Basileia Haroro Ripoti

Gabu Idauna Momokani Dekenai Hereva Momokani Ia Davaria

DIRAVA ena ura be “taunimanima ibounai ese mauri do idia davaria, bona hereva momokani do idia diba.” (1 Timoteo 2:​3, 4) Inai karaia totona, Iehova ena Witnes taudia ese Baibel bona Baibel bukadia milioni momo idia printaia. Nega haida, inai bukadia ese kudou maoro taudia idia durua dala idauna momokani dekenai hereva momokani idia diba totona. Unai hegeregerena, Basileia harorolaia taudia Freetown, Sierra Leone ai idia noho amo inai sivarai ia mai.

Osman be ena famili lalonai natudia 9 amo ia be mero iharuana. Tomadiho laloa bada ruma bese lalonai ia tubu dainai, tamana danu nega ibounai tomadiho totona ia lao. To, Osman ena tomadiho ese hel idia hadibaia dalana ia daradaralaia bada. Ia lalo-parara lasi dahaka dainai hebogahisi bada Diravana ese kara dika taudia lahi dekenai ia gabua. Hel lahina hahedinaraia totona idia gwauraia hereva ibounai ese Osman idia durua lasi unai ia lalo-pararalaia totona.

Dina ta, Osman ena mauri lagani be 20 neganai, ia ese bulu buka ta ia itaia, momoru ena maua lalonai ia noho. Buka ia ura bada dainai ia abia, ia hagoevaia, bona hereva kwarana​​—Mauri Ia Lao Henia Hereva Momokanina ia itaia. *

Osman ia laloa, ‘Inai hereva momokani be dahaka?’ Osman ia ura bada unai ia diba dainai, buka ia abia lao ruma bona nega tamona ia duahia haorea. Dirava ena ladana korikorina—Iehova—ia dibaia neganai ia moale bada herea. (Salamo 83:18) Osman ia diba danu Iehova ena kara badana be lalokau bona taunimanima lahi dekenai gabua lalohadaina be Iehova ia ura lasi momokani karana. (Ieremia 32:35; 1 Ioane 4:8) Dokonai, Osman ia itaia Iehova ese daudau lasi tanobada be paradaiso ai do ia halaoa bona taunimanima ese do idia noholaia ela bona hanaihanai. (Salamo 37:29; Apokalupo 21:​3, 4) Unai be sivarai namo herea, hebogahisi bona lalokau Diravana amo! Osman be mai ena lalona ibounai ida Iehova ia tanikiu henia badina dala ia kehoa gabu idauna momokani dekenai hereva momokani ia davaria totona.

Dina haida murinai, Osman ena turadia haida ese Iehova ena Witnes taudia edia Kingdom Hall ia dekenai idia hadibaia bona nega ginigunana hebou dekenai ia lao. Unuseniai, Witnes tauna ta ia noia ia danu Baibel idia stadilaia totona. Osman be lauma dalana ai ia tubu bona ia bapatiso, herevana ena famili ese idia dagedage henia. (Mataio 10:36) Hari, ia be kongregesen lalonai elda tauna ta. Momoru gabuna dekenai Baibel herevalaia bukana ta ia davaria dainai unai ibounai ia vara be hoa gauna momokani!

[Footnote]