Dabu Taudia Dekenai Hebogahisi mai Lalokauna Oi Hahedinaraia

‘Umui ta ta dekenai kara namo [“hebogahisi mai lalokauna,” “NW”] do umui henia.’​—SEKARAIA 7:9.

1, 2. (a) Dahaka dainai hebogahisi mai lalokauna ita hahedinaraia be namo? (b) Dahaka henanadai do ita tahudia?

IEHOVA DIRAVA ena Hereva ese “hebogahisi mai lalokauna” lalokau henia totona ita ia hagoadaia. (Mika 6:​8, NW, futnout) Unai bamona ita karaia be namo ena badina ia gwauraia danu. Gau ta be, “mai ena bogahisihisi tauna ese, sibona ena namo ia havaraia noho.” (Aonega Herevadia 11:17) Unai be momokani! Ma haida dekenai hebogahisi mai lalokauna eiava noho hanaihanai lalokauna hahedinaraia karana ese noho daudau hetura karana namona ia havaraia. Unai dainai turadia namodia​—dava bada gaudia unai​—do ita davaria!​​—Aonega Herevadia 18:24.

² Ma danu, Baibel ia gwau: “Kara maoromaoro bona bogahisihisi kara do oi karaia neganai, oiemu mauri dinadia be do idia momo.” (Aonega Herevadia 21:21) Oibe, hebogahisi mai lalokauna ita hahedinaraia neganai, Dirava ese ita do ia lalokau henia bona dala ia kehoa vaira negana ai hahenamo do ita abia, mauri hanaihanai ena hahenamo danu. To edena dala ai hebogahisi mai lalokauna ita hahedinaraia diba? Daika dekenai  ita hahedinaraia be namo? Bona hebogahisi mai lalokauna be taunimanima ese idia hahedinaraia hebogahisi amo ia idau, a?

Hebogahisi Bona Hebogahisi mai Lalokauna

3. Edena dala ai hebogahisi mai lalokauna be hebogahisi amo ia idau?

³ Hebogahisi bona hebogahisi mai lalokauna be dala idauidau amo idia idau. Hegeregere, hebogahisi idia hahedinaraia taudia be nega momo idia hebogahisi henia taudia idia tura henia lasi bona idia diba lasi. To, bema ta dekenai hebogahisi mai lalokauna ita hahedinaraia, unai tauna ita tura henia mai lalokau ida. Baibel lalonai, taunimanima ese edia hetura karana dainai ta ta dekenai hebogahisi mai lalokauna idia hahedinaraia. (Genese 20:13; 2 Samuela 3:8; 16:17) Eiava guna ta dekenai hebogahisi mai lalokauna idia hahedinaraia dainai hari unai kara ia hahedinaraia. (Iosua 2:​1, 12-​14; 1 Samuela 15:6; 2 Samuela 10:​1, 2) Edia idau ita diba totona, namona be Baibel lalonai ma haida dekenai hebogahisi bona hebogahisi mai lalokauna idia hahedinaraia karadia edia haheitalai rua do ita itaia.

4, 5. Edena dala ai iniseniai idia gwauraia Baibel haheitalai rua ese hebogahisi karana bona hebogahisi mai lalokauna ena idau idia hahedinaraia?

⁴ Haheitalai ta be bouti ia mutu neganai idia roho mauri taudia, idia ta be aposetolo Paulo, dekenai idia hahedinaraia hebogahisi. Davara ena hurehure ese idia ia abia lao Melita motumotuna dekenai. (Kara 27:37–​28:1) Ena be Melita taudia be maduna lasi unai loaloa taudia dekenai bona idia be turadia lasi, to Melita taudia ese idia diba lasi taudia idia abia dae bona idia dekenai “bogahisihisi” idia hahedinaraia. (Kara 28:​2, 7) Mai hebogahisi ida edia heabidae karana idia hahedinaraia, to ia vara kava sibona bona idia diba lasi taudia dekenai idia hahedinaraia. Unai dainai, ia be hebogahisi karana sibona.

⁵ To, King Davida ese ena turana, Ionatana, ena natuna Mepiboseta dekenai ia hahedinaraia heabidae karana mani ita laloa. Davida ese Mepiboseta ia hamaoroa: “Lauegu aniani patana dekenai do oi aniani nega ibounai.” Davida ese unai bamona ia karaia ena badina ia gwauraia neganai, ia hamaoroa: “Oiemu tamana Ionatana dainai, kara namona oi dekenai do lau karaia.” (2 Samuela 9:​6, 7, 13) Davida ese ia hahedinaraia heabidae karana be hebogahisi karana sibona lasi to hebogahisi mai lalokauna, badina unai amo ia hahedinaraia ena hetura karana gunana ia badinaia noho. (1 Samuela 18:3; 20:​15, 42) Unai hegeregerena, hari inai negai Dirava ena hesiai taudia ese taunimanima ibounai dekenai hebogahisi idia hahedinaraia. To, Dirava ese edia hetura karana ia lalo-namo henia taudia dekenai hebogahisi mai lalokauna, eiava noho hanaihanai lalokauna, idia hahedinaraia.​​—Mataio 5:​45; Galatia 6:​10.

6. Dirava ena Hereva lalonai, taunimanima ese hebogahisi mai lalokauna idia hahedinaraia daladia haida be dahaka?

⁶ Hebogahisi mai lalokauna ia hedinarai dala ma haida ita diba totona, unai kara idia hahedinaraia Baibel ena sivarai toi do ita tahua. Idia amo do ita diba taunimanima ese idia hahedinaraia hebogahisi mai lalokauna be (1) kara amo, (2) mai ura ida, bona (3) idia dabu taudia dekenai idia hahedinaraia. Ma danu, unai sivarai ese idia hahedinaraia edena bamona ita ese hari hebogahisi mai lalokauna ita hahedinaraia diba.

Tamana ta ese Hebogahisi mai Lalokauna Ia Hahedinaraia

7. Aberahamo ena hesiai tauna be Betuela bona Labana dekenai dahaka ia hamaoroa, bona ia ura dahaka ia diba?

⁷ Stadi hereva ginigunana dekenai Aberahamo ena hesiai tauna ena sivarai ita itaia, hari Genese 24:​28-67 ese ena sivarai dokona ia herevalaia. Rebeka ia hedavari henia murinai, ia be Rebeka ena tamana, Betuela, ena ruma dekenai idia boiria lao. (Siri 28-​32) Unuseniai, unai hesiai tauna ese ia hahedinaraia namonamo ia be Aberahamo ena natuna totona adavana ia tahua. (Siri 33-47) Ia hahedinaraia ia laloa idia vara gaudia be toa ta Iehova amo, “badina ia ese lau ia hakaua namonamo. Vadaeni lauegu biaguna ena tadina dekenai lau mai, iena natuna lau davaria, lauegu biaguna ena natuna do ia adavaia totona.” (Siri 48) Unai hesiai tauna ia ura momokani ia gwauraia sivaraina ese Betuela bona ena natuna Labana edia lalona do ia veria, bona do idia abia dae Iehova ese iena gaukara ia hanamoa noho. Dokonai, unai hesiai tauna ia gwau: “Unai dainai mani oi hereva, lauegu biaguna dekenai do oi bogahisihisi, bona  hanamoa kara ia dekenai do oi karaia. Bema lasi, mani oi hamaoroa lau, vadaeni do lau diba edena bamona do lau karaia.”​​—Siri 49.

8. Rebeka dekenai ia vara gauna dainai Betuela ena kara be edena bamona?

⁸ Iehova ese Aberahamo dekenai hebogahisi mai lalokauna ia hahedinaraia vadaeni. (Genese 24:​12, 14, 27) Betuela danu be unai bamona do ia karaia bona Aberahamo ena hesiai tauna ida Rebeka do ia siaia, a? Taunimanina edia hebogahisi karana bona Dirava ena hebogahisi mai lalokauna be do idia gaukara hebou gau ta idia hagugurua totona, a? Eiava unai hesiai tauna ena laolao daudauna be anina lasi, a? Aberahamo ena hesiai tauna ese Labana bona Betuela edia hereva ia kamonai neganai reana ia moale bada, badina idia gwau: “Inai kara be Lohiabada dekena amo ia mai.” (Siri 50) Idia itaia Iehova ese idia vara gaudia ia durua bona ia abia hidi dalana idia abia dae. Unai murinai, Betuela ese ena hebogahisi mai lalokauna ia hahedinaraia, ia gwau: “Rebeka be inai, oi abia, oi hakaua lao, oiemu biaguna ena natuna do ia adavaia, Lohiabada ena hereva hegeregere.” (Siri 51) Rebeka be mai ena ura ida Aberahamo ena hesiai tauna ia bamoa, bona gabeai ia be Isako ena lalokau adavana ai ia lao.​​—Siri 49, 52-​58, 67.

Natuna ta ese Ia Hahedinaraia Hebogahisi mai Lalokauna

9, 10. (a) Iakobo ese iena natuna Iosepa ia nanadaia ia totona dahaka do ia karaia? (b) Edena dala ai Iosepa ese ena tamana dekenai hebogahisi mai lalokauna ia hahedinaraia?

⁹ Aberahamo ena tubuna Iakobo danu ese hebogahisi mai lalokauna ia mamia. Genese karoa 47 ena hereva hegeregerena, Iakobo be Aigupito dekenai ia noho, bona “iena mase ia kahirakahira.” (Siri 27-​29) Unai ia laloa momo badina Dirava ese Aberahamo dekenai ia gwauhamata tanona murimurinai do ia mase. (Genese 15:18; 35:​10, 12; 49:​29-​32) To, Iakobo ia ura lasi Aigupito dekenai ia do idia guria, unai dainai dala ia karaia ena mase tauanina be Kanana tanona dekenai do idia abia lao. Iena natuna Iosepa, dagi bada ia dogoatao tauna, sibona ia hegeregere unai ia karaia totona, ani?

¹⁰ Baibel ena sivarai ia gwau: Iakobo be “iena natuna Iosepa dekenai ia boiria. Ia gwau, ‘Vadaeni mai momokani danu do oi gwauhamata inai kara namona do oi karaia, lau oi lalokau henia toana: Aigupito dekenai lau do oi guria lasi. To lauegu tubuna bona lauegu tamana idia noho gabuna dekenai do oi guria lau.’ ” (Genese 47:​29, 30) Iosepa ia gwauhamata unai bamona do ia karaia, bona unai murinai Iakobo ia mase. Iosepa bona Iakobo ena natudia ma haida ese iena tauanina “idia huaia lao, nadi matuna lalonai idia guria, Makapela ena tano dekenai. Unai nadi matuna bona tano be Aberahamo ese . . . ia hoia vadaeni.” (Genese 50:​5-8, 12-14) Unai dala ai, Iosepa ese iena tamana dekenai hebogahisi mai lalokauna ia hahedinaraia.

Ravana Hahinena ta ese Hebogahisi mai Lalokauna Ia Hahedinaraia

11, 12. (a) Edena dala ai Ruta ese Naomi dekenai hebogahisi mai lalokauna ia hahedinaraia? (b) Edena dala ai Ruta ese “hari” ia hahedinaraia hebogahisi mai lalokauna be ena “ravana” dekenai ia hahedinaraia gauna ia hereaia?

¹¹ Ruta bukana ese vabu hahinena Naomi ena Moaba ravana hahinena Ruta, ia danu be vabu ta, be Naomi dekenai hebogahisi mai lalokauna ia hahedinaraia dalana ena sivarai ia gwauraia. Naomi ese ena lalona ia hadaia Betelehema, Iuda tanona dekenai, ia giroa neganai, Ruta ese hebogahisi mai lalokauna bona ura goada ia hahedinaraia, ia gwau: “Oi lao gabuna, be lau danu do lau lao, bona do oi noho gabuna dekenai lau danu do lau noho. Oiemu bese be lauegu bese do idia lao, bona oiemu Dirava be lauegu Dirava do ia lao.” (Ruta 1:​16) Gabeai Ruta ese ena hebogahisi mai lalokauna ia hahedinaraia lou, badina ia hahedinaraia Naomi ena varavara Boasi do ia adavaia mai ena ura ida. * (Deuteronomi 25:​5, 6; Ruta 3:​6-9) Boasi ese Ruta ia hamaoroa, ia gwau: “Hari oi karaia karana ena namo ese, oiemu kara namona oiemu ravana dekenai ia hereaia. Badina be uhau taudia momo idia noho, ogogami taudia, bona mai edia kohu taudia. To idia ta oi tahua lasi.”​—Ruta 3:10.

¹² Ruta ese ena taunimanima ia rakatania bona  Naomi ia bamoa neganai, ena hebogahisi mai lalokauna be ena “ravana” dekenai ia hahedinaraia. (Ruta 1:​14; 2:​11) To “hari” ia hahedinaraia hebogahisi mai lalokauna​​—mai ena ura ida Boasi ia adavaia​—ese unai ia hereaia. Ruta be Naomi, natuna havaraia laganidia ia hanaia vadaeni hahinena, totona natuna ta do ia abia diba. Boasi bona Ruta idia headava, bona gabeai Ruta ese natuna ia havaraia neganai, Betelehema ena hahine idia boiboi, idia gwau: “Naomi be mai ena natuna mero.” (Ruta 4:​14, 17) Ruta be “hahine namona” momokani, bona unai dainai Iehova ese dala ia kehoa bona ia be Iesu Keriso ena tubuna hahinena ai ia lao.​​—Ruta 2:​12; 3:​11; 4:​18-​22; Mataio 1:​1, 5, 6.

Kara Amo

13. Edena dala ai Betuela, Iosepa, bona Ruta ese edia hebogahisi mai lalokauna idia hahedinaraia?

¹³ Betuela, Iosepa, bona Ruta ese hebogahisi mai lalokauna idia hahedinaraia dalana oi itaia, a? Unai be edia hereva sibona amo idia hahedinaraia lasi, to kara ta idia karaia danu. Betuela ia gwau, “Rebeka be inai,” bona ia “siaia lao” danu. (Genese 24:​51, 59) Iosepa ia gwau, “Oiemu ura hegeregere dohore lau karaia,” bona gabeai ia bona ena tadikaka be Iakobo ena hereva “hegeregerena idia karaia.” (Genese 47:30; 50:​12, 13) Ruta ia gwau, “Oi lao gabuna, be lau danu do lau lao,” bona ena taunimanima ia rakatania, Naomi ia bamoa, bena “idia ruaosi idia raka lao hebou, ela bona Betelehema dekenai idia ginidae.” (Ruta 1:​16, 19) Iuda tanona dekenai, Ruta be “Naomi ena hereva hegeregerena ia karaia” lou. (Ruta 3:6) Oibe, ma haida idia karaia bamona, Ruta ena hebogahisi mai lalokauna be ena kara amo ia hahedinaraia.

14. (a) Hari inai nega ai, Dirava ena hesiai taudia ese edena bamona edia kara amo hebogahisi mai lalokauna idia hahedinaraia? (b) Emu gabu dekenai idia noho Keristani taudia ese idia hahedinaraia hebogahisi mai lalokauna ena kara ta oi laloa diba, a?

¹⁴ Hari inai nega ai, ita itaia Dirava ena hesiai taudia be edia kara amo hebogahisi mai lalokauna idia hahedinaraia, bona unai ese iseda kudouna ia hamarerea. Hegeregere, idia buruka, idia lalo-metau, bona idia lalohisihisi tadikaka be hemami dalanai idia durua noho taudia mani oi laloa. (Aonega Herevadia 12:25) Eiava Iehova ena Witnes taudia momo mani oi laloa, edia motuka amo buruka taudia be Kingdom Hall dekenai idia abia lao, wiki ta ta ai idia karaia kongregesen heboudia totona. Anna, ena mauri lagani be 82 bona ia be mai ena roki gorerena, ese inai hereva ia gwauraia neganai ma haida edia hemami ia hahedinaraia danu, ia gwau: “Hebou iboudiai dekenai lau idia abia lao be hahenamo ta Iehova amo. Egu kudouna amo ia lau tanikiu henia badina lau dekenai unai bamona lalokau tadikaka bona taihu ia henia.” Emu kongregesen lalonai unai bamona kara oi karaia noho, a? (1 Ioane 3:​17, 18) Bema unai bamona oi karaia noho, namona be oi diba emu hebogahisi mai lalokauna idia laloa bada.

Mai Ura Ida

15. Unai Baibel ena sivarai toi amo ita itaia hegeregerena, hebogahisi mai lalokauna be edena dala ai idia hahedinaraia?

¹⁵ Ita itaia vadaeni Baibel sivaraidia ese idia hahedinaraia danu, hebogahisi mai lalokauna be ta ese ia doria dainai lasi, to sibona edia ura dainai idia karaia. Betuela be mai ena ura ida Aberahamo ena hesiai tauna ida ia gaukara hebou, bona Rebeka danu. (Genese 24:​51, 58) Haida ese Iosepa idia doria lasi hebogahisi mai lalokauna ia  hahedinaraia totona, to sibona ena ura dainai ia karaia. (Genese 50:​4, 5) Naomi ia itaia, “Ruta ia ura momokani, ia danu do ia lao.” (Ruta 1:18) Naomi ese Ruta ia hamaoroa Boasi dekenai do ia lao neganai, hebogahisi mai lalokauna dainai unai Moaba hahinena ia gwau: “Oiemu hereva hegeregerena do lau karaia.”​​—Ruta 3:​1-5.

16, 17. Dahaka dainai Betuela, Iosepa, bona Ruta ese idia hahedinaraia hebogahisi mai lalokauna be mai anina bada, bona dahaka ese idia ia veria unai kara idia hahedinaraia totona?

¹⁶ Betuela, Iosepa, bona Ruta ese idia hahedinaraia hebogahisi mai lalokauna be mai anina bada badina Aberahamo, Iakobo, bona Naomi be unai taudia idia doria diba lasi gau ta idia karaia totona. Momokani, taravatu ta ia gwau lasi Betuela ese ena natuna kekeni ia siaia lao be namo. Ia ese Aberahamo ena hesiai tauna ia hamaoroa diba: ‘Lasi, lau ura lasi egu gaukara goada kekenina be gabu daudauna dekenai lau siaia lao.’ (Genese 24:​18-​20) Unai hegeregerena, Iosepa ese ena tamana ena ura gauna do ia karaia eiava lasi be ia sibona ia abia hidi diba, badina Iakobo be do ia mase bona Iosepa ia doria diba lasi ena hereva hegeregerena do ia karaia totona. Naomi ese ia hahedinaraia Ruta be Moaba dekenai ia noho diba. (Ruta 1:8) Danu, Ruta ia hegeregere buruka tauna Boasi lasi, to “uhau taudia momo” amo ta do ia adavaia.

¹⁷ Betuela, Iosepa, bona Ruta be mai edia ura ida hebogahisi mai lalokauna idia hahedinaraia; edia kudouna ese idia ia veria unai idia karaia totona. Idia mamia kara maoromaoro idia badinaia totona idia be mai edia maduna idia tura henia taudia dekenai unai kara idia hahedinaraia, gabeai King Davida ia mamia ia be mai ena maduna Mepiboseta dekenai unai kara ia hahedinaraia totona.

18. (a) Keristani elda taudia ese ‘mamoe oreana idia naria’ neganai edena kara idia hahedinaraia? (b) Tadikaka durua karana dekenai, elda ta ese edena bamona ena hemami ia gwauraia?

¹⁸ Hari danu, hebogahisi mai lalokauna be Dirava ena taunimanima bona Dirava ena mamoe oreana idia naria taudia edia kara ta. (Salamo 110:3; 1 Tesalonika 5:​12) Unai bamona elda taudia, eiava naria taudia, idia laloa idia abia gaukara dainai idia be mai edia maduna. (Kara 20:28) To, edia mamoe naria gaukarana bona kongregesen totona idia hahedinaraia hebogahisi mai lalokauna ena kara ma haida be ‘ta ese idia ia oda dainai idia karaia lasi, to sibona edia ura dainai’ idia karaia. (1 Petero 5:2) Elda taudia ese mamoe oreana idia naria, badina idia be mai edia maduna bona idia ura unai gaukara idia karaia. Keriso ena mamoe dekenai hebogahisi mai lalokauna idia hahedinaraia badina unai idia karaia be maoro bona idia ura unai idia karaia. (Ioane 21:​15-​17) Keristani elda ta ia gwau: “Tadikaka be edia ruma dekenai lau vadivadi henia eiava telefon amo idia lau ringi henia karana lau moalelaia, badina ta dainai lasi to lau ura lau hahedinaraia idia lau laloa. Tadikaka lau durua gaukarana ese lau ia hamoalea bada!” Gabu iboudiai dekenai idia noho elda taudia mai edia lalokau ese mai edia kudouna ibounai ida unai hereva dekenai do idia lalo-tamona.

Dabu Taudia Dekenai Hebogahisi mai Lalokauna Oi Hahedinaraia

19. Inai stadi herevana lalonai ita herevalaia Baibel ena sivarai ese idia hahedinaraia hegeregerena, hebogahisi mai lalokauna be daidia dekenai ita hahedinaraia be namo?

¹⁹ Ita herevalaia vadaeni Baibel ena sivarai ese idia hahedinaraia, hebogahisi mai lalokauna be sibona idia durua diba lasi dabu taudia dekenai ita hahedinaraia. Aberahamo ena bese ladana be do ia noho totona, Betuela ena heduru ia abia be namo. Iakobo ia ura ena mase tauanina be Kanana dekenai do idia abia lao, Iosepa ena heduru be mai anina bada. Bona Naomi ese natuna ia abia totona, Ruta ena heduru ia abia be namo. Aberahamo, Iakobo, bona Naomi edia ura gaudia idia guguru totona ta ena heduru idia abia be namo.  Unai hegeregerena, hari inai nega lalonai, idia dabu taudia dekenai hebogahisi mai lalokauna ita hahedinaraia be namo. (Aonega Herevadia 19:17) Namona be bese kwarana tauna, Iobu ita tohotohoa, ia ese ‘ogogami taudia idia tai neganai, ia durua. Tamana bona sinana lasi maragidia danu, be durua ta lasi neganai ia durua’ bona ‘iena mase be kahirakahira tauna ia hanamoa.’ Ma danu, Iobu ese “vabu taudia” edia kudouna ia hamoalea bona ia be “matakepulu taudia edia matana, bona aena dika taudia edia aena.”​—Iobu 29:​12-15.

20, 21. Daidia dekenai hebogahisi mai lalokauna ita hahedinaraia be namo, bona ita ta ta ese iseda lalona ita hadaia dahaka ita karaia totona?

²⁰ Momokani, Keristani kongregesen ibounai dekenai, hisihisi idia abia dainai heduru totona idia taitai taudia idia noho. Unai bamona hemami idia abia ena badina haida be sibona idia noho, idia lalo-manoka, idia mamia idia hegeregere lasi, ma haida edia kara dainai idia lalohisihisi, idia gorere bada, eiava edia lalokau tauna ta ia mase. Herevana unai hisihisi ena badina be dahaka, to unai bamona lalokau taudia ibounai edia dabu gaudia be mai eda ura ida ita hahedinaraia noho hebogahisi mai lalokauna ena kara amo ita durua be namo.​​—1 Tesalonika 5:​14.

 ²¹ Unai dainai, namona be Iehova Dirava ita tohotohoa noho, badina iena “bogahisihisi bona lalokau” be bada herea. (Esodo 34:6; Efeso 5:1) Unai ita karaia diba bema idia dabu taudia bona ma haida dekenai mai eda ura ida iseda kara amo hebogahisi mai lalokauna ita hahedinaraia. Bona momokani Iehova do ita hanamoa bona moale bada do ita abia bema ta ta dekenai hebogahisi mai lalokauna ita hahedinaraia.​​—Sekaraia 7:​9, NW.

[Footnote]

Edena Bamona Do Oi Haere?

• Edena dala ai hebogahisi mai lalokauna be hebogahisi karana amo ia idau?

• Betuela, Iosepa, bona Ruta be edena dala ai hebogahisi mai lalokauna idia hahedinaraia?

• Hebogahisi mai lalokauna be edena dala ai ita hahedinaraia be namo?

• Daidia dekenai hebogahisi mai lalokauna ita hahedinaraia be namo?

[Study Questions]

[Picture on page 14]

Betuela ese edena dala ai hebogahisi mai lalokauna ia hahedinaraia?

[Picture on page 17]

Ruta ena noho hanaihanai lalokauna be hahenamo Naomi dekenai

[Pictures on page 19]

Taunimanima ese hebogahisi mai lalokauna be mai ura ida, kara amo, bona dabu taudia dekenai idia hahedinaraia