“Do oi gaukara goada, bona gaukara namona momokani tauna do oi lao, Dirava ese oi dainai do ia moale bada totona. Vadaeni oi ese hereva momokani do oi hadibaia maoromaoro, bona Dirava ena vairanai do oi hemarai lasi.”​​—⁠2 TIMOTEO 2:​15.

1, 2. (a) Dahaka dainai gaukara taudia ese tulu idia abia be gau badana? (b) Keristani taudia be dahaka gaukara idia karaia, bona edena bamona idia hahedinaraia Basileia idia tahua guna?

 GAUKARA taudia ese tulu idia abia be gau badana, edia gaukara idia haorea totona. To, tulu ta sibona idia abia be hegeregere lasi. Gaukara tauna be tulu maorona ia abia be gau badana, bona dala maorona ai ia gaukaralaia be namo. Hegeregere, bema ruma maragina ta oi haginia noho lalonai, oi ura au rua oi hakapudia, hama bona ikoko sibona do oi abia lasi. Namona be oi diba edena bamona ikoko be au lalonai oi kokoa vareai diba, unai amo ikoko oi hagagevaia lasi. Bema oi ura ikoko be au dekenai oi kokoa to hama gaukaralaia dalana oi diba lasi, do oi hekwarahi bada bona do oi lalohisihisi danu. To tulu gaukaralaia namonamo karana ese ita ia durua ita karaia gaukarana dekenai anina namona ita havaraia totona.

² Ita be Keristani taudia dainai, ita be mai iseda gaukara. Unai gaukara be mai anina bada. Iesu Keriso ese ena murinai idia raka taudia ia hagoadaia ‘Basileia do idia tahua guna.’ (Mataio 6:​33) Edena bamona unai ita karaia diba? Dala ta be Basileia harorolaia gaukarana bona hahediba taudia halaoa gaukarana ita karaia goadagoada. Dala iharuana be Dirava ena Hereva be iseda hesiai gaukara ena badina. Dala ihatoina be iseda kara ia namo. (Mataio 24:14; 28:​19, 20; Kara 8:​25; 1 Petero 2:​12) Unai Keristani gaukara ita karaia namonamo bona ita moalelaia totona, tulu maorodia ita abia bona gaukaralaia namonamo dalana ita dibaia be gau badana. Unai dekenai, aposetolo Paulo be Keristani hesiai tauna bamona haheitalai namona ia hahedinaraia, bona abidadama tamona taudia ia hagoadaia iena kara do idia tohotohoa. (1 Korinto 11:1; 15:10) Unai dainai, iseda gaukara hebou turana, Paulo, ena kara amo dahaka ita dibaia?

Paulo​​—⁠Basileia Harorolaia Goadagoada Tauna

3. Dahaka dainai ita gwau diba aposetolo Paulo be Basileia harorolaia goadagoada tauna?

³ Paulo be edena bamona gaukara tauna? Ia be gaukara “goadagoada” tauna. Paulo be mai ena goada ida sivarai namona be Meditereinien ena gabu momo herea ai ia halasia. Unai hesiku lasi aposetolo tauna ese Basileia harorolaia gaukara ia ura henia bada ena badina ia gwauraia neganai, ia  gwau: “To gau tamona, Sivarai Namona lau harorolaia dainai lau heagi diba lasi. Badina unai bamona do lau karaia be Dirava ese ia oda vadaeni. Bema Sivarai Namona lau harorolaia lasi neganai, madi, lau be dika momokani!” (1 Korinto 9:​16) Paulo be ia sibona hamauria karana ia laloa, a? Lasi. Ia be sibona ena namo ia laloa bada tauna lasi. To, ia ura ma haida be sivarai namona amo namo do idia abia danu. Ia gwau: “Sivarai Namona dainai, inai kara ibounai lau karaia noho. Bona lau diba, bema inai gaukara lau karaia noho, lau [bona ma haida] danu ese Sivarai Namona ena mauri hanamoa gaudia do lau abia.”​​—⁠1 Korinto 9:​23.

4. Keristani gaukara taudia ese edena tulu idia laloa bada?

⁴ Aposetolo Paulo be manau tauna, ia lalo-parara ia dibaia vadaeni gaudia sibona dekenai ia tabekau diba lasi. Kapenta tauna be hama ia abia be namo hegeregerena, Paulo be tulu maorona ia abia be namo Dirava ena hereva momokani be ena kamonai taudia edia kudouna lalonai ia atoa vareai totona. Edena tulu ia gaukaralaia? Ia be Dirava ena Hereva, Buka Helaga. Unai hegeregerena, Baibel be ita gaukaralaia tulu badana, ita ia durua taunimanima be hahediba taudia ai ita halaoa totona.

5. Haroro taudia namodia ai ita lao totona, idia torea hanai siridia ita duahia sibona lasi, to dahaka ita karaia danu be namo?

⁵ Paulo ia diba Dirava ena Hereva hadibaia namonamo karana be idia torea hanai siridia duahia karana sibona lasi. Ia ese “lalona veria herevadia” ia gaukaralaia. (Kara 28:​23, NW ) Edena dala ai? Paulo ese Dirava ena Hereva ia gaukaralaia namonamo amo taunimanima momo edia lalona ia veria Basileia ena hereva momokani idia abia dae totona. Ia danu ia hereva namonamo. Hua toi Efeso ena dubu ta ai, Paulo ese “Dirava ena Basileia hereva ia harorolaia bona ia hadibaia goada.” Ena be “haida be lalona auka dainai, idia kamonai henia lasi,” to ma haida idia kamonai. Paulo be Efeso dekenai ia haroro dainai, “Lohiabada ena hereva ia bada daekau bona ia kwalimu.”​​—⁠Kara 19:​8, 9, 20.

6, 7. Edena dala ai Paulo ese ena hesiai gaukara ia hahairaia, bona edena bamona unai ita karaia diba?

⁶ Paulo ese Basileia ia harorolaia goadagoada bona ‘ena hesiai gaukara ia hahairaia.’ (Roma 11:​13, NW ) Edena dala ai? Ia ura lasi sibona ia abia isi; bona ia hemarai lasi taunimanima vairanai ia idia gwauraia Dirava ena gaukara ia karaia tauna. To, ena hesiai gaukara be hahenamo hereadaena ta bamona ia laloa. Paulo ese Dirava ena Hereva ia hadibaia namonamo. Ena gaukara ese huahua namona ia havaraia, unai ese ma haida ia hagoadaia bona ia durudia edia hesiai gaukara idia karaia namonamo totona. Unai dala ai danu, ena hesiai gaukara ia hahairaia.

⁷ Paulo bamona, bema hanaihanai Dirava ena Hereva ita gaukaralaia namonamo, haroro taudia bamona iseda hesiai gaukara ita hahairaia diba. Iseda hesiai gaukara ena kahana idauidau ibounai dekenai, iseda tahua gauna be Baibel ena hereva be taunimanima momo dekenai ita gwauraia be namo. Edena dala ai lalona veria herevadia ita gaukaralaia diba? Mai anina bada daladia toi mani ita laloa: (1) Dirava ena Hereva ita hahedinaraia dalana ese ma haida edia hemataurai karana ia habadaia. (2) Dala namona ai Baibel ena hereva ena anina ita gwauraia hedinarai. (3) Edia lalona ia veria dalana ai Baibel ita herevalaia.

8. Hari inai negai, edena bamona Basileia harorolaia tulu ita abidia vadaeni, bona edena dala ai oi gaukaralaidia?

⁸ Hari inai negai, Basileia harorolaia taudia ese idia abia tulu idauidau be Paulo ena hesiai gaukara lalonai ia abia lasi. Idia be buka, magasin, buklet, boiboi pepana, pepapepa, kaset bona vidio. Lagani 1900 murinai, kadi, rekodi masini, saun motuka, bona reidio idia gaukaralaia danu. Oibe, iseda tulu hereadaena be Baibel, bona unai mai anina bada tulu ita gaukaralaia namonamo be gau badana.

Dirava Ena Hereva be Iseda Hesiai Gaukara Ena Badina

9, 10. Dirava ena Hereva gaukaralaia karana dekenai, Paulo ese Timoteo dekenai ia henia sisibana amo dahaka ita dibaia?

⁹ Edena dala ai Dirava ena Hereva be tulu namona ta bamona ita gaukaralaia diba? Paulo ese ena gaukara turana Timoteo dekenai ia henia herevana ita badinaia neganai, ia gwau: “Do oi gaukara goada, bona gaukara namona momokani tauna do oi lao, Dirava ese oi dainai do ia moale bada totona. Vadaeni oi ese hereva momokani do oi hadibaia maoromaoro, bona Dirava ena vairanai do oi hemarai lasi.” (2 Timoteo 2:​15) “Hereva momokani do oi hadibaia maoromaoro” ena anina be dahaka?

 ¹⁰ Unai Greek herevana idia hahanaia “hadibaia maoromaoro” ena anina be “utua maoromaoro” eiava “dala ta karaia maoromaoro.” Keristani Greek Revarevadia ai, unai hereva be nega tamona sibona idia gaukaralaia​—⁠unai be Paulo ese Timoteo dekenai sisiba hereva ia torea neganai. Unai hereva tamona ita gaukaralaia diba tano geia maoromaoro karana ita gwauraia hedinarai totona. Bema ia manada biru tauna ese tano ia geia gageva, do ia hemarai bada. Paulo ese Timoteo ia hadibaia ‘gaukara namona momokani tauna do ia lao’ totona, namona be Dirava ena Hereva ena hahediba hereva momokanidia do ia rakatania lasi. Namo lasi Timoteo ese ena hadibaia karana lalonai sibona ena lalohadai ia gaukaralaia. Namona be ia harorolaia bona hadibaia gaudia ibounai be Baibel amo ia abia. (2 Timoteo 4:​2-4) Unai dala ai, kudou-maoro taudia ese gau idauidau dekenai Iehova ena lalohadai do idia abia, to tanobada taudia edia lalohadai do idia abia dae lasi. (Kolose 2:​4, 8) Hari inai negai danu be unai bamona.

Namona be Iseda Kara Ia Namo

11, 12. Dirava ena Hereva hadibaia maoromaoro karana dekenai iseda kara be edena bamona?

¹¹ Momokani, Dirava ena Hereva ita hadibaia maoromaoro totona, iena hereva momokani ita harorolaia be namo, to unai sibona lasi. Namona be iseda kara amo ita hahedinaraia ita hadibaia gaudia ita badinaia. ‘Ita be Dirava ena gaukara ita karaia hebou’ taudia dainai, namo lasi ita be gaukara taudia koikoidia. (1 Korinto 3:⁠9) Dirava ena Hereva ia gwau: “Oibe, taunimanima haida umui hadibaia, to dahaka dainai umui sibona umui hadibaia lasi? Umui haroro, umui gwau, ‘Henaoa lasi,’ to umui be umui henaoa, a? Umui gwau, ‘Heudahanai lasi,’ to umui be umui heudahanai, a? Kaivakuku be umui kirikirilaia, to umui ese Dirava diba lasi taudia edia dubu gaudia umui henaoa, a?” (Roma 2:​21, 22) Hari ita be Dirava ena gaukara ita karaia dainai, Dirava ena Hereva ita hadibaia maoromaoro dalana ta be inai sisiba ita badinaia: “Lohiabada do oi abidadama henia, mai emu kudouna ibounai. Oi sibona oiemu diba do oi abidadama henia lasi. Oi karaia gaudia ibounai  lalonai, Lohiabada do oi laloa, vadaeni ia ese dala maorona, be oi dekenai do ia hadibaia.”​​—⁠Aonega Herevadia 3:​5, 6.

¹² Dirava ena Hereva hadibaia maoromaoro karana amo dahaka namo do ita abia? Kudou-maoro taudia edia mauri dekenai, Dirava ena Hereva ena siahu ese ia karaia diba gauna mani ita laloa.

Dirava Ena Hereva be mai Ena Siahu

13. Dirava ena Hereva badinaia karana ese ta dekenai dahaka ia havaraia diba?

¹³ Taunimanima ese Dirava ena Hereva idia abia dae neganai, unai ese idia do ia durua edia mauri idia haidaua totona. Idaunegai Tesalonika dekenai, Paulo ese Dirava ena hereva ena gaukara dalana bona ia havaraia anina namona be Keristani ai idia lao taudia dekenai ia itaia. Unai dainai idia ia hamaoroa: “Nega ibounai ai ese Dirava ai hanamoa, badina be Dirava ena hereva ai mailaia neganai, umui kamonai henia, bona umui abia dae. Oibe, umui abia dae momokani. Umui dekenai ia be taunimanima edia hereva lasi, to ia be Dirava ena hereva momokani. Badina be Dirava ena hereva ese umui Keriso abidadama henia taudia emui kudouna dekenai ia gaukara noho.” (1 Tesalonika 2:​13) Unai Keristani taudia​​—⁠Keriso murinai idia raka taudia momokanidia ibounai​​—⁠dekenai taunimanima edia laloa dalana be maragi herea bema Dirava ena aonega bada herea ida ita hahegeregerea. (Isaia 55:⁠9) Tesalonika taudia ‘ese Dirava ena hereva idia abia dae, vadaeni unai murinai taunimanima ese nega momo idia hisihisi henia. To Lauma Helaga ese iena moale ia henia idia dekenai’ bona abidadama taudia ma haida dekenai idia be haheitalai namona ai idia lao.​​—⁠1 Tesalonika 1:​5-7.

14, 15. Dirava ena Hereva ena siahu ena bada be edena bamona, bona dahaka dainai?

¹⁴ Dirava ena Hereva ena siahu be bada, ena Badina, Iehova hegeregerena. Ia be “Mauri Diravana” amo ia mai, iena hereva amo “guba ia karaia” bona unai hereva be hanaihanai Ia “siaia totona gaukarana be do ia karaia momokani.” (Heberu 3:​12; Salamo 33:6; Isaia 55:11) Baibel ia diba bada tauna ta ia gwau: “Dirava be ena Hereva amo ia parara lasi. Ia dekenai Baibel be gau idauna ta lasi bona unai buka ena hereva ia gorea lasi. . . . Unai dainai Baibel ena hereva be mai ena siahu, herevana taunimanima ese dahaka idia karaia ia dekenai; badina ia be mauri Diravana amo ia mai.”

¹⁵ Dirava ena Hereva amo ia mai siahuna ena bada be edena bamona? Ia be mai ena siahu bada herea. Paulo ese inai ia torea be maoro, ia gwau: “Dirava ena hereva be ia mauri noho, bona ia be mai ena siahu. Ia be mai ena matana momokani. Iena matana ese kaia mai ena kahana ruaosi ena matana ia hereaia momokani. Ia ese tau ta ia gwadaia neganai, unai tau ena lalona momokani dekenai ia vareai. Ia vareai ela bona lalona bona lauma ruaosi ia hapararaia. Bona ia ese iseda lalona bona iseda kudouna ena ura ibounai ia tahua diba.”​​—⁠Heberu 4:​12.

16. Edena dala ai Dirava ena Hereva ese ta ena lalohadai bona kara ia haidaua diba?

¹⁶ Dirava ena Hereva lalonai ia noho sivaraina ena “matana ese kaia mai ena kahana ruaosi ena matana ia hereaia momokani.” Ena siahu be bada herea bona taunimanima edia lalona momokani dekenai ia gaukara diba dainai, taunimanima ese idia karaia kohu eiava tulu ia hereaia. Dirava ena Hereva ese tau ta ena lalona momokani ia gwadaia bona ena lalona, laloa dalana bona ia ura henia gaudia ia haidaua diba, bona Dirava ese ia ura henia karadia ia karaia tauna ai ia lao. Unai tulu ena siahu be bada herea!

17. Dirava ena Hereva ena siahu mani oi gwauraia.

¹⁷ Dirava ena Hereva ese ta ena lalona momokani ai ia noho kara korikorina ia hahedinaraia diba, herevana ia ese sibona edena bamona ia laloa eiava ma haida edia matanai ia ese edena bamona karadia ia karaia. (1 Samuela 16:⁠7) Nega haida kara dika tauna ese ma haida ia hebogahisi henia, eiava tomadiho karadia ia goadalaia to ena lalona momokani ai ia noho kara korikorina ia hunia diba. Kara dika taudia be badina kereredia dainai toana koikoi idia hahedinaraia. Hekokoroku taudia idia koikoi bona manau toana idia hahedinaraia, to edia ura korikorina be taunimanima ese edia ladana do idia hanamoa. To Dirava ena Hereva ese ta ena kudouna dekenai idia noho gaudia ia hahedinaraia diba, unai dala amo ia be mai ena siahu manau tauna ia veria ena kara gunadia ia kokia bona ‘mauri matamata do ia atoa. Inai mauri matamata dainai, ena toana be Dirava ena toana bamona, ia ese ia karaia gauna. Inai mauri matamata ena kara be maoromaoro, helaga bona momokani.’ (Efeso 4:​22-​24) Dirava ena Hereva ena hahediba herevadia ese gari taudia edia mauri ia haidaua bona Iehova ena gari lasi Witnes taudia bona Basileia  harorolaia goadagoada taudia ai ia halaodia diba danu.​​—⁠Ieremia 1:​6-9.

18, 19. Inai paragraf rua amo eiava haroro ai oi davaria ekspiriens amo, oi hahedinaraia edena bamona Baibel ena hereva momokani ese ta ena laloa dalana ia haidaua diba.

¹⁸ Dirava ena Hereva ena siahu be gabu ibounai dekenai idia noho taudia dekenai namo ia havaraia. Hegeregere, Cambodia ai, Phnom Penh amo Basileia harorolaia taudia be Kompong Cham ena provinsi dekenai hua ta lalonai nega rua idia haroro. Unai hanua ena pasto hahine ta ia kamonai dubu gunalaia taudia haida ese Iehova ena Witnes taudia idia gwauraia dika murinai, dala ia karaia Witnes taudia ese unai provinsi idia vadivadi henia lou neganai, do ia hereva henidia. Holide idauidau moalelaia karana dekenai henanadai momo ia henia idia dekenai bona idia ese ia dekenai Baibel amo ena anina idia herevalaia neganai, ia kamonai namonamo. Bena ia gwau: “Hari lau diba pasto gaukara ai karaia hebou taudia ese umui dekenai idia herevalaia gaudia be momokani lasi! Idia gwau, umui ese Baibel umui gaukaralaia lasi, to hari dabai umui ese unai buka sibona umui gaukaralaia!”

¹⁹ Unai hahine be Witnes taudia ida ena Baibel herevalaia karana ia hadokoa lasi bona ena be ia idia hagaria ena pasto dagina do idia kokia, to unai ese ia koua lasi. Witnes taudia ida Baibel ia herevalaia karana be turana ta dekenai ia herevalaia, bena gabeai ena turana be Witnes taudia ida Baibel ia stadilaia matamaia. Ena turana ese ia dibaia noho gaudia ia ura henia bada dainai, nega ta ena dubu ena hebou ta ai ia gwau, “Umui mai, Iehova ena Witnes taudia ida Baibel ita stadilaia!” Daudau lasi murinai, unai pasto hahinena bona ma haida danu be Iehova ena Witnes taudia ida Baibel idia stadilaia matamaia.

20. Edena dala ai Ghana ai ia noho hahinena ena ekspiriens ese Dirava ena Hereva ena siahu ia hahedinaraia?

²⁰ Dirava ena Hereva ena siahu be Ghana ai ia noho hahinena, Paulina, ena sivarai ese ia hahedinaraia danu. Hanaihanai Basileia ia harorolaia taihu ta ida Diba ese Mauri Dekenai Ita Ia Hakaua Lao bukana amo Baibel ia stadilaia. a Paulina ia adavaia tauna be mai ena hahine iharuana danu bona Paulina ia lalo-parara gau haida ia haidaua be namo, to ena adavana bona ena varavara ibounai ese ia idia dagedage henia. Iena tubuna tau, kota badana ena diadi bona dubu ena pasto tauna ta, be Paulina ena lalona ia haidaua totona Mataio 19:​4-6 ena anina ia gwauraia kerere. Ena be diadi ena hereva be mai ena goada ida ia gwauraia, to karaharaga Paulina ia lalo-parara unai be Satani ese Iesu Keriso ia tohoa neganai Baibel ena hereva ia hagagevaia karana hegeregerena. (Mataio 4:​5-7) Iesu ena hereva headava dekenai ia laloatao, ia hahedinaraia Dirava ese tau bona hahine ia karaia, to tau bona hahine haida lasi, bona idia ruaosi, toiosi lasi, be tauanina tamona ai do idia lao. Iena lalohadai ia dogoatao auka bona maoro idia henia ena tau mai ena hahine iharuana do ia rakatania. Daudau lasi murinai, ia bapatiso bona Basileia harorolaia hahinena ai ia lao.

Dirava Ena Hereva Hadibaia Maoromaoro Noho

21, 22. (a) Ita be Basileia harorolaia taudia dainai, iseda lalona ita hadaia dahaka ita karaia totona? (b) Stadi hereva gabena dekenai dahaka do ita herevalaia?

²¹ Dirava ena Hereva be siahu bada tulu ta, ita gaukaralaia ma haida ita durua edia mauri idia haidaua totona, unai amo Iehova kahirakahira idia lao diba. (Iamesi 4:⁠8) Anina namona havaraia totona gaukara diba namonamo taudia ese tulu idia gaukaralaia hegeregerena, namona be iseda lalona ita hadaia do ita hekwarahi Dirava ia henia gaukarana, Basileia harorolaia gaukarana lalonai Dirava ena Hereva, Baibel, ita gaukaralaia namonamo.

²² Hahediba taudia halaoa gaukarana dekenai, edena dala ai Baibel ita gaukaralaia namonamo diba? Dala ta be hadibaia taudia namodia ai ita lao, lalona idia veria herevadia gwauraia karana ita habadaia. Mani stadi hereva gabena umui itaia, badina unai kahana ese ma haida ita hadibaia bona durua Basileia ena sivarai idia abia dae ena dala haida ia herevalaia.

[Footnote]

Oi Laloatao, A?

• Basileia harorolaia taudia be edena tulu idia abia?

• Edena dala idauidau ai Paulo be Basileia gaukara tauna namona?

• Dirava ena Hereva hadibaia namonamo karana ena anina be dahaka?

• Iehova ena Hereva ena siahu ena bada be edena bamona?

[Study Questions]

[Pictures on page 6]

Basileia harorolaia gaukarana lalonai, Keristani taudia ese idia gaukaralaia tulu haida