Heduru Totona Aneru Ita Noidia be Namo, A?

NEGA dikadia ai heduru totona aneru ita noidia be maoro, a? Taunimanima momo be unai bamona idia laloa. Momokani, New Catholic Encyclopedia ia gwau: “Ta be aneru dekenai . . . ia guriguri . . . to aneru be ita totona Dirava dekenai do idia noinoi.” Aneru dekenai unai bamona ita noinoi be namo, a?

Dirava ena Hereva ese ita dekenai Dirava idia badinaia aneru rua sibona edia ladana, Mikaela bona Gabriela, ia gwauraia. (Daniela 8:​16; 12:1; Luka 1:​26; Iuda 9) Unai ladadia be Baibel lalonai idia noho, badina unai amo ita diba aneru ta ta be lauma tauna ta mai ena ladana, siahu ta sibona lasi. To, aneru haida idia ura lasi taunimanima dekenai edia ladana idia hahedinaraia. Hegeregere, Iakobo ese ia vadivadi aneruna ta ena ladana ia henanadailaia neganai, unai aneru ese ena ladana ia gwauraia lasi. (Genese 32:29; Gunalaia Taudia 13:​17, 18) Baibel be aneru edia ladadia edia lista ia hahedinaraia lasi, unai amo taunimanima ese aneru do idia abidia isi kava lasi.

Aneru edia gaukara badana be Dirava ena hereva be taunimanima dekenai idia halasia. Momokani, Heberu bona Greek gado herevadia idia hahanaia “aneru” edia anina be “hereva gwauraia tauna.” To, aneru ese taunimanima edia guriguri be Ataiai Momokani Diravana ena terona dekenai idia laohaia lasi. Dirava ia gwau iena Natuna, Iesu Keriso ena ladana ai ia do ita guriguri henia. Iesu ia gwau: “Lauegu ladana dekenai Tamana do umui noia gaudia ibounai, be ia ese do ia henia umui dekenai.”​​—⁠Ioane 15:16; 1 Timoteo 2:⁠5.

Iehova Dirava be nega ibounai ia hegaegae dainai, bema dala maorona ai Ia ita guriguri henia, do ia kamonai. Baibel be ita ia hadibaia: “Lohiabada be ia dekenai idia boiboi taudia dekenai ia noho. Idia boiboi henia mai edia momokani danu taudia dekenai, Lohiabada be idia kahirakahira ia noho.”​​—⁠Salamo 145:⁠18.