Dirava Oi Tahua mai Emu Kudouna Bona Lalona Ida

Keristani tomadiho momokanina be taunimanima ia hagoadaia kudouna bona lalona idia gaukaralaia, Dirava ese ia moalelaia abidadama do idia habadaia totona.

MOMOKANI, Keristani tomadiho ia hamatamaia tauna, Iesu Keriso, ese ita ia hadibaia namona be mai iseda “lalona ibounai” ida, eiava darana ida, bona “lauma ibounai” bona “kudouna ibounai” ida Dirava ita lalokau henia. (Mataio 22:37) Oibe, iseda tomadiho lalonai lalona gaukaralaia karana be mai ena gaukara badana.

Iesu ese kamonai taudia ia hagoadaia ia hadibaia gaudia do idia laloa neganai, nega momo ia henanadai: “Dahaka umui laloa?” (Mataio 17:25; 18:12; 21:28; 22:42) Unai hegeregerena, aposetolo Petero ese abidadama tamona taudia ia tore henidia ‘edia lalodia do ia hagoadaia’ totona. (2 Petero 3:⁠1) Tanobada ena kahana momo ia vadivadi henia misinari tauna gunana, aposetolo Paulo, ese Keristani taudia ia hagoadadia ‘edia lalona’ idia gaukaralaia bona ‘sibona dekenai do idia hamomokania Dirava ena ura namona bona idia abia dae diba gauna bona goevadaena be dahaka.’ (Roma 12:​1, 2, NW ) Keristani taudia be idia abia dae gaudia idia tahua namonamo karana amo edia abidadama idia habadaia, unai be Dirava ia hamoalea gauna bona idia ia durua mauri lalonai hetoho idia haheaukalaia totona.​​—⁠Heberu 11:​1, 6.

Keristani haroro taudia gunadia be ma haida idia durua unai bamona abidadama idia habadaia totona, “Buka Helaga idia danu [idia] herevalaia” bona idia “hadibaia namonamo.” (Kara 17:​1-3) Unai bamona lalona veria karana ese kudou-maoro taudia ia hagoadaia kara namo idia hahedinaraia. Hegeregere, Makedonia ena siti Berea dekenai taunimanima haida ese “[Dirava ena] hereva idia kamonai, bona idia ura henia danu. Dina ibounai Buka Helaga idia tahua, inai hereva [Paulo bona ena bamodia idia gwauraia] be idia  momokani o lasi.” (Kara 17:11) Unai siri amo gau rua ita lalo-pararalaia be gau badana. Gau ginigunana be, Berea taudia idia ura Dirava ena Hereva idia kamonai; iharuana be, idia kamonaia gaudia idia abia dae sibona lasi, to idia ese Baibel lalonai idia hamomokania. Unai Keristani misinari tauna Luka be mai manau ida Berea taudia ia hanamoa, ia gwauraidia “namo.” Lauma gaudia dekenai oiemu lalona ia namo, a?

Lalona Bona Kudouna Idia Gaukara Hebou

Guna ita gwauraia bamona, tomadiho momokani lalonai, lalona bona kudouna idia gaukara hebou be namo. (Mareko 12:30) Hereva ginigunana lalonai ita herevalaia ruma penia tauna ena haheitalai mani oi laloa, ruma ia penia neganai kala kereredia ia gaukaralaia. Bema ena biaguna ena hereva ia kamonai namonamo neganai, reana mai ena kudouna ibounai ida iena gaukara ia karaia bona ia diba momokani ena biaguna ena lalo-namo do ia abia. Iseda tomadiho danu be unai bamona.

Iesu ia gwau: “Tomadiho taudia momokani ese mai Lauma bona mai momokani danu Tamana do idia tomadiho henia.” (Ioane 4:23) Unai dainai, aposetolo Paulo ia gwau: “Unai dainai . . . guriguri umui dainai ai ruaosi ese ai hadokoa lasi. Dirava ai noia, ia ese iena ura dalana umui dekenai do ia hadibaia, bona Lauma Helaga ena diba bona diari umui dekenai do ia henia. Vadaeni Lohiabada ena ura hegeregerena do umui noho, bona nega ibounai umui ese ia do umui hamoalea. Emui mauri ese kara namodia edia anina do idia havaraia.” (Kolose 1:​9, 10) Unai bamona diba maorona ese kudou-maoro taudia dekenai dala ia kehoa mai abidadama ida edia kudouna bona goada ibounai idia atoa edia tomadiho dekenai, badina “dahaka [idia] tomadiho henia be [idia] diba.”​​—⁠Ioane 4:⁠22.

Unai badina idauidau dainai, Iehova ena Witnes taudia ese beibi matamatadia eiava kamonai matamata taudia, Baibel idia do stadilaia namonamo lasi taudia idia bapatisoa lasi. Iesu be ena murinai idia raka taudia ia hamaorodia: “Bese ibounai be diba tahua taudia do umui halaoa . . . idia dekenai do umui hadibaia, umui dekenai lau henia hereva ibounai be do idia badinaia.” (Mataio 28:​19, 20) Dirava ena ura dekenai diba maorona idia abia kudou-maoro Baibel stiuden taudia sibona ese tomadiho karana dekenai lalona idia hadaia. Oi gaukara goada diba maorona oi abia totona, a?

Lohiabada Ena Guriguri Lalo-pararalaia

Baibel lalonai diba maorona bona Baibel dekenai diba sisina abia karana edia idau hahedinaraia totona, Mataio 6:​9-13 lalonai Lohiabada ena Guriguri mani ita laloa.

Taunimanima milioni momo ese Iesu ia gwauraia gurigurina be hanaihanai dubu lalonai idia gwauraia. To hida be guriguri ena kahana ginigunana, Dirava ena ladana bona ena Basileia ena anina idia hadibaia? Unai hereva be mai edia anina bada dainai, Iesu ese guriguri lalonai ia atodia guna.

Ia matamaia, ia gwau: “Aiemai Tamana e, guba dekenai oi noho, oiemu ladana do ai hahelagaia.” Iesu ia gwau Dirava ena ladana do idia hahelagaia. Taunimanima momo dekenai, henanadai rua ia havaraia. Ginigunana be, Dirava ena ladana be daika? Bona iharuana be, dahaka dainai idia hahelagaia?

Henanadai ginigunana ena haere be gado ginigunadia amo idia torea Baibel lalonai, gabu 7,000 mai kahana lalonai oi davaria. Ta be Salamo 83:18 dekenai, ia gwau: “Lau ura inai bamona do oi karaia, vadaeni idia be do idia diba oiemu ladana be Iehova. Bona oi sibona, Ataiai Momokani Diravana, ese tanobada oi biagua noho.” Esodo 3:15 be inai ladana, Iehova, ia herevalaia neganai, ia gwau: “Lauegu ladana be inai, ia lao hanaihanai, gabeai ia mai nega ibounai lalonai inai bamona lauegu ladana dohore umui gwauraia.” * To dahaka dainai Dirava ena ladana, goeva bona helaga edia badina, idia hahelagaia be namo? Badina matamana ai, taunimanima edia histori lalonai, haida ese idia hadikaia bona idia samania koikoi.

 Eden lalonai, Dirava ese Adamu bona Heva ia hamaorodia bema ia taravatua auna idia ania neganai do idia mase. (Genese 2:17) Satani ese hemataurai lasi dalanai Dirava ia gwauraia koikoi, Heva ia hamaoroa: “Inai be momokani lasi, dohore umui mase lasi.” Unai dainai, Satani ese Dirava be koikoi tauna ia gwauraia. To, unuseniai ia doko lasi. Dirava ena ladana ia hadikaia noho, Heva ia hamaoroa Dirava be Heva dekenai diba namona ia gwauraia hedinarai lasi. Ia gwau: “Dirava be inai bamona ia hereva badina ia diba, umui ania [kara namo bona kara dika hadibaia auna] neganai aonega do umui davaria, bona Dirava hegeregere do umui noho, kara namona bona kara dikana do umui diba.” Ladana hadikaia karana unai!​​—⁠Genese 3:​4, 5.

Taravatu auna ena huahua idia ania neganai, Adamu bona Heva be Satani ena kahanai idia gini. Unai nega amo, taunimanima momo be idia diba eiava lasi, to idia be Dirava ena kara maoromaoro taravatudia idia dadaraia karana amo unai kara dika ginigunana idia habadaia. (1 Ioane 5:19) Taunimanima be hisihisi idia abia neganai Dirava idia samania koikoi noho​—⁠ena be sibona edia kara dika dainai idia hisihisi. Aonega Herevadia 19:3 ia gwau: “Tau ta ena kara kava ese ena mauri ia hadikaia, bena ia ese Lohiabada ia badu henia.” (The New English Bible) Unai dainai Iesu, ena Tamana ia lalokau henia tauna, ese Ena ladana hahelagaia totona ia guriguri ena badina oi lalo-pararalaia, a?

“Oiemu Basileia Do Ia Mai”

Iesu be Dirava ena ladana hahelagaia karana ia gurigurilaia murinai, ia gwau: “Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.” (Mataio 6:10) Unai hereva ita laloa neganai, reana do ita henanadai: ‘Dirava ena Basileia be dahaka? Bona ena mai be edena dala ai tanobada ai Dirava ena ura karaia karana dekenai mai anina bada?’

Baibel lalonai, inai hereva “basileia” ena anina be “king ta ena lohia siahuna.” Unai dainai Dirava ena Basileia be Dirava ena lohia siahuna, eiava gavamani, mai ena king, ia ese ia abia hidi. Unai King be ia toreisi lou tauna Iesu Keriso​​—⁠“King ibounai edia King, bona lohia ibounai edia Lohia.” (Apokalupo 19:16; Daniela 7:​13, 14) Peroveta tauna Daniela ese Dirava ena Mesia Basileiana be Iesu Keriso ena imana dekenai ia noho ia gwauraia neganai, ia gwau: “Unai basileia namba 4 [hari idia lohia taunimanima edia gavamani] ena nega lalonai, guba ena Dirava ese basileia ta do ia haginia, inai basileia be do idia hadikaia diba lasi ela bona hanaihanai. Unai basileia be Dirava ese do ia naria, vadaeni bese ta ese do ia halusia diba lasi. Bona unai basileia ese basileia ibounai do ia hamakohia, bona haorea momokani, bona ia sibona do ia noho ela bona hanaihanai,” ena be dokona lasi.​​—⁠Daniela 2:⁠44.

Oibe, Dirava ena Basileia ese tanobada do ia biagua, kara dika lohiadia do ia kokia “ela bona hanaihanai.” Unai dala ai, Dirava ena Basileia be Iehova ena ladana hahelagaia dalana, bona ia amo Satani bona kara dika taudia ibounai edia hadikaia herevadia do ia haorea.​​—⁠Esekiela 36:⁠23.

Gavamani iboudiai bamona, Dirava ena Basileia be mai ena taunimanima. Unai be daidia? Baibel ese haere ia henia: “To manau taudia ese noho gabuna tano do idia abia, do idia helai namonamo, mai moale bona mai maino danu.” (Salamo 37:11) Unai hegeregerena, Iesu ia gwau: “Dagedage lasi taudia be idia namo, badina tanobada do idia abia.” Oibe, unai taudia be Dirava ena amo diba maorona idia abia, unai be mai anina bada mauri abia totona.​​—⁠Mataio 5:5; Ioane 17:⁠3.

Dirava idia lalokau henia bona ma haida idia lalokau henia lalo-manau taudia be tanobada ibounai idia hahonua negana oi laloa diba, a? (1 Ioane 4:​7, 8) Iesu ese unai ia gurigurilaia, ia gwau: “Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.” Iesu ese ena murinai idia raka taudia ia hadibaia unai bamona do idia guriguri ena badina oi lalo-pararalaia, a? Mai anina bada gauna be, oi dekenai unai guriguri be edena dala ai mai anina bada?

Taunimanima Milioni be Baibel Idia Herevalaia Noho

Iesu ia gwau tanobada ibounai dekenai lauma gaudia hadibaia edukeisen ta amo Dirava ena Basileia  ena mai do idia gwauraia hedinarai. Ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona [inai tanobada eiava nega oromana ena dokona] be do ia ginidae.”​​—⁠Mataio 24:⁠14.

Tanobada hegegemadai lalonai, Iehova ena Witnes taudia milioni 6 mai kahana be edia dekena taudia dekenai sivarai namona idia harorolaia. Oi idia boiria Dirava bona ena Basileia oi diba namonamo totona mai emu lalona ida “Buka Helaga [oi] tahua namonamo.” Unai bamona oi karaia neganai, emu abidadama ia hagoadaia bona tanobada paradaisona ena helaro do oi moalelaia, “badina be tanobada ibounai, be Lohiabada ena diba maoro dekena amo do ia honu momokani, davara be ranu dekenai ia honu bamona.”​​—⁠Isaia 11:​6-9.

[Footnote]

 [Box/Picture on page 8]

HADIBAIA TAUNA BADANA TOHOTOHOA

Nega momo Iesu ia hadibaia neganai, Baibel ena hereva badadia ia gwauraia. Hegeregere, ena toreisi lou murinai, ena mase dainai idia daradara diba tahua taudia rua dekenai Dirava ena ura ia hadibaia. Luka 24:27 ia gwau: “Mose bona peroveta taudia edia buka dekenai, iena sivarai herevadia ibounai edia anina, be Iesu ese idia dekenai ia hadibaia.”

Unai siri dekenai Iesu ese hereva badana ta​​—⁠“iena sivarai,” Mesia sivaraina​​—⁠ia abia hidi bona ena herevahereva lalonai “buka [Baibel]” amo hereva ia gwauraia. Iesu ese iena hereva idia durua Baibel siridia be kahana momo amo idia karaia laulau ta bamona ia haboua, unai amo ena diba tahua taudia ese hereva momokani ena anina idia itaia namonamo. (2 Timoteo 1:13) Unai dainai, idia lalo-parara sibona lasi to edia lalona ia hamarerea bada. Unai sivarai ia gwau: “Idia ruaosi sibona idia herevahereva, idia gwau, ‘Dala dekenai ia hereva ita dekenai, bona Buka Helaga ena anina ita dekenai ia hadibaia neganai, iseda lalona be idia siahu, ani?’ ”​​—⁠Luka 24:⁠32.

Iehova ena Witnes taudia idia gaukara goada edia haroro gaukara lalonai Iesu ena kara idia tohotohoa totona. Idia stadilaia bukadia be Dirava Ia Ura Dahaka Ita Karaia? buklet bona Diba ese Mauri Dekenai Ita Ia Hakaua Lao bukana. Unai bukadia ese Baibel ia herevalaia hereva namodia, hegeregere “Dirava be Daika?,” “Dahaka Dainai Dirava ese Hisihisi Ia Koua Lasi?,” “Tomadiho Momokanina be Edena Bamona Oi Davaria Diba?,” “Inai be Dokona Dinadia!” bona “Dirava Ia Hanamoa Besena Haginia Dalana” idia hahedinaraia. Kahana ta ta lalonai Baibel siri momo idia noho.

Oi ai hagoadaia emu gabu dekenai Iehova ena Witnes taudia oi itaia eiava inai magasin ena rau 2 dekenai ia noho adres oi tore henia, inai hereva eiava ma hereva haida herevalaia totona davana lasi Baibel stadi karaia totona.

[Picture]

Oiemu stiuden ena kudouna oi hamarerea totona, Baibel ena hereva badadia ta ta oi hahedinaraia

[Pictures on page 7]

Iesu ena guriguri ena anina oi lalo-pararalaia, a?

“Aiemai Tamana e, guba dekenai oi noho, oiemu ladana do ai hahelagaia . . . “

“Oiemu [Mesia] Basileia do ia mai . . . ”

“Oiemu ura gauna tanobada dekenai do ai karaia, guba dekenai idia karaia bamona”