Basileia Haroro Ripoti

POLAND dekenai, Iehova ena Witnes taudia edia ful-taim hesiai hahinena ta, Dorota, be ena mauri lagani 14 natuna mero ia hakaua lao sikuli ena kliniki dekenai, hanaihanai idia karaia bamona. Doketa Janina a ese Dorota ena natuna ena tauanina ia sekea lalonai, ruma ai ena natuna ia karaia gaukara totona Dorota ia nanadaia.

Dorota ia haere: “Bema lau hegeregere lasi neganai, egu natuna mero ese ruma bese lalonai ai ibounai siks totona aniani ia hegaegaelaia. Danu ruma ia hagoevaia bona ruma lalonai gau haida hanamoa totona ia durua. Duahiduahi karana ia ura henia. Ia be stiuden namona.”

Janina ia gwau: “Unai be hoa gauna momokani. Lau be lagani 12 iniseniai lau gaukara vadaeni, to unai bamona hereva ta lau do kamonai lasi.”

Dorota ia itaia unai be nega namona do ia haroro henia dainai, ia gwau: “Hari inai negai tama sina momo be edia natudia idia hadibaia namonamo lasi. Unai dainai edia natudia momo be sibona matauraia karana idia diba lasi.”

Janina ia henanadai: “Edena bamona unai gaudia ibounai oi diba? Tama sina momo be unai gaudia idia diba lasi.”

Dorota ia gwau: “Inai bamona hadibaia hereva namodia be Baibel lalonai idia noho. Hegeregere, Deuteronomi 6:​6-9 ena hereva hegeregerena, ita sibona ita hadibaia guna be namo, gabeai iseda natudia ita hadibaia. Iseda kudouna bona lalona be hakaua herevadia amo ita hahonua guna, bena iseda natudia dekenai ita hadibaia be namo, ani?”

Janina ia gwau: “Unai be hoa gauna momokani. Unai be hoa gauna momokani!” Bena Dorota ia nanadaia edena bamona Baibel ese ia durua ena natuna ia hadibaia totona.

Dorota ia gwau: “Wiki ibounai emai natudia ida Baibel ai stadilaia. Ai be buka ta ladana Memero Kekeni Edia Henanadai​​—⁠Haere Maorodia ai gaukaralaia.” b Bena unai buka bona ena sinado haida ia gwauraia.

Janina ia gwau: “Unai be gau matamatana momokani! Ia namo unai buka lau itaia?”

Hora ta murinai, Dorota be unai buka ia abia mai.

Janina be unai buka ia itaia lalonai, ia henanadai: “Oi be edena tomadiho tauna?”

“Lau be Iehova ena Witnes hahinena ta.”

“Iehova ena Witnes taudia be edena bamona tomadiho taudia ma haida idia kara henia?”

Dorota be ma ia haere: “Oi lau kara henia hegeregerena​​—⁠mai hemataurai ida. Momokani, ai ura idia ibounai be Baibel ena hereva momokani idia dibaia.”

Janina be ena hemami ia gwauraia hedinarai, ia gwau: “Lauegu mamina ia namo vadaeni.”

Dorota ena vadivadi ia ore neganai, ia ese Janina ia hamaoroa Baibel ia duahia totona. Ia gwau: “Emu mauri lalonai anina do ia havaraia bona emu gaukara do ia durua.”

Janina ia gwau: “Unai lau karaia totona lau oi hagoadaia momokani.”

Dorota be dala namona ai bona mai lalo-goada ida ia hereva dainai, ia ese unai doketa ena opesi vadivadi loulou karana amo haroro namona ia henia.​​—⁠1 Petero 3:​15.

[Footnotes]