“Dina ta Aonega Do Oi Davaria”

“Taunimanima momo be edia mauri lagani ginigunadia idia gaukaralaia dalana dainai, idia ese edia mauri lagani gabedia ai lalohisihisi idia davaria.” Unai hereva be lagani 1600 murinai ia noho French toretore tauna ladana Jean de La Bruyère ese ia gwauraia. Momokani, ia laloa rua matamata tauna be reana ia daradara dainai, ena mauri lalonai do ia moale lasi bona do ia lalohisihisi. To, lalo-auka matamata tauna ta be reana dala kererena ta ai do ia raka noho, bona unai dainai iena mauri lagani gabedia do ia moalelaia lasi. Herevana edena dala ai, to bema ta be ia maoro lasi karana eiava kara dikana ta ia karaia, ena mauri lalonai lalohisihisi do ia davaria diba.

Idia vara karadia be edena bamona ita dadaraia diba? Dirava ena Hereva ese matamata taudia edia laloa rua karana ia sisibalaia neganai, ia gwau: “Oiemu tau matamata negana ai, oi ia Havaraia Tauna Badana oi laloatao, metau dinadia idia do mai lasi, eiava inai hereva, ‘Idia dekenai lau moale lasi,’ amo do oi gwauraia laganidia idia do ginidae lasi negana ai.” (Hadibaia Tauna 12:​1, NW) Bema oi be matamata tauna ta, namona be oi do matamata noho neganai dala oi karaia, “oi ia Havaraia Tauna Badana” oi dibaia totona.

Baibel ese edena dala ai matamata taudia ia durua edia matamata negana ena kavakava karana idia hadokoa totona? Baibel ia gwau: “Bema oi ura bada diba do oi abia, bona sisiba oi kamonai henia noho neganai, oi ese dina ta aonega do oi davaria.” (Aonega Herevadia 19:20) Baibel ia hahedinaraia goevagoeva danu, ta ia matamata eiava ia bada negana ai ia gwau-edeede bona Dirava ena aonega ia dadaraia karana dainai, anina dikana do ia davaria. (Aonega Herevadia 13:18) To, Dirava ena hakaua herevadia badinaia karana amo ‘oiemu mauri dinadia do oi halataia, bona noho namona momokani oi dekenai do idia henia’ bona emu mauri do oi moalelaia.​—Aonega Herevadia 3:2.