Ia Buruka to Gau Matamata Ia Dibaia Diba

KSENIYA be lagani 1897 ai ia vara. Ia be mai ena natudia kekeni toi, mero tamona, tubudia 15, bona tubudia edia natudia ibounai be 25. Ena mauri dinadia ibounai lalonai, ena tama sina ese idia hadibaia hegeregerena ia kara. Herevana ia be tuari gabuna Abkhaz Republic, ia be Black Sea bona Caucasus huanai, amo ia heau mauri Moscow dekenai, to ena noho unai gabu matamata dekenai ia moalelaia, bona ena sene taudia amo ia abia tomadihona ia abidadama henia momokani.

Lagani 1993 ai, Kseniya ena natuna kekeni Meri be Iehova ena Witnes hahinena ai ia lao. Meri ese Kseniya dekenai Iehova Dirava bona Baibel ia herevalaia matamaia, to ia ura lasi ia kamonai. Kseniya ese ena natuna kekeni ia hamaoroa loulou, “Lau buruka vadaeni, gau matamata lau dibaia diba lasi.”

To, ena natuna kekeni Meri; ena tubuna mero ena adavana, Londa; bona ena tubuna ena natuna kekenidia Nana bona Zaza, idia ibounai be Iehova ena Witnes taudia ai idia lao, bona nega ibounai ia dekenai Baibel idia herevalaia. Lagani 1999 ena adorahi ta ai, idia ese Baibel ena siri ta idia duahia Kseniya dekenai, bona ia ese ena kudouna ia hamarerea. Unai siri lalonai Iesu be Lohiabada ena Anibou ia hamatamaia neganai, ena kamonai aposetolo taudia dekenai lalona veria herevana ia gwauraia. (Luka 22:​19, 20) Ena mauri lagani be 102, to unai adorahi ai, Kseniya ese ena lalona ia hadaia Baibel do ia stadilaia.

Kseniya ia gwau: “Egu mauri lagani be 102 neganai, mauri ena anina lau lalo-pararalaia diba. Hari lau diba gau ta lasi ese iseda lalokau Diravana, Iehova, hesiai henia karana ia hereaia diba. Egu lalona ia namo bona lau goada noho. Mata-galasi lau gaukaralaia lasi lau duahia neganai bona nega momo egu ruma bese taudia lau bamoa.”

November 5, 2000 ai, Kseniya be bapatiso ia abia. Ia gwau: “Hari egu mauri lau henia Iehova dekenai bona mai lalokau ida do lau hesiai henia. Egu ruma kahirakahira ia noho basi gabuna dekenai lau helai neganai, magasin bona pepapepa lau hariharilaidia. Varavara be nega momo idia mai lau idia vadivadi henia totona, bona mai moale ida idia dekenai Iehova ena sivarai momokanina lau kikilaia.”

Kseniya be vaira negana ia naria noho, badina ‘unai neganai ena tauanina be do ia matamata lou, eregabe hahine bamona, bona ena goada dinadia do ia davaria lou.’ (Iobu 33:25) Bema ena mauri laganidia be 100 ia hanaia vadaeni hahinena be ia hegeregere mauri ena anina Baibel amo ia dibaia totona, oi be edena bamona?