Dirava ese Bese Iboudiai Ia Abia Dae

JOHN be Mali dekenai ia lao negana ginigunana ai, ia ese Mamadou bona iena ruma bese taudia edia heabidae karana ia moalelaia. John be tano ai ia helai bona ia manada lasi dalanai disi tamona amo idia ida ia aniani hebou, to edena dala ai unai ruma biaguna dekenai dava bada harihari gauna​—⁠Basileia ena sivarai namona, Dirava ena Hereva, Baibel amo​—⁠do ia gwauraia ia laloa noho. Ena be John be France gado, Mali taudia idia diba gado, ia hereva diba, to edena dala ai unai ruma bese taudia, edia tomadiho bona laloa dalana be idau momokani taudia, ida do ia herevahereva ia daradaralaia.

Ita hoa lasi John ese Baibel lalonai Babela hanuana ena sivarai ia laloa. Unai gabu ai Dirava be gwau-edeede taudia edia gado ia haidaua. (Genese 11:​1-9) Unai dainai, tanobada ena kahana idauidau ai taunimanima edia gado, tomadiho, bona laloa daladia be idauidau. Hari momo be gabu idauidau idia vadivadi henia bona tano idauna dekenai idia lao idia noho totona dainai, tano momo lalonai idia ese John ia davaria hekwakwanai idia davaria: Baibel amo idia abia helarona be edena dala ai noho dalana idauna taudia dekenai do idia gwauraia?

Idaunegai Haheitalai Ta

Israela ena peroveta taudia ma haida bamona, Iona ena gaukara badana be Israela taudia ia hereva henia. Tomadiho momokani idia negea iduhu 10 basileiana be taunimanima vairanai Dirava ia ura lasi karadia idia karaia negana ai, ia be peroveta gaukarana ia karaia. (2 King Taudia 14:​23-25) Iona ese gaukara idauna ta ia abia, iena tano do ia rakatania bona Asuria dekenai do ia lao, Nineva taudia, iena tomadiho bona kastom amo idia idau taudia, do ia haroro henia totona, to ena hemami mani oi laloa. Reana Iona be Nineva taudia edia gado ia hereva diba lasi, o ia hereva namonamo diba lasi. Herevana Iona ese unai gado ia hereva diba eiava lasi, to toana be ia laloa ia hegeregere lasi, bona ia heau boio.​​—⁠Iona 1:​1-3.

Ia hedinarai goevagoeva, namona be Iona ia lalo-parara Iehova Dirava be taunimanima edia toana ia laloa sibona lasi, to edia kudouna ia tahua. (1 Samuela 16:⁠7) Hoa dalanai Iehova ese Iona ena maloa karana amo ia hamauria neganai, nega iharuana Iona ia hagania Nineva taudia do ia haroro henia. Iona ese unai oda ia badinaia dainai, Nineva taudia ibounai idia helalo-kerehai. To, Iona ese lalohadai maorona ia do abia lasi. Unai dainai Iehova ese gau ta ia gaukaralaia, bona ena haheitalai amo Iona ia hadibaia iena lalohadai ia haidaua be namo. Iehova ese Iona ia nanadaia: “Lau be Nineva totona do  lau bogahisihisi be namo. Ia be hanua badana.” Momokani, edia imana idibana bona imana laurina edia idau idia diba lasi “tatau 120,000” idia noho. (Iona 4:⁠5-11; NW ) To hari ita be edena bamona? Edena dala ai noho dalana idauna taudia ita durua diba?

Samaria Taudia Bona Iuda Lasi Taudia Ia Abia Dae

Aposetolo taudia edia negai, Iesu ese ia murinai idia raka taudia ia hagania bese ibounai taudia be hahediba taudia ai do idia halaoa. (Mataio 28:19) Idia dekenai unai be auka. Iesu ena hahediba taudia be Iuda taudia, bona Iona bamona, idia manadalaia karana be edia hanua bona kastom tamona taudia sibona idia hereva henia. Vaia, unai neganai ia vara inai henia kava karana be edia lalona ia ania danu. To, Iehova be idia vara gaudia ia biagua dainai, gabeai ena hesiai taudia ese iena ura idia lalo-pararalaia namonamo.

Gau ginigunana be Iuda taudia bona Samaria taudia huanai ia noho inai henia kava karana idia hanaia be namo. Iuda taudia be Samaria taudia idia tura henia lasi. To nega haida Iesu be dala ia hegaegaelaia, vaira negana ai Samaria taudia ese sivarai namona do idia abia dae totona. Samaria hahinena ia hereva henia neganai, ia hahedinaraia ia be ta ena toana ia laloa lasi. (Ioane 4:​7-26) Ma nega ta, Samaria tauna namona parabolena lalonai, Iesu ese Iuda tomadiho ia goadalaia tauna dekenai ia hahedinaraia, Iuda taudia sibona lasi to Iuda lasi taudia danu be edia dekena taudia idia laloa bada. (Luka 10:​25-​37) Iehova ese Keristani kongregesen lalonai Samaria taudia do ia abia dae negana ia mai kahirakahira neganai, Filipi, Petero, bona Ioane​​—⁠idia ibounai be Iuda taudia​​—⁠ese Samaria taudia idia haroro henia. Idia gwauraia sivaraina ese unai hanua lalonai moale bada ia havaraia.​​—⁠Kara 8:​4-8, 14-​17.

Bema Iuda Keristani taudia ese Samaria taudia, Iuda taudia edia varavara, idia lalokau henia be auka, reana idia ese Iuda lasi taudia, o Idau Bese taudia, Iuda taudia ese idia kirikirilaia bona idia inai henia taudia, idia lalokau henia be auka momokani. To gabeai, Iesu ia mase murinai, Iuda Keristani taudia bona Idau Bese taudia idia hapararaia gauna idia kokia diba. (Efeso 2:​13, 14) Petero ese unai dala matamatana ia abia dae totona, Iehova ese matahanai ta dekenai Petero Ia hamaoroa namona be ‘Dirava ese ia hagoevaia vadaeni gaudia, ia gwauraia lasi miro.’ Bena Iehova ena lauma ese Idau Bese tauna Korenelio dekenai ia hakaua lao. Petero ese Dirava ena lalohadai​​—⁠unai idau bese tauna ia gwauraia lasi miro, badina be Dirava ese ia hagoevaia vadaeni​​—⁠ia lalo-pararalaia neganai, ia be lauma helaga ena siahu henunai ia gwau: “Hari lau diba momokani Dirava ese taunimanima edia toana ia laloa lasi.” (Kara 10:​9-35) Petero ia hoa bada badina Dirava ese Korenelio bona ruma bese taudia latanai lauma helaga ia bubua neganai, Ia hahedinaraia ia abidia dae!

Paulo​​—⁠Iesu ese Ia Abia Hidi Bona Idau Bese Taudia Dekenai Ia Siaia Lao Tauna

Paulo ena haroro gaukara be haheitalai namona, badina ia hahedinaraia Iehova ese iena hesiai taudia ia hegaegaelaia taunimanima idauidau idia lalokau henia bona idia durua totona. Paulo ena kara ia haidaua negana ai, Iesu ia gwau Paulo ia abia hidi bese ibounai dekenai Iena ladana do ia gwauraia hedinarai totona. (Kara 9:15) Vadaeni Paulo be Arabia dekenai ia lao, reana Dirava ena ura, ia do ia gaukaralaia idau bese taudia dekenai sivarai namona ia harorolaia totona, ia ura ia laloa dobu.​—⁠Galatia 1:​15-17.

Ena misinari laolao ginigunana lalonai, Paulo be mai ena lalo-goada ida Iuda lasi taudia ia haroro henia. (Kara 13:​46-48) Iehova ese Paulo ena gaukara ia hanamoa, bona ia hamomokania  unai aposetolo tauna be Iehova ena dala ia badinaia. Petero be Iuda lasi tadikaka ia bamoa lasi matamaia neganai, Paulo be mai gari lasi ida unai lalohadai kererena ia hanamoa, bona unai ia hahedinaraia ia ese Iehova ena lalohadai ia lalo-pararalaia momokani.​—⁠Galatia 2:​11-14.

Dirava ese Paulo ia hakaua, ena hamomokania gaudia ma haida be iena misinari laolao iharuana ai ita itaia, unai neganai lauma helaga ese Paulo ia koua dainai, Roma ena provinsi Bitunia dekenai ia haroro lasi. (Kara 16:⁠7) Unai be nega maorona lasi. To gabeai, Bitunia taudia haida be Keristani taudia ai idia lao. (1 Petero 1:⁠1) Matahanai ta ai, Makedonia tauna ta ese Paulo ia noia, ia gwau: “Makedonia kahana dekenai oi mai, oi durua ai.” Paulo ia laloa namona be iena lao dalana ia haidaua, unai Roma provinsi ai sivarai namona do ia harorolaia diba totona.​—⁠Kara 16:​9, 10.

Paulo ese Atena taudia ia haroro henia neganai, iena hereva namona abia hidi karana idia tohoa. Greek bona Roma taudia edia taravatu lalonai, idau besena ena dirava herevalaia bona tomadiho karadia matamatadia hamatamaia be taravatu. To Paulo ese taunimanima ia lalokau henia dainai, edia tomadiho karadia ia laloa namonamo. Atena ai, ia ese boubou patana ta mai ena revareva, ‘ita diba lasi Dirava ena,’ ia itaia. Iena haroro gaukara lalonai unai gauna ia herevalaia. (Kara 17:​22, 23) Ena hereva ia hamatamaia mai hebogahisi bona hemataurai ida totona unai be dala namona!

Paulo be Iuda lasi taudia dekenai ena aposetolo gaukarana ia havaraia anina namona ia laloa lou neganai ia moale bada! Ia ese Korinto, Filipi, Tesalonika, bona Galatia ena taoni haida dekenai heduru ia henia dainai, Iuda lasi Keristani taudia momo idia noho kongregesen ia haginidia. Ia ese tatau bona hahine mai edia abidadama, hegeregere Damari, Dionusio, Seregio Paulo, bona Tito ia durua. Iehova bona Baibel idia diba lasi taudia ese Keristani dalana momokanina idia abia dae neganai, Paulo ena hahenamo badana be unai ia itaia! Paulo be Iuda lasi taudia ia durua hereva momokani idia diba totona, bona ena gaukara ia herevalaia neganai, ia gwau: “Lauegu ura tamona be inai: Sivarai Namona do lau harorolaia, Keriso ena ladana idia  do kamonai lasi gabudia dekenai. . . . Buka Helaga dekenai ia torea hegeregerena, ia gwau: ‘Iena Sivarai be tau ta ese idia dekenai ia hadibaia lasi taudia, be do idia itaia, bona iena hereva idia do kamonai lasi taudia, be do idia diba.’ ” (Roma 15:​20, 21) Iseda kastom idia badinaia lasi taudia dekenai sivarai namona ita harorolaia diba, a?

Tanobada Ena Bese Idauidau Taudia Iboudiai Durua

Solomona be Iehova ia guriguri henia, bona Ierusalema ena dubu dekenai do idia mai Israela lasi taudia ia herevalaia. Ia noinoi: “Unai neganai iena guriguri do oi kamonai, bona ia noinoi gauna do oi henia. Unai dekena amo tanobada bese ibounai ese oiemu ladana do idia diba.” (1 King Taudia 8:​41-43) Hari, tano momo dekenai Basileia harorolaia taudia tausen momo ese unai bamona hemami idia abia. Idia ese Nineva bamona taudia idia davaria, lauma dalanai idia be edia imana idibana bona edia imana laurina idia diba lasi. Bona Basileia harorolaia taudia idia ura tomadiho momokani taudia, bese idauidau momo amo, haboua karana ena peroveta herevadia idia hagugurua.​—⁠Isaia 2:​2, 3; Mika 4:​1-3.

Kerisendom taudia ese Baibel ena helaro sivaraina idia abia dae hegeregerena, tomadiho idaudia badinaia taudia be unai bamona idia karaia danu. Unai ena anina oi dekenai be dahaka? Namona be mai momokani ida oiemu noho dalana oi tahua. Bema oi laloa inai henia kava karana ese oi ia biagua auka, lalokau amo oi haorea. * Dirava ia ura ia abia dae taudia ita dadaraia lasi be namo.​—⁠Ioane 3:⁠16.

Hanua idauna taudia oi do hereva henia lasi neganai, emu lalona oi hegaegaelaia. Idia abia dae tomadiho herevadia, idia lalo-hekwarahilaia gaudia, bona edia laloa dalana oi dibaia; bena idia ida do oi lalo-tamonalaia gaudia oi tahua. Kara namo bona hebogahisi be ma haida dekenai oi hahedinaraia. Idia danu oi hepapahuahu lasi, bona emu kara ia auka lasi bona lalohadai namona oi hahedinaraia be namo. (Luka 9:​52-56) Bema unai bamona oi karaia, Iehova do oi hamoalea, badina “ia ura taunimanima ibounai ese mauri do idia davaria, bona hereva momokani do idia diba.”​—⁠1 Timoteo 2:⁠4.

Ita moale badina iseda kongregesen lalodiai noho dalana idauidau taudia idia noho! (Isaia 56:​6, 7) Hari, inai bamona ladadia, Mary, John, Stephen, bona Tom sibona lasi, to Mamadou, Jegan, Reza, bona Chan ita kamonai danu dainai, ita moale bada! Momokani, ita dekenai gaukara badana ena “iduara badana” ia kehoa vadaeni. (1 Korinto 16:⁠9) Unai dainai, namona be nega ibounai dala ita tahua taunimanima edia toana ia laloa lasi Diravana, Iehova, ena boiria herevana ita henia bona bese ibounai taudia ita abia dae!

[Footnote]

[Pictures on page 23]

Paulo ese ena haroro dalana ia haidaua dainai, sivarai namona be gabu idauidau taudia dekenai ia harorolaia diba

. . . Atena dekenai

. . . Filipi dekenai

. . . ia loaloa neganai