“Satani Do Umui Tuari Henia”

“Satani do umui tuari henia, vadaeni umui dekena amo do ia heau boio.”—IAMESI 4:⁠7.

1. Hari ia noho tanobadana be edena bamona ita gwauraia diba, bona dahaka dainai horoa taudia bona edia bamodia idia gima be gau badana?

 “DIRAVA ia boio vadaeni, to Diabolo ia noho.” Unai hereva be France buka torea tauna André Malraux ese ia gwauraia, bona unai hereva ese inai nega ai idia noho taudia edia noho dalana ia hahedinaraia momokani. Taunimanima idia karaia gaudia ese Diabolo ena koikoi karadia idia hahedinaraia badabada, to Dirava ena ura idia hahedinaraia lasi. Satani be ‘hoa bona toa karadia idauidau momo dekena amo taunimanima momo ia hakaua kerere noho bona kara kerere idauidau ibounai dekena amo, mase dala dekenai idia raka noho taudia ia koidia.’ (2 Tesalonika 2:​9, 10) Inai “nega ena dokona” lalonai Satani ese Dirava ena gwauhamata hesiai taudia, ‘Dirava ena taravatu idia badinaia momokani bona Iesu ena hereva momokani idia gwauraia hedinarai, ma idia badinaia’ horoa Keristani taudia unai, ia dagedage henidia. (2 Timoteo 3:1; Apokalupo 12:​9, 17) Unai horoa Keristani taudia bona edia bamodia, tanobada helarona idia abia taudia, idia gima noho be gau badana.

2. Satani ese edena dala ai Heva ia koia, bona aposetolo Paulo ese dahaka ia lalo-hekwarahilaia?

² Dala ibounai dekenai Satani be koikoi tauna. Ia ese gaigai ta amo Heva ia koia, bena Heva ia laloa bema Dirava dadaraia karana ia karaia, moale bada do ia davaria. (Genese 3:​1-6) Lagani 4,000 bamona murinai, aposetolo Paulo be ia lalo-hekwarahi, Korinto dekenai idia noho horoa Keristani taudia be Satani ena koikoi karadia dekenai idia moru garina. Paulo ia gwau: “To gaigai ese Heva ia koia hegeregerena, lau gari inai, namo lasi laloa idauidau ese umui do idia hakaua kerere, vadaeni emui lalokau goevagoeva Keriso dekenai do umui rakatania.” (2 Korinto 11:⁠3) Satani ese taunimanima edia lalona dekenai gau dikadia ia atoa bena edia laloa dalana ia hakererea. Heva ia koia bamona, ia ese Keristani taudia ia koidia diba, bena do idia laloa Iehova bona ena Natuna ese idia ura henia lasi gauna ta amo moale idia abia diba.

3. Iehova ese dahaka ia henia Diabolo amo ita ia gimaia totona?

³ Satani be manu ia tarapua tauna ida ita hahegeregerea diba. Ia ese tarapu idauidau ia atoa, diba lasi taudia ia abidia totona. Satani ena tarapu ita dadaraia totona, gau badana be “Ataiai Momokani Lohiabada [“ena hehuni gabuna,” NW ] dekenai [ita] lao.” Laulau dalanai, unai gabu be ita ia gimaia gabuna, Iehova ese edia kara amo iena lohia siahuna idia abia dae karana idia hamomokania taudia ibounai dekenai unai gabu ia henia. (Salamo 91:​1-3) Ita be Dirava ena Hereva, iena lauma helaga, bona iena orea amo ita ia gimaia karadia  ibounai ita abia be gau badana, unai amo ‘Satani ena koikoi karadia do ita koua.’ (Efeso 6:11) Ita daradara lasi, Diabolo ese koikoi karadia momo ia gaukaralaia Iehova ena hesiai taudia ia tarapudia totona.

Satani ese Keristani Ginigunadia Totona Ia Atoa Tarapu

4. Keristani taudia ginigunadia be edena bamona nega ai idia noho?

⁴ Lagani 100 C.E. vairanai bona murinai idia noho Keristani taudia be Roma Basileiana ena siahu bada negana lalonai idia noho. Pax Romano (Roma Mainona) dainai bisinesi karadia ia bada herea. Unai taga bada dainai lohia taudia edia laga-ani negana idia habadaia, bona idia ese dala idia karaia taunimanima ese moale karadia idauidau idia karaia, unai amo do idia gwau-edeede lasi. Nega haida, pablik holide edia momo be gaukara dinadia edia momo hegeregerena. Edia gunalaia taudia ese gavamani ena moni idia gaukaralaia taunimanima dekenai aniani idia henia bona moale karadia idauidau idia karaia totona, unai amo idia ubudia namonamo bona edia lalona idia veria.

5, 6. (a) Dahaka dainai Keristani taudia be Roma ena drama rumadia bona steidiam dekenai idia lao be maoro lasi? (b) Satani ese dahaka koikoi karana ia gaukaralaia, bona Keristani taudia ese edena dala ai unai idia dadaraia diba?

⁵ Keristani taudia ginigunadia dekenai unai bamona noho dalana be mai ena dika, a? Aposetolo taudia idia mase murinai idia noho toretore taudia, hegeregere Tertullian, ese idia torea herevadia amo ita diba, unai nega ena moale karadia momo be lauma bona tauanina dalanai Keristani taudia momokanidia dekenai dika ia havaraia diba. Unai gauna ta be, edia aria bona gadara momo be dirava koikoidia hanamoa totona idia karaia. (2 Korinto 6:​14-18) Edia drama karaia rumadia ai idia karaia sene drama momo be matabodaga karadia eiava rara bubu dagedage karadia idia hahedinaraia. Nega ia hanaia lalonai, taunimanima edia ura unai gaudia dekenai ia maragi, bona edia gabu ai herevahereva lasi drama mirodia idia karaia. Histori torea tauna Jérôme Carcopino be ena buka Daily Life in Ancient Rome lalonai ia gwau: “Unai drama lalodiai drama idia karaia hahinedia be edia dabua ibounai idia kokia diba. . . . Rara bubu karana idia hahedinaraia bada. [Unai herevahereva lasi drama] ese matabodaga karana ia habadaia momokani bona unai kara ese unai hanua ena taunimanima hutuma ia biagua. Unai gadara idauidau dainai idia lalohisihisi lasi, badina steidiam ai idia karaia dagedage bona rara bubu karadia ese nega daudau lalonai edia hemami ia hamasea, bona edia lalohadai ia hakererea vadaeni.”​—⁠Mataio 5:​27, 28.

⁶ Steidiam dekenai, heatu helulu taudia idia heatu ela bona idia ta ia mase, eiava idia be dagedage animal danu idia heatu, ela bona idia ese unai animal idia hamasea eiava animal ese idia ia hamasedia. Raskol taudia bona, gabeai, Keristani taudia momo danu be unai dagedage animal dekenai idia negedia. Unai nega ai, Satani ena koikoi karana be taunimanima ese matabodaga bona dagedage karadia idia inai henia ena hemami do ia hamanokaia ela bona unai gaudia idia manadalaia bona taunimanima momo ese idia tahua. Unai tarapu amo idia gini siri dalana tamona be unai drama idia karaia rumadia bona steidiam dekenai idia lao lasi.​—⁠1 Korinto 15:​32, 33.

7, 8. (a) Dahaka dainai Keristani tauna be kariota gadara helulu dekenai ia lao be aonega karana lasi? (b) Edena dala ai Satani ese Roma ai idia noho digudigu gabudia ia gaukaralaia Keristani taudia ia tarapudia totona?

 ⁷ Kariota gadara helulu be steidiam lalodiai idia karaia bona momo ese unai idia moalelaia bada, to Keristani taudia dekenai unai be maoro lasi badina nega momo gadara idia raraia taudia idia dagedage. Lagani 200 C.E. murinai ia noho toretore tauna ta ia gwau, gadara idia raraia taudia haida idia heatu, bona Carcopino ia gwau, unai gadara rumadia henunai “hisiu edia toana idia tahua taudia bona ariara hahinedia be bisinesi idia karaia.” Ia hedinarai goevagoeva, Keristani taudia dekenai Roma ena kariota gadara helulu gabudia be namo lasi.​—⁠1 Korinto 6:​9, 10.

⁸ Roma ena digudigu gabudia be edena bamona? Momokani, ta ia goeva totona ia digu be kerere lasi. To Roma ena digudigu gabudia be ruma badadia, ia lalonai be tauanina gigia daiutu, eksasais karaia daiutu, laki gadara gabudia, bona aniani bona inuinu gabudia idia noho. Ena be nega idia atoa tatau bona hahine be nega idauidau ai idia digu totona, to nega momo digudigu hebou karana idia koua lasi. Alesandria tauna Clement ia gwau: “Unai digudigu gabudia be tatau bona hahine dekenai idia kehoa; bona unuseniai edia dabua idia kokia matabodaga karadia idia moalelaia totona.” Unai dainai, momo ese idia abia dae gabuna be Satani ese ia gaukaralaia Keristani taudia ginigunadia ia tarapudia totona. Aonega taudia be unai bamona gabudia dekenai idia lao lasi.

9. Keristani taudia ginigunadia ese edena tarapu idauidau idia dadaraia?

⁹ Roma Basileiana ena siahu ia bada neganai, taunimanima ese laki gadara idia ura henia bada. Keristani taudia ginigunadia be unai gadara gabudia dekenai idia lao lasi karana amo, unai gadara dekenai beti monina idia atoa lasi. Laolao taudia idia rentaia rumadia bona bia inua gabudia edia daiutu lalodiai laki gadara maragidia idia karaia danu. Gadara taudia be gadara tauna ma ta ena imana lalonai ia dogoatao nadi eiava turia edia namba dekenai beti monina idia atoa. Laki gadara ese taunimanima ia hamoalea, badina idia laloa unai ese moni abia haraga dalana ia kehoa. (Efeso 5:⁠5) Ma danu, nega momo unai bamona inuinu gabudia dekenai idia gaukara hahine be ariara hahinedia, unai dainai matabodaga karadia ena dika ia noho. Satani ese unai bamona tarapu idauidau ia atoa, Roma ena Basileia Badana ena siti lalodiai idia noho Keristani taudia koia totona. Hari inai negai be ia idau, a?

Satani Ena Tarapu Idauidau Hari Inai Negai

10. Edena dala ai hari inai negai ena noho daladia be guna Roma Basileia edia noho daladia hegeregerena?

¹⁰ Idia hanaia lagani handred momo lalonai, Satani  ena tarapu idia idau lasi. Aposetolo Paulo ese Korinto hanuana dekenai idia noho Keristani taudia dekenai sisiba goadana ia henia, Satani ese idia “dekena amo kwalimu do ia abia” lasi totona. Ia gwau: “[Satani ena] koikoi ita diba vadaeni.” (2 Korinto 2:11) Kohu momo tanodia momo dekenai, noho daladia be guna Roma Basileiana ena siahu bada negana ai idia noho daladia hegeregerena. Taunimanima momo edia laga-ani negana be hari ia bada. Gavamani idia haginia laki gadara idauidau ese ogogami taudia dekenai helaro sisina ia henia. Taunimanima ese davana maragi moale karadia idauidau idia laloa bada. Spot gadara idia karaia steidiam be taunimanima amo idia honu, taunimanima be laki gadara idia karaia, nega haida gadara itaia taudia idia dagedage, bona nega momo gadara taudia idia dagedage. Taunimanima ese miusiki dikadia idia kamonai, bona drama karaia rumadia bona muvini piksa bona televisen dekenai danu kara bodagadia idia hahedinaraia. Tano haida dekenai, digudigu rumadia ai tatau bona hahine idia digudigu hebou, bona kone haida dekenai tauanina kavakava idia digu. Keristani tomadiho ia matamaia ena nega hegeregerena, hari Satani ese tanobada ena moale karadia idauidau ia gaukaralaia, Dirava ena hesiai taudia ia veridia totona.

11. Laga-ani karadia dekenai dahaka tarapu idia noho?

¹¹ Inai tanobada ai lalo-hekwarahi be ia bada, unai dainai ita ura nega haida ita laga-ani sisina eiava kara idauna ma ta ita karaia. To, Roma digudigu rumadia lalonai idia noho gaudia ese Keristani taudia dekenai dika ia havaraia diba hegeregerena, hari inai negai idia noho laga-ani bona loaloa gabudia haida be Satani ese ia gaukaralaia matabodaga eiava inuinu kekero karadia dekenai Keristani taudia ia veria vareai totona. Paulo be Korinto dekenai idia noho Keristani taudia ia tore henidia ia gwau: “Umui laloa kerere lasi. Bema kara dika taudia danu umui turana karaia neganai, idia ese emui kara namona do idia hadikaia. Umui emui laloa kavakava umui hadokoa, bona emui kara dika daladia umui rakatania. Umui kamonai. Umui haida be Dirava umui diba lasi.”​—⁠1 Korinto 15:​33, 34.

12. Hari inai negai, Satani ese dahaka koikoi karadia haida ia gaukaralaia Iehova ena hesiai taudia ia tarapua totona?

¹² Heva dekenai ia vara gauna amo ita itaia vadaeni, Satani ese koikoi karana ia gaukaralaia Heva ena lalohadai ia hadikaia totona. (2 Korinto 11:⁠3) Hari, Diabolo ia gaukaralaia tarapu ta be ia ura Keristani taudia idia laloa bema tanobada taudia edia kara haida idia karaia bona unai amo idia hahedinaraia Iehova ena Witnes taudia be taunimanima ma haida bamona, idia ese ma haida do idia durua Keristani hereva momokani idia abia dae totona. Nega haida, idia be abidadama lasi taudia bamona ai idia lao, bona idia ura karaia gauna idia hagugurua lasi. (Hagai 2:​12-14) Satani ena koikoi karana ma ta be ia ura gwauhamata Keristani taudia, matamata taudia bona taunimanima badadia, edia lalona ia veria mauri daladia rua be nega tamona idia badinaia bona ‘Dirava ena Lauma Helaga idia hahisia.’ (Efeso 4:30) Haida be Internet gaukaralaia kerere karana amo unai tarapu lalonai idia moru vadaeni.

13. Diabolo ese edena tarapu hehunina ta ia gaukaralaia, bona edena sisiba Aonega Herevadia lalonai ita laloa be maoro?

¹³ Satani ena tarapu ma ta be meamea kara hehunidia. Keristani tauna momokanina be mai ena ura ida Satani tomadiho henia karana, eiava meamea karadia do ia karaia lasi. To, haida ese dagedage eiava meamea karadia idia hahedinaraia muvini piksa, vidio gadara, bona natudia edia buka idauidau bona komik bukadia idia itaia neganai unai idia laloa bada lasi. Namona be meamea karadia idia hahedinaraia gaudia ibounai ita dadaraia momokani. Aonega hereva ta ia gwau: “Tau dikana ena mauri dalana dekenai be hekwakwanai, bona tarapu idia noho, to iena lauma ia naria noho tauna, be unai gaudia dekena amo ia raka siri noho.” (Aonega Herevadia 22:⁠5) Satani be “inai tanobada ena dirava” dainai, taunimanima momo ese idia ura henia gauna lalonai ena tarapu ia hunia diba.​—⁠2 Korinto 4:4; 1 Ioane 2:​15, 16.

Iesu ese Diabolo Ia Dadaraia

14. Iesu ese edena dala ai Satani ena hedibagani ginigunana ia dadaraia?

¹⁴ Diabolo oi dadaraia bena oi amo do ia siri karana dekenai, Iesu ese haheitalai namona ia hahedinaraia. Iesu ia bapatiso bona dina 40 lalonai aniani ia ania lasi murinai, Satani ese ia dibagania. (Mataio 4:​1-11) Hedibagani ginigunana dekenai Satani be Iesu ia aniani lasi murinai ia mamia hitolona ia laloa dainai ia tohoa. Satani ese Iesu ia noia  ena hoa karana ginigunana do ia karaia ena hitolo ia haorea totona. Iesu ese Deuteronomi 8:3 ena hereva ia gwauraia, ia ura lasi sibona ena ura gauna ta totona ena siahu ia gaukaralaia bona tauanina aniani ia laloa bada lasi to lauma aniani ia laloa bada.

15. (a) Edena ura namona be Satani ese ia gaukaralaia Iesu ia tohoa totona? (b) Diabolo ese Dirava ena hesiai taudia ia koia totona ia gaukaralaia gauna badana ta be dahaka, to edena dala ai ia ita dadaraia diba?

¹⁵ Unai hedibagani dekenai ita laloa gauna ta be Diabolo ese Iesu ia tohoa lasi matabodaga karana ta ia karaia totona. Hitolo ese aniani ania urana ia habadaia bona unai be tauanina ena ura goadana ta, bona Satani ese unai ia gaukaralaia Iesu ia dibagania totona. Hari inai negai, Diabolo ese dahaka hedibagani idauidau ia gaukaralaia Dirava ena taunimanima ia koia totona? Idia be momo bona idauidau, to ia gaukaralaia gauna badana ta be sihari kava ena hedibagani, ia ura unai amo Iehova ena taunimanima edia abidadama ia hadikaia. Iesu ita tohotohoa karana amo, Diabolo bona ena hedibagani idauidau ita dadaraia diba. Iesu ese siri maorodia ia gwauraia Satani ena koikoi karadia koua totona, unai hegeregerena ita ese hedibagani ita davaria neganai, siri namodia hegeregere Genese 39:9 bona 1 Korinto 6:18 ita lalodiatao bona gaukaralaia.

16. (a) Edena dala ai Satani ese nega iharuana Iesu ia dibagania? (b) Satani ese edena dala idauidau ai ita ia dibagania diba Iehova ita tohoa totona?

¹⁶ Gabeai, Diabolo ese Iesu ia hamaoroa dubu ena atai amo ia roho diho bona idia itaia bema Dirava ese ena aneru amo Iesu ia gimaia diba. Iesu ese Deuteronomi 6:16 ena hereva ia gwauraia, ia ura lasi ena Tamana ia tohoa. Satani be reana ita ia dibagania lasi dubu ena atai amo do ita roho diho totona, to ita ia dibagania diba Iehova ita tohoa totona. Ita laloa tanobada taudia edia dabua bona tauanina ena toana ita tohotohoa diba to sisiba do ita abia lasi, a? Moale karadia kereredia dekenai hahetoho ita davaria, a? Reana Iehova ita tohoa noho. Bema ita dekenai unai bamona lalohadai idia noho, Satani be ita amo do ia heau lasi, to ita danu do ia noho, hanaihanai ita do ia koia iena kahana ai ita gini totona.

17. (a) Edena dala ai Satani ese nega ihatoina Iesu ia dibagania? (b) Edena bamona Iamesi 4:7 ena hereva be ita dekenai do ia momokani diba?

¹⁷ Satani ia ura Iesu ese ia do ia tomadiho henia dainai ia dekenai tanobada ena basileia ibounai ia henia toho neganai, Iesu ese Baibel ena siri ia gwauraia karana amo Satani ia dadaraia lou, bona iena Tamana sibona tomadiho henia karana totona ia gini goada. (Deuteronomi 5:9; 6:13; 10:20) Satani ese reana tanobada ena basileia ibounai do ia henia lasi ita dekenai, to hanaihanai tanobada ena kohu amo ita ia dibagania, bona eda lalona ai kohu bada haboua karana amo sibona eda basileia maragina ta ita itaia bamona. Ita be Iesu hegeregerena ita haere, Iehova sibona dekenai iseda tomadiho karana ita henia, a? Bema oibe, Iesu dekenai ia vara gauna be ita dekenai do ia vara. Mataio ena sivarai ia gwau: “Satani ese ia rakatania.” (Mataio 4:11) Bema ita gini goada bona Baibel ena hakaua hereva maorodia ita laloatao bona ita badinaia, Satani ese ita do ia rakatania. Hahediba tauna Iamesi ia gwau: “Satani do umui tuari henia, vadaeni umui dekena amo do ia heau boio.” (Iamesi 4:⁠7) Keristani tauna ta be Iehova ena Witnes taudia edia brens opesi ia tore henia bona ia gwau: “Satani ia koikoi momokani. Ena be lau be mai egu ura namodia, to lau davaria egu hemami bona ura lau biagua be auka herea. To, boga-auka, haheauka, bona gau bada herea be, Iehova ena heduru amo, egu abidadama bona hereva momokani lau dogoatao noho diba.”

Ita Hegaegae Momokani Diabolo Ita Dadaraia Totona

18. Edena lauma tuari dabua ese ita ia durua Diabolo ita dadaraia totona?

¹⁸ Iehova ese ita dekenai lauma ena tuari dabua ibounai ia henia, ‘Satani ena koikoi karadia do ita  koua’ totona. (Efeso 6:​11-18) Iseda lalokau hereva momokani dekenai be iseda gabana dekenai beleta bamona do ita kwatua, eiava ita do ia hegaegaelaia, Keristani gaukara ita karaia totona. Iehova ena taravatu maoromaorodia ita dogoatao totona iseda lalona ita hadaia karana be kemena ena auri dabua bamona, iseda kudouna do ia gimaia. Bema sivarai namona be iseda tamaka bamona ita atoa, hanaihanai haroro gaukara do ita karaia, bona lauma dalanai unai ese ita do ia hagoadaia bona gimaia. Iseda abidadama goadana be kesi badana bamona, “Satani ena diba bona peva, lahi gaudia,” bona ena koikoi karadia bona hedibagani idauidau amo ita do ia gimaia. Iehova ena gwauhamata idauidau do idia guguru ita abidadama henia karana be kwara gauna bamona, iseda laloa dalana do ia gimaia bona ita dekenai lalo-maino do ia henia. (Filipi 4:⁠7) Bema Dirava ena Hereva gaukaralaia namonamo taudia ai ita lao, ia be hegeregere kaia ta ita gaukaralaia lauma dalanai Satani ena igui dekenai idia noho taudia ita ruhaia totona. Ita gaukaralaia diba danu ita sibona ita gimaia totona, Iesu ese hedibagani ia davaria neganai ia gaukaralaia hegeregerena.

19. “Satani ita dadaraia” sibona lasi, to dahaka danu ita karaia be namo?

¹⁹ “Dirava ese ia henia tuari dabua ibounai” ita atoa bona hanaihanai ita guriguri karana amo, ita diba momokani Satani ese ita ia tohoa neganai Iehova ese ita do ia gimaia. (Ioane 17:15; 1 Korinto 10:13) To Iamesi ese ia hahedinaraia “Satani ita dadaraia” sibona be hegeregere lasi. Namona be ita ese ita ia laloa ‘Diravana ena ura ita karaia.’ (Iamesi 4:​7, 8) Unai do ita karaia dalana be hereva gabena ese do ia hahedinaraia.

Edena Bamona Do Oi Haere?

• Edena tarapu idauidau Satani ese ia atoa be Keristani taudia ginigunadia ese idia dadaraia?

• Satani ese edena koikoi karadia ia gaukaralaia, hari inai negai Iehova ena hesiai taudia ia tarapudia totona?

• Iesu ese edena dala ai Diabolo ena hedibagani idauidau ia dadaraia?

• Edena tuari dabua ese ita ia durua diba Diabolo ita dadaraia totona?

[Study Questions]

[Picture on page 8, 9]

Iesu be mai ena goada ida Diabolo ia dadaraia

[Pictures on page 10]

Aposetolo edia nega ai idia noho Keristani taudia ese dagedage bona matabodaga moale karadia idia dadaraia

[Credit Line]

The Complete Encyclopedia of Illustration/J. G. Heck