“Idia Diho”

“Davara ese ia koudia momokani. Dobu gabuna dekenai idia diho, nadi bamona.”

UNAI hereva amo, Mose bona Israela taudia ese moale ane idia abia badina Davara Kakakaka amo idia roho mauri bona edia inai taudia, edia murinai idia heau mai Aigupito taudia​​—Farao bona iena tuari oreadia​​—idia mase ore.​​—Esodo 15:​4, 5.

Unai hoa gauna ia itaia tauna ese ena sisiba do ia lalo-pararalaia be auka lasi. Tau ta ese Iehova ena lohia siahuna ia hepapahuahulaia eiava ia dadaraia neganai ia kwalimu diba lasi bona mauri diba lasi. To, hua haida murinai, Israela tau badadia haida​​—Kora, Datana, Abirama, bona edia durua taudia 250​​—be Mose bona Arona ese Dirava amo idia abia dagi idia hepapahuahulaia.​​—Numera 16:​1-3.

Iehova ena hereva hegeregerena, Mose ese Israela taudia ia hadibaia idia gwau-edeede taudia amo do idia siri. Datana bona Abirama, mai edia ruma bese ida, be idia ura lasi edia kara idia haidaua. Bena Mose ia gwau Iehova ese sibona ena dala amo taunimanima dekenai do ia hahedinaraia namonamo unai tatau ese “Lohiabada ena hereva idia negea vadaeni.” Unai nega lalonai, Iehova ese edia aena henunai tano ia kehoa. “Idia do mauri noho lalonai, be mase taudia edia gabu dekenai idia diho, mai edia kohu danu. Tano ese idia ia koua momokani.” Kora bona unai gwau-edeede taudia ma haida be edena bamona? “Vadaeni lahi be Lohiabada amo ia diho, inai lahi ese inai tatau 250, muramura mai bonana namona idia gabua taudia ia gabua ore.”​​—Numera 16:​23-35; 26:10.

Farao bona iena tuari taudia, bona tano gagaena dekenai idia gwau-edeede taudia be ibounai idia boio badina Iehova ena lohia siahuna bona iena ura iena taunimanima durua totona idia abia dae lasi. Unai dainai, namona be hari nega dokona lalonai Iehova ena gimaia karana do idia itaia taudia ibounai do idia diba Iehova be “Ataiai Momokani Diravana” bona “Siahu Ibounai Diravana” bona idia kamonai henia. Unai bamona idia karaia neganai, Iehova ena hagoadaia hereva idia abia dae diba: “Sedira oi kahirakahira be taunimanima 1000 idia mase, bona oiemu imana idibana kahana dekenai, sedira taunimanima 10,000 idia mase, to unai dika be do oi davaria lasi. Oi ese Dirava ena kara do oi itaia: Ia ese tau dikadia edia kerere davana do ia henia momokani, be do oi itaia. Bema egu naria Tauna, Siahu Ibounai Diravana, be oiemu gima Tauna, oiemu kohoro oi halaoa.” ​​—Salamo 91:​1, 7-9.