Mauri Sivaraina

Tuari Gaudia Karaia Gaukarana Lau Rakatania Bona Taunimanima Hamauria Gaukarana Lau Karaia

ISIDOROS ISMAILIDIS ESE IA SIVARAILAIA

Lau tui diho bona egu vairana dekenai matana ranu idia diho. Lau guriguri, lau gwau: “Dirava e, egu lalona ena mamina ese lau ia hadibaia tuari kohudia karaia gaukarana do lau karaia lasi. Lau hekwarahi bada gaukara ma ta lau davaria totona, to lau davaria lasi. Kerukeru, egu gaukara hadokoa pepana do lau henia. Mani emu kara Iehova, namona be emai natudia be aniani totona idia hitolo lasi.” Edena bamona unai ibounai lau davaria?

LAU be lagani 1932 ai lau vara, Greece ena not kahanai, Drama dekenai, unuseniai mauri be mai maino bona ia auka lasi. Egu tamana ia ura lau karaia gauna be nega momo lau dekenai ia gwauraia. Lau ia hagoadaia United States dekenai do lau lao, edukeisen lau abia totona. Greece be Tanobada Ibounai Tuarina Iharuana lalonai idia hadikaia murinai, Greek taudia huanai idia gwauraia momo herevana be inai: “Emai kohu umui henaoa diba, to emai lalona dekenai ia noho gauna be umui henaoa diba lasi.” Egu lalona lau hadaia edukeisen badana do lau tahua bona ta ese ia henaoa diba lasi gauna do lau abia.

Egu maragi negana amo, Greek Otodoks Dubuna ese ia durua matamata taudia edia grup idauidau lalonai lau vareai. Unuseniai, ai idia hadibaia dika idia havaraia tomadiho orea idaudia do ai dadaraia. Idia gwauraia grup ta​​—⁠Iehova ena Witnes taudia​​—⁠lau laloatao namonamo, badina idia gwau idia be Keriso tuari henia taudia.

Lagani 1953 ai, Athens ena technical sikuli lau haorea murinai, Germany dekenai lau lao, gaukara lau tahua totona bona nega tamona ai sikuli lau lao totona. To unai ia vara lasi, unai dainai tano ma haida dekenai lau lao. Pura haida murinai, Belgium ena bouti kamokau gabuna ta dekenai lau noho bona lau davaria lau be moni lasi. Lau laloatao dubu ta dekenai lau raka vareai, lau helai diho,  bona lau tai bada herea dainai, egu matana ranu be foloa dekenai idia moru diho. Lau guriguri bema Dirava ese lau ia durua United States dekenai lau lao totona, kohu do lau tahua lasi to edukeisen do lau abia bona do lau hekwarahi Keristani tauna namona bona unai tano tauna namona ai do lau lao. Lagani 1957 ai, unuseniai lau ginidae.

Mauri Matamatana United States Dekenai

United States dekenai, gado ia diba lasi bona ia be moni lasi idau tano tauna dekenai mauri be ia auka. Gaukara rua lau karaia hanuaboi ai bona lau hekwarahi dina ai sikuli dekenai lau lao totona. Koledi haida dekenai lau lao bona kwalimu pepana lau abia. Bena University of California, Los Angeles dekenai, lau lao bona saiens ena kahana ta, fisiks, ena kwalimu pepana lau abia. Unai metau momo laganidia lalonai, egu tamana ena hereva edukeisen lau abia totona ese lau ia durua.

Unai nega ai, Greek kekeni, Ekaterini, mai hairaina lau hedavari henia bona lagani 1964 dekenai ai headava. Emai natuna mero ginigunana be lagani toi murinai ia vara, bona lagani hani idia do ore lasi neganai, natuna memero rua bona kekeni ta ai abia. Nega tamona ai ruma bese lau naria bona iunivesiti dekenai lau stadi be ia auka.

Misail bona speis gaudia ia karaia kampani ta Sunnyvale, California dekenai, U.S. Air Force totona lau gaukara. Peleini bona speis gaudia karaia gaukara idauidau lalonai lau vareai, Agena bona Apollo edia gaukara lalonai danu. Apollo 8 bona Apollo 11 gaukarana lau durua dainai medolo lau abia danu. Unai murinai, egu edukeisen lau habadaia bona ami totona speis gaukara idauidau lau karaia badabada. Unai negai, lau laloa gau ibounai lau abia​​—⁠hahine mai hairaina, natudia namodia hani, dagi bada gaukarana, bona ruma namona.

Haheauka Tauna Ta

Lagani 1967 ai, gaukara gabuna dekenai, Jim lau hedavari henia, ia be manau bona hebogahisi tauna momokani. Toana be hanaihanai Jim ena vairana dekenai kiri toana ia hedinarai, bona kofi ai inua hebou totona lau noia neganai, nega ta ia dadaraia lasi. Unai negadia ia gaukaralaia Baibel ena hereva be lau ida ia herevalaia totona. Jim ese lau ia hamaoroa ia be Iehova ena Witnes taudia ida ia stadi.

Jim be unai tomadiho oreana ia bamoa sivaraina lau kamonai neganai lau hoa bada. Edena bamona unai tau namona be Keriso ia tuari henia bona dika ia havaraia tomadiho oreana ena tarapu lalonai ia vareai? To, Jim ese lau ia ura henia bona ia hebogahisi henia karana lau dadaraia diba lasi. Toana be dina ibounai ia ese gau idauidau ia mailaia lau duahia totona. Hegeregere, dina ta ai lauegu opesi dekenai ia mai bona ia gwau: “Isidoros, inai hereva Gima Kohorona lalonai ese ruma bese maurina hagoadaia karana ia herevalaia. Oi abia lao ruma dekenai, bona emu adavana ida oi duahia.” Ia lau hamaoroa unai magasin do lau duahia, to gabeai lau lao mei rumana dekenai bona magasin lau darea kahana maragimaragi dekenai bona momoru gabuna dekenai lau negea.

Lagani toi lalonai, Jim ese lau dekenai ia henia buka bona magasin ibounai lau hadikaia ore. Iehova ena Witnes taudia lau lalo-dika henia kava, to Jim be egu turana ai ia noho totona, lau laloa ia namo bema ia gwauraia hereva lau kamonai bena do lau laloaboio haraga.

To, unai herevahereva amo, lau itaia lau abidadama henia  bona lau karaia gaudia momo be Baibel amo lasi. Lau lalo-parara Toi Tamona, hel ena lahi, bona mase diba lasi soulina hahediba herevadia be Baibel amo lasi. (Hadibaia Tauna 9:​10; Esekiela 18:​4, NW; Ioane 20:17) Lau be hekokoroku Greek Otodoks tauna dainai, lau ura lasi Jim lau hamaoroa ia be maoro. To nega ibounai Baibel ia gaukaralaia bona sibona ena lalohadai ia gwauraia lasi dainai, lau lalo-parara unai tauna ese Baibel amo mai ena anina bada sivaraina lau dekenai ia hahedinaraia.

Lauegu adavana ia mamia gau ta ia vara noho, bona ia nanadaia bema lau be egu turana, Witnes taudia ia bamoa tauna, lau hereva henia. Egu haere be oibe neganai, ia gwau: “Ia namo dubu ta dekenai ita lao, to Iehova ena Witnes taudia dekenai ita lao lasi be namo.” To, nega sisina murinai, lau bona egu adavana be emai natudia ida Iehova ena Witnes taudia edia hebou ai lao henia hanaihanai.

Abia Hidi Karana Aukana

Baibel lau stadilaia neganai, peroveta tauna Isaia ena hereva lau itaia, ia gwau: “Idia ese edia tuari kaia be hama dekenai do idia makohia, bona unai makohia auri dekena amo, tano geia auri do idia karaia. Bona idia edia io ena auri danu do idia botaia palaka, au rigi utua kaia do idia halaoa. Bese ta ese bese ta dekenai do ia tuari henia lou lasi, bona tuari dalana be do idia hadibaia lou lasi.” (Isaia 2:⁠4) Sibona lau nanadaia, ‘Edena bamona maino ia ura henia Diravana ena hesiai tauna be taunimanima idia hadikaia tuari kohudia ia karaia?’ (Salamo 46:⁠9) Daudau lasi murinai lau lalo-parara egu gaukara lau haidaua be namo.

Unai be hekwakwanai badana. Lau be mai egu dagi bada gaukarana. Unai bamona gaukara abia totona lagani momo lalonai lau gaukara goada, lau hekwarahi bada edukeisen lau abia totona, bona egu ura gaudia momo lau dadaraia. Lau hekwarahi to egu ura gauna lau abia, bona hari egu gaukara lau hadokoa gwauraia. To, egu lalokau bada Iehova totona bona iena ura karaia totona be ia kwalimu.​​—⁠Mataio 7:​21.

Egu lalona lau hadaia kampani ta ai Seattle, Washington dekenai, gaukara do lau tahua. To madi, daudau lasi murinai lau davaria, Isaia 2:4 ena hereva ida ia hegeregere lasi gaukara lau durua bada. Gaukara ma haida lau karaia totona lau hekwarahi to lau kwalimu lasi, bona egu lalona ena mamina dainai lau laloa momo. Lau lalo-parara unai gaukara lalonai, lalona ena mamina goevana lau dogoatao diba lasi.​​—⁠1 Petero 3:​21.

Ia hahedinaraia goevagoeva gau badadia haida ai haidaua be namo. Hua 6 ia do abia lasi neganai, emai mauri dalana ai haidaua bona emai ruma bese ena moni negea karana be kahana ta amo ai hamaragia. Bena emai ruma badana ai hoihoilaia bona Denver, Colorado dekenai, ruma maragina ta ai hoia. Hari lau hegeregere kara ginigabena lau karaia totona​—⁠egu gaukara amo lau doko karana unai. Egu doko pepana lau taipia bona egu lalona ena mamina lau gwauraia hedinarai. Unai hanuaboi ai, natudia idia mahuta murinai, lau bona egu adavana be ai tui diho bona Iehova dekenai ai guriguri, inai sivarai ena matamanai ia hahedinaraia hegeregerena.

Hua ta ia do abia lasi neganai, Denver dekenai ai lao, bona pura rua murinai, July 1975 ai, lau bona egu adavana be bapatiso ai abia. Hua 6 lalonai gaukara lau davaria diba lasi, bona ai haboua monina be metairametaira ai haorea. Hua namba 7 ai, hua  ta ta lalonai ruma ena davana ai karana monina ese emai akaun dekenai ia noho monina ia hanaia. Gaukara idauidau lau tahua matamaia, to maoromaoro unai murinai ensinia gaukarana lau abia. Guna lau abia moni ena kahana sibona lau abia; to unai be Iehova ena amo lau noia gauna ia hanaia. Lau moale bada badina lauma gaudia lau atoa guna dainai!​​—⁠Mataio 6:​33.

Emai Natudia Ai Hadibaia Iehova Idia Lalokau Henia Totona

Unai gaudia idia vara lalonai, lau bona Ekaterini be ai bisi bada herea emai natudia hani be Dirava ena hakaua herevadia amo ai hadibaia totona. Hamoalea gauna be, Iehova ena heduru dainai, idia ibounai be lo Keristani taudia ai idia lao vadaeni, edia mauri ibounai idia henia mai anina bada Basileia sivarai namona harorolaia gaukarana dekenai. Emai memero toi, Christos, Lakes, bona Gregory be Hesiai Gaukara Hadibaia Sikulina idia haorea vadaeni bona gabu idauidau ai, kongregesen idia vadivadi henia bona hagoadaia. Bona Toula, emai natuna kekeni, be Iehova ena Witnes taudia edia hedikwota, New York dekenai, volantia gaukara ia karaia noho. Idia ibounai ese moni bada gaukara namodia idia dadaraia Iehova idia hesiai henia totona, unai ese emai kudouna ia hamarerea bada.

Momo ese ai idia nanadaia edena bamona natudia naria namonamo karana dekenai ai kwalimu. Momokani, natudia naria totona heduru hereva tamona ita gwauraia diba lasi, to ai gaukara goadagoada Iehova bona dekena taudia lalokau henia urana be edia kudouna dekenai ai atoa totona. (Deuteronomi 6:​6, 7; Mataio 22:​37-​39) Natudia idia dibaia gauna be, Iehova ita hamaoroa diba ia ita lalokau henia bema iseda kara amo unai do ita hahedinaraia.

Pura ibounai dina ta ai, nega momo unai be Saturday dekenai, ai ibounai be haroro gaukara ai karaia hebou. Ruma bese ena Baibel Stadi be hanaihanai Monday hanuaboi dekenai ai karaia, aniani murinai, bona natudia ta ta ida Baibel stadi ai karaia danu. Natudia idia do maragi neganai, pura ta ta ai natudia ta ta ida stadi be nega momo ai karaia nega kwadogidia lalonai, bona idia bada neganai, stadi ena nega ai halataia, bona nega tamona pura ibounai ai karaia. Unai stadi lalodiai, emai natudia be ai dekenai idia hereva bona mai gari lasi ida edia hekwakwanai be ai dekenai idia herevalaia.

Bona danu, hagoadaia moale karadia ai moalelaia hebou. Miusiki gaudia ai gadaralaia hebou be emai ura gauna, bona natudia ta ta be sibona idia ura ane idia gadaralaia. Pura ena dokona haida ai, ruma bese haida ai boiria hagoadaia hebamo karadia totona. Holide negadiai, ai ibounai ai loaloa hebou. Unai bamona loaloa ta dekenai, pura rua lalonai Colorado ena ororo gabunai ai loaloa bona unuseniai idia noho kongregesen ida ai haroro hebou. Emai natudia be distrik hebouhebou ena dipatmen idauidau dekenai idia gaukara karana bona gabu idauidau dekenai Kingdom  Hall haginia gaukarana be mai edia moale ida idia laloatao. Emai natudia be Greece dekenai edia varavara itaia totona ai abia lao neganai, abidadama Witnes taudia momo idia hedavari henia danu, guna edia abidadama dainai dibura dekenai idia noho taudia. Unai ese edia lalona ia hamarerea bada dainai, edia lalona idia hadaia mai gari lasi ida hereva momokani totona do idia gini goada.

Momokani, nega haida ai, natudia haida idia kerere eiava hebamo karana dekenai abia hidi dikana idia karaia. Nega ma haida ai, reana taravatu momo ai atoa dainai, hekwakwanai momo ai havaraia idia dekenai. To Baibel lalonai ai davaria ‘Iehova ena lalona biagua karana’ ese ai ia durua hekwakwanai ai hamaoromaoroa totona.​​—⁠Efeso 6:​4, NW; 2 Timoteo 3:​16, 17.

Egu Mauri Ena Moale Bada Negana

Emai natudia be ful-taim hesiai gaukara idia karaia matamaia murinai, lau bona Ekaterini be taunimanima hamauria gaukarana ai karaia badabada totona ai karaia diba gauna ai lalohadailaia. Unai dainai, lagani 1994 ai, egu nega ia do abia lasi neganai gaukara amo lau doko murinai, ai ruaosi ese regula painia gaukara ai karaia matamaia. Emai haroro gaukara lalonai koledi bona univesiti haida ai vadivadi henia, unuseniai stiuden taudia ai haroro henia bona idia haida ida Baibel stadi ai karaia. Edia hekwakwanai lau lalo-pararalaia diba​​—⁠badina idia davaria hekwakwanai be lagani momo lasi gunanai lau davaria​​—⁠Iehova idia dibaia totona idia lau durua neganai anina namona lau havaraia. Lau moale bada, badina stiuden taudia Bolivia, Brazil, Chile, China, Egypt, Ethiopia, Mexico, Thailand, bona Turkey amo lau stadi henia dainai! Telefon amo haroro karana lau moalelaia danu, bona egu gado idia kiki taudia lau hereva henia neganai lau moale bada.

Ena be lau be mai egu koua gaudia momo, Greek gado dainai egu hereva ena rege be idau bona lau buruka, to hanaihanai gaukara idauidau karaia totona lau gini hegaegae bona Isaia ena lalohadai lau hahedinaraia toho, ia gwau: “Lau be inai, do lau lao! Lau do oi siaia!” (Isaia 6:⁠8) Ai moale badina taunimanima 6 bamona ai durua diba edia mauri be Iehova dekenai idia gwauhamatalaia totona. Ai dekenai inai be moale bada negana.

Nega ta ai, egu mauri ibounai lalonai taunimanima hamasea gaudia dikadia lau karaia. To, Iehova ese ena hebogahisi dainai dala ia kehoa, lau bona egu ruma bese be iena gwauhamata hesiai taudia ai ai lao totona bona emai mauri ai henia mauri hanaihanai tanobada paradaisona dekenai ena sivarai namona be taunimanima dekenai ai abia lao totona. Lau karaia abia hidi metaudia lau laloa neganai, Malaki 3:10 ena hereva lau laloa, ia gwau: “ ‘Lau do umui tohoa karaia. Unai kahana ta lau dekenai do umui henia, vadaeni lauegu kara namona do umui itaia. Lau ese guba ena uindo do lau kehoa, bona gau namodia momo herea umui dekenai do lau bubua diho.’ ” Mai emai kudouna ibounai ida ai moale badina unai bamona ia karaia vadaeni!

[Box/Picture on page 27]

Lakes: Egu tamana be kara koikoi taudia ia dadaraia. Ia hekwarahi bada ia kara koikoi lasi totona, ena ruma bese dekenai haheitalai namona ia hahedinaraia totona. Nega momo ai ia hamaoroa, ia gwau: “Bema emui mauri umui gwauhamatalaia Iehova dekenai, unai ena anina be bada. Namona be Iehova dainai, mai emui moale ida sibona emui ura umui dadaraia. Keristani tauna ai umui lao ena anina be unai.” Unai hereva lau laloatao noho bona unai ese lau ia hagoadaia ena haheitalai lau tohotohoa bona Iehova dainai sibona egu ura lau dadaraia totona.

[Box/Picture on page 27]

Christos: Egu tama sina ese mai edia goada ibounai ida Iehova idia badinaia bona idia abia tama sina edia maduna idia huaia karana lau laloa bada. Ruma bese ta hegeregerena, gau ibounai ai karaia hebou​​—⁠emai haroro bona emai holide. Ena be ma gau idauidau momo herea idia karaia diba, to egu tama sina ese kohu momo idia tahua lasi, to haroro gaukara idia laloa bada. Hari, lau diba lau moale momokani bema Iehova ena hesiai gaukara lau karaia goadagoada.

[Box/Picture on page 28]

Gregory: Egu tama sina edia hagoadaia hereva egu hesiai gaukara lau habadaia totona ese lau ia durua bada, to edia haheitalai bona edia moale Iehova ena hesiai gaukarana dekenai, ese lau ia veria egu noho lau laloa namonamo, egu lalo-hekwarahi ful-taim hesiai gaukara hamatamaia karana dekenai lau atoa siri, bona Iehova ena gaukara lau karaia badabada totona. Egu tama sina lau tanikiu henia, badina lau idia durua lau gaukara goadagoada karana amo ia mai moale lau davaria totona.

[Box/Picture on page 28]

Toula: Hanaihanai egu tama sina ese ai idia hamaoroa emai hetura karana Iehova ida be mai anina bada gauna bona ai moale momokani diba dalana tamona be Iehova ai hesiai henia mai emai goada ibounai ida. Ai dekenai idia hahedinaraia Iehova ia noho momokani. Nega momo emai tamana ese ai ia hamaoroa, mai lalona ena mamina namona ida oi mahuta diba, hegeregere bema oi diba mai emu goada ibounai ida oi gaukara Iehova oi hamoalea totona, unai ena mamina be namo herea.

[Picture on page 25]

Lagani 1951 ai, Greece dekenai, lau be ami tauna neganai

[Picture on page 25]

Ekaterini ida lagani 1966 ai

[Picture on page 26]

Egu ruma bese lagani 1996 ai: (laurina kahana amo ia lao idibana kahana, murinai) Gregory, Christos, Toula; (vairanai) Lakes, Ekaterini, bona lau