Basileia Haroro Ripoti

“Lau Ura Dirava Lau Hesiai Henia”

“LAUEGU orea taudia e, ia dekena amo do umui raka siri.” Aposetolo taudia edia negai, aposetolo Ioane ese unai aneru ena boiboi herevana ia kamonai. Hari iseda nega lalonai, kudou-maoro taudia milioni momo ese unai boiboi idia kamonaia bona “Babulonia badana,” eiava tanobada ena tomadiho koikoi basileiana, amo idia raka siri. (Apokalupo 18:​1-4) Idia ta be Wilner, Haiti amo tauna, bona ia ese ena sivarai ia gwauraia.

“Lau be lagani 1956 ai lau vara Katolik dubu idia laloa bada ruma bese lalonai, taoni maragina St. Marc, Haiti dekenai, ai noho. Mani egu ruma bese ena moale oi laloa, badina lau bona egu taoni dekenai idia noho mero ma rua idia abia hidi tomadiho sikulina, St. Michel de l’Atalaye, Haiti dekenai, ai lao totona. Bena lagani 1980 lalonai, ai idia siaia lao Stavelot, Belgium dekenai, hadibaia herevadia ma haida ai abia totona. Unuseniai Katolik dubu ena sikuli badana dekenai ai lao danu.

“Matamanai lau moale bada unai pris dagi ena kosi do lau karaia. Dina ta, dina tubu aniani abia daiutuna dekenai, aiemai grup ia naria pris tauna ese lau ia nanadaia miniti haida lalonai do lau noho bona do ai herevahereva sisina. Lau hoa maragi lasi badina lau ia hadibaia ia ura lau ida ia mahuta hebou! Iena lalohadai lau dadaraia bona lau lalohisihisilaia bada. Egu ruma bese lau tore henia bona ia vara hekwakwanai lau herevalaia, bena hua haida murinai tomadiho sikulina lau rakatania, herevana egu ruma bese taudia idia moale lasi. Hanua dekenai noho gabuna lau davaria bona sikuli ma ta dekenai gaukara idauna ta lau dibaia.

“St. Marc dekenai lau giroa neganai, egu abidadama Katolik dubu dekenai ia ore. To, lau ura Dirava lau hesiai henia, to lau diba lasi dahaka lau karaia be namo. Adventist dubu, bena Ebenezer dubu, bona Mormon dubu dekenai lau lao. Lauma dalanai hakaua herevadia namodia lau davaria diba lasi.

“Bena lau laloatao Belgium dekenai tomadiho sikuli lau lao henia neganai, Crampon Baibel lau duahia. Ia lalonai lau davaria Dirava be mai ena ladana. Unai dainai, lau guriguri bona Dirava ena ladana lau gaukaralaia, lau noia lau do ia durua tomadiho momokani do lau davaria totona.

“Daudau lasi murinai, Iehova ena Witnes hahine rua be egu noho gabu dekenai ruma ta idia abia. Idia be regerege bada lasi, taunimanima idia matauraia, bona ma haida idia laloa bada taudia. Lau itaia edia mauri dalana be namo. Dina ta, Witnes hahine ta ese lagani ta ta ai idia karaia Memorial, Keriso ena mase laloatao hebouna, dekenai lau ia boiria. Unai hebou lau moalelaia bada bona Witnes taudia amo Baibel stadi lau abia dae. Hua six murinai, lau diba momokani Dirava hesiai henia dalana korikorina lau davaria vadaeni. Iehova dekenai egu mauri lau gwauhamatalaia, bona November 20, 1988 ai, bapatiso lau abia.”

Gabeai, Wilner ese ful-taim hesiai gaukara ia hamatamaia. Hari, ia be kongregesen ena elda ta. Ia bona ena adavana, mai edia natudia rua, be mai moale ida kongregesen lalonai hesiai gaukara idia karaia.

[Picture on page 9]

Wilner be Baibel duahia karana amo ia davaria Dirava ena ladana be Iehova