“Sivarai Namona Harorolaia Gaukara Do Oi Karaia”
“Sivarai Namona Harorolaia Gaukara Do Oi Karaia”
“Nega ibounai do oi laloa maoromaoro. . . . Sivarai Namona harorolaia gaukara do oi karaia.”—2 TIMOTEO 4:5.
1. Iesu be iena murinai idia raka taudia dekenai dahaka hahegani ia henia?
IEHOVA ena ladana bona ena ura be tanobada ibounai dekenai idia harorolaia noho. Unai ena badina be Dirava dekenai idia gwauhamata taudia ese Iesu Keriso ena hahegani, iena murinai idia raka taudia dekenai ia henia gauna idia laloa bada, ia gwau: “Do umui lao, bese ibounai be diba tahua taudia do umui halaoa, bona Tamana, Natuna, bona Lauma Helaga ena ladanai do umui bapatiso henia idia dekenai. Bona idia dekenai do umui hadibaia, umui dekenai lau henia hereva ibounai be do idia badinaia.”—Mataio 28:19, 20.
2. Kongregesen naria tauna Timoteo be dahaka hadibaia herevana ia abia, bona Keristani kongregesen naria taudia ese Dirava ena hesiai tauna ena dagi karadia ibounai do idia karaia namonamo dalana ta be dahaka?
2 Iesu ena hahediba taudia ginigunadia ese unai hahegani idia laloa bada. Hegeregere, aposetolo Paulo ese ena Keristani tadikaka bona kongregesen naria tauna Timoteo ia hagoadaia: “Sivarai Namona harorolaia gaukara do oi karaia, bona Dirava ena hesiai tauna ena dagi karadia ibounai do oi karaia namonamo.” (2 Timoteo 4:5) Hari inai negai, kongregesen naria tauna ta ese Dirava ena hesiai tauna ena gaukara ia karaia namonamo dalana ta be, hanaihanai Basileia do ia harorolaia goadagoada. Hegeregere, Kongregesen Buka Stadi naria tauna ena hahenamo namo hereana be haroro gaukara ia gunalaia bona ma haida ia hadibaia. Paulo ese sivarai namona ia harorolaia bona ma haida dekenai haroro dalana ia hadibaia.—Kara 20:20; 1 Korinto 9:16, 17.
Idaunegai Sivarai Namona Idia Harorolaia Goadagoada Taudia
3, 4. Filipo be sivarai namona ia harorolaia tauna dainai, dahaka ia vara?
3 Taunimanima momo idia diba Keristani taudia ginigunadia be sivarai namona idia harorolaia goadagoada taudia. Sivarai namona ia harorolaia tauna Filipo mani oi laloa. “Tatau 7 . . . ladana namo taudia, Lauma Helaga bona aonega dekenai idia honu taudia” idia abia hidi neganai, Filipo be ta, idia ese dina ibounai Ierusalema dekenai idia noho Helene gado bona Heberu gado idia herevalaia Keristani vabu taudia dekenai aniani idia hariharilaia. (Kara 6:1-6) Unai mai anina bada gaukarana ia ore bona aposetolo taudia lasi to Keristani taudia be dagedage dainai gabu idauidau dekenai idia lao murinai, Filipo be Samaria hanua dekenai ia lao. Unuseniai sivarai namona ia harorolaia bona lauma helaga ese ia hasiahua, demoni ia lulua bona aena dika bona marere diba lasi taudia ia hanamodia totona. Samaria taudia momo ese Basileia ena sivarai idia abia dae bona bapatiso idia abia. Ierusalema dekenai idia noho aposetolo taudia ese unai idia kamonaia neganai, aposetolo Petero bona Ioane idia siaia lao Samaria dekenai, unai amo abidadama bapatiso taudia matamatadia ese lauma helaga idia abia diba.—Kara 8:4-17.
4 Gabeai Dirava ena lauma ese Filipo ia hakaua, Gasa ia lao henia dalana ai Etiopia eunuko tauna ia davaria totona. Filipo ese Isaia ena peroveta herevana ia gwauraia hedinarai namonamo murinai, unai “dagi badana tauna, Kanedake, Etiopia ena kwini hahine ena” henunai, be Iesu Keriso ia abidadama henia bona bapatiso ia abia. (Kara 8:26-38) Unai murinai, Filipo be Asadodoa dekenai ia lao bena gabeai Kaisarea dekenai ia lao, unai laolao lalonai “ia vareai hanua ibounai dekenai Sivarai Namona ia harorolaia.” (Kara 8:39, 40) Sivarai namona harorolaia gaukarana dekenai haheitalai namona ia hahedinaraia!
5. Taunimanima momo idia diba Filipo ena natuna kekeni 4 be dahaka gaukara idia karaia?
5 Lagani 20 bamona murinai, Filipo be Kaisarea dekenai haroro gaukara ia do goadalaia noho. Paulo bona Luka be Filipo ena ruma dekenai idia noho neganai, ia “be mai ena natuna 4, headava lasi kekeni, idia ese peroveta hereva idia gwauraia.” (Kara 21:8-10) Lauma dalanai Filipo ese idia ia hadibaia namonamo, haroro gaukara idia ura henia bada bona danu peroveta herevadia idia gwauraia be hahenamo badana. Hari inai negai, bema tama sina ese haroro gaukara idia ura henia bada, edia natudia memero bona kekenidia edia lalona idia veria diba, edia mauri ibounai lalonai haroro gaukara idia goadalaia totona.
Hari Sivarai Namona Idia Harorolaia Goadagoada Taudia
6. Sivarai namona harorolaia taudia ginigunadia be dahaka anina namona idia havaraia?
6 Iesu Keriso ese ena peroveta hereva badana lalonai iseda nega bona nega dokona ia herevalaia neganai, ia gwau: “Sivarai Namona bese ibounai dekenai be do idia haroro henia guna.” (Mareko 13:10) Sivarai namona be “tanobada ibounai dekenai” do idia harorolaia murinai, dokona be do ia ginidae. (Mataio 24:14) Paulo bona sivarai namona idia harorolaia taudia ginigunadia ese sivarai namona idia harorolaia lalonai, momo be abidadama taudia ai idia lao bona Roma Basileiana ena gabu momo dekenai kongregesen idia haginidia. Unai kongregesen idauidau naria totona idia abia hidi elda taudia be edia tadikaka bona taihu ida sivarai namona harorolaia gaukarana idia karaia gabu momo dekenai. Unai nega dekenai Iehova ena hereva ia bada daekau bona ia kwalimu, hari danu be unai hegeregerena badina Iehova ena Witnes taudia milioni momo ese sivarai namona idia harorolaia. (Kara 19:20) Oi be mai moale ida Iehova idia hanamoa taudia ta, a?
7. Hari Basileia idia harorolaia taudia be dahaka gaukara idia karaia?
7 Hari inai negai, Basileia idia harorolaia taudia momo be dala ia kehoa negadiai, sivarai namona harorolaia gaukarana idia habadaia. Tausen momo be misinari gaukara idia karaia bona handred tausen momo be regula bona heduru painia gaukara idia karaia. Bona Basileia idia harorolaia goadagoada pablisa tatau, hahine bona natudia be gaukara namo hereana idia karaia! Oibe, Iehova ena taunimanima ibounai be Keristani taudia bona sivarai namona idia harorolaia taudia dainai, mai lalo-tamona ida Iehova idia hesiai henia bona Ia amo idia abia hahenamo idauidau idia moalelaia.—Sepanaia 3:9.
8. Edena makaia gaukarana be hari idia karaia noho, bona daidia ese idia karaia?
8 Dirava be Iesu murinai idia raka horoa taudia dekenai tanobada hegegemadai sivarai namona harorolaia gaukarana ia henia. Unai haroro gaukara idia durua taudia be Keriso ena “mamoe idaudia” taudia bona edia namba be ia bada ia lao noho. (Ioane 10:16) Peroveta herevana lalonai, unai hahemauri gaukarana be hari idia vara kara dika rohoroho dainai idia taitai bona lalohisihisi taudia edia baguna dekenai maka idia atoa karana ida idia hahegeregerea. Kahirakahira, kara dika taudia do idia hadikaia ore. Unai ita naria noho lalonai, tanobada taudia dekenai hahemauri hereva momokanidia ita hadibaia be hahenamo badana!—Esekiela 9:4-6, 11.
9. Edena dala ai kamonai taudia matamatadia be haroro gaukara dekenai ita durudia diba?
9 Bema nega sisina daudau lalonai sivarai namona harorolaia gaukara ita karaia vadaeni, ita ese kongregesen lalonai idia noho kamonai taudia matamatadia ita durua diba. Nega haida, haroro gaukara dekenai ita idia bamoa diba. Elda taudia idia ura bada tadikaka be lauma dalanai idia hagoadaia. Manau kongregesen naria taudia edia hekwarahi ese ma haida idia durua diba, sivarai namona harorolaia goadagoada bona anina namona havaraia taudia ai idia lao totona.—2 Petero 1:5-8.
Ruma-Ta-Ruma-Ta Dekenai Ita Haroro
10. Haroro gaukara dekenai, Keriso bona ena murinai idia raka taudia ginigunadia be dahaka haheitalai idia hahedinaraia?
10 Iesu Keriso be sivarai namona harorolaia tauna dainai, ena murinai idia raka taudia dekenai haheitalai namo hereana ia hahedinaraia. Dirava ena Hereva ese Keriso bona ena hahediba taudia edia haroro gaukara ia herevalaia: “Iesu ese hanua badadia bona hanua maragidia edia lalonai ia haroro loaloa, Dirava ena Basileia ena Sivarai Namona ia harorolaia. Iena diba tahua taudia 12 ia danu idia lao.” (Luka 8:1) To aposetolo taudia be edena bamona? Pentekoste 33 C.E. ai, lauma helaga idia abia murinai, “dina ibounai, Dubu Helaga lalonai bona ruma lalonai, taunimanima idia hadibaia noho, bona Iesu Keriso ena Sivarai Namona idia gwauraia noho. Inai gaukara idia hadokoa lasi.”—Kara 5:42.
11. Kara 20:20, 21 ena hereva hegeregerena, aposetolo Paulo be ena hesiai gaukara dekenai dahaka ia karaia?
11 Aposetolo Paulo be sivarai namona ia harorolaia goadagoada dainai, Efeso Keristani elda taudia ia hamaorodia diba: “Umui dekenai lau haroro bona hadibaia neganai, emui ruma dekenai, bona taunimanima edia vairana dekenai durua hereva ta lau hunia lasi.” Paulo be “ruma dekenai” ia hadibaia neganai, ia be ia ida Iehova idia tomadiho henia taudia edia ruma dekenai ia lao, abidadama taudia dekenai mamoe vadivadi ia karaia totona, a? Lasi, badina ma ia gwau: “Iuda taudia bona Helene taudia danu dekenai lau sisiba henia goada edia lalona do idia giroa Dirava dekenai, bona Lohiabada Iesu do idia abidadama henia.” (Kara 20:20, 21) Iehova dekenai edia mauri idia gwauhamatalaia vadaeni taudia be inai hadibaia herevana, edia “lalona do idia giroa Dirava dekenai, bona Lohiabada Iesu do idia abidadama henia,” idia abia be anina lasi. Paulo be Efeso Keristani elda taudia dekenai ruma-ta-ruma-ta haroro gaukarana ia hadibaia, to danu abidadama lasi taudia ia hadibadia edia lalona do idia giroa bona idia abidadama totona. Paulo be unai bamona ia karaia neganai, ia hahedinaraia ia be Iesu ena dala ia tohotohoa.
12, 13. Filipi 1:7 ena hereva hegeregerena, Iehova ena taunimanima be dahaka idia karaia, haroro gaukara idia karaia noho totona?
12 Ruma-ta-ruma-ta haroro gaukarana be mai ena hekwarahi danu. Hegeregere, Baibel ena sivarai be haida edia ruma dekenai ita harorolaia neganai, idia badu. Ita ura lasi taunimanima ita habadudia. To, ruma-ta-ruma-ta haroro gaukarana be Baibel ese ia gwauraia bona Dirava bona iseda dekena taudia ita lalokau henia dainai ita karaia. (Mareko 12:28-31) Kota momo dekenai, United States ena Suprim Kota ai danu gwaumaoro ita tahua, ruma-ta-ruma-ta haroro gaukarana ita karaia noho totona. (Filipi 1:7) Nega momo kota momo dekenai ita kwalimu. Kota herevana ta ia gwau:
13 “Tomadiho pepapepadia hariharilaia karana be misinari taudia ese idaunegai sivarai namona idia harorolaia dalana ta—printa masini idia karaia matamata negana amo, unai dala idia gaukaralaia matamaia. Idia hanaia laganidia lalonai, unai gaukara ese tomadiho karadia idauidau ia hagoadaia bada. Hari, tomadiho orea maragidia momo ese unai bamona sivarai namona harorolaia dalana be dala badana ai idia badinaia, edia haroro taudia ese ruma tausen momo dekenai Evanelia sivaraina idia laohaia bona taunimanima idia vadivadi henia, idia abidadama henia gaudia idia abia dae totona. . . . [United States Constitution] ena taravatu henunai unai bamona tomadiho gaukarana be mai anina bada, dubu lalodiai tomadiho karana bona pasto bona pris taudia be platfom amo idia haroro karana hegeregerena.”—Murdock v. Pennsylvania, 1943.
Dahaka Dainai Ita Haroro Noho?
14. Iseda haroro gaukara dekenai dahaka anina namona ita havaraia diba?
14 Ruma-ta-ruma-ta dekenai ita haroro ena badina be momo. Hanaihanai ruma tauna ta ita haroro henia neganai, Baibel ena hereva momokani ena uhe ita hadoa toho. Lou henia ita karaia neganai, ita ura unai uhe be ranu dekenai ita dairia. Bona anina namona ia havaraia diba, badina Paulo ia gwau: “Lau ese uhe lau hadoa. Apolo ese ranu dekenai ia dairia. To Dirava ese unai hadoa gauna ia hatubua.” (1 Korinto 3:6) Unai dainai, namona be uhe ‘hadoa bona dairia’ gaukarana ita karaia noho, badina ita diba Iehova ese ‘do ia hatubua.’
15, 16. Dahaka dainai taunimanima edia ruma dekenai ita haroro loulou?
15 Taunimanima momo be edia mauri do idia haboioa dainai, sivarai namona ita harorolaia. Ita haroro neganai, ita bona ita idia kamonai henia taudia ita hamauria diba. (1 Timoteo 4:16) Bema ita diba tau ta ese ena mauri do ia haboioa, heduru sisina sibona ita henia be namo, a? Lasi! Ita ura taunimanima do idia mauri dainai, edia ruma dekenai ita haroro henidia loulou be namo. Taunimanima edia noho dalana be hanaihanai ia idau. Reana nega ta ai, ta be ia bisi momokani dainai ia ura lasi Baibel ena sivarai ia kamonai, to gabeai do ia ura ia kamonai. Eiava reana ruma bese tauna ma ta do ita davaria bona unai ese dala ia kehoa diba Baibel ita herevalaia totona.
16 Ruma taudia edia noho dalana sibona lasi, to edia kara ia idau diba danu. Hegeregere, ta be reana ena lalokau tauna ta ia mase neganai ia lalohisihisi bada, unai ese ena lalona ia hamarerea diba Basileia ena sivarai ia kamonai totona. Ita ura unai tauna ita hagoadaia, ita durua lauma gaudia ia tahua bona unai gaudia ia abia dalana ita hahedinaraia.—Mataio 5:3, 4.
17. Haroro gaukara ita karaia ena badina badana be dahaka?
17 Ruma-ta-ruma-ta ai ita haroro eiava Keristani hesiai gaukara idauidau ita karaia ena badina badana be, ita ura Iehova ena ladana hahedinaraia gaukarana ita durua. (Esodo 9:16; Salamo 83:18) Iseda sivarai namona harorolaia gaukarana ese hereva momokani bona kara maoromaoro idia ura henia taudia ia durudia Iehova hanamoa taudia ai idia lao totona be hahenamo badana! Salamo torea tauna ia gwau: “Ulato bona uhau, buruka taudia, bona natuna maragidia danu, namona be idia ibounai ese, Lohiabada ena ladana do idia hanamoa bada! Iena ladana badana ese, taunimanima ibounai edia ladana badana ia hereaia noho. Iena hairaina be ataiai momokani, ia ese tanobada bona guba ia hereaia noho.”—Salamo 148:12, 13.
Haroro Gaukara ese Ita Ta Ta Ia Durua
18. Sivarai namona harorolaia gaukarana ita karaia dainai, dahaka namo ita abia?
18 Sivarai namona harorolaia gaukarana ita karaia karana ese dala idauidau ai ita ta ta ia durua. Ruma-ta-ruma-ta dekenai sivarai namona ita harorolaia karana ese ita ia durua dainai, ruma taudia idia badu neganai, manau karana ita hahedinaraia diba. Sivarai namona idia harorolaia taudia namodia ai ita lao totona, namona be Paulo bamona, ‘taunimanima idauidau ibounai edia mauri dalana ita abia dae, dala idauidau ibounai dekena amo, haida do ita veria mauri totona.’ (1 Korinto 9:19-23) Iseda diba haroro gaukara dekenai ese ita ia durua dala namona ai ita kara eiava hereva totona. Iehova dekenai ita tabekau bona iseda hereva ita abia hidi namonamo neganai, Paulo ena sisiba ita badinaia diba: “Nega ibounai mai laloa namona bona mai gado namo do umui hereva. Bona taunimanima ta ta dekenai do umui haere henia mai maoromaoro danu.”—Kolose 4:6.
19. Edena dala ai lauma helaga ese sivarai namona harorolaia taudia ia durua?
19 Danu, sivarai namona harorolaia gaukarana ese ita ia veria Dirava ena lauma helaga dekenai ita tabekau totona. (Sekaraia 4:6) Unai amo ena huahua—“lalokau, moale, maino, haheauka, bogahisihisi, kara maoromaoro, abidadama momokani kara, manau, tauanina ena ura koua karana”—be iseda haroro gaukara dekenai idia hedinarai. (Galatia 5:22, 23) Unai ese eda kara taunimanima dekenai ia haidaua, badina lauma helaga ena hakaua dalana badinaia karana ese ita ia durua sivarai namona ita harorolaia neganai lalokau, moale, maino, haheauka, bogahisihisi, kara maoromaoro, abidadama, manau bona tauanina ena ura koua karana ita hahedinaraia totona.
20, 21. Ita be sivarai namona harorolaia taudia dainai, ita bisi noho ena namo haida be dahaka?
20 Ita be sivarai namona harorolaia taudia dainai, taunimanima hebogahisi henia taudia ai ita lao be hahenamo ma ta. Taunimanima ese edia hekwakwanai idauidau—gorere, moni gaukara lasi, ruma bese lalonai ia vara gaudia—idia gwauraia neganai, ita be sisiba henia taudia bamona ita kara lasi, to idia ida Baibel ena hagoadaia bona lalona hanamoa herevadia ita herevalaia. Lauma dalanai idia matakepulu to kara maoromaoro idia ura henia taudia ita lalodia bada. (2 Korinto 4:4) Lauma dalanai, “mauri hanaihanai idia ura kudou-maoro taudia” dekenai heduru ita henia be hahenamo badana!—Kara 13:48, NW.
21 Bema sivarai namona harorolaia gaukarana ita karaia hanaihanai, unai ese ita do ia durua lauma gaudia ita laloa bada totona. (Luka 11:34) Unai ese namo bada ia havaraia, badina bema lasi inai tanobada taudia edia kohu laloa bada hedibaganina lalonai do ita moru. Aposetolo Ioane ese Keristani taudia ia hagoadaia: “Tanobada do umui ura henia lasi, bona tanobada ena gaudia danu do umui ura henia lasi. Bema tanobada umui ura henia noho neganai, Tamana Dirava umui ura henia lasi inai. Badina be tanobada gaudia ibounai, tauanina ena ura dikadia, matabodaga ena ura dikadia, bona hekokoroku, inai gaudia be Tamana Dirava dekena amo idia mai lasi. Idia be tanobada dekena amo idia mai noho. Tanobada, mai ena gau dikadia, taunimanima idia ura dikadika gaudia, be kahirakahira do idia ore. To Dirava ena ura ia karaia noho tauna be do ia noho ela bona hanaihanai.” (1 Ioane 2:15-17) Ita be sivarai namona harorolaia taudia dainai, Lohiabada ena gaukara dekenai ita bisi karana ese ita do ia durua, tanobada ita dadaraia totona.—1 Korinto 15:58.
Guba Dekenai Kohu Ita Haboua
22, 23. (a) Sivarai namona idia harorolaia Keristani taudia be dahaka kohu namodia idia haboua be namo? (b) Hereva gabena ese edena bamona ita do ia durua?
22 Basileia harorolaia goadagoada karana ese idia noho hanaihanai hahenamo idauidau ia mailaia. Iesu ese unai ia hahedinaraia, ia gwau: “Inai tanobada dekenai kohu do umui haboua lasi, iniseni be manumanu ese dabua idia ania ore, bona raraka ese auri ia hadikaia, iniseni danu henaoa taudia ese ruma idia makohia bona gau idia henaoa. To umui emui kohu be guba dekenai do umui haboua, unuseni be manumanu bona raraka ese gau idia hadikaia lasi, unuseni danu henaoa taudia ese ruma idia makohia diba lasi, bona gau idia henaoa diba lasi. Badina be umui emui kohu idia noho gabuna dekenai, umui emui kudouna danu unuseni ia noho.”—Mataio 6:19-21.
23 Namona be guba dekenai iseda kohu ita haboua noho, badina ita diba momokani ita be Siahu Ibounai Lohiabadana Iehova, ena Witnes taudia be hahenamo badana. (Isaia 43:10-12) Ita be Dirava ena hesiai taudia dainai, ita abia gaukara ita karaia noho lalonai, namona be iseda hemami be Dirava ia hesiai henia mauri lagani 90 mai kahana Keristani hahine ena bamona, ia gwau: “Iehova lau tanikiu henia bada badina lagani momo lalonai egu kara ia haheaukalaia bona hanaihanai lau guriguri ia be lauegu lalokau Tamana ela bona hanaihanai totona.” Unai taihu bamona, bema hanaihanai iseda hetura karana Iehova ida ita laloa bada, do ita ura bada sivarai namona harorolaia gaukara ita hagugurua. Hereva gabena ese ita do ia durua bena do ita itaia edena bamona iseda hesiai gaukara do ita hagugurua diba.
Edena Bamona Do Oi Haere?
• Dahaka dainai sivarai namona ita harorolaia be namo?
• Idaunegai bona hari sivarai namona idia harorolaia taudia edia gaukara be edena bamona oi gwauraia diba?
• Dahaka dainai ruma-ta-ruma-ta dekenai ita haroro?
• Sivarai namona oi harorolaia neganai, edena dala ai namo oi davaria?
[Study Questions]
[Pictures on page 4]
Filipo bona ena natuna kekenidia bamona, hari sivarai namona idia harorolaia taudia danu idia moale
[Picture on page 6]
Ma haida dekenai sivarai namona oi harorolaia lalonai, edena dala ai namo oi davaria?