Iehova ese Oi Ia Laloa
Iehova ese Oi Ia Laloa
“Ia [Dirava] ese umui ia naria noho. Unai dainai emui laloa hekwarahi gaudia ibounai be iena imana dekenai do umui atoa.”—1 PETERO 5:7.
1. Iehova bona Satani edia kara be edena dala badana ai idia idau?
IEHOVA bona Satani edia kara be idia idau. Iehova kahirakahira ia lao noho tauna be Diabolo ese ia koua toho. Edia kara ena idau be buka ta ese ia gwauraia. Satani ena gaukara idauidau be Baibel bukana Iobu ese ia gwauraidia bona buka ta, Encyclopædia Britannica (1970), ia gwau: ‘Satani ena gaukara be tanobada ibounai ia loaloa bona do ia gwauraia dika karadia eiava taudia ia tahua; unai dainai iena gaukara be “Lohiabada ena matana” amo ia idau, badina Lohiabada be tanobada ia itaia noho bona namo gaudia ibounai ia hanamoa noho (II Chron. xvi, 9). Satani be taunimanima edia kara namo dekenai ia laloa kerere, unai dainai Dirava ena maoro bona siahu henunai unai do ia tohoa totona bona ia tohoa neganai Dirava ese ia atoa hetoana do ia hanaia lasi.’ Oibe, ia be Dirava amo ia idau momokani!—Iobu 1:6-12; 2:1-7.
2, 3. (a) Edena dala ai inai ladana “Diabolo” ena anina be Iobu dekenai ia vara gauna ai ia hedinarai momokani? (b) Baibel ese edena bamona ia hahedinaraia Satani ese Iehova ena hesiai taudia tanobada dekenai ia do samanidia noho?
2 Inai hereva “Diabolo” be Greek gado herevana amo ia mai bona ena anina be “samania koikoi tauna,” eiava “ladana hadikaia tauna.” Baibel bukana Iobu ese ia hahedinaraia, Satani be Iehova ena kamonai hesiai tauna Iobu ia gwauraia sibona ena namo totona Dirava ia hesiai henia, ia gwau: “Bema Iobu ese oi dekena amo gau ta ia abia lasi neganai, oi dekenai do ia gari, a?” (Iobu 1:9) Iobu bukana lalonai ia noho sivaraina ese ia hahedinaraia, ena be Iobu ese hahetoho bona hedibagani idauidau ia davaria, to Iehova kahirakahira dekenai ia lao. (Iobu 10:9, 12; 12:9, 10; 19:25; 27:5; 28:28) Ena hisihisi murinai, Dirava dekenai ia gwau: “Guna egu taiana sibona dekenai, oiemu sivarai lau kamonai, to harihari egu matana ese, oi idia itaia momokani vadaeni.”—Iobu 42:5.
3 Iobu ena nega amo ema bona hari, Satani ese Iehova ena kamonai hesiai taudia samania karana ia hadokoa vadaeni, a? Lasi. Apokalupo bukana ese ia hahedinaraia inai nega dokona lalonai, Satani ese Keriso ena horoa tadikaka bona edia kamonai bamodia danu ia do samanidia noho. (2 Timoteo 3:12; Apokalupo 12:10, 17) Unai dainai, gau badana be ita Keristani taudia momokanidia ibounai ese ita ia laloa Diravana, Iehova, ita kamonai henia bona ia ita lalokau henia bada dainai ita hesiai henia be namo, unai amo Satani ena samani herevadia do ita hakoikoia. Unai bamona ita karaia neganai, Iehova ena kudouna do ita hamoalea.—Aonega Herevadia 27:11.
Iehova be Ita Ia Durua Daladia Ia Tahua
4, 5. (a) Iehova be Satani bamona lasi, to ia ese tanobada dekenai dahaka ia tahua? (b) Bema ita ura Iehova ena lalo-namo ita abia, dahaka ita karaia be namo?
4 Satani be tanobada dekenai ia loaloa, ta ia samani koikoi bona ia ania ore totona. (Iobu 1:7, 9; 1 Petero 5:8) To Iehova be idau, do ia hagoadaia taudia ia tahua. Peroveta tauna Hanani ese King Asa ia hamaoroa: “Lohiabada ena matana ese tanobada ena kahana ibounai idia itaia noho, ia ese ia dekenai idia badinaia momokani taudia do ia hagoadaia totona.” (2 Sivarai 16:9) Edia kara be idau momokani; Satani be mai ena badu ida taunimanima ia tahua bona Iehova be mai ena lalokau ida taunimanima ia laloa!
5 Iehova be hehuni dalanai ita ia itaia noho lasi, eda kerere ibounai ia diba totona. Salamo torea tauna ia gwau: “Bema oi ese aiemai kara dika ibounai oi duahia neganai, daika ese oiemu kota lalonai ia kwalimu diba?” (Salamo 130:3) Unai henanadai ena haere be: ta lasi. (Hadibaia Tauna 7:20) Bema mai iseda kudouna ibounai ida Iehova kahirakahira ita lao, iena matana be iseda latanai, ita do ia gwauraia dika totona lasi, to iseda hekwarahi ia itaia bona heduru bona eda dika gwauatao totona ita henia guriguridia ia haere henia totona. Aposetolo Petero ia gwau: “Lohiabada ese, kara maoromaoro taudia ia naridia noho, bona edia guriguri ia kamonai henia noho. To Lohiabada ese, kara dika taudia edia dala ia koua noho.”—1 Petero 3:12.
6. Edena dala ai Davida dekenai ia vara gauna be ita ia hagoadaia bona ia sisiba henia?
6 Davida be goevadae lasi tauna bona kara dika badana ia karaia. (2 Samuela 12:7-9) To ena lalo-hekwarahi ibounai be Iehova dekenai ia gwauraia bona guriguri goadagoada karana amo ia kahirakahira dekenai ia lao. (Salamo 51:1-12) Iehova ese ena guriguri ia kamonai henia bona ena kara dika ia gwauatao, to ia karaia kara dika dainai ia vara anina dikana ia abia. (2 Samuela 12:10-14) Unai ese ita ia hagoadaia bona ia sisiba henia be namo. Ita ia hagoadaia badina ita diba bema ita helalo-kerehai momokani, Iehova ese mai ena ura ida iseda kara dika do ia gwauatao, to sisiba ita abia badina ita lalo-parara kara dika ese nega momo anina dikana ia havaraia. (Galatia 6:7-9) Bema ita ura Iehova kahirakahira ita lao, namona be Ia idia hamoalea lasi gaudia amo ita siri momokani.—Salamo 97:10.
Iehova ese Ena Taunimanima Ia Veria Mai Ia Dekenai
7. Iehova be edena bamona taudia ia itadia, bona edena dala ai ia dekenai ia veridia mai?
7 Davida be ena ane ta lalonai ia gwau: “Lohiabada e, oi be ataiai momokani oi noho, to oi ese manau taudia oi laloa noho, bona hekokoroku taudia ese, oi dekena amo idia hunia diba lasi.” (Salamo 138:6) Unai hegeregerena, ane ma ta ia gwau: “Daika be Lohiabada iseda Dirava hegeregerena? Lohiabada be guba ena ataiai ia helai noho, to ia ese iena kwarana ia atoa diho, iena matana ia negea, guba bona tanobada ia itaia noho. Ia ese ogogami taudia, be tano ena kahu dekena amo ia abia isi noho.” (Salamo 113:5-7) Oibe, guba bona tanobada ia Havaraia Siahu Ibounai Diravana be inai tanobada ia itaia bona ia ese “manau taudia,” “ogogami taudia” bona ‘kara dika rohoroho ibounai dainai idia taitai bona idia lalohisihisi noho taudia’ ia itadia noho. (Esekiela 9:4) Iena Natuna amo unai bamona taudia be ia dekenai ia veridia mai. Iesu be tanobada dekenai ia noho neganai, ia gwau: “Lauegu Tamana, lau ia siaia Diravana, ese do ia veria mai tauna sibona lau dekenai do ia mai diba. . . . Egu Tamana ese bema ia durua lasi tauna, be lau dekenai do ia mai diba lasi.”—Ioane 6:44, 65.
8, 9. (a) Dahaka dainai ita ibounai be Iesu kahirakahira ita lao be gau badana? (b) Dahaka dainai mauri davalaia boubouna be mai anina bada?
8 Taunimanima ibounai be Iesu dekenai idia mai bona ena mauri davalaia boubouna idia abidadama henia be namo, badina idia vara neganai idia be kara dika taudia, bona Dirava amo idia noho daudau. (Ioane 3:36) Dirava ida maino idia karaia be gau badana. (2 Korinto 5:20) Dirava ia naria lasi ela bona kara dika taudia idia noinoi bena idia ida maino idia karaia diba dalana ta ia karaia. Aposetolo Paulo ia gwau: “Dirava ese iena lalokau badana ia hedinaraia ita dekenai, badina ita be do kara dika noho taudia neganai, Keriso be ita dainai ia mase. . . . Guna ita maino lasi Dirava dekenai, to iena Natuna ia mase dekena amo maino ia karaia, vadaeni Dirava bona ita be turana vadaeni. . . . Momokani, Keriso ese ita do ia hamauria, badina be ia mauri noho!”—Roma 5:8, 10.
9 Dirava be taunimanima ida maino ia karaia noho, bona unai hereva momokani hereadaena be aposetolo Ioane ese ia hamomokania, ia gwau: “Dirava ese iena lalokau ita dekenai, be inai bamona ia hedinaraia: Ia ese iena Natuna tamona tanobada dekenai ia siaia, ia dekena amo mauri do ita abia totona. Lalokau ena anina be inai: Ita ese Dirava ita lalokau henia lasi, to Dirava ese ita ia lalokau henia. Bona ia ese iena Natuna ia siaia, ia sibona be iseda dika gwauatao dalana totona.” (1 Ioane 4:9, 10) Dirava ese unai dala ia karaia, to taunimanima ese idia karaia lasi. ‘Kara dika taudia,’ Ia ‘ida idia maino lasi’ taudia unai, dekenai lalokau bada herea ia hahedinaraia Diravana dekenai oi ura oi lao kahirakahira, ani?—Ioane 3:16.
Iehova Ita Tahua be Gau Badana
10, 11. (a) Iehova ita tahua totona dahaka ita karaia be namo? (b) Satani ena tanobada dikana be edena bamona ita laloa be namo?
10 Momokani, Iehova ese ita ia doria lasi ia kahirakahira ita lao totona. Namona be ‘Dirava do ita tahua, bona sedira ita tahua noho neganai do ita davaria. To momokani, Dirava be daudau lasi ita ta ta dekenai.’ (Kara 17:27) Namona be ita lalo-parara Iehova ita kamonai henia be maoro. Hahediba tauna Iamesi ia gwau: “Dirava ena ura do umui karaia. Satani do umui tuari henia, vadaeni umui dekena amo do ia heau boio. Dirava dekenai do umui raka kahirakahira lao, vadaeni ia ese umui dekenai do ia raka kahirakahira mai. Kara dika taudia e, emui imana do umui huria. Keristani koikoi taudia e, laloa rua dekena amo umui emui kudouna do umui hagoevaia.” (Iamesi 4:7, 8) Namona be eda lalona ita hadaia goada Diabolo do ita dadaraia bona Iehova ena kahanai ita gini goada.
11 Unai ena anina be Satani ena tanobada dikana amo ita gini siri. Iamesi ia gwau danu: “Umui diba lasi, a, bema umui ura tanobada danu umui turana karaia neganai, inai be umui ese Dirava umui tuari henia noho?” (Iamesi 4:4) Unai hegeregerena, bema ita ura Iehova ena turadia ai ita lao, namona be ita lalo-parara Satani ena tanobada ese ita do ia inai henia.—Ioane 15:19; 1 Ioane 3:13.
12. (a) Davida ese dahaka hagoadaia herevadia ia torea? (b) Iehova ese edena sisiba herevana be peroveta tauna Asaraia amo ia gwauraia?
12 Satani ena tanobada ese dala haida amo ita ia dagedage henia neganai, gau badana be guriguri amo Iehova ena heduru ita noia. Iehova ese nega momo ia hamauria tauna, Davida, be ita ia hagoadaia, ia gwau: “Lohiabada be ia dekenai idia boiboi taudia dekenai ia noho. Idia boiboi henia mai edia momokani danu taudia dekenai, Lohiabada be idia kahirakahira ia noho. Ia dekenai idia gari taudia dekenai, idia ura henia gaudia ia henia noho. Edia taitai ia kamonai, bona ia ese idia ia hamauria noho. Ia idia lalokau henia taudia, be Lohiabada ese ia naridia namonamo, to ia ese kara dika taudia do ia hadikaia ore.” (Salamo 145:18-20) Unai ane ese ia hahedinaraia, ita ta ta ese hahetoho ita davaria neganai Iehova ese ita ia hamauria diba bona ‘hisihisi badana’ ai ena taunimanima ibounai do ia hamauria. (Apokalupo 7:14) Bema Iehova kahirakahira ita noho, ia be ita kahirakahira ai do ia noho danu. “Dirava ena Lauma” ena siahu henunai, peroveta tauna Asaraia ese hereva momokani badana ta ia gwauraia: “Umui be Lohiabada dekenai umui noho neganai, ia ese umui dekenai danu ia noho. Bema Lohiabada umui tahua, umui ese do umui davaria. To bema umui rakatania, ia ese umui do ia rakatania.”—2 Sivarai 15:1, 2.
Namona be Ita Dekenai Iehova Ia Noho Momokani
13. Edena bamona ita hahedinaraia diba Iehova be ita dekenai ia noho momokani?
13 Aposetolo Paulo be Mose ia herevalaia neganai, ia gwau ‘Mose ena lalona ia goada noho, ita itaia diba lasi Diravana, be matana dekenai ia itaia bamona.’ (Heberu 11:27) Momokani, Mose be ena matana korikori amo Iehova ia itaia lasi. (Esodo 33:20) To ia dekenai Iehova be ia noho momokani bona unai be hegeregere Iehova ia itaia bamona. Unai hegeregerena, Iobu ena hahetoho murinai, ena abidadama ena matana amo Iehova ia itaia goevagoeva, ia be ena kamonai hesiai taudia amo hahetoho ia koudia lasi to ia be idia ia rakatania diba lasi Diravana. (Iobu 42:5) Baibel ese ia hahedinaraia Enoka bona Noa be “Dirava danu idia turana karaia.” Dirava hamoalea bona kamonai henia daladia idia tahua karana amo unai idia karaia. (Genese 5:22-24; 6:10, 22; Heberu 11:5, 7) Bema ita dekenai Iehova be ia momokani, hegeregere ia be Enoka, Noa, Iobu, bona Mose dekenai ia momokani bamona, ita karaia gaudia ibounai lalonai ‘ia do ita laloa’ bona ‘ia ese dala maorona ita dekenai do ia hadibaia.’—Aonega Herevadia 3:5, 6.
14. Iehova ita “badinaia” ena anina be dahaka?
14 Israela taudia be Gwauhamata Tanona dekenai kahirakahira idia vareai neganai, Mose ese idia ia sisiba henidia: “Lohiabada, emui Dirava ena murinai do umui raka, bona ia do umui gari henia. Lohiabada ena hereva do umui kamonai henia, iena hesiai gaukara do umui karaia, bona ia do umui badinaia.” (Deuteronomi 13:4) Idia be Iehova murinai do idia raka, do idia gari henia, kamonai henia, bona badinaia. Unai hereva “badinaia” idia herevalaia neganai, Baibel ia diba bada tauna ta ia gwau, “unai hereva be hetura korikori karana ia hahedinaraia.” Salamo torea tauna ia gwau: “Lohiabada idia gari henia taudia, be Lohiabada ese idia dekenai, iena hunia gaudia ia hadibaia noho.” (Salamo 25:14) Bema Iehova be ita dekenai ia noho momokani bona bema ia ita lalokau henia bada dainai ita ura lasi dala ta amo ia ita habadua, unai hetura karana namona do ita moalelaia diba.—Salamo 19:9-14.
Iehova ese Oi Ia Laloa be Oi Diba, A?
15, 16. (a) Salamo 34 ese edena bamona ia hahedinaraia Iehova ese ita ia laloa? (b) Bema Iehova ese ita dekenai ia karaia kara namodia ita laloatao be auka, dahaka ita karaia be namo?
15 Satani ena koikoi karadia ta be ia ura iseda Dirava, Iehova, ese ena kamonai hesiai taudia ia lalodia noho karana do ita laloaboio. Israela ena King Davida be dika bada ia davaria neganai danu, Iehova ena henari karana ia diba momokani. Davida be Gata ena King Akisi vairanai kavakava ena toana koikoi ia hahedinaraia neganai, ane namo hereana ta ia karaia, bona unai ane ese inai abidadama herevadia idia hahedinaraia: “Lau danu Lohiabada do ita hanamoa. Iena ladana do ita hanamoa hebou! Lohiabada dekenai lau guriguri, bona ia ese lau dekenai ia haere. Ia ese egu gari ibounai dekena amo, lau ia hamauria. Lohiabada ena aneru ese, Dirava dekenai idia gari taudia ia naridia noho, bona dika dekena amo ia hamauridia noho. Lohiabada ena kara do umui tahua namonamo, iena dala do umui tohoa namonamo, vadaeni do umui diba momokani, Lohiabada be namo momokani. Lohiabada dekenai idia abidadama taudia ese, moale do idia davaria. Lohiabada be lalohisihisi taudia kahirakahira ia noho, bona ia ese edia lalona ia ore taudia ia hamauria noho. Kara maoromaoro tauna ena hisihisi be momo, to Lohiabada ese unai tau do ia durua, vadaeni unai hisihisi do ia ore.”—Salamo 34:3, 4, 7, 8, 18, 19; 1 Samuela 21:10-15.
16 Iehova ena hahemauri siahuna oi abidadama henia momokani, a? Ena aneru amo oi ia naria karana oi diba, a? Oi mamia bona itaia vadaeni Iehova be ia namo, a? Iehova ese oi ia kara namo henia negana ta oi laloatao diba, a? Mani oi laloa lou. Haroro gaukara dekenai, reana hesiku mamina oi abia lalonai ruma ginigabena oi karaia neganai unai oi mamia, a? Reana ruma tauna ida umui kiki namo herea. Iehova ese oi dekenai goada ma haida ia henia bona oi ia hanamoa dainai, unai nega ai ia oi tanikiu henia, a? (2 Korinto 4:7) To, reana Iehova ese oi totona ia karaia kara namodia haida oi laloatao be auka. Reana ia hanaia vadaeni wiki ta, hua ta, lagani ta eiava lagani haida dekenai oi laloa lou. Bema unai bamona, namona be oi hekwarahi Iehova kahirakahira oi lao totona bona Iehova ese oi ia hakaua dalana oi itaia, ani? Aposetolo Petero ese Keristani taudia ia sisiba henia: “Dirava ena imana goadana henunai do umui manau. . . . Ia ese umui ia naria noho. Unai dainai emui laloa hekwarahi gaudia ibounai be iena imana dekenai do umui atoa.” (1 Petero 5:6, 7) Momokani, ia ese oi ia laloa bada karana dekenai do oi hoa bada!—Salamo 73:28.
Iehova Oi Tahua Noho
17. Iehova ita tahua noho totona, dahaka be gau badana?
17 Iehova ida iseda hetura karana idia hagoadaia karadia be do ita karaia noho. Iesu be guriguri amo ena Tamana dekenai ia gwau: “Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.” (Ioane 17:3) Iehova bona ena Natuna ita dibaia noho totona, anina be hanaihanai ita hekwarahi noho. “Dirava ena laloa dobu gaudia” ita lalo-pararalaia totona, guriguri bona lauma helaga edia heduru ita abia be gau badana. (1 Korinto 2:10; Luka 11:13) Danu, “hesiai tauna mai ena kamonai, bona mai ena kara maoromaoro” oreana edia hahekau ita abia be gau badana, “aniani neganai” iseda lalona be lauma aniani amo ita ubua totona. (Mataio 24:45) Unai orea amo, Iehova ese ita ia sisiba henia dina ta ta ai ena Hereva ita duahia, Keristani hebou ita lao henidia hanaihanai, bona mai eda kudouna ibounai ida “Basileia ena Sivarai Namona” harorolaia gaukarana ita karaia. (Mataio 24:14) Unai bamona ita karaia neganai, ita be ita ia laloa Diravana, Iehova, do ita tahua noho.
18, 19. (a) Namona be iseda lalona ita hadaia dahaka ita karaia totona? (b) Bema Diabolo ita dadaraia bona Iehova ita tahua noho, dahaka hahenamo do ita abia?
18 Satani be ia karaia diba gaudia ibounai ia karaia noho Iehova ena taunimanima dagedage henia, inai henia, bona hametaua karadia idauidau ia havaraia totona. Ia ura iseda maino bona noho namona Dirava ena vairanai ia hadikaia. Ia ura lasi kudou-maoro taudia ita tahua bona ita durudia Iehova ena lohia siahuna idia abia dae totona. To namona be Iehova ita badinaia noho bona ita abia dae ia ese kara dika taudia amo ita do ia hamauria. Iehova ena Hereva ese ita ia hakaua bona ena tanobada oreana ida ita gaukara goada neganai, ita diba momokani ia be hanaihanai do ia noho ita ia durua totona.—Isaia 41:8-13.
19 Unai dainai namona be ita ibounai ese Diabolo bona ena koikoi karadia ita dadaraia, bona nega ibounai iseda lalokau Diravana, Iehova, ‘ita do ia haginia goada bona iseda abidadama do ia hagoadaia’ tauna ita tahua noho. (1 Petero 5:8-11) Unai amo, ‘Dirava ena lalokau lalonai do ita noho bona Iesu Keriso do ita naria noho, ia ese iena bogahisihisi dainai mauri hanaihanai ita dekenai do ia henia’ totona.—Iuda 21.
Edena Bamona Do Oi Haere?
• “Diabolo” ena anina be dahaka, bona Diabolo be edena dala ai unai ladana ena anina ia hamomokania?
• Iehova ese tanobada taudia ia itaia karana be edena dala ai Diabolo ese taunimanima ia itaia karana amo ia idau?
• Dahaka dainai ta be Iehova kahirakahira ia lao totona mauri davalaia boubouna ia abia dae be namo?
• Iehova ita “badinaia” ena anina be dahaka, bona edena dala ai ia ita tahua noho diba?
[Study Questions]
[Picture on page 15]
Ena be Iobu ese hahetoho ia davaria, to ia lalo-parara Iehova ese ia laloa
[Pictures on page 16, 17]
Dina ta ta Baibel duahia karana, Keristani hebou lao henidia hanaihanai, bona haroro gaukara ita karaia goadagoada karana amo ita diba Iehova ese ita ia laloa