nega be hegeregere lasi egu ura gaudia iboudiai lau karaia haorea totona, unai dainai haheauka diba lasi ena mamina lau abia.”

Emu ura gaudia oi laloa goada dainai dala goevadaena sibona do oi tahua, bona unai ese lalohisihisi bada ia havaraia. Ben, headava matamata tauna ta, ia gwau: “Egu kara, lalohadai, eiava hemami lau tahua lou neganai, hanaihanai hanamoa dalana sibona lau itaia. Karaia dalana goevadaena lau tahua loulou, bena unai dainai haheauka lasi karana, badu, bona lalohisihisi lau mamia.” Gail, Keristani adavana ta, ia gwau: “Karaia dalana goevadaena tahua lalohadaina dekenai, kwalimu lasi be ia noho lasi. Ai ura ai be sinana hereadaena bona adavana hereadaena. Ai moale totona gaukara ena anina ai havaraia, unai dainai nega ai haorea kava neganai ai badu.”

Lalohisihisi ia havaraia diba gauna ma ta be ita gorere bona ita buruka ita lao. Iseda goada ia maragi ia lao bona ita karaharaga diba lasi ese iseda kara ena hetoana ia hahedinaraia goevagoeva, bona reana unai ese iseda lalohisihisi ia habadaia. Elizabeth ia gwau: “Lau gorere lasi neganai gau momo karaia haraga be auka lasi, to hari unai gaudia lau karaia diba lasi bona haheauka lasi hemamina lau abia.”

Unai gaudia be lalohisihisi havaraia gaudia haida. Bema unai hemami ita biagua namonamo lasi, reana do ita laloa ma haida ese ita idia laloa bada lasi. Unai dainai, dahaka gau namodia ita karaia diba unai lalohisihisi haheaukalaia totona bona iseda ura gaudia ita laloa maoromaoro totona?

Ura Gaudia Laloa Maoromaoro Daladia

Gau ginigunana be, ita laloaboio lasi Iehova be laloa maoromaoro bona hebogahisi Diravana. Salamo 103:14 ese ita ia hamaoroa lou, ia gwau: “Dirava ia diba, ita be tanobada ena kahu dekena amo ita ia karaia. Bona ita dekenai ia laloa noho, ita be kahu sibona.” Iehova be iseda diba bona goada ena hetoana ia diba, unai dainai ita henia diba gaudia sibona ia ura. Ita amo ia noia gauna ta be “mai manau danu Dirava danu do ita raka hebou.”​​—⁠Mika 6:⁠8.

Iehova ese ita ia hagoadaia ia dekenai ita guriguri  be namo. (Roma 12:12; 1 Tesalonika 5:17) To, edena dala amo unai ese ita ia durua? Guriguri ese iseda laloa dalana ia hanamoa. Guriguri goadagoada karana amo ita hahedinaraia ita diba heduru ita abia be namo​​—⁠unai be manau bona hekokoroku lasi karana. Iehova ia ura dikadika iseda guriguri ia haerelaia ena lauma helaga henia karana amo, bona iena lauma ena huahua be lalokau, hebogahisi, kara maoromaoro, bona boga auka. (Luka 11:13; Galatia 5:​22, 23) Guriguri ese lalo-hekwarahi bona badu ia hanamoa diba danu. Elizabeth ia gwau: “Guriguri amo ita abia lalo-goada be kara ma ta amo do oi abia lasi.” Kevin ese unai hereva ia abia dae, bona ia gwau: “Egu guriguri be lalo-maino lau abia lau laloa goevagoeva diba, hekwakwanai ta lau hanamoa diba totona. Hanaihanai, Iehova ese egu noinoi ia haerelaia.” Aposetolo Paulo be guriguri ena namo ia diba. Unai dainai inai sisiba ia henia: “Dirava ena maino ese taunimanima edia diba ia hanaia momokani. Keriso Iesu umui danu ia hakapua tamona dainai, inai maino ese emui laloa gaudia, bona emui kudouna idia mamia gaudia ibounai do ia gimaia namonamo.” (Filipi 4:​6, 7) Oibe, Iehova hereva henia karana ese ita ia durua ita bona ma haida amo ita ura ita tahua gaudia ita laloa maoromaoro totona.

To, nega haida, hagoadaia herevadia ita kamonai be namo. Hereva maorona nega korikori ai be namo. Ita abidadama henia lo turana ta ida ita herevahereva neganai, reana ita lalo-hekwarahilaia o ita lalohisihisilaia gauna ena badina do ita davaria diba. (Aonega Herevadia 15:23; 17:17; 27:⁠9) Matamata taudia be gau ta idia lalo-hekwarahilaia neganai, namona be idia diba tama sina edia sisiba ese idia do ia durua idia laloa namonamo totona. Kandi ese unai ia laloa bada, ia gwau: “Egu tamana bona sinana edia hahekau lalokauna ese lau ia durua dainai, egu ura gaudia lau laloa maoromaoro bona laloa namonamo karana lau habadaia bona taunimanima ese egu hebamo idia moalelaia.” Oibe, Aonega Herevadia 1:​8, 9 ena hereva namona ita laloaboio lasi be namo, ia gwau: “Lauegu natuna e, oiemu tamana bona sinana, edia hadibaia hereva do oi kamonai henia. Idia edia hadibaia hereva ese, oiemu kara do idia hanamoa, oiemu kwarana ena herahera, bona ageva ese oiemu toana idia hanamoa bamona.”

Dala goevadaena tahua hanaihanai lalohadaina be inai aonega herevana ese ia herevalaia: “Bema oi ura oiemu mauri be oiemu ura hegeregerena do ia vara, lalohisihisi oi boiria mai.” Unai dika koua totona, oiemu laloa dalana oi haidaua be namo. Manau bona hekokoroku lasi​​—⁠bona iseda goada ena hetoana laloa namonamo karana​​—⁠ese iseda ura gaudia laloa maoromaoro karana do ia hagoadaia. Mai maoro ida, Roma 12:3 ese ita ia sisiba henia, ia gwau namona be ‘ita laloa lasi ita be bada momokani.’ Danu, Filipi 2:3 ese ita ia hagoadaia namona be ita lalo-manau bona ita laloa taunimanima ma haida ese ita idia hereaia.

Guna ai kikilaia hahinena, Elizabeth, be iena gorere dainai sibona dekenai ia hesiku. Mai anina bada gauna ia dekenai be, nega ia atoa Iehova ena lalohadai ia abia totona, bona ia diba iseda gaukara ia laloaboio lasi neganai unai ese ena lalona ia hanamoa. Colin be gorere dikana ta dainai ia raka diba lasi. Matamanai, iena hemami be ia do goada noho negana ai ia karaia gaukara be mai anina to ia gorere negana ai ia karaia gaukara be anina lasi. To Baibel siri haida, hegeregere 2 Korinto 8:​12, ia laloa dobu neganai, unai hemami ia hanamoa. Unai siri ia gwau: “Bema tau ta ia ura dikadika harihari gauna do ia henia, Dirava ese inai kara do ia ura henia. Dirava ia diba unai tau ena kohu be hida, bona ia laloa karaia, unai tau ena harihari gauna be iena kohu hegeregerena o lasi. Bema tau ta madi be kohu lasi neganai, Dirava ese unai tau ena henia kara do ia laloa momo lasi.” Colin ia gwau: “Hari lau henia diba gaudia be momo lasi, to lau henia diba, bona Dirava ese unai ia abia dae.” Heberu 6:​10 ese ita ia hamaoroa lou: “Dirava ena kara be gagevagageva lasi, ia be maoromaoro momokani. Unai dainai ia ese emui kara namodia do ia laloaboio lasi.”

Edena dala amo ita itaia diba bema iseda ura gaudia ita laloa maoromaoro, eiava? Sibona oi nanadaia, ‘egu ura gaudia be Diravana ena ura gaudia hegeregerena, a?’ Galatia 6:4 ia gwau: “Ibounai ta ta ena kara ena kara ia diba be namo. Bema iena kara be namo, ia sibona ia heagilaia diba. To bema iena kara be tau ta ena kara danu ia hahegeregerea, unai tau do ia gwauraia kerere totona, unai be namo lasi.” Laloaboio lasi, Iesu ia gwau: “Lauegu huaia auna be ia metau lasi, bona huaia neganai danu hekwarahi lasi.” Oibe, ita Keristani taudia be mai eda huaia auna, to ia “metau lasi” bona huaia totona do ita “hekwarahi lasi,” bona Iesu ena gwauhamata be bema huaia namonamo dalana ita dibaia, ita do ia hagoadaia.​​—⁠Mataio 11:​28-30.

 Ura Gaudia Laloa Maoromaoro Karana Ena Davana

Iseda ura laloa maoromaoro karana ita habadaia totona Dirava ena Hereva ena sisiba ita kamonai bona badinaia neganai, do idia noho daudau dava namodia ita abia. Gau ta be, unai ese iseda tauanina ia hagoadaia. Jennifer be Iehova ena hadibaia loulou herevadia amo namo ia davaria, bona ia gwau: “Egu mauri lau ura henia bada dainai goada ma haida lau abia.” Unai dainai, Aonega Herevadia 4:​21, 22 ese ita ia hagoadaia eda matana bona kudouna amo Iehova ena hereva ita itaia noho, “badina idia davaridia taudia dekenai, inai aonega herevadia be mauri, bona idia ese tau ta ena tauanina, be idia hanamoa noho.”

Davana namona ma ta be iseda lalona bona hemami do idia namo. Theresa ia gwau: “Dirava ena Hereva lau laloa bona egu kudouna dekenai ia diho neganai, lau itaia ia ese egu moale ia habadaia.” Momokani, iseda mauri lalonai, ita ura gaudia haida do ita davaria lasi, to do ita haheauka diba. Iamesi 4:8 ese ita ia hagoadaia: “Dirava dekenai do umui raka kahirakahira lao, vadaeni ia ese umui dekenai do ia raka kahirakahira mai.” Iehova ena gwauhamata be ita do ia hagoadaia bona maino do ia henia mauri ena hekwakwanai ita haheaukalaia totona.​​—⁠Salamo 29:⁠11.

Bema iseda ura gaudia ita laloa maoromaoro, lauma dalanai do ita goada noho. Unai be hahenamo ta danu. Iseda mauri lalonai mai anina bada gaudia do ita itaia goevagoeva. (Filipi 1:​10, NW ) Ita hagugurua diba gaudia namodia do ita tahua, bona unai ese moale bona mamina namona do ia havaraia. Mai eda ura ida Iehova do ita abidadama henia, badina ita diba ia ese ita ia naria dainai, namo do ia vara. Petero ia gwau: “Dirava ena imana goadana henunai do umui manau, vadaeni iena nega namona lalonai ia ese umui do ia abia isi.” (1 Petero 5:⁠6) Iehova ese oi do ia abia isi bona hahenamo ma ta ese unai hahenamo ia hereaia diba lasi, ani?

[Pictures on page 31]

Ura gaudia laloa maoromaoro karana ese ita ia durua lalo-hekwarahi bona lalohisihisi ita haheaukalaia totona