Noga Noho, Raka Lao Noho mai Goada Ida!

Mai Anina Bada Heboudia Edia Ripoti

DAIKA ia gwau diba ita be “metau dikadia momo” idia vara ena nega lalonai ita noho lasi? Ita Iehova ena Witnes taudia be “nega ena dokona” ena metau idauidau ita mamia danu. (2 Timoteo 3:​1-5) To ita diba taunimanima be heduru idia abia be namo. Idia be tanobada dekenai idia vara gaudia edia anina idia diba lasi. Idia be lalo-goada bona helaro idia abia be namo. Iseda dekena taudia ita durudia totona iseda gaukara badana be dahaka?

Ita be Dirava ia henia gaukarana, Dirava ia haginia Basileia ena sivarai namona ita harorolaia. (Mataio 24:14) Namona be taunimanima idia diba unai guba Basileiana sibona be taunimanima durua dalana tamona. To, iseda hereva be nega haida idia abia dae lasi. Gabu haida dekenai iseda gaukara idia koua bona iseda tadikaka idia hahisidia. To, ita hesiku lasi. Iehova ita abidadama henia momokani dainai, ita noga noho bona mai goada ida sivarai namona ita harorolaia noho.​​—⁠Kara 5:⁠42.

October 2001 lalonai, mai anina bada hebouna dekenai unai ura goadana ia hedinarai. Saturday, October 6 ai, Assembly Hall of Jehovah’s Witnesses, Jersey City, New Jersey, United States dekenai, Watch Tower Bible and Tract Society of Pennsylvania ena lagani hebouna idia abia. * Unai dina murinai, gabu 4 dekenai hebou ma haida idia abia, United States dekenai be toi bona Canada dekenai be tamona idia abia. *

Lagani ena hebou matamana ai, Iehova ena Witnes taudia edia Hakaua Oreana tauna ta, bona seamani, Samuel F. Herd ese Salamo 92:​1, 4 ia herevalaia bona ia gwau: “Ita ura tanikiu kara ita hahedinaraia.” Momokani, tanobada hegegemadai amo ripoti 5 ese iseda tanikiu kara ena badina idia hahedinaraia.

Gabu Idauidau amo Idia Mai Ripoti

Tadikaka Alfred Kwakye be Ghana, guna Gold Coast idia gwauraia gabuna, ena haroro gaukara ia sivarailaia. Lagani haida lalodiai unai gabu dekenai iseda gaukara idia taravatua. Taunimanima idia henanadai: “Dahaka dainai idia taravatua? Dahaka umui karaia?” Tadikaka Kwakye ia gwau, unai ese dala ia kehoa ai haroro totona. Lagani  1991 ai, taravatu idia kokia neganai, Ghana dekenai Iehova ena Witnes taudia be 34,421. August 2001 ai, namba ibounai be 68,152​​—⁠98 pesen amo ia bada. Palani idia karaia noho taunimanima 10,000 idia helai diba Assembly Hall karaia totona. Ia hahedinaraia goevagoeva, iseda tadikaka Ghana dekenai be edia tomadiho karana ena ura kwalimu idia gaukaralaia namonamo.

Ena be politikol heiriheiri ia vara, to iseda tadikaka Ireland dekenai be haroro gaukara idia karaia goadagoada, bona edia gini siri karana dainai idia matauraidia. Brens Komiti kodineita Peter Andrews, ia gwau Ireland ena sekit 6 lalonai kongregesen 115 idia noho. Tadikaka Andrews be lagani 10 merona, Liam, ena ekspiriens ia gwauraia, ia be mai gari lasi ida sikuli dekenai ia haroro. Liam be Lau Egu Bible Sivarai Buka, Iehova ena Witnes taudia idia halasia bukana, be ena klas turadia 25 bona ena tisa dekenai ia hariharilaia. Liam ia ura bapatiso ia abia, to ta ia henanadai bema ia be do matamata. Liam ia haere: “Egu mauri lagani be herevana to egu lalokau Iehova dekenai be mai anina bada. Lauegu bapatiso ese do ia hahedinaraia, ia lau lalokau henia.” Liam ena tahua gauna be misinari tauna ai do ia lao.

Lagani 1968 ai, Venezuela dekenai sivarai namona harorolaia pablisa taudia be 5,400. To, Brens Komiti kodineita Stefan Johansson, ia gwau, hari be 88,000 ia hanaia. Bona do ia bada daekau badina lagani 2001 ena Memorial dekenai 296,000 idia mai. Lagani 1999 ai, December ena hua lalonai, medu bada herea dainai tano be kopukopu ai ia lao bena ia moru diho bena taunimanima 50,000 ia hamasedia, idia haida be Witnes taudia. Kingdom Hall ta be kopukopu amo ia honu ela bona guhi ena daudau be mita 0.5 sibona. Ta ia gwau unai ruma idia rakatania neganai, tadikaka idia gwau: “Lasi! Unai be emai Kingdom Hall bona ai ura lasi ai rakatania.” Gaukara idia hamatamaia bona kopukopu, nadi, bona momoru bada herea idia kokia. Unai ruma idia hanamoa lou bona tadikaka idia gwau ena toana ese guna dika badana ia do vara lasi negana ena toana ia hereaia!

Tadikaka Denton Hopkinson, Brens Komiti kodineita, ia gwau, Filipino dekenai gado bona hereva daladia ibounai be 87. Hesiai laganina gunana lalonai, unai tano ai gado badadia toi​​—⁠Cebuano, Iloko, bona Tagalog​​—⁠dekenai New World Translation of the Holy Scriptures idia halasia. Tadikaka Hopkinson ese mauri lagani 9 merona ta ena ekspiriens ia gwauraia, ia be Good News​​—⁠To Make You Happy, Iehova ena Witnes taudia idia halasia bukana ia duahia. Brens amo buka ma haida ia abia, ia duahidia danu, to ena ruma bese be ia idia dagedage henia. Lagani haida murinai  medikol sikuli lalonai ia noho neganai, brens opesi taudia ia hereva henidia bona Baibel stadi totona ia noinoi. Lagani 1996 ai bapatiso ia abia bona ful-taim hesiai gaukara dekenai ia vareai. Hari ena adavana ida brens opesi dekenai idia gaukara.

Brens Komiti kodineita, Ronald Parkin, ia gwau, ‘Puerto Rico be “Witnes taudia siaia” gabuna.’ Unai motumotu dekenai idia noho pablisa taudia be 25,000 bamona bona lagani momo lalodiai unai namba ia idau lasi. Dahaka dainai? Badina be Puerto Rico dekenai, lagani ta ta ai United States dekenai pablisa 1,000 bamona idia “siaidia,” bona idia momo be moni gaukara dainai idia lao. Tadikaka Parkin be lukimia gorerena ia abia Witnes merona Luis, ena mauri lagani be 17, ena kota herevana ia gwauraia. Luis be rara ia dadaraia dainai kota dekenai ia idia abia lao. Diadi ia ura ia sibona ese ia hereva henia dainai hospital dekenai ia vadivadi henia. Luis ese ia nanadaia: “Dahaka dainai bema lau be kara dika badana lau karaia neganai, tau badana bamona lau do oi hahemaoro henia, to bema Dirava ena taravatu lau ura badinaia neganai, mero maragi bamona lau oi kara henia?” Unai diadi ia diba ia be tau badana bamona ia laloa merona bona sibona ena dala ia abia hidi diba.

Gabu idauidau amo idia mai ripoti murinai, U.S. ena Brens Komiti kodineita, Harold Corkern ese lagani momo lalonai Iehova ena hesiai gaukara idia karaia taudia hani ia henanadai henidia. Arthur Bonno be lagani 51 lalonai ful-taim hesiai gaukara ia karaia bona hari ia be Ecuador dekenai Brens Komiti ena gaukara ia karaia. Angelo Catanzaro be lagani 59 lalonai ful-taim hesiai gaukara ia karaia, unai lagani momo lalodiai sekit gaukarana ia karaia. Richard Abrahamson, be lagani 1953 ai Gilead Sikuli ia haorea bona Brooklyn Betele dekenai ia do lao lasi neganai, lagani 26 lalonai Denmark dekenai naria gaukara ia karaia. Gabeai, ibounai be mai moale bada ida mauri lagani 96 tauna, Carey W. Barber, ena sivarai idia kamonai. Tadikaka Barber be lagani 1921 ai bapatiso ia abia, bena lagani 78 lalonai ful-taim hesiai gaukara ia karaia bona lagani 1978 amo ema bona hari ia be Hakaua Oreana tauna ta.

Hereva Namodia

Lagani ena hebou lalonai, lalona veria herevadia idia henia danu. Tadikaka Robert W. Wallen be hereva ta, “Iena Ladana Ia Abia Besena” ia herevalaia. Ita be Dirava ena ladana ita abia taudia, bona tano 230 lalonai ita idia davaria diba. Iehova be ita dekenai vaira negana namona bona helaro ia henia. (Ieremia 29:11) Dirava ena Basileia ita harorolaia noho be namo, lalona hagoadaia bona lalo-maino idia havaraia hereva namodia ita herevalaia. (Isaia 61:⁠1) Tadikaka Wallen ena hereva dokonai ia gwau: “Namona be dina ta ta iboudiai, ita idia boiria ladana, Iehova ena Witnes taudia, hegeregerena ita noho.”​​—⁠Isaia 43:⁠10.

Program ena hereva dokona ena kahana toi be Hakaua Oreana taudia toi ese idia henia. Ena sinado be “Hari Nega be Noga Noho, Gini Goada, Bona Goada Noho Negana.”​​—⁠1 Korinto 16:⁠13.

Ginigunana be Tadikaka Stephen Lett ese “Inai Hanuaboi Horana ai Oi Noga Noho” herevana ia henia. Tadikaka Lett ia gwau, mahuta be harihari gauna ta. Ita ia hagoadaia. To, lauma dalanai ita mahuta be namo do ia havaraia diba lasi. (1 Tesalonika 5:⁠6) Edena dala ai lauma dalanai ita noga noho diba? Tadikaka Lett be lauma dalanai “muramura maragidia” toi ia herevalaia: (1) Lohiabada ena gaukara do umui karaia goadagoada. (1 Korinto 15:58) (2) Lauma gaudia laloa bada. (Mataio 5:⁠3) (3) Baibel amo idia henia sisiba herevadia kamonai henia bona badinaia.​​—⁠Aonega Herevadia 13:⁠20.

Tadikaka Theodore Jaracz be hereva namona ta ia henia, ena sinado be “Hahetoho Lalonai Gini Goada.” Tadikaka Jaracz be Apokalupo 3:10 ia herevalaia neganai, ia henanadai: “ ‘Tohoa negana’ be dahaka?” Unai hahetoho be “Lohiabada ena dina” dekenai do ia mai, hari ita noholaia negana. (Apokalupo 1:10) Unai hahetoho be inai henanadai badana dainai ia vara​​—⁠ita be Dirava ena Basileia ena kahanai ita gini eiava Satani ena tanobada dikana ena kahanai? Unai hahetoho negana ia do ore lasi lalonai, hahetoho bona hekwakwanai do ita davaridia. Iehova bona ena orea do ita badinaia, eiava? Tadikaka Jaracz ia hereva bamona, ‘Ita ta ta be Dirava  badinaia karana ita hahedinaraia be namo.’

Dokonai, Tadikaka John E. Barr be “Lauma Gaudia Ia Laloa Bada Tauna Bamona Ita Goada” ia herevalaia. Luka 13:​23-25, ia herevalaia neganai, ia hahedinaraia ita sibona ita raka goada “iduara maragimaragi dekena amo do [ita] raka vareai” totona. Momo idia kwalimu lasi badina idia goada totona idia hekwarahi lasi. Keristani tau badadia ai ita lao totona iseda mauri lalonai Baibel ena taravatu ibounai ita badinaia. Tadikaka Barr ia gwau: “Lau diba umui abia dae hari be nega namona (1) Iehova ita atoa guna; (2)  ita goada noho; bona (3) Iehova ena ura karaia totona ita hekwarahi. Unai dala amo, mauri hanaihanai ena iduara maragina lalonai do ita vareai diba.”

Lagani ena hebou ia doko gwauraia neganai, henanadai ta idia do haerelaia lasi: Lagani 2002 ena hesiai laganina ena siri badana be dahaka? Unai henanadai ena haere be unai dina murinai idia henia.

Hebou Ena Kahana Ma Ta

Sunday daba ena hebouhebou ena program ia matamaia neganai idia ura bada idia kamonai. Pura ena Gima Kohorona ena stadi amo ia matamaia, unai murinai lagani ena hebou ena hereva badadia haida idia gwauraia. Gabeai, idia ibounai be lagani 2002 ena siri badana ena hereva idia kamonai mai moale ida: “Lau dekenai umui mai, . . . lau ese laga-ani do lau henia umui dekenai.” (Mataio 11:28) Unai hereva be gabeai December 15, 2001 Gima Kohorona ena stadi herevadia lalonai idia halasia.

Unai murinai, August 2001 lalonai France bona Italy dekenai “Dirava Ena Hereva Hadibaia Taudia” Hebouhebouna dekenai idia lao taudia haida edia moale idia gwauraia hedinarai. * Dokonai, dina ena program ena hereva badadia rua be Brooklyn Betele amo idia siaia taudia ese idia henia.

Ginigunana ena sinado be “Mai Gari Lasi ida Inai Nega Dikana Lalonai Iehova Abidadama Henia.” Hereva henia tauna ese hereva badadia ia gwauraidia: (1) Nega ibounai Dirava ena taunimanima dekenai, mai gari lasi ida Iehova abidadama henia karana be gau badana. Baibel lalonai dagedage idia davaria negadiai gari lasi bona abidadama idia hahedinaraia taudia edia haheitalai momo ia herevalaia. (Heberu 11:1–12:⁠3) (2) Iehova be ita dekenai badina korikori ia henia ia ita abidadama henia momokani totona. Ena gaukara bona ena Hereva ese idia hahedinaraia ena hesiai taudia ia naridia bona ia lalodiaboio diba lasi. (Heberu 6:10) (3) Hari inai negai gari lasi bona abidadama be mai anina bada. Iesu ia gwau bamona, ita do idia “badu henia.” (Mataio 24:⁠9) Ita gini goada totona namona be Dirava ena Hereva dekenai ita tabekau, ita diba momokani ena lauma be ita danu ia noho, bona ita gari lasi sivarai namona ita harorolaia totona. (4) Idia vara gaudia ese idia hahedinaraia ita be dagedage ita davaria noho. Hereva henia tauna be iseda tadikaka Armenia, France, Georgia, Kazakhstan, Russia, bona Turkmenistan dekenai edia haheauka karana ia herevalaia neganai, ibounai edia kudouna ia hamarerea. Momokani, hari be nega namona ita gari lasi bona Iehova ita abidadama henia totona!

Hereva dokona ia henia tauna ena sinado be “Iehova Ena Orea ida Raka Hebou.” Unai hereva be hereva badadia haida ia hahedinaraia. (1) Iehova ena taunimanima edia gaukara ia heau lao be tanobada ibounai dekenai idia itaia diba. Iseda haroro gaukara bona iseda hebouhebou dainai taunimanima ese ita idia itaia diba. (2) Iehova ese lalo-tamona oreana ia haginia. Lagani 29 C.E. ai, Dirava ese lauma helaga amo Iesu ia horoa, “gau ibounai”⁠​—⁠guba helarona taudia bona tanobada helarona taudia⁠​—⁠be Dirava ena  ruma bese tamona ai do ia halaoa totona. (Efeso 1:​8-10) (3) Hebouhebou be iseda tadikaka oreana ena lalo-tamona ia hahedinaraia kara namona. August gunana ai France bona Italy dekenai idia abia hebouheboudia dekenai unai ia hedinarai goevagoeva. (4) France bona Italy dekenai lalona veria gwaubou herevana ta idia henia. Hereva henia tauna ese unai gwaubou herevana amo hereva haida ia gwauraia. Unai gwaubou herevana ena hereva ibounai be henunai ia hedinarai.

Hereva ginigabena ena dokonai, vadivadi tauna be Hakaua Oreana ese idia hegaegaelaia hadibaia hereva namona ta, kudouna ia hamarerea herevana, ia duahia. Ena kahana ta ia gwau: “Hari be noga bona gima noho negana, tanobada dekenai idia vara gaudia ita lalodia. . . . Ai ura umui dekenai Hakaua Oreana edia lalokau umui dekenai bona Dirava ena taunimanima ibounai dekenai ai gwauraia hedinarai. Mai emui kudouna ibounai ida Dirava ena ura umui karaia noho lalonai Iena hahenamo do umui davaria.” Inai nega aukadia lalonai gabu ibounai dekenai Iehova ena taunimanima be edia lalona idia hadaia idia mahuta lasi bona mai gari lasi ida Iehova ena lalo-tamona oreana ida idia raka hebou.

[Footnotes]

[Box/Pictures on page 29-31]

Gwaubou Herevana

August 2001 ai, “Dirava Ena Hereva Hadibaia Taudia” Hebouheboudia be France bona Italy dekenai idia abia. Unai hebouhebou lalodiai gwaubou hereva badana ta idia henia. Henunai, unai gwaubou herevana ia noho.

“ITA be Iehova ena Witnes taudia dainai, ita ibounai inai ‘Dirava Ena Hereva Hadibaia Taudia’ Hebouhebouna dekenai be hadibaia hereva namodia ese ia durua bada. Unai hadibaia hereva ena badina be ia hedinarai goevagoeva. Unai hadibaia hereva be taunimanima amo lasi. Ia be idaunegai peroveta tauna Isaia ese ia herevalaia Tauna, iseda ‘Hadibaia Tauna Hereadaena,’ amo ia mai. (Isaia 30:20) Iehova ena hadibaia hereva, Isaia 48:17 dekenai, mani umui laloa: ‘Lau inai Lohiabada, emui Dirava. Emui namo habadaia dalana, be umui dekenai lau hadibaia noho. Emui raka dalana namona dekenai umui lau hakaua noho.’ Edena bamona unai ia hagugurua? Dala badana be tanobada ibounai lalonai gado momo herea ai idia hahanaia bona hariharilaia bukana, Baibel amo, bona ita ia hadibaia goevagoeva ia gwau: ‘Buka Helaga ibounai be Dirava ena lauma amo ia vara bona ia be mai ena namo hadibaia totona.’​​—⁠2 Timoteo 3:​16, NW.

“Hari inai negai, taunimanima be unai bamona hadibaia hereva namona idia abia be gau badana. Dahaka dainai unai bamona ita gwau diba? Inai tanobada ena noho dikana ena toana oi laloa neganai, aonega taudia be dahaka idia abia dae? Gauna be inai: Ena be taunimanima milioni momo be tanobada ena edukeisen amo diba idia abia, to kara maorodia idia badinaia lasi bona namo bona dika edia idau idia laloa lasi. (Isaia 5:​20, 21) Momo be Baibel ena hereva idia diba lasi. Ena be kompiuta gaukaralaia daladia amo gau momo idia dibaia, to inai bamona henanadai badadia edia haere be edeseniai ita davaria diba? Mauri ena anina be dahaka? Iseda nega lalonai idia vara gaudia be edena bamona ita lalo-pararalaia diba? Vaira negana totona helaro korikorina ta ia noho, a? Maino bona noho namona be do idia vara momokani, a? Danu, laiberi dekenai taunimanima idia tahua gaudia ibounai ia herevalaia bukadia milioni momo idia noho. To, taunimanima be guna idia karaia kereredia idia karaia loulou noho. Taravatu utua karadia idia bada idia lao. Guna idia laloa idia  ore momokani gorere idia vara lou, to haida hegeregere, AIDS be idia bada idia lao. Ruma bese idia parara ena namba ia bada ia lao. Tanobada hadikaia karadia idia karaia. Taunimanima hagaria karadia bona taunimanima momo idia hamasea diba tuari gaudia ese maino bona noho namona ia hadikaia. Idia hanamoa diba lasi hekwakwanai be idia bada idia lao. Inai nega dikana ai iseda dekena taudia durudia totona iseda gaukara maorona be dahaka? Taunimanima edia hisihisi ena badina ia gwauraia herevana bona hari mauri namona ena dala ia hahedinaraia sibona lasi to vaira negana ena helaro namona ia hahedinaraia herevana ta ia noho, a?

“Baibel ese ita ia hagania gaukarana be ‘Umui lao, bese iboudiai taudia be hahediba taudia ai do umui halaoa, idia dekenai do umui hadibaia, umui dekenai lau henia hereva ibounai be do idia badinaia.’ (Mataio 28:​19, 20) Iesu Keriso be mase amo ia toreisi lou bena guba bona tanobada dekenai siahu ibounai ia abia neganai, unai gaukara ia henia. Unai ese taunimanima idia karaia gaukara ibounai ia hanaia. Dirava ena lalohadai hegeregerena, namona be iseda gaukara, kara maoromaoro totona idia hitolo taudia edia lauma gaudia laloa bada gaukarana, ita atoa guna. Baibel ena badina namona dainai unai gaukara ita karaia namonamo.

“Unai dainai unai gaukara be iseda mauri lalonai ita laloa bada be namo. Dirava ena hahenamo bona heduru amo unai gaukara ita karaia diba, ena be tomadiho bona politikol oreadia be gau idauidau idia gaukaralaia ita idia veria, koua bona idia dagedage henia tanobada hegegemadai lalonai ita karaia gaukarana idia koua totona. Mai eda abidadama ida ita diba momokani inai gaukara ese anina namona do ia havaraia noho ela bona ita karaia haorea. Dahaka dainai ita diba momokani? Badina Lohiabada Iesu Keriso ia gwauhamata Dirava ia henia gaukara dekenai ita danu do ia noho ela bona tanobada ena dokona.

“Lalo-hekwarahi bada taunimanima besena be dokona idia lao henia noho. Dokona ia do ginidae lasi neganai ita karaia noho gaukarana ita haorea guna be namo. Unai dainai, ita Iehova ena Witnes taudia be eda lalona ita hadaia inai ita karaia:

“Ginigunana be: Ita be gwauhamata hesiai taudia dainai, iseda mauri lalonai Basileia tahua karana ita atoa guna bona lauma dalanai ita tubu noho. Unai ita hagugurua totona, iseda guriguri be Salamo 143:10 ena hereva bamona: ‘Oiemu ura ena kara, be lau dekenai mani do oi hadibaia.’ Namona be ita be stiuden namodia, hanaihanai ita gaukara goada Baibel ita duahia, sibona eda stadi bona tahua karana ita karaia. Iseda goada be taunimanima dekenai ia hedinarai totona, ita hekwarahi kongregesen heboudia, sekit hebouhebou, bona distrik, nesenel bona intenesenel hebouheboudia amo idia henia Tiokratik edukeisen totona ita hegaegae bona idia amo namo bada ita abia totona.​​—⁠1 Timoteo 4:15; Heberu 10:​23-25.

“Iharuana be: Dirava ese ita ia hadibaia totona, iena teibolo sibona dekenai do ita aniani bona Baibel lalonai demoni ena hadibaia herevadia koikoidia dekenai ita naria ena sisiba ita badinaia namonamo. (1 Korinto 10:21; 1 Timoteo 4:⁠1) Ita ia hadikaia gaudia, tomadiho edia hereva koikoidia, anina lasi lalohadaidia, hemarai kara bodagadia, matabodaga sivarai bona laulau, moale karadia dikadia, bona hadibaia hereva namodia danu idia hegeregere lasi gaudia ibounai ita dadaraia. (Roma 1:​26, 27; 1 Korinto 3:20; 1 Timoteo 6:3; 2 Timoteo 1:13) ‘Harihari gaudia’ bamona tatau, idia hegeregere hereva namodia idia hadibaia taudia, ita lalodia bada dainai, edia hekwarahi ita matauraia momokani bona mai eda kudouna ibounai ida ita gaukara hebou kara goevadia bona maorodia bona Dirava ena Hereva ai idia noho taravatudia ita badinaia totona.​​—⁠Efeso 4:​7, 8, 11, 12; 1 Tesalonika 5:​12, 13; Tito 1:⁠9.

“Ihatoina be: Ita be Keristani tama sina dainai mai eda lalona ibounai ida hereva amo sibona lasi to iseda haheitalai amo iseda natudia ita hadibadia. Iseda ura badana be edia maragi negana amo ita durudia ‘revareva helagadia ese idia dekenai aonega idia henia noho ela bona hamauria idia davaria.’ (2 Timoteo 3:15) Ita diba Iehova ena matahakani bona hadibaia dalana dekenai ita hadibaia karana amo dala do ia kehoa Dirava ena gwauhamata do idia mamia, anina be ‘mauri namona  do idia abia, bona edia mauri do ia daudau tanobada dekenai.’​​—⁠Efeso 6:​1-4.

“Namba 4 be: Bema lalo-hekwarahi eiava hekwakwanai badadia idia vara neganai, gau ginigunana be ‘Dirava do ita noia,’ badina ita diba ‘Dirava ena maino ese taunimanima edia diba ia hanaia momokani, bona inai maino’ ese ita do ia gimaia. (Filipi 4:​6, 7) Keriso ena huaia auna ita abia dainai laga-ani ita abia diba. Ita diba Dirava be ita ia naria dainai, ita daradara lasi iseda lalo-hekwarahi ia dekenai do ita gwauraia diba.​​—⁠Mataio 11:​28-30; 1 Petero 5:​6, 7.

“Namba 5 be: Iehova ena Hereva hadibaia taudia ai ita lao ena hahenamo dainai eda tanikiu ita hahedinaraia, unai dainai do ita hekwarahi iena ‘hereva momokani ita hadibaia maoromaoro’ totona bona ‘hesiai tauna ena dagi karadia ibounai ita karaia namonamo’ totona. (2 Timoteo 2:15; 4:⁠5) Unai ena anina ita diba momokani dainai, ita ura bada kamonai taudia ita tahua bona ita hadoa uhena hatubua gaukarana do ita karaia. Danu, Baibel stadi momo karaia amo iseda hadibaia dalana do ita hanamoa diba. Unai amo iseda kara be Dirava ena ura hegeregerena, iena ura be ‘taunimanima ibounai ese mauri do idia davaria, bona hereva momokani do idia diba.’​​—⁠1 Timoteo 2:​3, 4.

“Namba 6 be: Idia ore vadaeni laganidia lalonai bona inai lagani lalonai tano momo dekenai Iehova ena Witnes taudia momo be badu bona dagedage karadia idauidau idia davaria. To, Iehova be ita danu ia noho. (Roma 8:31) Ena Hereva momokanina ese ita ia hadibaia iseda Basileia harorolaia gaukarana bona iseda hadibaia gaukara koua, hametaua, eiava haorea totona idia karaia ‘tuari gauna ta’ do ia kwalimu diba lasi. (Isaia 54:17) Nega namona ai eiava nega dikana ai, hereva momokani herevalaia karana ita hadokoa diba lasi. Iseda ura be iseda haroro bona hadibaia gaukarana ita hagugurua haraga. (2 Timoteo 4:​1, 2) Iseda tahua gauna be Dirava ena Basileia ena sivarai namona be tanobada ena taunimanima ibounai dekenai ita harorolaia. Unai dala amo, idia ese mauri hanaihanai kara maoromaoro tanobada matamatana lalonai idia abia diba ena sivarai do idia dibaia noho. Ita be lalo-tamona ai Dirava ena Hereva hadibaia taudia dainai, iseda ura badana be Hadibaia Tauna Badana, Iesu Keriso, ena haheitalai ita tohotohoa bona ena kara namodia ita hahedinaraia. Unai ibounai do ita karaia badina iseda Hadibaia Tauna Hereadaena bona Mauri Henia Tauna, Iehova Dirava, ita matauraia bona hanamoa.

“Umui ibounai inai hebouhebou dekenai unai gwaubou hereva umui abia dae taudia, mani umui gwau OIBE!”

Gwaubou ena henanadai dokonai, France dekenai hebouhebou toi ai idia hebou taudia 160,000 bona Italy ena gabu 9 dekenai idia hebou taudia 289,000 be gado idauidau ai idia boiboi badabada idia gwau “OIBE.”