Keristani Gini Siri Karana Inai Nega Dokona Ai

“Idia be tanobada ena lasi, lau hegeregerena, lau be tanobada ena lasi.”​—⁠IOANE 17:⁠16.

1, 2. Iesu be iena murinai idia raka taudia edia kara inai tanobada dekenai be edena bamona ia gwauraia, bona ena hereva dainai dahaka henanadai idia vara?

 IESU ena tanobada maurina goevadaena ena hanuaboi ginigabena ai, iena hahediba taudia idia kamonai noho lalonai ia ese guriguri lata hereana ta ia gwauraia. Unai guriguri lalonai, Keristani taudia momokanidia ibounai edia mauri dalana ia gwauraia. Iena murinai idia raka taudia ia herevalaia neganai, ia gwau: “Oiemu hereva lau henia vadaeni idia dekenai, bona tanobada ese ia badu henia vadaeni idia dekenai, badina idia be tanobada ena lasi, lau hegeregerena, lau be tanobada ena lasi. Lau noinoi lasi tanobada dekena amo idia oi kokia totona, to lau noinoi Tau Dikana dekena amo idia do oi hamauria. Idia be tanobada ena lasi, lau hegeregerena, lau be tanobada ena lasi.”​—⁠Ioane 17:​14-16.

² Iesu be nega rua ia gwau iena murinai idia raka taudia be inai tanobada ena lasi. Ma danu, tanobada amo idia idau karana ese badu do ia havaraia​—⁠tanobada ese idia do ia badu henia. To, Keristani taudia idia lalohisihisi lasi be namo; Iehova ese idia do ia naria. (Aonega Herevadia 18:10; Mataio 24:​9, 13) Iesu ena hereva dainai, reana ita henanadai: ‘Dahaka dainai Keristani taudia momokanidia  be tanobada ena lasi? Idia be tanobada ena lasi ena anina be dahaka? Bema tanobada ese Keristani taudia ia badu henia, idia ese edena bamona inai tanobada idia laloa? Inai tanobada ena gavamani be edena bamona idia laloa?’ Baibel ena haere unai henanadai dekenai be gau badana, badina ita ibounai dekenai idia be mai anina bada.

‘Ita be Dirava Ena’

3. (a) Dahaka dainai ita be tanobada amo ita idau? (b) Dahaka ese ia hamomokania inai tanobada be “Satani” ena siahu henunai ia noho?

³ Ita be inai tanobada ena lasi ena badina ta be Iehova ida ita abia hetura karana namona. Aposetolo Ioane ia gwau: “Ita diba danu, ita be Dirava ena natuna taudia, bona Satani ese tanobada taudia ibounai ia gunalaia noho.” (1 Ioane 5:19) Ia hedinarai goevagoeva Ioane ena hereva inai tanobada dekenai be ia momokani vaitani. Hari inai negai, tanobada dekenai idia vara tuari, taravatu utua karadia, dagedage, hisihisi, kara koikoi bona matabodaga karadia ese idia hamomokania Satani be inai tanobada ia biagua, Dirava lasi. (Ioane 12:31; 2 Korinto 4:4; Efeso 6:12) Ta be Iehova ena Witnes ai ia lao neganai, unai bamona kara kereredia do ia karaia lasi bona ia abia dae lasi, bona unai dainai ia be tanobada ena lasi.​—⁠Roma 12:2; 13:​12-14; 1 Korinto 6:​9-11; 1 Ioane 3:​10-12.

4. Edena dala idauidau amo ita hahedinaraia ita be Iehova ena?

⁴ Ioane ia gwau Keristani taudia be inai tanobada amo idia idau, idia be “Dirava ena.” Iehova idia gwauhamata henia taudia ibounai be iena. Aposetolo Paulo ia gwau: “Bema ita mauri, be Lohiabada dekenai ita mauri, bona bema ita mase, be Lohiabada dekenai do ita mase. Unai dainai ita mauri noho o do ita mase, ita be Lohiabada ena.” (Roma 14:8; Salamo 116:15) Ita be Iehova ena dainai, ia sibona ita tomadiho henia. (Esodo 20:​4-6) Unai dainai, Keristani tauna momokanina be tanobada gauna ta dekenai ena mauri do ia henia lasi. Bona ena be bese edia pepe ia matauraia, to ena kara amo eiava ena kudouna lalonai idia ia tomadiho henia lasi. Ia ese spot gadara idia goadalaia taudia eiava hari inai nega ena ladana bada taudia ia tomadiho henia lasi. Momokani, haida ese edia ura hegeregerena idia kara ena maoro ia matauraia, to ia ese Havaraia Tauna sibona ia tomadiho henia. (Mataio 4:10; Apokalupo 19:10) Unai kara dainai danu ia be tanobada amo ia idau.

“Lauegu Basileia be Inai Tanobada Gauna Lasi”

5, 6. Ita be Dirava ena Basileia henunai ita noho dainai, edena dala ai ita be inai tanobada amo ita idau?

⁵ Keristani taudia be Keriso Iesu ena murinai idia raka taudia bona Dirava ena Basileia henunai idia noho taudia, unai dainai idia be tanobada ena lasi danu. Iesu be Pontio Pilato vairanai idia kota henia neganai, ia gwau: “Lauegu Basileia be inai tanobada gauna lasi. Bema lauegu Basileia be inai tanobada gauna, egu hesiai taudia be do idia tuari, Iuda taudia edia imana dekena amo lau do idia hamauria. Gau tamona, lauegu Basileia be iniseni lasi.” (Ioane 18:36) Unai Basileia amo Iehova ese ena ladana do ia hahelagaia, iena lohia siahuna ena maoro do ia hamomokania, bona iena ura gauna be tanobada dekenai do ia vara, guba dekenai ia vara bamona. (Mataio 6:​9, 10) Iesu ena hesiai gaukara ibounai lalonai, Basileia ena sivarai namona ia harorolaia, bona ia gwau iena murinai idia raka taudia ese unai gaukara do idia karaia ela bona inai tanobada dikana ena dokona. (Mataio 4:23; 24:14) Lagani 1914 ai, Apokalupo 11:15 ena peroveta herevana ia guguru, ia gwau: “Tanobada biagua siahuna be iseda Lohiabada bona iena Keriso idia abia vadaeni. Bona Lohiabada ese tanobada do ia biagua momokani, ela bona hanaihanai.” Kahirakahira momokani, unai guba Basileiana sibona ese taunimanima ibounai do ia lohiaia. (Daniela 2:44) Nega ta ai, tanobada ena lohia taudia  danu ese ena siahu do idia lalo-pararalaia.​—⁠Salamo 2:​6-12.

⁶ Unai ibounai idia diba dainai, hari inai negai Keristani taudia momokanidia be Dirava ena Basileia henunai idia noho, bona Iesu ena sisiba idia badinaia, bena ‘Dirava ena Basileia bona iena kara maoromaoro idia tahua guna.’ (Mataio 6:33) Ita gwau lasi unai ena anina be idia noholaia tanodia idia dagedage henia, lasi, to unai kara dainai lauma dalanai idia be tanobada amo idia idau. Aposetolo taudia edia nega hegeregerena, hari Keristani taudia edia gaukara badana be ‘Dirava ena Basileia idia hadibaia bona idia harorolaia.’ (Kara 28:23) Taunimanima edia gavamani ta be mai ena maoro lasi unai gaukara ia koua totona.

7. Dahaka dainai Keristani taudia idia gini siri, bona edena dala ai unai idia hahedinaraia?

⁷ Iehova ena Witnes taudia be Iehova ena bona idia be Iesu ena murinai idia raka taudia bona danu idia be Dirava ena Basileia henunai idia noho taudia dainai, lagani 2000 vairana bona murina laganidia lalonai, tano tamona taudia idia karaia tuaridia bona tanobada besedia huanai idia vara tuaridia amo idia gini siri. Unai tuaridia lalonai kahana ta dekenai idia gini lasi, tuari gaudia idia abia lasi ta idia hamasea totona, bona tanobada ena lalohadai ta totona lalo-ani herevadia idia gwauraia loaloa lasi. Dagedage bada negadia lalonai abidadama goadana idia hahedinaraia, lagani 1934 ai Germany ena Nazi lohia taudia dekenai idia gwauraia hakaua herevana idia badinaia, ia gwau: “Politikol karadia ai laloa lasi, to Dirava ena Basileia iena King Keriso henunai ai badinaia momokani. Tau ta do ai haberoa eiava hadikaia lasi. Ai ura maino dekenai ai noho bona dala ia kehoa neganai taunimanima ibounai ai kara namo henia.”

Keriso Ena Hereva Gwauraia Taudia Bona Ena Gaukara Taudia

8, 9. Hari inai negai, edena dala ai Iehova ena Witnes taudia be Keriso ena hereva gwauraia taudia bona ena gaukara taudia, bona unai dainai edia kara tanobada dekenai be edena bamona?

⁸ Paulo ese ia bona horoa Keristani taudia ma haida ia herevalaia bona ia gwau “ai be Keriso ena hereva gwauraia hedinarai taudia, Dirava ese aiemai uduna dekena amo umui dekenai ia noia noho.” (2 Korinto 5:20; Efeso 6:20) Lagani 1914 amo ema bona hari, ita gwau diba Dirava ese ena lauma amo ia horoa Keristani taudia be Dirava ena Basileia ena hereva gwauraia taudia, bona idia be unai Basileia ena “natudia.” (Mataio 13:​38, NW; Filipi 3:20; Apokalupo 5:​9, 10) Danu, Iehova ese bese ibounai amo “mamoe idaudia” edia ‘hutuma bada herea’ ia haboua, unai taudia be tanobada helarona idia abia Keristani taudia, idia ese horoa taudia idia durua Keriso ena hereva idia gwauraia totona. (Apokalupo 7:9; Ioane 10:16) Unai “mamoe idaudia” ita gwauraia diba, Dirava ena Basileia ena “gaukara taudia.”

⁹ Idau tano ena gavamani ena hereva gwauraia hedinarai tauna bona ena gaukara taudia be idia noholaia tanona ena gaukara idauidau lalonai idia vareai lasi. Unai hegeregerena, Keristani taudia be inai tanobada besedia edia politikol karadia amo idia gini siri. Idia ese bese, kopina ena kala, mauri dala, eiava moni dainai idia parara oreana ta idia durua lasi bona idia dagedage henia lasi. (Kara 10:​34, 35) To, “taunimanima ibounai dekenai kara namodia” idia karaia. (Galatia 6:10) Iehova ena Witnes taudia edia gini siri karana dainai ta be mai ena momokani ida ia gwau diba lasi idia be kopina ena kala, bese, eiava iduhu ma ta taudia edia kahana dekenai idia noho dainai, edia sivarai ia dadaraia diba.

Lalokau be Edia Toana Badana

10. Keristani tauna dekenai lalokau be mai anina bada, a?

¹⁰ Ita herevalaia vadaeni gaudia sibona lasi, to  Keristani taudia be tanobada ena kara idauidau amo idia gini siri ena badina ma ta be edia hetura karana Keristani taudia ma haida ida. Iesu be iena murinai idia raka taudia dekenai ia gwau: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” (Ioane 13:35) Tadikaka lalokau henia karana be Keristani tauna ena kara badana. (1 Ioane 3:14) Keristani tauna be Iehova bona Iesu ia hetura henia dainai, ena hetura karana Keristani taudia ma haida ida be ia goada. Iena lalokau be iena gabu dekenai idia noho kongregesen taudia sibona dekenai ia hahedinaraia lasi. To iena “Keristani varavara taudia tanobada kahana ibounai dekenai” ia lalokau henia.​—⁠1 Petero 5:⁠9.

11. Iehova ena Witnes taudia ese idia ta ta idia lalokau henia dainai, edia kara be edena bamona?

¹¹ Hari inai negai, Iehova ena Witnes taudia ese edia tadikaka idia lalokau henia be Isaia 2:4 ena hereva idia hagugurua karana amo idia hahedinaraia, ia gwau: “Idia ese edia tuari kaia be hama dekenai do idia makohia, bona unai makohia auri dekena amo, tano geia auri do idia karaia. Bona idia edia io ena auri danu do idia botaia palaka, au rigi utua kaia do idia halaoa. Bese ta ese bese ta dekenai do ia tuari henia lou lasi, bona tuari dalana be do idia hadibaia lou lasi.” Keristani taudia momokanidia be Iehova ese ia hadibaia dainai, idia be Dirava ida bona idia ta ta ida maino dekenai idia noho. (Isaia 54:13) Dirava bona edia tadikaka idia lalokau henia dainai, idia ese edia Keristani tadikaka​—⁠eiava taunimanima ma ta​—⁠tano ma haida dekenai, do idia tuari henia lasi. Edia maino bona lalo-tamona be edia tomadiho ena kahana badana ta, ia hahedinaraia goevagoeva Dirava ena lauma helaga idia abia momokani. (Salamo 133:1; Mika 2:12; Mataio 22:​37-39; Kolose 3:14) Idia ura ‘maino do idia tahua, bona maino kara do idia karaia noho,’ badina idia diba “Lohiabada ese kara maoromaoro taudia ia naria noho.”​—⁠Salamo 34:​14, 15.

Keristani Taudia ese Tanobada Idia Laloa Dalana

12. Iehova ese inai tanobada taudia be edena bamona ia laloa, bona Iehova ena Witnes taudia ese edena bamona unai idia tohotohoa?

¹² Iehova ese inai tanobada ia hahemaoro henia vadaeni, to inai tanobada dekenai idia noho taudia ibounai ia do hahemaoro henia lasi. Ia abia hidi negana ai, Iesu amo unai do ia karaia. (Salamo 67:​3, 4; Mataio 25:​31-46; 2 Petero 3:10) Unai ia do vara lasi neganai, taunimanima dekenai lalokau bada ia hahedinaraia. Ia sibona ia havaraia Natuna ia henia, taunimanima ibounai ese mauri hanaihanai do idia abia diba totona. (Ioane 3:16) Ita be Keristani taudia dainai, Dirava ena lalokau ita tohotohoa bona Dirava ese ia henia hahemauri daladia be ma haida dekenai ita herevalaia, herevana nega momo iseda hereva idia abia dae lasi.

13. Tanobada ena lohia taudia be edena bamona ita laloa be namo?

¹³ Edena dala ai tanobada ena lohia taudia ita laloa be namo? Paulo ese unai henanadai ia haerelaia, ia gwau: “Taunimanima ibounai ese  gavamani do idia kamonai henia. Badina be gavamani ta ia noho diba lasi bema Dirava ia ura lasi neganai. Gavamani ena siahu be Dirava ese ia henia.” (Roma 13:​1, 2) Siahu Ibounai Diravana ese taunimanima ia koua lasi dainai idia ese “siahu” idia abia (haida edia siahu ese ma haida edia ia hanaia, to idia ibounai edia siahu be Iehova ena siahu henunai). Keristani tauna ese tanobada ena siahu taudia ia kamonai henia, badina unai be Iehova kamonai henia karana ena kahana ta. To bema taunimanima edia gavamani ena taravatu ese Dirava ena taravatu ia utua be edena bamona?

Dirava Bona Kaisara Ena Taravatu

14, 15. (a) Edena dala ai Daniela ese kamonai karana dekenai ia vara hepapahuahu ta ia koua diba? (b) Heberu memero toi be kamonai karana dekenai ia vara hepapahuahu idia koua diba lasi neganai, dahaka idia karaia?

¹⁴ Daniela bona ena bamodia toi ese taunimanima edia gavamani kamonai henia lalonai Dirava ena siahu henunai noho karana dekenai haheitalai namona idia hahedinaraia. Unai Heberu memero matamatadia foa be igui hesiai taudia bamona Babulonia dekenai idia noho neganai, idia ese unai tano ena taravatu idia kamonai henia, bona karaharaga idia abidia hidi gau ma haida idia hadibadia totona. Daniela ia lalo-parara reana unai hadibaia karana lalonai Iehova ena Taravatu do idia makohia, unai dainai biaguna ta ida unai gaudia ia kikilaia. Unai dainai, dala idaudia idia karaia unai Heberu memero foa edia lalona ena mamina idia matauraia totona. (Daniela 1:​8-17) Iehova ena Witnes taudia ese hekwakwanai koua totona, Daniela ena haheitalai idia tohotohoa bona dala namona ai siahu taudia dekenai edia lalohadai idia gwauraia.

¹⁵ To gabeai, kamonai henia karana dainai ia vara hepapahuahu idia koua diba lasi. Babulonia ena king be Dura ena taora ai kaivakuku badana ta ia haginia bona oda ia henia, lohia taudia bona distrik idia naria taudia be unai kaivakuku hahelagaia ena aria dekenai idia mai totona. To hari, Daniela ena turadia toi ese Babulonia ena distrik ibounai naria gaukarana idia abia vadaeni, unai dainai idia danu ese unai oda idia badinaia be namo. Unai aria ena kahana ta lalonai, idia hebou taudia ibounai be unai kaivakuku vairanai do idia tui diho. To unai Heberu memerodia toi idia diba unai ese Dirava ena taravatu do ia utua. (Deuteronomi 5:​8-10) Unai dainai, taunimanima ibounai idia tui diho neganai, idia tui diho lasi. King ena oda idia kamonai henia lasi karana dainai, mase dikana amo edia mauri idia haboioa diba, bona hoa karana ta sibona amo idia roho mauri; to idia laloa Iehova idia kamonai henia dainai, edia mauri idia haboioa be namo.​—⁠Daniela 2:49–3:⁠29.

16, 17. Aposetolo taudia be haroro gaukara hadokoa ena oda idia abia neganai, edena bamona idia kara, bona dahaka dainai?

¹⁶ Aposetolo edia negai Ierusalema dekenai, Iesu Keriso ena aposetolo taudia idia boiria Iuda gunalaia taudia edia vairanai idia vareai totona, bona idia haganidia Iesu ena ladana dekenai do idia haroro lasi. Edena bamona idia kara? Iesu ese idia ia hagania bese ibounai dekenai, Iudea dekenai danu, taunimanima be hahediba taudia ai do idia halaoa. Danu, idia ia hamaoroa idia be iena sivarai do idia harorolaia Ierusalema dekenai bona tanobada ena kahana ibounai dekenai. (Mataio 28:​19, 20; Kara 1:⁠8) Aposetolo taudia idia diba Iesu ena hahegani ese Iehova ena ura idia dekenai ia hahedinaraia. (Ioane 5:30; 8:28) Unai dainai, idia gwau: “Dirava ai kamonai henia be namo, taunimanima ai kamonai henia be dika.”​—⁠Kara 4:​19, 20; 5:⁠29.

¹⁷ Aposetolo taudia idia gwau-edeede lasi. (Aonega  Herevadia 24:21) To, Dirava ena ura idia karaia karana be taunimanima edia lohia taudia ese idia koua neganai, idia gwau sibona, “Dirava ai kamonai henia be namo, taunimanima ai kamonai henia be dika.” Iesu ia gwau namona be “Kaisara ena gaudia umui henia Kaisara dekenai, Dirava ena gaudia umui henia Dirava dekenai.” (Mareko 12:17) Bema taunimanima edia hereva dainai Dirava ena hahegani ita badinaia lasi, Dirava ia abia be maoro gauna be taunimanima dekenai ita henia unai. To, Kaisara ena gau ibounai be Kaisara dekenai ita henia, to Iehova ena siahu badana ita abia dae. Ia be Guba bona Tanobada edia Lohia Badana, Havaraia Tauna, bona siahu ibounai ena Badina.​—⁠Apokalupo 4:⁠11.

Do Ita Gini Goada

18, 19. Iseda tadikaka momo be edena dala ai idia gini goada, bona edena dala ai edia haheitalai ita tohotohoa diba?

¹⁸ Hari, gavamani momo ese Iehova ena Witnes taudia edia gini siri karana idia abia dae, bona unai dainai ita moale. To, tano haida dekenai, Witnes taudia ese dagedage bada idia davaria. Idia hanaia laganidia handred bamona lalonai ema bona hari, iseda tadikaka bona taihu haida be idia hekwarahi bada, lauma dalanai “abidadama ena heau helulu” idia karaia.​—⁠1 Timoteo 6:⁠12.

¹⁹ Edena dala ai idia bamona ita gini goada diba? Gau ginigunana be, ita laloatao dagedage do ita davaria diba. Bema unai bamona gaudia ita davaria, namona be ita lalohisihisi eiava ita hoa lasi. Timoteo ese Paulo ia sisiba henia: “Dirava badinaia idia ura taudia ibounai ese dagedage ena hisihisi do idia abia.” (2 Timoteo 3:12; 1 Petero 4:12) Satani ena siahu ia bada tanobadana lalonai, edena bamona dagedage do ita davaria lasi? (Apokalupo 12:17) Ita do abidadama noho lalonai, nega ibounai haida idia laloa maoro lasi bona ita do “idia hereva dika henia noho.”​—⁠1 Petero 4:⁠4.

20. Edena hagoadaia hereva momokanidia ita abia?

²⁰ Gau iharuana be, ita diba momokani Iehova bona iena aneru ese ita do idia durua. Idaunegai ia noho tauna Elisaia ese ia gwauraia bamona, “ita idia durua taudia be momo, to unai orea idia durua taudia be momo lasi.” (2 King Taudia 6:16; Salamo 34:⁠7) Reana Iehova ese ena badina namona dainai, nega sisina lalonai iseda inai taudia edia dagedage karana ia koua lasi. To, hanaihanai ita dekenai goada do ia henia ita haheauka noho totona. (Isaia 41:​9, 10) Haida be idia mase vadaeni, to unai dainai ita laloa momo lasi. Iesu ia gwau: “Tauanina be do idia alaia diba, to lauma be do idia alaia diba lasi taudia dekenai do umui gari lasi. To lauma bona tauanina ruaosi [Gehena] dekenai do ia alaia mase diba Diravana dekenai be do umui gari, be namo.” (Mataio 10:​16-23, 28) Inai tanobada dekenai ita be “hanua lasi taudia bamona.” Iseda nega ita gaukaralaia “mauri korikori,” mauri hanaihanai unai, Dirava ena tanobada matamatana dekenai ita abia totona. (1 Petero 2:11; 1 Timoteo 6:19; NW ) Bema Dirava ita kamonai henia noho, taunimanima ta ese unai ahuna namona be ita dekena amo do ia kokia diba lasi.

21. Namona be hanaihanai dahaka ita laloatao?

²¹ Unai dainai, namona be Iehova Dirava ida ita abia hetura karana namona ita laloatao. Ita be Keriso ena murinai ita raka bona Basileia henunai ita noho taudia bona unai hahenamo be hanaihanai ita laloa bada be namo. Mai iseda kudouna ibounai ida iseda tadikaka ita lalokau henia, bona hanaihanai idia amo ita abia lalokau ita moalelaia be namo. Bona gau badana be salamo torea tauna ena hereva ita badinaia, ia gwau: “Lohiabada dekenai do umui abidadama henia. Do umui laloa goada, daradara lasi. Lohiabada dekenai do umui abidadama henia.” (Salamo 27:14; Isaia 54:17) Bena, guna idia noho Keristani taudia momo herea bamona, mai eda helaro ida ita gini goada​—⁠ita be tanobada ena lasi bona ita be Keristani gini siri karana ita hahedinaraia taudia.

Anina Oi Gwauraia Diba, A?

• Edena dala ai Iehova ita tura henia dainai tanobada amo ita idau?

• Ita be Dirava ena Basileia henunai ita noho dainai, edena dala amo inai tanobada amo ita gini siri?

• Edena dala ai tadikaka lalokau henia karana dainai ita be inai tanobada amo ita idau?

[Study Questions]

[Picture on page 25]

Ita be Dirava ena Basileia henunai ita noho dainai, iseda kara inai tanobada dekenai be edena bamona?

[Picture on page 26]

Hutu tauna ta bona Tutsi tauna ta be idia gaukara hebou mai moale ida

[Picture on page 27]

Iuda bona Arab Keristani tadikakadia

[Picture on page 27]

Serbia, Bosnia, bona Croatia Keristani taudia ese idia ta ta edia hebamo idia moalelaia

[Picture on page 28]

Lohia taudia ese ita idia hagania Dirava ena taravatu ita makohia neganai, dala maorona be dahaka?