Emu Hesiai Gaukara Do Oi Karaia Namonamo
Emu Hesiai Gaukara Do Oi Karaia Namonamo
“Hesiai tauna ena dagi karadia ibounai do oi karaia namonamo.”—2 TIMOTEO 4:5.
1, 2. Ena be Keristani taudia ibounai be sivarai namona harorolaia taudia, to Baibel ia gwau elda taudia be dahaka idia karaia be namo?
OI BE Basileia harorolaia tauna ta, a? Bema oibe, unai hahenamo namona dainai Iehova oi tanikiu henia. Kongregesen lalonai oi be elda ta, a? Unai be hahenamo ma ta Iehova amo. To namona be ita laloaboio lasi, edukeisen namona eiava hereva namonamo karana sibona dainai ita haroro eiava kongregesen ita naria lasi. Iehova ese diba ia henia dainai, ita hegeregere haroro gaukara ita karaia totona bona ita huanai idia noho tatau haida edia kara be Baibel ena taravatu haida hegeregerena dainai, kongregesen naria gaukarana idia karaia.—2 Korinto 3:5, 6; 1 Timoteo 3:1-7.
2 Idia gwauhamata vadaeni Keristani taudia ibounai ese sivarai namona harorolaia gaukarana idia karaia, to elda taudia be haroro gaukara dekenai haheitalai namona idia hahedinaraia be namo. “Haroro bona hadibaia gaukara idia karaia” goadagoada elda taudia edia kara be Dirava, Keriso bona Iehova ena Witnes taudia ese idia itaia noho. (1 Timoteo 5:17; Efeso 5:23; Heberu 6:10-12) Nega ibounai, elda tauna ena hahediba herevadia ese lauma dalanai ena kamonai taudia ia durua be namo, badina aposetolo Paulo ese kongregesen naria tauna Timoteo ia hamaoroa: “Badina be negana do ia ginidae, taunimanima be hereva maoromaoro do idia ura lasi kamonai. Lasi momokani. To edia ura sibona do idia tahua. Idia ese idia ura henia hadibaia taudia momo do idia haboua. Vadaeni inai hadibaia taudia ese sivarai kavakava do idia gwauraia, unai taudia idia ura kamonai gaudia sibona. Oibe, hereva momokani do idia negea, to gori kavakava do idia kamonai henia. To oi ese nega ibounai do oi laloa maoromaoro. Hisihisi lalonai do oi haheauka. Sivarai Namona harorolaia gaukara do oi karaia, bona Dirava ena hesiai tauna ena dagi karadia ibounai do oi karaia namonamo.”—2 Timoteo 4:3-5.
3. Hahediba hereva koikoidia ese kongregesen ena goada lauma dalanai ia hadikaia lasi totona, kongregesen naria tauna be dahaka ia karaia be namo?
3 Hahediba hereva koikoidia ese kongregesen ena goada lauma dalanai ia hadikaia lasi totona, kongregesen naria tauna ese Paulo ena sisiba ia badinaia be namo, ia gwau: “Nega ibounai do oi laloa maoromaoro. . . . Bona Dirava ena hesiai tauna ena dagi karadia ibounai do oi karaia namonamo.” (2 Timoteo 4:5) Oibe, namona be elda tauna ese ena ‘dagi karadia ibounai do ia karaia namonamo.’ Unai gaukara do ia hagugurudia momokani be namo. Ena hesiai gaukara ibounai ia hagugurua elda tauna ese ena maduna ena kahana ta sibona lasi to ibounai ia laloa namonamo. Unai bamona tauna ese gau maragidia ia karaia maoromaoro danu.—Luka 12:48; 16:10.
4. Dahaka ese ita ia durua diba hesiai gaukara ita hagugurua totona?
4 Hesiai gaukara ita hagugurua totona hanaihanai nega bada ita atoa be gau badana lasi, to nega ita gaukaralaia namonamo be namo. Keristani taudia ibounai ese nega idia gaukaralaia namonamo neganai, edia hesiai gaukara idauidau idia hagugurua diba. Elda tauna be haroro gaukara ena nega ia habadaia totona, gau ibounai ia hegaegaelaia namonamo be namo, unai amo iena sediual do ia hegeregere bona do ia diba dahaka gaukara do ia haria bona edena bamona do ia karaia. (Heberu 13:17) Vaia, idia matauraia elda tauna danu be sibona edia maduna idia huaia, Nehemia ese Ierusalema ena magu haginia lou gaukarana ia durua bamona. (Nehemia 5:16) Bona Iehova ena hesiai taudia ibounai be Basileia harorolaia gaukarana idia karaia hanaihanai be namo.—1 Korinto 9:16-18.
5. Hesiai gaukara be edena bamona ita laloa be namo?
5 Ita moale badina ita be ia gini vadaeni guba Basileiana ita harorolaia taudia! Dokona ia do ginidae lasi neganai, namona be tanobada hegegemadai sivarai namona harorolaia gaukarana ita moalelaia. (Mataio 24:14) Ena be ita be goevadae lasi taudia, to Paulo ena hereva ese ita ia hagoadaia diba: “Ai, inai [haroro gaukara ena] diari ai abia vadaeni taudia, be hodu, manoka gaudia sibona bamona do ai noho. Inai anina be taunimanima ibounai do idia diba inai siahu badana be Dirava sibona dekena amo, ai dekena amo ia mai lasi.” (2 Korinto 4:7) Oibe, hesiai gaukara namona ita karaia diba—to Dirava ese ia henia goada bona aonega sibona amo unai ita karaia diba.—1 Korinto 1:26-31.
Dirava Ena Hairai Diarina Hahedinaraia
6. Israela taudia bona lauma Israela taudia edia idau be dahaka?
6 Paulo be horoa Keristani taudia ia herevalaia neganai, ia gwau Dirava “ese ai dekenai diba ia henia, vadaeni, taravatu matamata do ai gwauraia hedinarai.” Aposetolo tauna ese gwauhamata matamatana, Dirava ese Iesu Keriso amo lauma Israela taudia ida ia karaia gauna, be Taravatu gwauhamata gunana, Dirava ese Mose amo Israela taudia ida ia karaia gauna, ida ia hahegeregerea. Paulo ma ia gwau, Mose be Sinai Ororona amo ia diho mai neganai, ia be Taravatu Ten nadina ia dogoatao bona ena vairana be ia diaridiari bada herea dainai Israela taudia ese ia idia itaia noho be hegeregere lasi. Gabeai, gau badana ta ia vara badina muko ese edia kudouna bona “laloa be idia koua noho.” To, mai lalona ibounai ida Iehova idia tomadiho henia neganai, unai muko do ia kokia. Bena Paulo be gwauhamata matamatana lalonai idia noho taudia ese idia abia hesiai gaukarana ia herevalaia neganai, ia gwau: “Ita Keristani taudia ibounai, iseda vairana be muko ese idia koua lasi. Unai dainai Lohiabada ena diaridiari be ita ese ita hedinaraia, hevarivari bamona.” (2 Korinto 3:6-8, 14-18; Esodo 34:29-35) Hari, Iesu ena “mamoe idaudia” danu ese Iehova ena hairai diarina idia hahedinaraia be hahenamo badana.—Ioane 10:16.
7. Edena dala ai taunimanima ese Dirava ena hairai diarina idia hahedinaraia diba?
7 Tau ta be Dirava ena vairana ia itaia neganai do ia mase dainai, ita goevadae lasi taudia ese Dirava ena hairai diarina be edena bamona ita hahedinaraia diba? (Esodo 33:20) Oibe, Iehova be mai ena hairai diarina sibona lasi, to danu ia ura bada ena Basileia amo ena lohia siahuna do ia hahelagaia. Basileia idia gwauraia hereva momokanidia be “Dirava ena hoa gaudia” ena kahana ta, bona Pentekoste 33 C.E. ai, lauma helaga ese ia horoa taudia ese idia harorolaia matamaia. (Kara 2:11) Lauma ena hakaua henunai, idia ese idia abia hesiai gaukarana idia hagugurua diba.—Kara 1:8.
8. Paulo ese hesiai gaukara ia herevalaia neganai, ena lalona ia hadaia dahaka ia karaia totona?
8 Paulo ese ena hesiai gaukara ia hagugurua totona ena lalona ia hadaia gau ta ese ia koua lasi be namo. Ia gwau: “Dirava ena bogahisihisi dainai inai haroro gaukara ai dekenai ia henia, unai dainai ai be hesiku lasi. Ai be hemarai karadia, taunimanima idia hunia gaudia, ai negea vadaeni, bona koikoi karadia be ai karaia lasi. Dirava ena hereva danu ai senisia lasi. Ai be hereva momokani ai gwauraia hedinarai noho, Dirava ena vairana dekenai. Unai dekena amo taunimanima idia diba, ai be mai momokani danu Dirava ena gaukara ai karaia noho.” (2 Korinto 4:1, 2) Paulo ese “inai haroro gaukara” ia herevalaia dalana amo hereva momokani ia hedinarai bona lauma diarina be gabu ibounai dekenai ia lao.
9, 10. Edena dala ai Iehova ena hairai diarina ita hahedinaraia diba?
9 Paulo ese diari korikorina bona lauma diarina ena Badina ia herevalaia: “Dirava ia hereva, ia gwau, ‘Dibura dekena amo diari do ia hedinarai.’ Unai Dirava danu ese aiemai lalona dekenai iena diari ia atoa, ai do ia hadiaria totona. Inai diari be inai bamona: Ai diba momokani Dirava ena hairai diarina be Keriso ena vairana dekenai ia hedinarai noho.” (2 Korinto 4:6; Genese 1:2-5) Iseda hahenamo bada hereana ta be ita be Dirava ena hesiai taudia dainai, namona be ita goeva noho, unai amo hevarivari bamona Iehova ena hairai diarina be ita ese ita hahedinaraia diba.
10 Lauma diburana dekenai idia noho taudia be Iesu Keriso, Mose Badana, amo ia hedinarai Iehova ena hairai diarina eiava toana idia itaia diba lasi. To ita be Iehova ena hesiai taudia dainai, Baibel amo ia mai hairai diarina ita abia bona ma haida dekenai ita hahedinaraia. Bema hari lauma diburana dekenai idia noho taudia ese mase idia davaria lasi totona, namona be Dirava amo ia mai diarina idia abia. Vadaeni, mai moale bona ura bada ida Dirava ena hahegani, dibura dekena amo Iehova ena hairai diarina do ita hahedinaraia haheganina unai, do ita badinaia.
Baibel Stadi ai Emu Diari Oi Hahedinaraia
11. Iseda diari hahedinaraia karana dekenai Iesu be dahaka ia gwau, bona iseda hesiai gaukara lalonai edena dala ta ai unai ita karaia diba?
11 Iesu be ena murinai idia raka taudia ia hamaorodia: “Umui be tanobada taudia ibounai edia diari. Ororo dekenai ia noho hanua be ia hunia diba lasi. Lamepa idia gabua neganai, maua ena henunai do idia atoa lasi, to lamepa gabuna dekenai do idia atoa, vadaeni ena diari be ruma taudia ibounai do idia itaia. Umui emui diari taunimanima edia vairana dekenai unai bamona do umui hedinaraia, vadaeni umui emui kara namodia do idia itaia neganai, umui emui Tamana guba dekenai do idia hanamoa.” (Mataio 5:14-16) Iseda kara namodia dainai ma haida ese Dirava idia hanamoa diba. (1 Petero 2:12) Bona haroro gaukara ena kahana idauidau ese dala momo ia kehoa, iseda diari ita hahedinaraia totona. Anina idia havaraia Baibel stadi ita karaia ena badina badana ta be, ita ura Dirava ena Hereva amo ia mai lauma diarina ita hahedinaraia. Unai be mai anina bada dalana ta iseda hesiai gaukara ita hagugurua totona. Edena heduru herevadia ese ita do idia durua, hereva momokani idia tahua taudia edia kudouna ia hamarerea diba Baibel stadi ita karaia totona?
12. Edena dala ai guriguri be mai anina bada Baibel stadi hakaua karana dekenai?
12 Iehova dekenai guriguri amo unai ita gwauraia hedinarai karana ese ia hahedinaraia ita ura momokani Baibel stadi ita karaia. Danu ia hahedinaraia ita ura ma haida ita durua Dirava amo diba idia abia totona. (Esekiela 33:7-9) Iehova ese iseda guriguri do ia haerelaia bona iseda hekwarahi haroro gaukara lalonai do ia hanamoa danu. (1 Ioane 5:14, 15) To Baibel stadi ta ita hamatamaia totona sibona ita guriguri lasi. Baibel stadi ta ita hamatamaia murinai, Baibel stiuden do ia abia be namo gaudia ita gurigurilaia bona lalohadailaia be namo, unai amo stadi ta ta ita hakaua namonamo diba.—Roma 12:12.
13. Dahaka ese ita do ia durua anina idia havaraia Baibel stadi ita hakaua totona?
13 Anina idia havaraia Baibel stadi ita hakaua totona, namona be unai stadi negadia ta ta totona ita hegaegae namonamo. Bema ita laloa ita hegeregere lasi, reana Kongregesen Buka Stadi naria tauna ese wiki ta ta ena stadi ia hakaua dalana ita itaia be heduru gauna. Nega haida, namona be Baibel stadi hakaua dalana dekenai anina namona idia havaraia Basileia pablisa taudia ita bamoa. Oibe, Iesu Keriso ena kara bona hadibaia daladia ita laloa be namo.
14. Edena dala ai Baibel stiuden ena kudouna ita hamarerea diba?
14 Iesu ia moale ena guba Tamana ena ura ia karaia bona ma haida dekenai Dirava ia herevalaia totona. (Salamo 40:8) Ia be lalo-manau tauna bona ia idia kamonai henia taudia edia kudouna hamarerea karana dekenai ia kwalimu. (Mataio 11:28-30) Unai dainai, namona be ita hekwarahi iseda Baibel stadi taudia edia kudouna ita hamarerea totona. Unai ita karaia totona, namona be stadi ta ta totona ita hegaegae neganai, stadi tauna ena noho dalana ita laloa. Hegeregere, bema ena bese taudia ese Baibel idia abia dae lasi, namona be ita hamaoroa Baibel ena hereva be momokani. Anina be Baibel siri momo do ita duahia bona edia anina do ita gwauraia hedinarai.
Stiuden Taudia Durua Haheitalai Idauidau Idia Lalo-Pararalaia Totona
15, 16. (a) Baibel lalonai idia noho haheitalai ta ia lalo-pararalaia lasi stiuden tauna be edena bamona ita durua diba? (b) Dahaka ita karaia diba bema iseda buka lalonai be Baibel stiuden ese ia lalo-pararalaia lasi haheitalai ta ia noho?
15 Reana Baibel stiuden be Baibel lalonai idia gaukaralaia haheitalai ta ia diba lasi. Hegeregere, Iesu ia gwau lamepa be lamepa ena gini gabuna dekenai idia atoa, to reana stiuden be unai hereva ena anina do ia lalo-pararalaia lasi. (Mareko 4:21, 22) Iesu ese idaunegai oela lamepa mai ena uiki ta, lahi ia araia noho gauna, ia herevalaia. Unai bamona lamepa be lamepa ena gini gabuna ta dekenai idia atoa, unai amo ruma ena kahana ta ia hadiaria diba. Iesu ena haheitalai ita hahedinaraia namonamo totona, namona be inai bamona buka Insight on the Scriptures dekenai inai hereva “Lamp” bona “Lampstand” edia anina ita tahua. * To Baibel stadi lalonai, stiuden tauna ese do ia lalo-pararalaia bona abia dae dalana ai gau ta ita gwauraia hedinarai namonamo be moale gauna!
16 Baibel stadi buka ta lalonai be reana stadi tauna ese ia lalo-pararalaia lasi haheitalai ta ia noho. Nega oi atoa unai oi gwauraia hedinarai namonamo totona, eiava stadi ena point ia haidaua lasi haheitalai ma ta oi gaukaralaia. Reana magasin eiava buka ta ese ia hahedinaraia, headava lalonai turana namona bona gaukara hebou karana be gau badana. Unai be hegeregere, gaba toua taudia be edia gaba idia botaia matamaia. Ane abia kekenina mai ena gado regena namo hereana be idia ia badinaia bona ane ia abia. Unai amo miusiki mai ena regena namona ia vara. Turana namona bona gaukara hebou karana ena haheitalai ma ta be inai, gaukara taudia be bouti amo maua idia kokia neganai, ta be ena bamona dekenai maua ia negea, ena bamona ese ia gobea namonamo bona ma ta ia naria.
17. Iesu ese haheitalai ia gaukaralaia dalana amo dahaka ita dibaia diba?
17 Haheitalai ma ta ita gaukaralaia totona, anina be ita hegaegae guna be namo. Unai amo ita hahedinaraia Baibel stiuden ena namo ita laloa bada. Iesu be auka lasi haheitalaidia ia gaukaralaia, hereva aukadia edia anina ia gwauraia hedinarai totona. Iena Haroro Herevana Badana ese unai ia haheitalaia bona Baibel ese ia hahedinaraia iena hadibaia karana ese ena kamonai taudia ia durua namonamo. (Mataio 5:1–7:29) Iesu be ma haida edia namo ia laloa bada dainai, mai manau ida gau ibounai edia anina ia gwauraia hedinarai.—Mataio 16:5-12.
18. Iseda buka bona magasin dekenai Baibel siridia idia gwauraia neganai, dahaka ita karaia be namo?
18 Ma haida edia namo laloa bada karana ese ita ia hagoadaia ‘Buka Helaga ita herevalaia’ totona. (Kara 17:2, 3) Anina be mai guriguri ida ita stadi bona mai aonega ida “kohu naria tauna mai ena kamonai” oreana ese ia hegaegaelaia buka bona magasin ita gaukaralaia. (Luka 12:42-44) Hegeregere, Diba ese Mauri Dekenai Ita Ia Hakaua Lao buka ai be idia torea hanai siri momo idia noho. * To unai buka be ia bada lasi dainai, siri haida be idia gwauraia sibona. Baibel stadi ta ita karaia neganai, idia gwauraia siridia haida ita duahia bona edia anina ita hahedinaraia be gau badana. Badina iseda hadibaia herevana be Dirava ena Hereva amo bona ia be mai ena siahu bada. (Heberu 4:12) Stadi ta ta ibounai lalonai Baibel oi gaukaralaia, paragraf lalonai idia noho siridia oi duahidia totona. Stiuden tauna oi durua Baibel ese hereva ta eiava kara ta ia herevalaia dalana ia itaia totona. Ia dekenai oi hahedinaraia edena bamona Dirava badinaia karana amo namo do ia abia.—Isaia 48:17, 18.
Lalona Veria Henanadaidia Gaukaralaia
19, 20. (a) Baibel stadi ta ita karaia neganai, dahaka dainai lalona tahua henanadaidia ita gaukaralaia be namo? (b) Bema hereva ta ita herevalaia lou be namo, dahaka ita karaia diba?
19 Iesu ese henanadai ia gaukaralaia namonamo dainai taunimanima ia durua idia laloa namonamo totona. (Mataio 17:24-27) Bema Baibel stiuden ia hahemaraia lasi lalona tahua henanadaidia ita gwauraia, ena haere amo ena lalohadai unai hereva dekenai ia hahedinaraia diba. Reana ita davaria ena lalohadai be Baibel ena lalohadai hegeregerena lasi. Hegeregere, Toi Tamona ia abia dae. Diba bukana ena karoa 3 ese ia hahedinaraia, inai hereva “Toi Tamona” be Baibel lalonai ia hedinarai lasi. Buka dekenai idia torea hanai bona idia gwauraia siridia ese idia hahedinaraia Iehova be Iesu ena amo ia idau bona lauma helaga be lauma tauna lasi to Dirava ena gaukara siahuna. Unai Baibel siridia duahia bona herevalaia karana ese emu hereva do ia hamomokania. To bema ia do lalo-parara lasi, dahaka ita karaia diba? Reana gabeai, stadi murinai nega sisina ita atoa diba Iehova ena Witnes taudia edia buka ma ta, hegeregere Toi Tamona Oi Abia Dae be Namo, Eiava? buklet amo unai kahana ita herevalaia totona. Unai murinai, Diba bukana amo stadi do ita hamatamaia lou diba.
20 Reana stiuden tauna ena haere, oi henia lalona tahua henanadai dekenai, be hoa gauna eiava emu lalona ia hamoalea lasi. Bema kuku ania karana, eiava ma gau ta umui herevalaia, namona be ita hamaoroa stadi do ita karaia noho bena gabeai unai do ita herevalaia. Ita diba stiuden tauna be kuku ia do ania noho dainai, namona be idia halasia vadaeni herevadia ita tahua, unai amo ita durua diba lauma dalanai ia goada ia lao noho totona. Stiuden tauna ena kudouna ita hamarerea totona ita hekwarahi noho lalonai, Iehova dekenai ita guriguri unai stiuden do ia durua lauma dalanai ia tubu totona.
21. Bema iseda hadibaia dalana ese Baibel stiuden ia durua, dahaka ia vara diba?
21 Bema ita hegaegae namonamo bona Iehova ena heduru ita abia, ita diba momokani iseda hadibaia dalana ese Baibel stiuden ia durua diba. Nega ia lao noho lalonai, reana ia do ita durua Dirava lalokau henia bada karana ia habadaia totona. Reana Iehova ena orea do ia matauraia bona moalelaia bada danu. Bona Baibel stiuden taudia idia gwau, “momokani Dirava be umui emui huanai ia noho” neganai, ita moale! (1 Korinto 14:24, 25) Unai dainai, namona be anina idia havaraia Baibel stadi ita karaia bona ita hekwarahi ma haida ita durudia Iesu ena hahediba taudia ai idia lao totona.
Ita Laloa Bada Gaukarana
22, 23. Bema ita ura iseda hesiai gaukara ita karaia namonamo, dahaka be gau badana?
22 Iseda hesiai gaukara ita hagugurua totona, namona be Dirava ese ia henia goadana dekenai ita tabekau. Paulo be hesiai gaukara ia herevalaia neganai, horoa Keristani tadikakadia dekenai ia gwau: “Inai diari ai abia vadaeni taudia, be hodu, manoka gaudia sibona bamona do ai noho. Inai anina be taunimanima ibounai do idia diba inai siahu badana be Dirava sibona dekena amo, ai dekena amo ia mai lasi.”—2 Korinto 4:7.
23 Herevana ita be horoa taudia eiava “mamoe idaudia,” ita be hodu manokadia bamona. (Ioane 10:16) To, Iehova ese ita dekenai goada ia henia diba, ita abia gaukarana ita hagugurua totona, herevana hekwakwanai idauidau ita davaria. (Ioane 16:13; Filipi 4:13) Unai dainai, namona be hanaihanai Iehova dekenai ita tabekau momokani, ita karaia hesiai gaukara ita laloa bada bona iseda hesiai gaukara ita karaia namonamo.
[Footnotes]
^ par. 15 Iehova ena Witnes taudia ese idia halasia.
^ par. 18 Iehova ena Witnes taudia ese idia halasia.
Edena Bamona Do Oi Haere?
• Elda taudia be dahaka idia karaia diba, edia hesiai gaukara idia karaia namonamo totona?
• Edena dala ai anina idia havaraia Baibel stadi ita hakaua diba?
• Dahaka do oi karaia bema Baibel stadi tauna ta ese haheitalai ta ia lalo-pararalaia lasi, eiava hereva ta dekenai diba ma haida ia abia be namo?
[Study Questions]
[Picture on page 10]
Keristani elda taudia be kongregesen dekenai idia hadibaia bona hesiai gaukara dekenai edia tadikaka idia durua
[Picture on page 12]
Anina ia havaraia Baibel stadi ita karaia be dala ta, iseda diari ita hahedinaraia totona