“Oiemu moale be Lohiabada dekena amo do oi tahua, vadaeni ia ese, oi ura henia gaudia oi dekenai do ia henia.”​​—⁠SALAMO 37:⁠4.

1, 2. Daika be moale korikori ena Badina, bona King Davida ese edena bamona unai ia hahedinaraia?

 “IDIA diba lauma gaudia idia tahua be namo taudia idia moale, . . . bogahisihisi henia taudia be idia namo, . . . taunimanima huanai maino idia karaia taudia be idia namo.” Unai bona ma hereva siks haida be moale taudia ia gwauraia hedinarai, unai hereva be Iesu ena haroro herevana ena hamatamaia hereva namodia, evanelia toretore tauna Mataio ese ia torea bamona. (Mataio 5:​3-11; NW ) Iesu ena hereva ese ita ia hagoadaia moale do ita davaria diba.

² Idaunegai Israela ena King Davida ese ia torea ane helagana dekenai ia hahedinaraia, Iehova be moale korikori ena Badina. Davida ia gwau: “Oiemu moale be Lohiabada dekena amo do oi tahua, vadaeni ia ese, oi ura henia gaudia oi dekenai do ia henia.” (Salamo 37:⁠4) To dahaka ese Iehova bona ena kara idauidau dibaia karana dekenai “moale” ia havaraia diba? Iehova ese ena ura hagugurua totona ia karaia vadaeni gaudia bona do ia karaia gaudia oi laloa neganai, unai ese edena bamona dala ia kehoa “oi ura henia gaudia” oi abia totona? Salamo 37 siri 1 ia lao 11 do ita tahua namonamo, unai amo haere do ita davaria.

“Umui Mama Lasi”

3, 4. Salamo 37:1 ena hereva hegeregerena, Davida ese dahaka sisiba ia henia, bona hari dahaka dainai unai sisiba ita badinaia be maoro?

³ Ita be “metau dikadia momo” negana ai ita noho bona kara dika be bada herea. Ita itaia vadaeni aposetolo Paulo ena hereva be momokani, ia gwau: “Kara dika taudia bona koikoi taudia ese edia kara dika bona edia koikoi do idia habadaia. Idia ese tau haida do idia koia, bona ma tau haida ese idia danu do idia koia.” (2 Timoteo 3:​1, 13) Kara dika taudia idia kwalimu bona taga dainai ita mama diba! Unai ibounai ese iseda lalona ia veria diba, bena lauma dalanai do ita itaia namonamo lasi. Salamo 37 ena hamatamaia herevana ese dika idia havaraia diba taudia dekenai ita ia hadibaia, ia gwau: “Do umui laloa hekwarahi lasi kara dika taudia dainai. Kara kerere taudia dainai do umui mama lasi.”

⁴ Dina ta ta ai, tanobada ena niusi halasia oreadia ese kara gagevadia be ita dekenai idia hadibaia loulou. Koikoi bisinesi taudia be idia panisidia lasi. Raskol taudia ese goada lasi taudia idia kara dika henidia. Ala-ala taudia be idia davaria lasi eiava idia panisia lasi. Unai bamona hahemaoro hagagevaia karadia ibounai ese badu ia havaraia bona iseda lalo-maino ia hadikaia diba. Toana be kara dika taudia edia kwalimu karana ese mama ena mamina ia havaraia diba. To ita lalohisihisi ese gau ta do ia hanamoa, a? Kara dika taudia ese idia moalelaia gau namodia dekenai ita mama karana ese edia noho dalana ia haidaua, a? Lasi momokani! Bona ita “laloa hekwarahi” be badina lasi. Dahaka dainai?

5. Dahaka dainai kara dika taudia be rei bamona?

 ⁵ Salamo torea tauna ia haere, ia gwau: “Badina be nega daudau lasi lalonai, tau dikadia be do idia dika, rei kaukau ia dika bamona, bona au edia raurau idia kakoro bamona.” (Salamo 37:⁠2) Reana rei matamata ena toana ia namo, to daudau lasi murinai ia kakoro bona ia mase. Kara dika taudia danu be unai bamona. Edia noho namona be do ia noho daudau lasi. Idia mase neganai, kara gageva amo idia abia gaudia ese idia do idia durua lou lasi. Dokonai, taunimanima ibounai be hahemaoro maoromaoro idia abia. Paulo ia gwau: “Kara dika ena davana be mase.” (Roma 6:23) Kara dika taudia bona kara kerere taudia ibounai be edia “davana” do idia abia bona do idia ore. Unai be anina lasi maurina momokani!​​—⁠Salamo 37:​35, 36; 49:​16, 17.

6. Salamo 37:​1, 2 edia hereva amo dahaka ita dibaia?

⁶ Vadaeni, kara dika taudia ese idia abia gau namodia, do idia noho daudau lasi gaudia unai, ita lalohisihisilaia be namo, a? Salamo 37 ena siri ginigunadia rua amo ita dibaia gauna be inai: Namo lasi kara dika taudia edia kwalimu karana, ese oi ia veria Iehova hesiai henia totona oi abia hidi dalana oi rakatania totona. To, lauma dalanai oi abia hahenamo bona tahua gaudia oi laloa noho be namo.​​—⁠Aonega Herevadia 23:⁠17.

“Lohiabada Dekenai Do Oi Abidadama, Bona Kara Namo Do Oi Karaia”

7. Dahaka dainai Iehova ita abidadama henia be namo?

⁷ Salamo torea tauna ese ita ia hagoadaia, ia gwau: “Lohiabada dekenai do oi abidadama, bona kara namo do oi karaia.” (Salamo 37:3a) Lalo-hekwarahi gaudia ita davaria eiava ita daradara neganai, Iehova dekenai ita abidadama momokani be namo. Ia sibona be lauma dalanai noho namona ia henia Tauna. Mose ia gwau: “Bema tau ta ese Ataiai Momokani Lohiabada dekenai ia lao, Lohiabada ese mase dekena amo do ia naria totona, bona bema unai tau be, Siahu Ibounai Dirava kahirakahira ia noho neganai. Dirava ese do ia naria bona durua.” (Salamo 91:⁠1) Inai tanobada dikana lalonai taravatu utua karadia idia bada dainai ita lalo-hekwarahi neganai, Iehova dekenai ita tabekau momokani be namo. Bema iseda aena ena turia ia makohi, ita ura turana ta ese ita ia durua. Unai hegeregerena, mai abidadama ida ita raka totona, Iehova ena heduru ita abia be namo.​​—⁠Isaia 50:⁠10.

8. Edena dala ai Keristani haroro gaukara ita karaia neganai, unai ese ita ia durua kara dika taudia edia noho namona dekenai ita lalo-hekwarahi lasi totona?

⁸ Dala namona ta be mamoe bamona taudia ita tahua bona durua noho Iehova ena ura ena diba maorona idia abia totona, unai amo kara dika taudia edia noho namona ese ita dekenai lalo-hekwarahi do ia havaraia lasi. Kara dika ia bada noho lalonai, namona be nega bada ita henia ma haida ita durua totona. Aposetolo Paulo ia gwau: “Kara namodia do umui laloaboio lasi, bona kohu lasi taudia danu, umui emui kohu do umui abia hebou. Inai bamona karadia be boubou gaudia bamona, Dirava ese ia moalelaia gaudia.” Kara namodia do ita hahedinaraia dalana badana be ma haida dekenai Dirava ena Basileia ena sivarai namona ita herevalaia. Taunimanima vairanai ita haroro karana amo “hanamoa Dirava dekenai do ita henia nega ibounai, boubou gauna bamona.”​​—⁠Heberu 13:​15, 16; Galatia 6:10.

9. Davida ena hereva “tano dekenai do oi noho” oi gwauraia hedinarai.

⁹ Davida ma ia gwau: “Tano dekenai do oi noho namo, mai abidadama ida oi kara.” (Salamo 37:3b, NW ) Davida ena nega dekenai, “tano” be Iehova ese Israela taudia dekenai ia henia Gwauhamata Tanona ia herevalaia. Solomona ia lohia lalonai, unai tano ena hetoana be not kahana dekenai ia  noho Dano tanona amo ia lao saut kahana ai ia noho Bere Sieba tanona dekenai. Unai be Israela taudia edia noho gabuna. (1 King Taudia 4:​25) Hari, herevana edena gabu ai ita noho, to tanobada ibounai be paradaiso ai ia lao, unai gabu ai kara maoromaoro do ia noho, negana ita naria noho. Ita naria noho lalonai, ita be lauma dalanai ita noho namo.​​—⁠Isaia 65:​13, 14.

10. ‘Mai abidadama ida ita kara’ neganai, dahaka do ita abia?

¹⁰ ‘Mai abidadama ida ita kara’ neganai, dahaka do ita abia? Dirava ena siahu amo idia torea aonega herevana ta ia gwau: “Kara maoromaoro tauna ese, gau namodia momo do ia davaria.” (Aonega Herevadia 28:20) Herevana edeseniai ita noho eiava daika ita haroro henia, to bema mai kamonai ida sivarai namona ita harorolaia noho, Iehova amo davana namona do ita abia. Hegeregere, Frank bona iena adavana Rose be lagani 40 gunanai Scotland ena taoni ta ai painia gaukara idia karaia. Guna unai gabu dekenai kamonai taudia haida be hereva momokani amo idia hure oho. Unai ese unai painia tadikaka bona ena adavana ia koua lasi, haroro bona hahediba taudia halaoa gaukarana idia karaia totona. Hari unai taoni dekenai kongregesen ta ia noho. Unai headava tau bona hahine edia kamonai karana dainai Iehova ese idia ia hanamoa. Mai manau ida Frank ia gwau: “Ai be hereva momokani lalonai ai do noho bona ai be Iehova ai do hesiai henia noho dainai unai be hahenamo badana.” Oibe, ‘mai abidadama ida ita kara’ neganai, hahenamo momo ita abia bona ita moalelaia.

“Moale be Lohiabada Dekena amo Do Oi Tahua”

11, 12. (a) Edena dala ai ‘moale be Lohiabada dekena amo ita tahua’ diba? (b) Sibona emu stadi totona dahaka tahua gaudia oi atoa, bona reana dahaka anina namona do oi abia?

¹¹ Iseda hetura karana Iehova ida ita hagoadaia bona ia ita abidadama henia noho totona, ‘moale be Ia dekena amo ita tahua’ be namo. (Salamo 37:⁠4a) Unai be edena bamona ita karaia? Iseda mauri lalonai idia vara gaudia ita laloa momo lasi, ena be unai be mai ena hekwarahi, to Iehova ita laloa be namo. Unai ita karaia totona, dala ta be nega ita atoa Iena Hereva ita duahia totona. (Salamo 1:​1, 2) Oiemu Baibel duahiduahi karana amo moale oi abia, a? Iehova oi dibaia namonamo totona Baibel oi duahia neganai, moale do oi davaria. Baibel ena kahana ta oi duahia murinai, oi doko bona sibona oi nanadaia, ‘Inai sivarai amo dahaka lau dibaia, Iehova be edena bamona Diravana?’ Baibel oi duahia neganai, noutbuk eiava pepa haida idia noho be heduru gauna. Nega ta ta oi doko bona oi duahia gauna ena anina oi laloa neganai, hereva haida oi torea unai amo Dirava ena kara namona ta oi laloa lou diba. Salamo ma ta dekenai, Davida be ane ia abia: “Lohiabada e, oi be lauegu Nadi Gini Gabuna, bona egu Hamauria Tauna. Mani lau do oi durua, vadaeni lauegu uduna ena hereva, bona lauegu kudouna ena laloa, be do idia namo, oiemu vairana dekenai.” (Salamo 19:14) Dirava ena Hereva ita laloa namonamo karana be ia “namo” Iehova dekenai bona ita dekenai danu.

¹² Edena dala ai iseda stadi bona laloa dobu karana amo moale ita davaria diba? Namona be ita ura Iehova bona ena kara ita dibaia namonamo. Tau Hereadaena bona Draw Close to Jehovah bukana a ai gau momo idia noho ita lalohadailaia totona. Davida ese kara maoromaoro taudia ia hagoadaia, ia gwau, Iehova ese “oi ura henia gaudia oi dekenai do ia henia.” (Salamo 37:⁠4b) Unai bamona abidadama ese aposetolo Ioane ena lalona ia veria inai hereva ia torea totona, ia gwau: “Dirava ita abidadama henia dainai, ita diba momokani, bema gau ta iena ura hegeregerena ita noia neganai, ia ese ita dekenai do ia kamonai. Bona ita diba  iseda noinoi ibounai ia kamonai dainai, ita diba danu ita noia gaudia do ita abia.”​​—⁠1 Ioane 5:​14, 15.

13. Vanegai laganidia lalonai, tano momo dekenai Basileia harorolaia gaukarana be edena dala idauidau ai idia karaia badabada?

¹³ Ita be Dirava badinaia taudia dainai, iseda moale bada gauna be Iehova ese ena lohia siahuna ena maoro ia hamomokania karana ita itaia. (Aonega Herevadia 27:11) Guna, gavamani aukadia edia siahu henunai iseda tadikaka ese haroro gaukara badana idia karaia, unai ita dibaia neganai ita moale bada herea, ani? Inai tanobada ena dokona ia do mai lasi neganai, do idia vara gaudia haida ita naria mai eda ura ida. Iseda gaukara idia taravatua lasi tanodia dekenai, Iehova ena hesiai taudia idia gaukara goadagoada sikuli taudia, heau mauri taudia, bona nega sisina lalonai unai tano dekenai idia noho bona tomadiho ena maoro idia moalelaia taudia ma haida idia haroro henidia totona. Iseda ura badana be unai taudia ta ta be edia tano dekenai idia giroa lou neganai, haroro gaukara idia taravatua gabudia ai hereva momokani ena diari do idia hahedinaraia noho.​​—⁠Mataio 5:​14-​16.

“Oiemu Mauri be Lohiabada Ena Imana Dekenai Do Oi Atoa”

14. Dahaka ese idia hamomokania Iehova dekenai ita abidadama diba?

¹⁴ Iehova ese iseda lalo-hekwarahi bona metau ia kokia diba, unai ita diba ese ita ia hagoadaia momokani! Edena dala ai? Davida ia gwau: “Oiemu mauri be Lohiabada ena imana dekenai do oi atoa. Ia dekenai do oi abidadama, vadaeni ia ese oi do ia durua.” (Salamo 37:⁠5) Iseda kongregesen dekenai hamomokania gaudia idia hahedinaraia Iehova ese ita ia durua diba. (Salamo 55:22) Ful-taim hesiai gaukara idia karaia taudia, herevana idia be painia taudia, sekit bona distrik naria taudia, misinari, eiava Betele dekenai volantia gaukara idia karaia taudia, idia ese oi idia hamaoroa diba Iehova ese idia ia naria. Oi diba taudia oi hereva henia bona nanadaia edena dala ai Iehova ese idia ia durua. Momokani, ekspiriens momo do oi kamonai, idia hahedinaraia nega aukadia dekenai danu, Iehova ese hanaihanai heduru ia henia. Hanaihanai mauri durua gaudia ia henia.​​—⁠Salamo 37:25; Mataio 6:​25-​34.

15. Edena dala ai Dirava ena taunimanima edia kara maoromaoro be diari bamona ia hedinarai?

¹⁵ Iehova ita abidadama henia bona ia dekenai ita tabekau momokani neganai, salamo torea tauna ena hereva do ita mamia diba, ia gwau: “Oiemu kara namona be Lohiabada ese do ia hedinaraia, dina ena diari bamona. Ia ese oiemu kara maoromaoro, be taunimanima edia vairanai do ia hedinaraia, dina tubua bamona.” (Salamo 37:⁠6) Ita be Iehova ena Witnes taudia dainai, nega momo ita idia gwauraia kerere. To, Iehova ese kudou-maoro  taudia edia matana ia kehoa idia lalo-parara totona, iseda haroro gaukara be Iehova bona dekena taudia ita lalokau henia dainai ita karaia. Danu, iseda kara namodia, ena be momo ese idia gwauraia kerere, be ia hedinarai goevagoeva. Iehova ese dagedage karadia idauidau amo ita ia hagoadaia. Unai dainai, Dirava ena taunimanima edia kara maoromaoro be ia diari, dina be dina tubu ai ia hedinarai bamona.​​—⁠1 Petero 2:​12.

‘Oi Laga-Ani Bona Oi Naria’

16, 17. Salamo 37:7 ena hereva bamona, hari be nega namona dahaka ita karaia totona, bona dahaka dainai?

¹⁶ Salamo torea tauna ma ia gwau: “Lohiabada ena vairanai do oi laga-ani. Iena vairanai do oi helai, oi naria ela bona ia ese oi do ia durua. Edia gaukara dekena amo, kohu momo idia davaria taudia, be idia dainai do oi mama lasi. Ma palani dikadia idia karaia, bona unai palani ena anina idia davaria taudia, idia totona do oi laloa hekwarahi lasi.” (Salamo 37:⁠7) Unai hereva amo Davida ese ia hahedinaraia, namona be mai haheauka ida Iehova ita naria kara ta ia karaia totona. Ena be inai tanobada dikana ena dokona ia do mai lasi, to unai dainai ita maumau lasi. Iehova ena hebogahisi bona haheauka be bada herea, guna ita laloa bamona lasi, ani? Dokona ia do mai lasi neganai, sivarai namona ita harorolaia goadagoada lalonai, ita danu ita hahedinaraia mai haheauka ida ita naria noho diba, a? (Mareko 13:10) Hari inai nega lalonai, iseda moale idia kokia bona lauma dalanai iseda noho namona idia hadikaia diba karadia ita karaia haraga lasi. Hari be nega namona Satani ena lalona veria tanobadana ita dadaraia goadagoada totona. Bona hari be nega namona iseda kara ia goeva noho be namo bona Iehova vairanai iseda kara maoromaoro ita hadikaia lasi. Ita hekwarahi noho lalohadai dikadia ita kokia bona haida dekenai ia maoro lasi karadia ita karaia lasi, tau ese hahine ta eiava tau ma ta ia kara henia dalana, eiava hahine ese tau ta eiava hahine ma ta ia kara henia dalana ia naria namonamo be namo​​—⁠Kolose 3:⁠5.

¹⁷ Davida ese ita ia sisiba henia, ia gwau: “Do oi badu lasi, do oi dagedage lasi. Do oi laloa hekwarahi o laloa badu lasi, badina unai bamona laloa ese kara dika ia havaraia noho. Badina kara dika taudia be, dika momokani do idia davaria, to Lohiabada idia abidadama henia taudia ese, edia tano dekenai do idia noho, mai namo danu.” (Salamo 37:​8, 9) Oibe, Iehova ese tanobada amo kara gageva bona idia karaia taudia ibounai do ia kokia, mai abidadama ida unai nega ita naria noho​​—⁠ia kahirakahira momokani.

“Nega Daudau Lasi Lalonai”

18, 19. Salamo 37:10 amo dahaka hagoadaia hereva oi abia?

¹⁸ “Nega daudau lasi lalonai kara dika taudia do idia ore. Edia gabu do umui tahua, to do umui davaria lasi.” (Salamo 37:10) Inai tanobada dikana ena dokona bona Iehova amo idia gini siri taudia edia dika ena dokona ita lao henia lalonai, unai hereva ese ita ia hagoadaia! Taunimanima ese idia haginia gavamani eiava siahu oreadia be idia hegeregere lasi. Bona hari Dirava ese ita do ia lohia negana be ia mai kahirakahira noho, Iesu Keriso be Iehova ena Basileia do ia lohiaia. Unai Basileia ese tanobada do ia biagua momokani bona Dirava ena Basileia idia inai henia taudia ibounai do ia kokia.​​—⁠Daniela 2:​44.

¹⁹ Tanobada matamatana ai Dirava ena Basileia henunai, “kara dika” tauna do oi tahua to do oi davaria diba lasi. Momokani, ta be Iehova ia gwau-edeede henia neganai maoromaoro do idia kokia. Iena lohia siahuna ia abia dae lasi tauna eiava iena siahu henunai ia ura lasi noho tauna be unuseniai do ia noho lasi. Oiemu dekena taudia ibounai edia ura tamona be Iehova do idia hanamoa. Noho namona do ia mailaia​​—⁠loka be lasi, auri be lasi, bona gau ta ese abidadama bona moale do ia hadikaia lasi!​​—⁠Isaia 65:20; Mika 4:4; 2 Petero 3:​13.

20, 21. (a) Salamo 37:11 ese ia gwauraia manau taudia be daidia, bona edeseni amo “maino” bada idia davaria? (b) Bema Davida Badana ita tohotohoa, dahaka hahenamo idauidau do ita abia?

²⁰ Bena, “manau taudia ese noho gabuna tano do idia abia.” (Salamo 37:11a) To unai “manau taudia” be daidia? Oibe, “manau taudia” be Iehova  idia naria noho, idia dekenai idia vara kara gageva ibounai do ia hamaoromaoroa totona. “Do idia helai namonamo, mai moale bona mai maino danu.” (Salamo 37:11b) Hari danu Keristani kongregesen momokanina ita bamoa neganai, lauma paradaisona lalonai maino ai ita noho diba.

²¹ Ena be hisihisi idauidau amo laga-ani ita abia lasi, to ta ta ita durua bona idia lalo-metau taudia ita hagoadaia. Unai dainai, Iehova ena taunimanima idia moale momokani. Mamoe naria gaukarana idia karaia tadikaka be mai lalokau ida lauma dalanai​​—⁠bona nega haida tauanina dalanai⁠—ita idia durua, unai amo kara maoromaoro dainai ita davaria hisihisi ita haheaukalaia diba. (1 Tesalonika 2:​7, 11; 1 Petero 5:​2, 3) Unai maino be gau namo hereana! Danu iseda helaro be maino paradaisona ai mauri hanaihanai do ita abia. Unai dainai Davida Badana, Iesu Keriso ita tohotohoa, ena ura bada Iehova dekenai ese ia doria dainai mai kamonai ida ena hesiai gaukara ia karaia ela bona dokona. (1 Petero 2:​21) Unai bamona ita karaia neganai do ita moale noho, bona moale ia henia Diravana Iehova do ita hanamoa noho.

[Footnote]

Oi Haere Diba, A?

• Salamo 37:​1, 2 amo dahaka oi dibaia?

• Edena dala ai ‘moale be Iehova dekenai ita tahua’ diba?

• Dahaka ese ia hamomokania Iehova dekenai ita abidadama diba?

[Study Questions]

[Picture on page 21]

Keristani taudia ‘be kara kerere taudia dainai idia mama lasi’

[Picture on page 22]

“Lohiabada dekenai do oi abidadama, bona kara namo do oi karaia”

[Picture on page 23]

Iehova oi dibaia namonamo amo ia dekenai moale do oi davaria

[Picture on page 24]

“Manau taudia ese noho gabuna tano do idia abia”