“Dirava Idia Diba Lasi Taudia Edia Vairanai, Kara Namodia Do Umui Karaia”

“Taunimanima ibounai do umui matauraia. Keristani taudia ibounai do umui lalokau henia.”​—⁠1 PETERO 2:⁠17.

1, 2. (a) Niuspepa toretore tauna ese dahaka hereva namodia amo Iehova ena Witnes taudia ia gwauraia? (b) Dahaka dainai Iehova ena Witnes taudia idia hekwarahi kara namo taravatudia idia badinaia noho totona?

 LAGANI haida gunanai, Amarillo, Texas, U.S.A. dekenai, niuspepa toretore tauna ta ese unai gabu ai idia noho dubu idauidau ia vadivadi henia bona ia itaia gaudia ia torea. Ia laloa orea iboudiai amo ta be ia idau. Ia gwau: “Lagani toi lalonai, lau be Iehova ena Witnes taudia ese lagani ta ta ai idia abia hebouhebouna Amarillo Civic Center dekenai lau lao. Idia huanai lau raka loaloa neganai, nega ta lau itaia lasi ta ese kuku ia ania, bia ia inua, eiava hereva dikadia ia gwauraia. Egu mauri lalonai unai bamona goeva momokani, kara namo, hemataurai dabua idia karaia taunimanima namodia be guna lau itaia lasi.” Unai bamona hereva namodia Iehova ena Witnes taudia dekenai be nega momo niuspepa ai idia halasia. Dahaka dainai Witnes taudia edia hahediba herevadia idia abia dae lasi taudia ese nega momo Witnes taudia idia hanamoa?

² Nega momo, Dirava ena taunimanima edia kara namona dainai hanamoa herevadia idia abia. Tanobada dekenai taunimanima edia kara ia dika ia lao, to Iehova ena Witnes taudia idia laloa kara namo taravatudia idia badinaia be edia maduna, edia tomadiho ena kahana ta. Idia diba edia kara ese Iehova bona edia Keristani tadikaka edia ladana idia hanamoa eiava hadikaia bona edia kara namo ese idia harorolaia hereva momokani ena namo be ma haida dekenai ia hahedinaraia. (Ioane 15:8; Tito 2:​7, 8) Kara namo ita hahedinaraia noho bena Iehova bona ena Witnes taudia edia ladana namona ita hadikaia lasi dalana, bona unai ita karaia neganai namo ita davaria daladia, mani ita itaia.

 Keristani Ruma Besena

3. Ruma bese taudia be dahaka amo ita gimaia be gau badana?

³ Ruma bese lalonai eda kara mani oi laloa. Gerhard Besier bona Erwin K. Scheuch ese idia torea buka ta (The New Inquisitors: Freedom of Religion and Religious Envy) ia gwau: “[Iehova ena Witnes taudia] idia abia dae edia ruma bese idia gimaia momokani be namo.” Unai hereva be momokani, bona hari inai negai dika gaudia momo idia noho bona idia amo emu ruma bese oi naria be gau badana. Natudia momo be ‘tama bona sina idia kamonai henia lasi’ bona taunimanima badadia momo ese ‘lalokau idia diba lasi’ bona ‘sibona edia ura idia biagua lasi.’ (2 Timoteo 3:​2, 3; NW) Ruma bese lalodiai adavana idia dagedage henidia, tama sina ese dala idauidau amo edia natudia idia hadikaia eiava idia naria lasi, bona natudia idia gwau-edeede, drag idia gaukaralaia bona matabodaga karadia idia karaia, eiava ruma amo idia heau siri. Unai ibounai be inai “tanobada” ena siahu dikana dainai ia vara. (Efeso 2:​1, 2) Iseda ruma bese taudia be unai siahu amo ita gimaia be gau badana. Edena dala ai? Iehova ena sisiba bona hakaua daladia ruma bese taudia totona do ita badinaia.

4. Keristani ruma bese taudia edia maduna idia ta ta dekenai be dahaka?

⁴ Keristani tauna bona ena adavana idia lalo-parara hemami dalanai, lauma dalanai, bona tauanina dalanai idia ta ta dekenai idia be mai edia maduna. (1 Korinto 7:​3-5; Efeso 5:​21-23; 1 Petero 3:⁠7) Keristani tama sina be natudia naria maduna metauna idia abia. (Aonega Herevadia 22:6; 2 Korinto 12:14; Efeso 6:⁠4) Bona Keristani ruma bese lalodiai natudia idia bada idia lao neganai, idia diba idia danu be mai edia maduna. (Aonega Herevadia 1:​8, 9; 23:22; Efeso 6:1; 1 Timoteo 5:​3, 4, 8) Ruma bese ena maduna idauidau hagugurua totona hekwarahi, lalo-goada, lalokau, bona sibona eda ura tahua lasi karadia be mai anina bada. To, ruma bese taudia be Dirava ese ia henia maduna idauidau idia badinaia namonamo neganai, idia ta ta dekenai bona kongregesen taudia dekenai idia be hahenamo ta. To mai anina bada gauna be inai, ruma bese ia Hamatamaia Tauna, Iehova Dirava, idia hanamoa.​—⁠Genese 1:​27, 28; Efeso 3:⁠15.

 Keristani Tadikaka Oreana

5. Keristani tadikaka edia hebamo karana amo dahaka namo ita abia?

⁵ Ita be Keristani taudia dainai, ita be mai iseda maduna kongregesen lalonai idia noho tadikaka dekenai bona “Keristani varavara taudia tanobada kahana ibounai dekenai.” (1 Petero 5:⁠9) Lauma dalanai ita noho namo totona kongregesen taudia ita bamoa be gau badana. Iseda Keristani tadikaka ida ita hebou neganai, edia hebamo amo goada ita abia bona danu “hesiai tauna mai ena kamonai, bona mai ena kara maoromaoro” amo lauma aniani namodia ita abia. (Mataio 24:​45-47) Bema ita be mai iseda hekwakwanai, iseda tadikaka dekenai ita lao diba Baibel ena hakaua herevadia amo sisiba namona ita abia totona. (Aonega Herevadia 17:17; Hadibaia Tauna 4:9; Iamesi 5:​13-18) Gau ta dekenai ita dabu neganai, iseda tadikaka ese ita idia rakatania lasi. Iehova ena orea lalonai ita noho be hahenamo badana!

6. Paulo ese edena dala ai ia hahedinaraia Keristani taudia ma haida dekenai ita be mai iseda maduna?

⁶ To, gau haida ita abia sibona totona kongregesen dekenai ita noho lasi; gau haida ita henia totona ita noho danu. Momokani, Iesu ia gwau: “Henia kara ena moale be bada, abia kara ena moale be maragi.” (Kara 20:35) Aposetolo Paulo ese mai ena ura ida henia karana ia herevalaia neganai, ia gwau: “Ita diba momokani Dirava ese iena gwauhamata do ia badinaia. Unai dainai namona be iseda abidadama ita dogoatao goada noho. Ita gwauraia noho abidadama be unai. Umui ta ta dekenai durua henia daladia do umui laloa noho. Unai bamona lalokau dekena amo kara namodia do umui karaia. Iseda guriguri hebou kara do umui hadokoa lasi, haida ese idia hadokoa bamona. To umui ta ta emui Keristani varavara taudia edia lalona do umui hagoadaia, oibe, inai kara do umui habadaia be namo. Badina be Lohiabada ena Dina be kahirakahira do ia ginidae.”​—⁠Heberu 10:​23-25.

7, 8. Edena dala ai ita ese iseda kongregesen taudia bona tano ma haida ai idia noho Keristani taudia dekenai henia karana ita hahedinaraia diba?

⁷ Kongregesen lalonai, iseda ‘abidadama ita gwauraia’ hedinarai bema hebou dekenai ita haere eiava program lalonai gau ma haida ita karaia. Oiemu hekwarahi ese iseda tadikaka do idia hagoadaia momokani. Hebouhebou vairanai bona murinai idia danu ita herevahereva karana amo idia ita hagoadaia danu. Unai nega ai manoka taudia, lalo-metau taudia, bona gorere taudia ita hagoadaia. (1 Tesalonika 5:14) Kudou-maoro Keristani taudia be unai bamona henia karana idia karaia dainai, nega ginigunana ai iseda hebou dekenai idia mai taudia be iseda huanai ia noho lalokauna idia itaia neganai idia hoa bada.​—⁠Salamo 37:21; Ioane 15:12; 1 Korinto 14:⁠25.

⁸ To, kongregesen taudia sibona dekenai iseda lalokau ita hahedinaraia lasi. Iseda tadikaka tanobada ibounai dekenai ita lalokau henia danu. Unai dainai, Kingdom Hall Haginia Gaukarana Ena Kontribusen mauana be Kingdom Hall ta ta dekenai idia atoa. Reana iseda Kingdom Hall ia dika lasi, to ita diba eda Keristani tadikaka tausen momo be hebou gabuna namona ta lasi. Kingdom Hall Haginia Gaukarana Ena Kontribusen totona moni ita henia neganai, unai bamona taudia dekenai lalokau ita hahedinaraia, herevana idia ita diba lasi.

9. Dahaka badina badana dainai Iehova ena Witnes taudia idia lalokau heheni?

⁹ Dahaka dainai Iehova ena Witnes taudia idia lalokau heheni? Iesu ese idia ia hagania unai bamona idia karaia totona. (Ioane 15:17) Bona idia lalokau heheni karana ese ia hamomokania Dirava ena lauma helaga be idia ta ta dekenai bona edia orea dekenai ia gaukara noho. Lalokau be ‘lauma helaga ese ia havaraia’ karana ta. (Galatia 5:​22, 23) Iehova ena Witnes taudia ese Baibel idia stadilaia, Keristani heboudia idia lao henia, bona hanaihanai Dirava idia guriguri henia neganai, lalokau be edia kara korikorina ai ia lao, herevana ‘taunimanima momo edia lalokau ia keru’ tanobadana dekenai idia noho.​—⁠Mataio 24:⁠12.

Iseda Maduna Inai Tanobada Lalonai

10. Inai tanobada taudia dekenai iseda maduna be dahaka?

¹⁰ Paulo ena hereva ‘iseda abidadama ita gwauraia’ hedinarai dainai, maduna ma ta ita laloa. Iseda Keristani tadikaka ai idia do lao lasi taudia dekenai, sivarai namona ita harorolaia gaukarana amo danu, iseda abidadama ita gwauraia hedinarai. (Mataio 24:14; 28:​19, 20; Roma 10:​9, 10, 13-15) Unai bamona haroro gaukara amo henia karana ita hahedinaraia danu. Unai gaukara ita karaia lalonai, iseda nega bona goada ita henia, ita hegaegae, ita hadibaia, bona sibona eda kohu ita gaukaralaia. To,  aposetolo Paulo ia gwau danu: “Badina lau be taunimanima ibounai edia hesiai tauna, do lau durudia totona. Dirava ena taravatu diba taudia do lau durua, bona Dirava ena taravatu diba lasi taudia danu do lau durua. Sikuli vadaeni taudia do lau durua, sikuli lasi taudia danu do lau durua. Unai dainai lau ura umui Roma noho taudia dekenai danu Sivarai Namona do lau harorolaia.” (Roma 1:​14, 15) Namona be Paulo hegeregerena, mai eda ura ida unai taudia ita “durua.”

11. Edena Baibel ena hakaua herevadia rua ese iseda noho inai tanobada lalonai idia biagua, to dahaka ita lalo-parara?

¹¹ Iseda tadikaka ai idia do lao lasi taudia dekenai ita be mai iseda maduna ma haida, a? Oibe. Ita diba “Satani ese tanobada taudia ibounai ia gunalaia noho.” (1 Ioane 5:19) Ita diba Iesu be ena hahediba taudia dekenai ia gwau: “Idia be tanobada ena lasi, lau hegeregerena, lau be tanobada ena lasi.” To, ita be inai tanobada lalonai ita noho, ita gaukara, bona heduru idauidau ita abia noho. (Ioane 17:​11, 15, 16) Unai dainai inai tanobada lalonai ita be mai iseda maduna idauidau. Idia be dahaka? Aposetolo Petero ese unai henanadai ia haerelaia. Ierusalema idia hadikaia gwauraia neganai, Asia Minor dekenai idia noho Keristani taudia ia tore henia, bona unai revareva ena kahana ta ese ita ia durua inai tanobada lalonai lalohadai maorona ita dogoatao totona.

12. Edena dala ai Keristani taudia be “idau taudia bona hanua lasi taudia bamona,” bona unai dainai dahaka amo idia siri be namo?

¹² Petero ia gwau: “Lauegu lalokau taudia e, umui be inai tanobada dekenai umui noho, idau taudia bona hanua lasi taudia bamona. Unai dainai, umui lau noia, tauanina ena ura dikadia do umui karaia lasi. Inai ura dikadia ese emui lauma idia tuari henia noho.” (1 Petero 2:11) Lauma dalanai, Keristani taudia momokanidia be ‘inai tanobada dekenai idia noho, idau taudia bona hanua lasi taudia bamona,’ badina edia mauri lalonai idia laloa bada gauna be mauri hanaihanai​—⁠Dirava ese lauma helaga amo ia horoa taudia be guba dekenai bona “mamoe idaudia” taudia be vaira negana ai tanobada paradaisona dekenai unai do idia abia. (Ioane 10:16; Filipi 3:​20, 21; Heberu 11:13; Apokalupo 7:​9, 14-17) To tauanina ena ura dikadia be dahaka? Idia haida be taga bona ladana bada tahua karadia, matabodaga uradia, bona “kohu momo ura dikadika” bona “mama” karadia.​—⁠Kolose 3:5; 1 Timoteo 6:​4, 9; 1 Ioane 2:​15, 16.

13. Edena dala ai tauanina ena ura dikadia ese ‘iseda lauma idia tuari henia’?

¹³ Unai bamona ura dikadia ese ‘iseda lauma idia tuari henia.’ Idia ese iseda hetura karana Dirava ida idia hadikaia bona unai amo iseda Keristani helaro (iseda “lauma,” eiava mauri) ita haboioa diba. Hegeregere, bema matabodaga gaudia ita ura henia, edena bamona ita sibona be ‘Dirava dekenai boubou gauna bamona, mai mauri bona mai helaga danu do ita henia’? Bema kohu ura henia ena tarapu dekenai ita moru, edena bamona ‘Basileia do ita tahua guna’ diba? (Roma 12:​1, 2; Mataio 6:33; 1 Timoteo 6:​17-19) Namona be Mose ena haheitalai ita tohotohoa, tanobada ena hedibagani idauidau ita dadaraia, bona iseda mauri lalonai Iehova ena hesiai gaukara ita atoa guna. (Mataio 6:​19, 20; Heberu 11:​24-26) Unai be mai anina bada, inai tanobada lalonai lalohadai maorona ita dogoatao totona.

“Kara Namodia Do Umui Karaia”

14. Dahaka dainai ita Keristani taudia ita hekwarahi, kara namo ita hahedinaraia totona?

¹⁴ Mai anina bada herevana ma ta be Petero ese gabeai ia gwauraia herevana dekenai ita davaria, ia gwau: “To Dirava idia diba lasi taudia edia vairanai, kara namodia do umui karaia. Momokani, hari idia ese umui idia gwauraia kerere noho. To bema emui kara namodia idia itaia neganai, idia ese Dirava do idia hanamoa, Keriso do ia giroa mai dinana dekenai.” (1 Petero 2:12) Ita be Keristani taudia dainai, ita hekwarahi kara namo ita hahedinaraia totona. Sikuli lalonai ita stadi goadagoada. Iseda gaukara gabuna dekenai, ita gaukara goadagoada bona ita kara momokani​—⁠ena be iseda biaguna ia kara maoro lasi. Ia parara ruma besena lalonai, Witnes tau eiava hahine ia hekwarahi Keristani hakaua herevadia ia badinaia totona. Nega momo unai be ia auka, to ita diba iseda kara namo ese Iehova ia hamoalea bona nega momo Witnes lasi taudia edia lalohadai ita dekenai ia haidaua.​—⁠1 Petero 2:​18-20; 3:⁠1.

15. Iehova ena Witnes taudia ese kara namo taravatudia idia badinaia karana be edena bamona taunimanima momo ese idia itaia?

¹⁵ Iehova ena Witnes taudia momo ese kara namo idia hahedinaraia namonamo, unai be idia hanaia laganidia lalonai taunimanima ese niuspepa  dekenai idia halasia herevadia amo ita itaia. Hegeregere, Italy ena niuspepa ta (Il Tempo) ia gwau: “Iehova ena Witnes taudia ida idia gaukara hebou taudia idia gwau Witnes taudia be kara momokani taudia, idia abia dae gaudia idia abidadama henia momokani dainai toana be unai ese edia mauri ia biagua bamona; to kara maoromaoro idia badinaia dainai idia ita matauraia be namo.” Argentina ai, Buenos Aires ena niuspepa ta (Herald) ia gwau: “Idia hanaia laganidia lalonai Iehova ena Witnes taudia ese idia hahedinaraia idia be gaukara goadagoada, laloa namonamo, moni idia negea kava lasi, bona Dirava idia gari henia taudia.” Russia ena diba bada tauna ta Sergei Ivanenko, ia gwau: “Tanobada ibounai lalonai taunimanima idia diba Iehova ena Witnes taudia ese gavamani ena taravatu idia badinaia goevagoeva bona mai edia momokani ida takisi moni idia henia.” Iehova ena Witnes taudia ese Zimbabwe dekenai hebouhebou totona idia gaukaralaia gabuna ena biaguna ia gwau: “Lau itaia Witnes taudia haida ese momoru idia gogoa bona mei rumadia idia hagoevaia. Inai gabu idia rakatania neganai, gabu ia goeva momokani guna bamona lasi. Emui matamata taudia be kara namo taudia. Lau ura tanobada ibounai be Iehova ena Witnes taudia amo ia honu.”

Keristani Kamonai Karana

16. Iseda kara tanobada ena siahu taudia dekenai be edena bamona, bona dahaka dainai?

¹⁶ Petero ese iseda kara tanobada ena siahu taudia dekenai ia herevalaia danu. Ia gwau: “Taunimanima edia taravatu ibounai do umui badinaia, Lohiabada dainai. King do umui kamonai henia, badina ia be siahu bada herea tauna. Gavana taudia danu edia hereva do umui badinaia. Badina be king ese idia ia abia hidi, kara dika taudia do idia panisia, to kara namo taudia do idia hanamoa totona. Badina be Dirava ia ura be, emui kara namo dekena amo, kavakava taudia edia hereva kava do umui koua.” (1 Petero 2:​13-15) Ia gaukara namonamo gavamani amo ita abia namo idauidau ita moalelaia bona Petero ena hereva ita badinaia dainai, gavamani ena taravatu ita kamonai henia bona takisi ita henia. Ita abia dae Dirava ese gavamani taudia dekenai gwaumaoro ia henia kara dika taudia idia panisia totona, to tanobada ena siahu taudia ita kamonai henia ena badina badana be “Lohiabada dainai.” Unai be Dirava ena ura. Ma danu, ita ura lasi kara kerere dainai panisi ita abia bena Iehova ena ladana do ita hadikaia.​—⁠Roma 13:​1, 4-7; Tito 3:1; 1 Petero 3:⁠17.

17. Idia laloa namonamo lasi taudia ese ita idia inai henia neganai, dahaka ita diba momokani?

¹⁷ To madi, idia laloa namonamo lasi siahu taudia haida ese ita idia dagedage henia eiava dala ma haida amo ita idia inai henia​—⁠hegeregere samania koikoi herevadia idia halasia. To, Iehova ese ia abia hidi negana ai edia koikoi herevadia do ia hahedinaraia, bona edia “hereva kava” do ia koua. Iseda Keristani kara namo ese ia hahedinaraia daidia ese hereva momokani idia gwauraia. Unai dainai kara momokani gavamani taudia ese nega momo iseda kara namodia dainai ita idia hanamoa.​—⁠Roma 13:3; Tito 2:​7, 8.

Dirava Ena Hesiai Taudia

18. Ita Keristani taudia ese edena dala idauidau ai iseda ura kwalimu ita gaukaralaia kerere lasi?

¹⁸ Petero ia sisiba, ia gwau: “Umui be ura kwalimu taudia, to inai ura kwalimu do umui gaukaralaia kerere lasi. Unai ura kwalimu lalonai umui noho neganai, hunia dekenai kara dika do umui karaia lasi, to Dirava ena hesiai taudia mai guia danu do umui noho.” (1 Petero 2:16; Galatia 5:13) Hari, Baibel ena hereva momokani dibaia karana ese hahediba hereva koikoidia amo ita ia ruhaia. (Ioane 8:32) Danu, ita be mai iseda ura kwalimu, bona sibona eda ura hegeregerena abia hidi ita karaia diba. To, iseda ura kwalimu ita gaukaralaia kerere lasi. Iseda turadia, dabua, tauanina ena toana, moale karadia​—⁠aniani bona inuinu gaudia danu⁠—ita abia hidi neganai, ita laloatao Keristani taudia be Dirava ena hesiai taudia, idia sibona idia hamoalea toho lasi. Ita ura Iehova ita hesiai henia,  to ita be iseda tauanina ena ura eiava inai tanobada ena sitaelo idauidau edia hesiai taudia lasi.​—⁠Galatia 5:24; 2 Timoteo 2:22; Tito 2:​11, 12.

19-21. (a) Edena dala ai siahu taudia ita laloa? (b) Edena dala ai haida ese edia ‘Keristani taudia ibounai idia lalokau henia’? (c) Iseda mai anina bada maduna be dahaka?

¹⁹ Petero be ma ia gwau: “Taunimanima ibounai do umui matauraia. Keristani taudia ibounai do umui lalokau henia. Dirava do umui gari henia. King do umui matauraia.” (1 Petero 2:17) Taunimanima ese dagi mai edia siahu idauidau idia abia karana be Iehova Dirava ese ia koua lasi dainai, unai taudia ita matauraia be namo. Iseda guriguri lalonai idia ita gwauraia danu, badina ita ura dala ia kehoa noho, Dirava ita badinaia bona mai maino ida iseda hesiai gaukara ita karaia noho totona. (1 Timoteo 2:​1-4) To unai nega tamona ai, ‘Keristani taudia ibounai ita lalokau henia.’ Nega ibounai iseda Keristani tadikaka edia namo ita tahua, ita ura lasi idia ita hadikaia.

²⁰ Hegeregere, Africa tanona ta dekenai idau bese dagedage henia karana ia vara neganai, Iehova ena Witnes taudia edia Keristani kara ia hedinarai namonamo. Switzerland ena niuspepa ta (Reformierte Presse) ia gwau: “Lagani 1995 ai, African Rights oreana ese . . . idia hamomokania dubu ibounai be [unai dagedage] lalonai idia vareai, to Iehova ena Witnes taudia be idia vareai lasi.” Tanobada ibounai ese unai dagedage ena sivarai idia kamonai neganai, Iehova ena Witnes taudia Europe dekenai ese edia tadikaka bona ma haida dekenai aniani bona muramura gaudia idia siaia haraga. (Galatia 6:10) Idia ese Aonega Herevadia 3:27 ena hereva idia badinaia, ia gwau: “Bema dika ese taunimanima namodia ia hadikaia, bona bema oi be mai oiemu dala do oi durudia neganai, oiemu durua do oi koua lasi.”

²¹ To, tanobada ena siahu taudia dekenai ita hahedinaraia hemataurai bona iseda tadikaka dekenai ita hahedinaraia lalokau ia hanaia mai anina bada maduna ta ia noho. Unai be dahaka? Petero ia gwau: “Dirava do umui gari henia.” Taunimanima ita matauraia sisina to Iehova ita matauraia bada be namo. Edena bamona unai be momokani? Bona edena dala ai iseda maduna Dirava dekenai bona tanobada ena siahu taudia dekenai ita sikelea namonamo diba? Unai henanadai be hereva gabena ese do ia haerelaia.

Oi Laloatao, A?

• Ruma bese lalonai Keristani taudia edia maduna idauidau be dahaka?

• Edena dala ai kongregesen lalonai henia karana ita hahedinaraia diba?

• Inai tanobada dekenai iseda maduna be dahaka?

• Kara namo taravatudia ita badinaia karana amo dahaka namo ita davaria diba?

[Study Questions]

[Picture on page 19]

Keristani ruma bese taudia be edena dala ai moale bada idia davaria diba?

[Pictures on page 20]

Dahaka dainai Iehova ena Witnes taudia ese idia ta ta idia lalokau henia?

[Pictures on page 20]

Iseda tadikaka ita lalokau henia diba, herevana idia ita diba lasi, a?