Iehova Ena Hebogahisi mai Lalokauna amo Heduru Oi Abia Noho

‘Daika be mai ena aonega? Lohiabada ena noho hanaihanai lalokauna taunimanima dekenai do ia gwauraia.’​—SALAMO 107:43.

1. Edena negai inai hereva “hebogahisi mai lalokauna” be nega ginigunana Baibel lalonai ia hedinarai, bona unai kara dainai dahaka henanadai do ita lalodia?

LAGANI 4,000 bamona gunanai, Aberahamo ena kakana ena natuna, Lota, ese Iehova be inai bamona ia gwauraia: “Oi ese emu hebogahisi mai lalokauna oi habadaia.” (Genese 19:​19, NW ) Unai be nega ginigunana inai hereva “hebogahisi mai lalokauna” be Baibel lalonai ia hedinarai. Iakobo, Naomi, Davida, bona Dirava ena hesiai taudia ma haida ese unai Iehova ena kara idia herevalaia danu. (Genese 32:​10, NW; Ruta 1:​8, NW; 2 Samuela 2:​6, NW ) Momokani, inai hereva “hebogahisi mai lalokauna” be nega 250 bamona New World Translation of the Holy Scriptures Baibel lalonai ia hedinarai. To Iehova ena hebogahisi mai lalokauna ena anina be dahaka? Idaunegai, daidia dekenai ia hahedinaraia? Hari, edena dala ai ia amo heduru ita abia?

2. Dahaka dainai ita herevalaia Heberu herevana ena anina idia hahedinaraia be auka, bona edena bamona idia hahanaia?

² Baibel lalonai Heberu herevana idia hahanaia “hebogahisi mai lalokauna” ena anina be bada herea dainai, gado momo dekenai hereva tamona amo ena anina idia hahedinaraia be auka. Unai dainai, inai hereva bona hereva gabena lalonai do idia gwauraia Buka Helaga ena siri lalonai idia hedinarai herevadia haida, hegeregere “lalokau,” “bogahisihisi,” bona “badinaia momokani,” ese unai Heberu herevana ena anina ibounai idia hahedinaraia lasi. To, Buka Helaga lalonai nega haida inai hereva “noho hanaihanai lalokauna” idia gaukaralaia bona unai be maoro, badina ena anina be bada bona unai Heberu herevana ia hahedinaraia namonamo.​—Deuteronomi 7:12; Salamo 48:9.

Lalokau Bona Badinaia Karana amo Ia Idau

3. Edena dala ai hebogahisi mai lalokauna be lalokau amo ia idau?

³ Hebogahisi mai lalokauna, eiava noho hanaihanai lalokauna, be lalokau bona badinaia karana ida ia hegeregere sisina. To, mai anina bada daladia ai idia amo ia idau. Hebogahisi mai lalokauna bona lalokau idia idau dalana mani oi itaia. Gado haida ai idia gwau diba gau idauidau bona kara idauidau idia lalokau henia. Hegeregere, Baibel ese “uaina bona oela lalokau henia” karana bona “aonega lalokau henia” karana ia herevalaia. (Aonega Herevadia 21:​17, NW; 29:​3, NW ) To hebogahisi mai lalokauna be kara eiava gau idauidau dekenai ita hahedinaraia lasi, to taunimanima dekenai ita hahedinaraia. Hegeregere, Deuteronomi 7:9 ese taunimanima ia gwauraia, ia gwau Iehova ese “iena noho hanaihanai lalokauna do ia henia noho, ela bona uru 1,000.”

4. Edena dala ai hebogahisi mai lalokauna be badinaia karana amo ia idau?

⁴ Danu, Heberu gado herevana idia hahanaia “hebogahisi mai lalokauna” ena anina ese “badinaia karana” ena anina ia hereaia. Gado haida dekenai, ta ena siahu henunai ia noho tauna ese mai siahu tauna ia laloa dalana idia herevalaia neganai inai hereva “badinaia karana” idia gaukaralaia. To tahua gaukara ia karaia hahine ta ese ia hahedinaraia, Baibel lalonai, noho hanaihanai lalokauna “be ia idau: siahu tauna ese ia manoka eiava ia dabu eiava iena siahu henunai ia noho tauna dekenai unai kara ia hahedinaraia.” Unai dainai King Davida ese Iehova ia noinoi henia diba, ia gwau: “Lau, oiemu hesiai tauna, be mai emu bogahisihisi danu do oi itaia noho. Oiemu noho hanaihanai lalokauna dainai, lau do oi hamauria.”  (Salamo 31:16) Dabu tauna, Davida, ese siahu bada tauna, Iehova, ia noia ia dekenai noho hanaihanai lalokauna, eiava hebogahisi mai lalokauna, do ia hahedinaraia. Siahu tauna vairanai dabu tauna be siahu lasi dainai, siahu tauna ia hahedinaraia hebogahisi mai lalokauna be ta ese ia doria dainai lasi, to sibona ena ura dainai ia karaia.

5. (a) Dirava ena Hereva lalonai ena hebogahisi mai lalokauna dainai idia vara gaudia haida be dahaka? (b) Edena dala, Iehova ese hebogahisi mai lalokauna ia hahedinaraia daladia unai, do ita tahua?

⁵ Salamo torea tauna ia henanadai: ‘Daika be mai ena aonega? Lohiabada ena noho hanaihanai lalokauna taunimanima dekenai do ia gwauraia.’ (Salamo 107:43) Iehova ena hebogahisi mai lalokauna dainai haida ia hamauria bona naria. (Salamo 6:4; 119:​88, 159) Ita ia gimaia bona hekwakwanai amo ia ruhaia. (Salamo 31:​16, 21; 40:11; 143:12) Unai kara dainai, Iehova ese ta ena kara dika ia gwauatao diba. (Salamo 25:7) Baibel ena sivarai bona siri haida ita riviulaia karana amo, do ita itaia Iehova ena hebogahisi mai lalokauna be (1) kara amo ia hahedinaraia bona (2) iena kamonai hesiai taudia dekenai ia hahedinaraia.

Hamauria Karana​—Hebogahisi mai Lalokauna amo Ia Vara

6, 7. (a) Edena dala ai Iehova ese Lota dekenai ena hebogahisi mai lalokauna bada herea ia hahedinaraia? (b) Dahaka ia vara bena Lota ese Iehova ena hebogahisi mai lalokauna ia herevalaia?

⁶ Reana Iehova ena hebogahisi mai lalokauna ena bada ita dibaia totona, dala namona be Baibel lalonai unai kara idia hahedinaraia sivaraidia ita tahua. Genese 14:​1-​16 ai ita davaria, Lota, Aberahamo ena kakana ena natuna, be ena inai taudia ese idia abia lao. To Aberahamo ese Lota ia hamauria. Iehova ese Lota bona ena ruma bese idia noho hanua dikana, Sodoma, ia hadikaia  gwauraia neganai danu, Lota be ena mauri ia haboioa diba.​​—Genese 18:​20-​22; 19:​12, 13.

⁷ Iehova ese Sodoma ia do hadikaia lasi neganai, iena aneru ese Lota bona ena ruma bese taudia be unai hanua amo idia hakaua siri. Unai nega ai, Lota ia gwau: “Oi ese kara namona lau dekenai oi karaia vadaeni, lau dekenai oi bogahisihisi [“hebogahisi mai lalokauna,” NW ], bona lau oi hamauria vadaeni.” (Genese 19:​16, 19) Unai hereva amo Lota ia hahedinaraia Iehova ese ia dekenai hebogahisi mai lalokauna bada herea ia hahedinaraia bona ia hamauria. Unai nega ai, Dirava ese Lota ia hamauria bona naria karana amo ena hebogahisi mai lalokauna ia hahedinaraia.​—2 Petero 2:7.

Iehova Ena Hebogahisi mai Lalokauna Bona Iena Hakaua Dalana

8, 9. (a) Aberahamo ena hesiai tauna ia abia gaukarana be dahaka? (b) Dahaka dainai unai hesiai tauna be Dirava ena hebogahisi mai lalokauna totona ia guriguri, bona ia guriguri lalonai dahaka ia vara?

⁸ Genese karoa 24 lalonai, Dirava ese hebogahisi mai lalokauna, eiava noho hanaihanai lalokauna, ia hahedinaraia ena sivarai ma ta ita davaria. Unai sivarai ese ia hahedinaraia, Aberahamo ese ena hesiai tauna ia hamaoroa ena varavara idia noho tanona dekenai do ia lao bona iena natuna Isako totona adavana do ia abia. (Siri 2-4) Unai gaukara be mai ena hekwarahi, to Aberahamo ese ena hesiai tauna ia hagoadaia Iehova ena aneru ese ia do ia hakaua. (Siri 7) Hesiai tauna be “hanua ta ladana Nahoro” (Harana o ia kahirakahira hanuana ta) dekenai ia ginidae neganai, hanua hahinedia be ranu abia totona idia mai. (Siri 10, 11) Ia itaia hahine idia mai kahirakahira neganai, ia diba ena gaukara ena anina do ia vara negana ia ginidae. To edena dala ai hahine maorona ia abia hidi diba?

⁹ Aberahamo ena hesiai tauna ia diba Dirava ena heduru ia abia be namo, unai dainai ia guriguri: “Lohiabada e, lauegu biaguna Aberahamo ena Dirava e, oi dekenai lau noinoi, hari dina lauegu gaukara mani oi hanamoa, bona oiemu gwauhamata [“hebogahisi mai lalokauna,” NW ] lauegu biaguna Aberahamo dekenai mani oi hamomokania.” (Siri 12) Iehova ese edena dala ai ena hebogahisi mai lalokauna ia hahedinaraia? Unai hesiai tauna ese Dirava amo toa ta ia noia, unai amo Ia ese ia abia hidi hahinena do ia diba. (Siri 13, 14) Iehova amo ia noia gauna be hahine ta ese ia karaia. Unai be hegeregere, ia ese unai hesiai tauna ena guriguri ia kamonai bamona! (Siri 15-​20) Unai hesiai tauna ia hoa, bona “ia itaia noho.” To, mai anina bada gaudia haida ia diba be namo. Unai hahine hairaina be Aberahamo ena varavara ta, a? Bona ia do headava lasi, a? Unai dainai unai hesiai tauna “ia hereva lasi. Ia ura diba Lohiabada ese iena laolao ena anina ia henia vadaeni o lasi.”​​—Siri 16, 21.

10. Dahaka dainai Aberahamo ena hesiai tauna ia gwau Iehova ese ena biaguna dekenai hebogahisi mai lalokauna ia hahedinaraia?

¹⁰ Daudau lasi murinai, unai hahine matamata ia gwau: “Lau be Betuela ena natuna, lauegu tubuna hahine ena ladana be Milika, Nahoro [Aberahamo ena kakana] ena adavana.” (Genese 11:26; 24:24) Unai neganai hesiai tauna ia lalo-parara Iehova ese ena guriguri ia haerelaia. Ia moale bada dainai ia igo diho bona ia gwau: “Lohiabada, lauegu biaguna Aberahamo ena Dirava e, oi lau hanamoa, badina be oiemu gwauhamata [“hebogahisi mai lalokauna,” NW ] lauegu biaguna dekenai oi hamomokania vadaeni. Oi Lohiabada ese maoromaoro lau oi hakaua, lauegu biaguna ena [kakana] ena ruma dekenai.” (Siri 27) Dirava ese unai hesiai tauna ia hakaua karana amo ena biaguna, Aberahamo, dekenai hebogahisi mai lalokauna ia hahedinaraia.

Dirava Ena Hebogahisi mai Lalokauna amo Ita Ia Ruhaia Bona Gimaia

11, 12. (a) Edena hahetoho lalodiai Iosepa ese Iehova ena hebogahisi mai lalokauna ia mamia? (b) Dirava ese ena hebogahisi mai lalokauna be edena bamona Iosepa dekenai ia hahedinaraia?

¹¹ Hari, Genese karoa 39 mani ita tahua. Unai karoa ese Aberahamo ena tubuna Iosepa ena sivarai  ia kikilaia, Aigupito dekenai hesiai tauna ta bamona ia idia hoihoilaia. Ena be unai ia vara, to “Lohiabada ese Iosepa ia naria noho.” (Siri 1, 2) Oibe, Iosepa ena Aigupito biaguna Potifara danu ia abia dae Iehova be Iosepa ia durua noho. (Siri 3) To, Iosepa ese hahetoho badana ia davaria. Idia samania koikoi idia gwau ia ura Potifara ena adavana ia hadikaia, unai dainai idia hadiburaia. (Siri 7-​20) Bona unai “dibura ruma dekenai” “iena aena be seini dekena amo idia kwatua, unai be mai hisihisi, bona iena aiona dekenai auri dekena amo idia guia.”​—Genese 40:15; Salamo 105:18.

¹² Unai hahetoho badana lalonai dahaka ia vara? “Lohiabada ese Iosepa dekenai ia itaia noho, ia bogahisihisi henia.” (Siri 21a) Hebogahisi mai lalokauna karana ta dainai, gau haida idia vara matamaia bena murinai Iosepa be ia abia noho hekwakwanai amo idia ruhaia. Iehova ena kara dainai “dibura ruma naria tauna be Iosepa dekenai ia moale.” (Siri 21b) Unai dainai, Iosepa dekenai gaukara ia henia. (Siri 22) Gabeai, Iosepa be Aigupito ena lohia tauna, Farao, dekenai ia hahedinaraia tauna ia hedavari henia. (Genese 40:​1-4, 9-​15; 41:​9-​14) King ese Iosepa be Aigupito ena lohia iharuana ai ia halaoa, bona gabeai Aigupito dekenai hitolo bada ia vara neganai Iosepa ese taunimanima hamauria gaukarana ia karaia. (Genese 41:​37-​55) Iosepa ena mauri lagani be 17 neganai hahetoho ia abia matamaia bona lagani 12 mai kahana idia vara noho! (Genese 37:​2, 4; 41:46) To unai hekwakwanai bona hisihisi laganidia ibounai lalonai, Iehova Dirava ese Iosepa dekenai  hebogahisi mai lalokauna ia hahedinaraia, ia gimaia ia idia hadikaia ore lasi totona bona ia naria dala badana ai Iena ura ia hagugurua totona.

Dirava ese Ena Hebogahisi mai Lalokauna Ia Hahedinaraia Noho

13. (a) Salamo 136 lalonai Iehova ese ena hebogahisi mai lalokauna dainai ia karaia karadia be edena bamona? (b) Hebogahisi mai lalokauna ena anina be dahaka?

¹³ Iehova ese Israela besena dekenai hebogahisi mai lalokauna ia hahedinaraia loulou. Salamo 136 ese ia hahedinaraia ena hebogahisi mai lalokauna dainai idia ia hamauria (Siri 10-15), ia hakaua, (Siri 16), bona ia gimaia. (Siri 17-20) Dirava ese taunimanima ta ta dekenai ena hebogahisi mai lalokauna ia hahedinaraia danu. Ma ta dekenai hebogahisi mai lalokauna ia hahedinaraia tauna ese sibona ena ura dainai ia dabu tauna ia durua. Baibel ia herevalaia buka ta ese hebogahisi mai lalokauna ia herevalaia neganai, ia gwau: “Unai kara amo ta ese ma ta ena mauri ia naria eiava ia durua. Dika ta eiava hisihisi ia davaria tauna totona kara ta ia karaia.” Diba bada tauna ta ia gwau ia be “kara amo ia hedinarai lalokauna.”

14, 15. Dahaka dainai ita gwau diba Lota be Dirava ese ia lalo-namo henia hesiai tauna?

¹⁴ Genese bukana lalonai ita itaia sivaraidia ese idia hahedinaraia, Iehova ese ia idia lalokau henia taudia dekenai hebogahisi mai lalokauna ia hahedinaraia noho. Lota, Aberahamo, bona Iosepa edia noho dalana be idauidau bona hahetoho idauidau idia davaria. Idia be goevadae lasi taudia, to idia be Iehova ena lalo-namo idia abia hesiai taudia, bona Dirava ena heduru idia abia be namo. Ita goada noho diba badina ita diba iseda lalokau guba Tamana ese unai bamona taudia dekenai hebogahisi mai lalokauna ia hahedinaraia.

¹⁵ Lota ese aonega lasi dalanai gau haida ia abia hidi dainai hekwakwanai ia davaria. (Genese 13:​12, 13; 14:​11, 12) To, kara namodia ia hahedinaraia danu. Dirava ena aneru rua be Sodoma dekenai idia ginidae neganai, Lota ese idia dekenai heabidae karana ia hahedinaraia. (Genese 19:​1-3) Ia abidadama dainai iena kekeni edia maoheni rua ia hadibaia, kahirakahira Sodoma be dika do ia davaria. (Genese 19:14) Dirava ena lalohadai Lota dekenai be 2 Petero 2:​7-9 ai ita davaria, ia gwau: “Dirava ese unai kara maoromaoro tauna Lota ia hamauria. Lota be unai lebulebu taudia edia kara dainai iena lalona be ia metau. Lota be kara maoromaoro tauna, to edia huanai ia noho dainai, dina ibounai edia dika ia itaia bona ia kamonai. Unai dainai iena lalona be ia hisihisi bada. Bema hisihisi bona metau Dirava badinaia taudia dekenai idia noho neganai, Lohiabada ese inai hisihisi dekena amo idia ia hamauria diba.” Oibe, Lota be kara maoromaoro tauna, bona unai siri ese ia hahedinaraia ia be Dirava badinaia tauna. Ia hegeregerena, ita danu ese Dirava ena hebogahisi mai lalokauna do ita moalelaia, bema iseda ‘kara iboudiai idia helaga bona Dirava ita badinaia namonamo.’​​—2 Petero 3:​11, 12.

16. Baibel ese Aberahamo bona Iosepa be edena bamona hereva namodia amo ia gwauraia?

¹⁶ Genese karoa 24 ese ia hahedinaraia goevagoeva  Aberahamo ena hetura karana Iehova ida ia namo herea. Siri ginigunana ese ia hahedinaraia “Lohiabada ese, Aberahamo ena kara ibounai lalonai, ia hanamoa vadaeni.” Aberahamo ena hesiai tauna ese Iehova ia gwauraia “lauegu biaguna Aberahamo ena Dirava.” (Siri 12, 27) Bona hahediba tauna Iamesi ia hahedinaraia Aberahamo be “Dirava ese ia gwauraia maoromaoro” bona “unai dainai idia gwau Aberahamo be Dirava ena turana.” (Iamesi 2:​21-23) Iosepa dekenai unai ia momokani danu. Genese karoa 39 ese Iehova bona Iosepa huanai ia noho hetura karana namona ia hahedinaraia. (Siri 2, 3, 21, 23) Ma danu, hahediba tauna Stefano ese Iosepa ia herevalaia neganai, ia gwau: “Dirava ese Iosepa danu ia noho.”​—Kara 7:9.

17. Lota, Aberahamo, bona Iosepa edia sivarai amo dahaka ita dibaia?

¹⁷ Ita herevalaia vadaeni taudia, Dirava ena hebogahisi mai lalokauna idia mamia taudia unai, be Iehova Dirava ida hetura karana namona idia moalelaia bona dala idauidau amo Iena ura idia hagugurua taudia. Idia davaria hekwakwanai be sibodia idia hanaia diba lasi. Lota ese ena mauri ia haboioa diba, Aberahamo ena bese ladana ia orea diba, bona Iosepa ese ena gaukara badana ia reaia diba. Iehova sibona ese unai tatau, ia idia badinaia dabu taudia unai ia durua diba, bona ena hebogahisi mai lalokauna idia hahedinaraia karadia amo unai ia karaia. Bema ita ura Iehova Dirava ena hebogahisi mai lalokauna ita mamia ela bona hanaihanai, namona be ita danu ese Ia ita tura henia bona Iena ura ita karaia noho.​​—Esera 7:​28; Salamo 18:50.

Dirava Ena Hesiai Taudia ese Namo Bada Idia Abia

18. Baibel siri idauidau ese Iehova ena hebogahisi mai lalokauna be edena bamona idia hahedinaraia?

¹⁸ Iehova ena hebogahisi mai lalokauna ese ‘tanobada ia hahonua’ vadaeni, bona Dirava ita tanikiu henia unai kara ia hahedinaraia dainai! (Salamo 119:64) Mai eda kudouna ibounai ida Salamo torea tauna ena hereva ita abia dae, ia gwau: “Idia ese Lohiabada do idia tanikiu henia be namo, iena lalokau badana dainai. Badina be ia ese kara namodia momokani idia dekenai ia karaia.” (Salamo 107:​8, 15, 21, 31) Ita moale badina Iehova ese ia lalo-namo henia hesiai taudia​—idia ta ta eiava edia orea​—dekenai ena hebogahisi mai lalokauna ia hahedinaraia. Peroveta tauna Daniela ia guriguri neganai, Iehova ia gwauraia “Dirava badana, taunimanima ibounai oi dekenai idia gari. Oiemu gwauhamata oi badinaia noho momokani, bona oiemu hereva badinaia taudia, bona oi idia lalokau henia taudia be oi ese oi bogahisihisi henidia noho.” (Daniela 9:4) King Davida ia guriguri, ia gwau: “Oiemu lalokau be oi dekenai idia manada taudia dekenai, do oi henia noho.” (Salamo 36:10) Ita moale bada badina Iehova ese ena hesiai taudia dekenai hebogahisi mai lalokauna ia hahedinaraia!​​—1 King Taudia 8:23; 1 Sivarai 17:13.

19. Hereva gabena dekenai dahaka henanadai do ita laloa?

¹⁹ Momokani, ita be Iehova ena taunimanima dainai namo bada ita abia! Dirava ese taunimanima ibounai dekenai ia hahedinaraia lalokauna sibona amo heduru ita abia lasi, to iseda guba Tamana ena hebogahisi mai lalokauna, eiava noho hanaihanai lalokauna dainai hahenamo badadia ita abia. (Ioane 3:​16) Ita dabu neganai, Iehova ia hahedinaraia hebogahisi mai lalokauna amo heduru bada ita abia. (Salamo 36:7) To edena dala ai Iehova Dirava ena hebogahisi mai lalokauna ita tohotohoa diba? Ita ta ta ese unai kara namo hereana ita hahedinaraia noho, a? Unai bona unai bamona henanadai ma haida be hereva gabena dekenai do ita laloa.

Oi Laloatao, A?

• New World Translation Baibel lalonai “hebogahisi mai lalokauna” ida dahaka hereva ma ta idia gaukaralaia?

• Hebogahisi mai lalokauna be edena dala ai lalokau bona badinaia karana amo ia idau?

• Iehova ese edena dala ai Lota, Aberahamo, bona Iosepa dekenai hebogahisi mai lalokauna ia hahedinaraia?

• Iehova ese guna hebogahisi mai lalokauna ia hahedinaraia daladia be edena bamona ita idia hagoadaia diba?

[Study Questions]

[Picture on page 9]

Dirava ese Lota dekenai hebogahisi mai lalokauna ia hahedinaraia dalana oi diba, a?

[Pictures on page 11]

Iehova ena hebogahisi mai lalokauna dainai Aberahamo ena hesiai tauna ia hakaua

[Pictures on page 12]

Iehova ese Iosepa ia gimaia karana amo ia dekenai hebogahisi mai lalokauna ia hahedinaraia