MANI oi laloa, tanobada lalonai dagedage karadia be lasi! Pulisi, dibura rumadia, eiava kota badadia dekenai moni bada negea karana be lasi. Unai tanobada lalonai taunimanima ta ta ese ma haida edia mauri bona kohu do idia matauraia. Unai hereva oi abia dae be auka, a? Reana unai bamona oi laloa, to unai gau ibounai do idia idau karana be Baibel ese ia gwauhamatalaia vadaeni. Namona be Baibel ese inai tanobada ai taravatu utua karana bona dika havaraia gaudia ma haida ia perovetalaia dalana ita laloa, ani?

Salamo bukana ia gwau: “Do umui laloa hekwarahi lasi kara dika taudia dainai. Kara kerere taudia dainai do umui mama lasi. Badina be nega daudau lasi lalonai, tau dikadia be do idia dika, rei kaukau ia dika bamona, bona au edia raurau idia kakoro bamona. To manau taudia ese noho gabuna tano do idia abia, do idia helai namonamo, mai moale bona mai maino danu.” (Salamo 37:​1, 2, 11) Momokani, tau ta ia hegeregere lasi Dirava ena gwauhamata bona ita ia hagoadaia gwauhamatadia iboudiai do ia hagugurua karana ia koua totona.

Dirava be ena Basileia amo unai hahenamo idauidau do ia mailaia. Lohiabada ena Guriguri lalonai, Iesu Keriso ese iena hahediba taudia ia hadibaia unai Basileia bona Dirava ena “ura gauna tanobada dekenai do ai karaia, guba dekenai idia karaia bamona” totona do idia guriguri. (Mataio 6:​9, 10) Kahirakahira, unai Basileia henunai, tau ta be ogogami, dagedage, eiava sibona ena namo ia tahua karana dainai ia karaia taravatu utua karadia, do ia karaia lasi. To, Dirava ena Hereva ia gwau: “Namona be koni momo herea, be tano dekenai do ia vara namonamo. Namona be ororo gabudia danu dekenai, uiti bona aniani avadia do idia tubu namonamo.” (Salamo 72:16) Momokani, Iehova Dirava ese taunimanima ibounai tanobada dekenai gau namodia momo herea do ia henidia. Gau badana be, taunimanima be Dirava bona dekena tauna lalokau henia karana ese idia do ia hagoadaia, bona tanobada be taravatu utua karadia ese do ia hadikaia lou lasi.