Hari Iehova ia ura lasi adavana momo abia karana ita karaia, to ena hesiai taudia gunadia, Israela taudia dekenai unai ia koua lasi. Iena taravatu ia haidaua, a?

Iehova be adavana momo abia karana dekenai unai taravatu ia haidaua lasi. (Salamo 19:7; Malaki 3:⁠6) Matamana negana amo, unai dala be taunimanima totona ia atoa lasi, bona hari danu be hegeregere. Iehova ese Heva be Adamu totona ia havaraia neganai, tau tamona ese hahine tamona do ia abia taravatuna ia gwauraia. “Unai dainai tau ese tamana sinana do ia rakatania, iena adavana dekenai do ia noho, ruaosi be tauanina tamona do idia lao.”​​—⁠Genese 2:​24.

Iesu Keriso be tanobada ai ia noho neganai, headava hadokoa bona headava lou karana totona idia henanadai taudia ia haere henidia neganai, unai taravatu ia gwauraia lou. Ia gwau: “Be, Buka Helaga umui duahia lasi, a? Ia torea, ‘Hamatamaia nega ia karaia neganai, Dirava ese tau bona hahine ia karaia, bona ia gwau: Inai dainai tau ta be iena tamana sinana do ia rakatania, iena adavana dekenai do ia hakapua, vadaeni idia ruaosi be tamona idia noho.’ Unai dainai idia be rua lasi, edia tauanina be tamona” Iesu ma ia gwau: “Bema iena adavana ia heudahanai lasi, to tau ta ese iena adavana ia rakatania, vadaeni hahine ta ma ia adavaia, unai tau be heudahanai tauna.” (Mataio 19:​4-6, 9) Bona unai amo ia hedinarai goevagoeva, adavana rua eiava momo abia karana be heudahanai karana.

Dahaka dainai idaunegai adavana momo abia karana idia koua lasi? Namona be oi laloatao inai kara be Iehova amo ia mai lasi. Baibel ese ia gwauraia adavana momo ia abia tauna ginigunana be, Lameka, Kaino ena tubuna ta. (Genese 4:​19-​24) Iehova ese Noa ena negai Abata badana ia havaraia neganai, Noa bona ena natudia memero toi edia adavana be tamona tamona sibona. Adavana momo idia abia taudia ibounai be Abata badana ese ia hamasedia ore.

Lagani handred momo murinai, Iehova ese Israela taudia be ena taunimanima ai ia halaodia neganai, Israela taudia be adavana momo abia karana idia karaia vadaeni, ena be unai negai momo be adavana tamona sibona idia abia. Dirava ia ura lasi hahine momo idia noho ruma besedia idia parara. To, taravatu ia atoa unai bamona ruma besedia idia noho namonamo totona.​​—⁠Esodo 21:​10, 11; Deuteronomi 21:​15-​17.

To adavana momo abia karana do ia noho hanaihanai lasi. Unai be Iesu ese Iehova ena taravatu ginigunana headava dekenai ia gwauraia lou bona danu lauma helaga ena siahu amo aposetolo Paulo ese ia torea herevana amo ita diba. Ia gwau: “Tatau ese edia adavana ta ta do idia abia be namo. Hahine taudia danu edia adavana korikori sibona do idia abia be namo.” (1 Korinto 7:⁠2) Paulo be Dirava ena lauma helaga amo inai ia torea danu, Keristani kongregesen lalonai tau ta bema ia be naria tauna eiava hesiai tauna, namona be “ia be hahine tamona ena adavana.”​​—⁠1 Timoteo 3:​2, 12; Tito 1:⁠6.

Unai hegeregerena, lagani 2,000 gunanai Keristani kongregesen ia matamaia neganai, Iehova ese adavana momo abia karana ia hadokoa. Unai nega ai, Dirava ese tau bona hahine ginigunadia ia havaraia neganai ia atoa headava taravatuna idia badinaia lou: tau tamona bona hahine tamona. Hari inai negai tanobada hegegemadai ai Dirava ena taunimanima dekenai unai headava taravatuna ia noho.​​—⁠Mareko 10:​11, 12; 1 Korinto 6:​9, 10.