Iehova Hesiai Henia Noho mai Emu Abidadama Kudouna Ida
Iehova Hesiai Henia Noho mai Emu Abidadama Kudouna Ida
“Dirava e, egu kudouna lalonai, egu abidadama ia goada momokani. Egu abidadama ia goada momokani oi dekenai.”—SALAMO 57:7.
1. Dahaka dainai Davida ia abia lalohadai goadana ita abia diba danu?
IEHOVA ese ita, iena gwauhamata hesiai taudia, ia durua bena Keristani abidadama dekenai ita gini goada bona Keristani tomadiho momokanina do ita badinaia diba. (Roma 14:4) Unai dainai, salamo torea tauna Davida ia abia lalohadai goadana ita abia diba danu. Ane ia abia, ia gwau: “Dirava e, egu kudouna lalonai, egu abidadama ia goada momokani.” (Salamo 108:1) Bema iseda kudouna lalonai iseda abidadama ia goada, do ita ura Dirava dekenai ita henia gwauhamata ita hamomokania. Bona bema ia dekena amo hahekau bona goada ita tahua, do ita marere lasi, iseda lalona do ita hadaia ia do ita badinaia, bona ‘nega ibounai Lohiabada ena gaukara do ita karaia goadagoada.’—1 Korinto 15:58.
2, 3. Paulo ena sisiba 1 Korinto 16:13 ai, ena anina be dahaka?
2 Aposetolo Paulo ese idaunegai Korinto Keristani taudia dekenai ia henia herevana be mai anina hari inai negai Keristani taudia dekenai danu. Ia gwau: “Umui naria namonamo, abidadama dekenai umui gini goada, metau ibounai lalonai do umui haheauka, do umui goada.” (1 Korinto 16:13) Greek gado ai, unai oda ta ta ia henia dalana ia hahedinaraia ia ura harihari idia karaia, bona idia ia hagoadaia do idia karaia noho. Unai sisiba ena anina be dahaka?
3 Lauma dalanai ita “naria namonamo” karana be Diabolo ita dadaraia bona Dirava kahirakahira dekenai ita noho. (Iamesi 4:7, 8) Iehova dekenai ita tabekau neganai ita lalo-tamona noho diba bona ‘Keristani abidadama dekenai ita gini goada’ diba. Ita ibounai—ita huanai idia noho hahine momo danu—be ‘metau ibounai lalonai idia haheauka’ bona Dirava idia hesiai henia mai gari lasi ida. (Salamo 68:11, NW ) ‘Do ita goada’ dalana be iseda guba Tamana amo hanaihanai goada ita tahua iena ura do ita karaia diba totona.—Filipi 4:13, NW.
4. Keristani bapatiso ita do abia lasi neganai, dahaka ita karaia guna?
4 Iehova dekenai mai eda ura ida gwauhamata ita karaia bona ranu bapatisona ita abia neganai, ita hahedinaraia hereva momokani ita abia dae. To dahaka ita karaia guna bena bapatiso ita abia? Gau ginigunana be Dirava ena Hereva ena diba maoromaoro ita abia. (Ioane 17:3) Unai ese iseda abidadama ia haginia bona ita helalo-kerehai, anina be guna ita karaia kerere gunadia dainai ita lalohisihisi. (Kara 3:19; Heberu 11:6) Unai murinai iseda kara ita haidaua; iseda kara kerere ita rakatania bona iseda mauri lalonai Dirava ena ura ita badinaia. (Roma 12:2; Efeso 4:23, 24) Bena guriguri amo mai iseda kudouna ibounai ida Iehova dekenai iseda mauri ita gwauhamatalaia. (Mataio 16:24; 1 Petero 2:21) Dirava ita noia lalona ena mamina namona do ita abia bona iseda gwauhamata ia dekenai ita hahedinaraia totona bapatiso ita abia. (1 Petero 3:21) Bema unai kara badadia ita laloa noho, iseda gwauhamata do ita hamomokania bona do ita hekwarahi noho mai eda abidadama kudouna ida Iehova ita hesiai henia totona.
Diba Maoromaoro Oi Tahua Noho
5. Dahaka dainai Baibel amo diba ita abia noho be namo?
5 Dirava dekenai ita henia gwauhamata ita hamomokania totona, iseda abidadama ia hagoadaia Baibel dibana ita abia noho be gau badana. Matamanai, Dirava ena hereva momokani ita dibaia neganai, unai lauma aniani abia karana ese ita ia hamoalea bada! (Mataio 24:45-47) Unai “aniani” ena mamina be namo herea—lauma dalanai ita ia hagoadaia. Hari gau badana be unai mai digara lauma aniani ita abia noho, bena mai eda abidadama kudouna ida Iehova do ita hesiai henia noho diba.
6. Edena dala ai ta ese oi ia durua Baibel ena hereva momokani be mai emu kudouna ibounai ida oi laloa bada totona?
6 Baibel amo diba ma haida ita abia totona, do ita hekwarahi. Ia be ta ia hunia dava bada gauna bamona—ia ita davaria totona do ita hekwarahi. To ‘Dirava oi diba’ neganai, unai be ahuna namona! (Aonega Herevadia 2:1-6) Basileia pablisa ta be oi ida Baibel ia stadilaia neganai, reana Diba ese Mauri Dekenai Ita Ia Hakaua Lao bukana ia gaukaralaia. Reana nega bada umui gaukaralaia ena karoa ta ta karaia totona, bona stadi negana tamona lalonai umui haorea lasi. Idia torea hanai lasi siridia umui duahia bona kikilaia neganai, namo oi davaria. Bema hereva ta oi lalo-pararalaia lasi, stadi naria tauna ese ia gwauraia hedinarai namonamo. Emu Baibel stadi ia naria tauna ia hegaegaelaia namonamo guna, ia guriguri Dirava ena lauma do umui abia, bona oi ia durua hereva momokani be mai emu kudouna ibounai ida oi laloa bada totona.
7. Edena bamona tauna ia hegeregere ma haida dekenai Dirava ena hereva momokani hadibaia totona?
7 Unai hekwarahi be maoro, badina Paulo ia gwau: “Dirava ena hadibaia hereva ia tahua tauna ese iena hadibaia tauna dekenai harihari gaudia do ia henia be namo, iena gaukara davana.” (Galatia 6:6) Greek gado ai, unai siri ia hahedinaraia ta ese Dirava ena Hereva ena hahediba herevadia be “tahua tauna” ena lalona bona kudouna ai ia atoa momokani. Ta ese oi ia hadibaia unai bamona dainai, do oi hegeregere ma haida hadibaia totona. (Kara 18:25) Emu gwauhamata oi badinaia totona, Dirava ena Hereva stadilaia hanaihanai karana amo, lauma dalanai emu goada bona abidadama oi dogoatao be gau badana.—1 Timoteo 4:13; Tito 1:13; 2:2.
Oi Helalo-Kerehai Bona Emu Kara Oi Haidaua Negana Laloatao
8. Edena dala ai Dirava ia moalelaia karana ita karaia noho diba?
8 Hereva momokani oi dibaia, oi helalo-kerehai, bona oi mamia Dirava ese Iesu ena mauri davalaia boubouna amo emu kerere ia gwauatao neganai, oi mamia moalena oi laloatao, a? (Salamo 32:1-5; Roma 5:8; 1 Petero 3:18) Momokani, oi ura lasi kara dika mauri dalana dekenai oi giroa lou, ani? (2 Petero 2:20-22) Unai do ia vara lasi totona, durua gauna ta be hanaihanai Iehova dekenai guriguri oi henia, bena Dirava ia moalelaia karana do oi karaia, emu gwauhamata do oi hamomokania, bona mai abidadama ida Iehova do oi hesiai henia noho diba.—2 Petero 3:11, 12.
9. Kara dika ita rakatania murinai, edena dala ita tahua be namo?
9 Kara dika oi rakatania bona emu kara oi haidaua murinai, Dirava ena heduru oi tahua noho, emu abidadama kudouna oi naria totona. Guna oi be dala kererena dekenai oi raka, to mapu namona oi itaia bamona, bona hari dala maorona ai oi raka matamaia. Unai dala oi haboioa lasi. Dirava ena hakaua herevadia oi badinaia noho, bona emu lalona oi hadaia mauri ia lao henia dalana do oi badinaia.—Isaia 30:20, 21; Mataio 7:13, 14.
Emu Gwauhamata Bona Bapatiso Laloaboio Lasi
10. Dirava dekenai iseda mauri ita gwauhamatalaia neganai, edena gaudia ita laloa noho be namo?
10 Namona be inai oi laloatao, guriguri amo Iehova dekenai gwauhamata oi karaia, bona oi laloa emu abidadama hesiai gaukara do oi karaia ela bona hanaihanai. (Iuda 20, 21) Emu mauri oi gwauhamatalaia neganai, ena anina be ia oi atoa helaga gaukara do oi karaia guna totona. (Levitiko 15:31; 22:2) Unai gwauhamata be nega sisina sibona lalonai do oi karaia lasi, bona taunimanima dekenai oi karaia lasi. Guba bona Tanobada edia Lohia Badana dekenai do ia noho hanaihanai gwauhamatana oi henia, bona ena anina be emu mauri ibounai lalonai Dirava do oi badinaia noho. Oibe, “ita mauri noho o do ita mase, ita be Lohiabada ena.” (Roma 14:7, 8) Bema Dirava ena ura ita badinaia bona mai abidadama kudouna ida ia ita hesiai henia, do ita moale.
11. Dahaka dainai emu bapatiso bona ena anina oi laloatao be gau badana?
11 Namona be oi laloatao emu bapatiso be Dirava dekenai mai emu kudouna ibounai ida oi karaia gwauhamatana ia laulaulaia. Ta ese oi ia fosia lasi, oi sibona ese emu lalona oi hadaia bapatiso do oi abia. Hari emu lalona oi hadaia emu mauri ibounai lalonai emu ura do oi biagua, bona Dirava ena ura hegeregerena do oi noho, a? Dirava oi noia lalona ena mamina namona ia henia, bona bapatiso amo emu gwauhamata ia dekenai oi hamomokania. Emu lalona ena mamina namona do oi dogoatao bema emu gwauhamata oi hagugurua, bena Iehova ena hahenamo namodia do oi abia.—Aonega Herevadia 10:22.
Emu Ura be mai Anina Danu
12, 13. Edena dala ai iseda ura be mai anina iseda gwauhamata bona bapatiso dekenai?
12 Tanobada hegegemadai, taunimanima milioni momo be gwauhamata idia karaia bona bapatiso idia abia dainai, hahenamo momo idia abia. Ranu bapatiso amo Dirava dekenai iseda gwauhamata ita hamomokania neganai, iseda mauri gunana ita rakatania, to iseda ura ita rakatania lasi. Ta ese ita ia hadibaia namonamo bona abidadama ita abia, to Dirava dekenai ita guriguri, gwauhamata ita karaia, bona bapatiso ita abia neganai, iseda ura ita gaukaralaia. Gwauhamata ita henia bona bapatiso ita abia totona, namona be Dirava ena ura ita tahua bena mai eda ura ida iseda lalona ita hadaia do ita karaia. (Efeso 5:17) Unai amo Iesu ita tohotohoa, badina kapenta gaukara ia rakatania, bapatiso ia abia, bona iena guba Tamana ena ura ia karaia goadagoada neganai, ia ese ena ura ia gaukaralaia.—Salamo 40:7, 8; Ioane 6:38-40.
13 Iehova Dirava ena ura be iena Natuna be ‘hisihisi dekena amo iseda Hamauria Tauna korikori ai do ia lao.’ Unai dainai Iesu be mai ura ida unai hisihisi ia haheaukalaia mai abidadama ida be gau badana. Ia ese “Dirava ia guriguri henia, mai taitai bona mai matana ranu danu. . . . Bona Dirava ese Iesu ena noinoi ia abia dae.” (Heberu 2:10, 18; 5:7, 8) Bema Dirava gari henia mai hemataurai ida karana ita hahedinaraia, iseda noinoi do ia “abia dae” danu, bona ita diba Iehova ese ita, iena gwauhamata Witnes taudia, do ia durua do ita gini goada totona.—Isaia 43:10.
Abidadama Kudouna Oi Dogoatao Diba
14. Dahaka dainai dina ta ta ai Baibel ita duahia be namo?
14 Dahaka ese oi ia durua abidadama kudouna oi dogoatao bona Dirava dekenai emu gwauhamata oi hamomokania totona? Dina ta ta ai Baibel oi duahia, Dirava ena Hereva ena diba maoromaoro oi abia noho totona. “Hesiai tauna mai ena kamonai, bona mai ena kara maoromaoro” ese ita ia hagoadaia loulou unai ita karaia. Unai bamona sisiba idia henia badina iseda gwauhamata ita hamomokania totona, Dirava ena hereva momokani ena dala dekenai ita raka noho be gau badana. Bema Iehova ena orea be mai ena ura ida hahediba herevadia koikoidia ia abia dae, ia ese Iehova ena Witnes taudia bona idia haroro henia taudia do ia hamaoroa lasi Baibel idia duahia be namo.
15. (a) Dala ta ita abia hidi neganai, dahaka ita laloa guna be namo? (b) Dahaka dainai ita gwau diba Keristani ta ena moni gaukara be ena gaukara ginigunana lasi?
15 Dala ta oi abia hidi neganai, namona be inai oi laloa guna, Iehova dekenai oi henia gwauhamata do ia durua, eiava lasi? Reana emu moni gaukara dekenai unai be mai anina. Oi ia durua hereva momokani harorolaia gaukarana oi goadalaia totona, a? Ena be gaukara biagudia momo idia davaria gwauhamata Keristani taudia be edia gaukara idia karaia namonamo bona edia hereva idia badinaia, to idia itaia danu Iehova ena Witnes taudia be inai tanobada ena kohu idia tahua goadagoada lasi bona dagi namodia abia totona ma haida ida idia kara helulu lasi. Unai ena badina be Witnes taudia be taga, ladana badana, dagi badana, eiava siahu idia tahua lasi. Dirava dekenai gwauhamata idia henia bona idia ura idia hamomokania taudia dekenai, gau badana be Dirava ena ura idia karaia. Moni gaukara ese idia ia durua mauri durua gaudia idia abia totona, to edia mauri lalonai unai gaukara be gau ginigunana lasi. Aposetolo Paulo hegeregerena, edia gaukara badana, o gaukara ginigunana be Keristani haroro gaukara. (Kara 18:3, 4; 2 Tesalonika 3:7, 8; 1 Timoteo 5:8) Basileia gaukara do idia durua gaudia be emu mauri lalonai oi atoa guna, a?—Mataio 6:25-33.
16. Dahaka ita karaia diba bema lalo-hekwarahi dainai Dirava dekenai ita henia gwauhamata ita hamomokania be auka?
16 Taunimanima haida be hereva momokani idia do dibaia lasi neganai, lalo-hekwarahi ese edia mauri ia hadikaia gwauraia. To Basileia helarona idia abia dae neganai, moale, tanikiu karana, bona lalokau edia Dirava dekenai be edia kudouna lalonai idia mamia momokani! Bema unai nega amo idia abia hahenamo idia lalodia lou, idia do ia durua Iehova dekenai idia henia gwauhamata idia hamomokania totona. To, edena bamona bema hari inai negai idia davaria hekwakwanai idia lalo-hekwarahilaia bada bona “Dirava ena hereva” ia koua, ginigini ese uhe bona do ia havaraia huahua idia koua hegeregerena? (Luka 8:7, 11, 14; Mataio 13:22; Mareko 4:18, 19) Bema oi laloa unai ia vara matamaia oi eiava oiemu ruma bese dekenai, namona be Iehova dekenai oi guriguri bona emu lalo-hekwarahi do oi gwauraia bona ia oi noia oi do ia durua emu lalokau bona tanikiu karana do ia habadaia. Ia dekenai emu maduna metau oi henia neganai, oi do ia durua bona hagoadaia, mai emu abidadama kudouna bona moale ida ia oi hesiai henia noho diba totona.—Salamo 55:22; Filipi 4:6, 7; Apokalupo 2:4.
17. Hahetoho dikadia ita davaria neganai, edena dala ai ita haheaukalaia diba?
17 Iehova Dirava dekenai emu mauri oi gwauhamatalaia neganai guriguri oi henia, bona guriguri oi henia noho bona hanaihanai oi karaia be namo. (Salamo 65:2) Hedibagani eiava hahetoho aukana oi davaria neganai, Dirava ena hahekau bona heduru oi tahua bona oi badinaia. Namona be ita diba abidadama be gau badana, badina aposetolo Iamesi ia gwau: “Bema umui ta be aonega lasi [hahetoho ta haheaukalaia totona], namona be Dirava do ia noia, vadaeni Dirava ese aonega ia dekenai do ia henia. Badina be Dirava ese taunimanima ibounai dekenai gau namodia ia henia noho. Bona tau ta bema ia be gau ta lasi, vadaeni Dirava do ia noia neganai, Dirava ese do ia badu henia lasi. To unai tau ia noinoi neganai, namona be ia abidadama sibona, bona daradara lasi. Badina be daradara tauna be davara ena hurehure bamona. Lai ese ia doria lao, doria mai, ia be gini gabuna lasi. Bema daradara tauna ia laloa, gau ta Lohiabada dekena amo do ia abia diba, iena laloa be anina lasi. Badina be laloa rua tauna be iena kara ibounai lalonai, ia ese dala tamona sibona ia badinaia diba lasi.” (Iamesi 1:5-8) Bema ita laloa hahetoho ta do ita haheaukalaia diba lasi, namona be inai ita diba momokani: “Umui dekenai idia pidia dibagani ibounai ese taunimanima ibounai dekenai danu idia pidia noho. To Dirava be ia momokani. Ia ese umui do ia naria, emui goada ia hanaia dibagani ese umui do ia pidia garina. Bona dibagani ia mai neganai, emui dala ta do ia kehoa. Vadaeni inai dala dekena amo unai dibagani dekena amo do umui kwalimu diba.”—1 Korinto 10:13.
18. Dahaka ita karaia diba bema ita hunia kara dika ta dainai, Iehova dekenai ita henia gwauhamata badinaia urana ia hamanokaia?
18 Bema kara dikana ta oi karaia bona oi hunia, to emu lalona ia hahisia bona Dirava dekenai oi henia gwauhamata badinaia karana ia hamanokaia, edena bamona? Bema oi helalo-kerehai, oi ia hamoalea gauna be Iehova ese “ia lalohisihisi momokani, bona ia manau momokani” tauna do ia inai henia lasi. (Salamo 51:17) Mai edia lalokau elda taudia edia heduru oi tahua be namo, badina oi diba idia—Iehova bamona—be emu ura, guba Tamana oi tura henia namonamo lou urana, do idia laloa maragi lasi. (Salamo 103:10-14; Iamesi 5:13-15) Bena emu goada lauma dalanai bona emu abidadama kudouna do idia namo lou dainai, emu raka dalana do oi hamaoromaoroa bona Dirava dekenai oi henia gwauhamata do oi hamomokania diba.—Heberu 12:12, 13.
Mai Abidadama Kudouna ida Hesiai Gaukara Karaia Noho
19, 20. Dahaka dainai iseda gwauhamata ita hamomokania noho be gau badana?
19 Inai nega dikana lalonai, namona be ita gaukara goada iseda gwauhamata ita hamomokania bona mai eda abidadama kudouna ida Dirava ita hesiai henia noho. Iesu ia gwau: “Iena lalona do ia goada noho ela bona dokona, unai tauna be do ia mauri.” (Mataio 24:13) “Dina gabedia ai” ita noho dainai, dokona be ita diba lasi negana ai ia mai diba. (2 Timoteo 3:1, NW ) Danu, ita ta ita diba lasi bema kerukeru do ita mauri noho. (Iamesi 4:13, 14) Unai dainai gau badana be hari dina iseda gwauhamata ita hamomokania!
20 Aposetolo Petero be ena revareva iharuana ai unai ia hahedinaraia goevagoeva. Ia hahedinaraia Abata lalonai Dirava idia badinaia lasi taudia idia mase, unai dainai tanobada ia laulaulaia taudia, kara dika taudia unai, be ‘Iehova ena dina’ lalonai do idia mase danu. Unai dainai Petero ia gwau: “Umui emui kara ibounai do idia helaga be namo, bona Dirava do umui badinaia namonamo”! Ma idia ia hagoadaia: “Lauegu lalokau taudia e, inai gaudia umui diba vadaeni. Unai dainai do umui naria namonamo, koikoi taudia [Dirava idia badinaia lasi taudia] ese umui do idia hakaua kerere garina. Oibe, umui emui gini goada gabuna dekena amo do umui moru garina, do umui naria namonamo.” (2 Petero 3:5-17) Bema tau ta ese bapatiso ia abia vadaeni tauna ia hakaua kerere, bena unai tau dainai ena abidadama kudouna ia dogoatao lasi bona ia mase, unai be dika bada!
21, 22. Salamo 57:7 ena hereva be edena dala ai Davida bona Keristani taudia korikoridia dekenai ia momokani?
21 Emu lalona oi hadaia Dirava dekenai oi henia gwauhamata do oi hamomokania, to hagoadaia gauna be emu bapatiso dinana mai moalena oi laloa noho bona Dirava ena heduru oi tahua, emu hereva bona kara ese iena kudouna do idia hamoalea totona. (Aonega Herevadia 27:11) Iehova ese ena taunimanima do ia durua noho, bona namona be ia ita badinaia noho. (Salamo 94:14) Davida ena inai taudia ese ia idia hadikaia gwauraia neganai, Dirava ese hebogahisi ia hahedinaraia bona edia palani ia hadikaia, bona Davida ia hamauria. Davida ese ena tanikiu karana ia hahedinaraia, mai goada ida ena Hamauria Tauna dekenai ia noho lalokau goadana ia anelaia. Mai hemami goadana ida inai ane ia abia, ia gwau: “Dirava e, egu kudouna lalonai, egu abidadama ia goada momokani. Egu abidadama ia goada momokani oi dekenai. Oi hanamoa totona ane do lau abia, ane namona do lau abia.”—Salamo 57:7.
22 Davida bamona, Keristani taudia momokanidia ese Dirava abidadama henia karana idia rakatania lasi. Mai edia abidadama kudouna ida idia gwau Iehova dainai hahemauri idia abia, bona mai moale ida ane amo idia hanamoa. Bema abidadama kudouna oi abia, gau badana be Dirava dekenai oi tabekau, bona iena heduru amo emu gwauhamata ia dekenai do oi hamomokania diba. Momokani, oi be salamo torea tauna ia anelaia “tau namona” bamona oi lao diba, ia gwau: “Dika bada ia vara ena sivarai ia kamonai neganai, unai tau be do ia gari lasi, badina ia ese Lohiabada dekenai ia abidadama henia goada noho.” (Salamo 112:6, 7) Iehova oi abidadama henia bona ia oi tabekau henia neganai, emu gwauhamata Dirava dekenai do oi hamomokania diba bona mai abidadama kudouna ida ia do oi hesiai henia noho.
Oi Laloatao, A?
• Dahaka dainai Baibel ena diba maoromaoro ita abia noho be namo?
• Dahaka dainai iseda helalo-kerehai bona kara haidaua negana ita laloa noho be namo?
• Bema iseda gwauhamata bona bapatiso negana ita laloa lou, edena dala ai ita ia durua?
• Dahaka ese ita do ia durua mai abidadama kudouna ida Iehova ita hesiai henia noho totona?
[Study Questions]
[Pictures on page 18]
Dina ta ta ai Dirava ena Hereva duahia karana amo, lauma dalanai emu goada oi dogoatao, a?
[Picture on page 18]
Keristani haroro gaukara ita atoa guna neganai, mai abidadama kudouna ida Iehova ita hesiai henia noho diba