Tauanina Dalanai Ita Hegeregere Karana Dibaia Dalana

Aposetolo Paulo ese Filipi ai idia noho Keristani taudia ia tore henia neganai, ia gwau: “Lau manada vadaeni. Bona lau dekenai ia noho gauna dekenai lau moale vadaeni. . . . Unai dainai gabu ibounai, nega ibounai, lau boga kunu o lau hitolo, be lau laloa momo lasi. Bona lauegu gau be momo, o hegeregere lasi neganai, egu lalona ia namo noho.”​​—⁠Filipi 4:​11, 12.

Dahaka ese Paulo ia durua tauanina dalanai ia hegeregere totona? Iseda nega lalonai, gau ibounai edia davana idia bada daekau bona moni ena hekwakwanai ita laloa dainai, Keristani taudia momokanidia ese tauanina dalanai idia hegeregere dalana idia dibaia be namo, unai amo edia hesiai gaukara Dirava dekenai idia karaia namonamo diba.

UNAI revareva ai, Paulo ese guna ia karaia gaukara namona ia herevalaia. Ia gwau: “Lau ese tauanina ena toana gaudia lau abidadama henia diba. Sedira tau haida ese tauanina ena toana idia abidadama henia, to lau ese idia lau hereaia diba. Lau vara, vadaeni pura tamona murinai lauegu kopina idia utua. Lau be Israela besena tauna lau vara, lauegu iduhu be Beniamina. Lauegu sene taudia danu be Heberu. Iuda edia Taravatu lau badinaia momokani, badina lau be Farisea orea tauna. Lauegu goada lau hedinaraia, lau ese ekalesia lau dagedage henia. Bema tau ta ese kara maoromaoro ia davaria diba Taravatu ia badinaia dekena amo, lau be kerere ta lasi momokani.” (Filipi 3:​4-6) Ma danu, Paulo be Iuda tauna dainai, Ierusalema ai idia noho hahelaga taudia badadia amo gaukara ta ia abia bona ia idia durua. Unai ese dala ia kehoa Iuda taudia edia politik bona tomadiho lalonai siahu bona ladana bada ia abia totona, moni danu do ia abia.​​—⁠Kara 26:​10, 12.

To Paulo be Keristani hesiai tauna ai ia lao neganai, ena mauri ia idau haraga. Sivarai namona dainai, mai ena ura ida ena gaukara namona bona Iuda taudia dekenai mai anina bada gaudia ia rakatania. (Filipi 3:​7, 8) Unai dainai hari edena dala ai sibona do ia naria? Ia be hesiai gaukara ia karaia dainai davana do ia abia, a? Aniani bona dabua be edena dala ai do ia abia?

Paulo ese ena hesiai gaukara ia karaia davana lasi. Korinto hanua dekenai ia noho neganai, Akwila bona Prisikila ida palai turia gaukara idia karaia, bona gau ma haida ia karaia sibona ia naria totona, unai amo ia hesiai henia taudia dekenai metau do ia henia lasi. (Kara 18:​1-3; 1 Tesalonika 2:9; 2 Tesalonika 3:​8-​10) Paulo ese misinari laolao latadia toi ia karaia, bona heduru idia abia be namo kongregesen ia vadivadi henidia danu. Dirava ena hesiai gaukara ia karaia goadagoada dainai, ena kohu be momo lasi. Nega momo tadikaka ese tauanina dalanai ia dabu gaudia idia henia. To nega haida nega aukadia dainai, gau haida dekenai ia dabu momokani. (2 Korinto 11:27; Filipi 4:​15-​18) To, Paulo be ena mauri dalana dekenai ia maumau diba lasi, bona ma haida edia gau ia ura henia lasi. Keristani tadikaka edia namo totona mai ura ida bona mai moale ida ia gaukara  goada. Momokani, Paulo ese Iesu ena hereva, taunimanima momo ese idia diba herevana unai, ia gwauraia: “Henia kara ena moale be bada, abia kara ena moale be maragi.” Ia be haheitalai namona ita ibounai totona!​​—⁠Kara 20:​33-35.

Tauanina Dalanai Ita Hegeregere Karana Ena Anina

Paulo be tauanina dalanai ia hegeregere dainai moale bona namo bada ia davaria. Tauanina dalanai ita hegeregere karana ena anina be dahaka? Ita gwau diba, ena anina be ita dekenai idia noho gaudia be idia hegeregere. Unai kara dainai, Paulo ese hesiai gaukara lalonai ia bamoa tauna Timoteo ia hamaoroa, ia gwau: “To momokani, Dirava ia badinaia tauna ese kohu momokani do ia davaria. Oibe, ia davaria, badina . . . iena lalona be namo. Badina be gau ta tanobada dekenai ita abia mai lasi, bona gau ta danu do ita abia lao lasi. Unai dainai bema ita be mai iseda aniani bona dabua neganai, moni dekenai ita laloa momo lasi be namo.”​​—⁠1 Timoteo 6:​6-8.

Mani oi itaia, Paulo ese lalona ia namo karana be Dirava badinaia karana ida ia gwauraia hebou. Ia diba moale korikori be Dirava badinaia karana amo​—⁠anina be Dirava hesiai henia gaukarana ita atoa guna​—⁠bona kohu eiava taga amo ia mai lasi. Ia dekenai idia noho “aniani bona dabua” ese ia idia durua Dirava ia badinaia noho diba totona. Paulo be Iehova dekenai ia tabekau dainai tauanina dalanai ia hegeregere, herevana ena noho dalana be edena bamona.

Hari inai negai, taunimanima momo idia lalo-hekwarahi bona idia moale lasi, badina tauanina dalanai idia hegeregere dalana idia diba lasi eiava idia dadaraia. Tauanina dalanai idia hegeregere karana idia habadaia lasi, to moni bona moni ese ia hoia diba gaudia dekenai idia abidadama. Hoihoi gaudia idia hahedinaraia bisinesi bona nius halasia oreadia ese taunimanima idia hauraia kohu matamatadia idia abia haraga totona, bema idia abia lasi, do idia moale lasi. Unai dainai, momo be moni bona kohu tahua karana ena tarapu dekenai idia moru. Moale idia davaria lasi,  to “dibagani dekenai idia moru. . . . Bona boroma be tarapu dekenai ia moru bamona, ura dikadia bona ura kavakava ese unai kohu ura henia taudia do idia koia, bona hadikaia.”​—⁠1 Timoteo 6:​9, 10.

Tauanina Dalanai Hegeregere Dalana Idia Dibaia Vadaeni

Hari inai negai, Dirava badinaia karana bona tauanina dalanai ia hegeregere tauna be do ia moale bona ena lalona do ia namo, a? Oibe. Hari taunimanima milioni momo be unai bamona idia karaia noho. Idia dekenai idia noho gaudia dekenai edia lalona ia hegeregere dainai, moale davaria dalana idia dibaia vadaeni. Idia be Iehova ena Witnes taudia, Dirava dekenai edia mauri idia gwauhamatalaia, iena ura idia karaia bona gabu ibounai ai taunimanima dekenai ena ura idia hadibaia noho.

Hegeregere, misinari gaukara totona idia hadibaia bona idia diba lasi tanodia dekenai Dirava ena Basileia sivarai namona harorolaia totona  idia siaia taudia, mani oi laloa. (Mataio 24:14) Nega momo, idia lao tanodia edia noho dalana be guna idia manadalaia noho maurina bamona lasi. Hegeregere, lagani 1947 ena matamana ai, misinari haida be Asia tano ta dekenai idia ginidae neganai, tuari ese ia hadikaia gaudia be idia do noho, bona ruma haida sibona be mai edia paua. Tano momo dekenai, misinari taudia ese dabua huria masini idia gaukaralaia lasi, to dabua huria bodi idia gaukaralaia dabua ta ta idia huria totona, eiava sinavai badinai idia noho nadi latanai idia huria. To taunimanima dekenai Baibel ena hereva momokani hadibaia totona idia mai, unai dainai noho gabu matamata ena noho dalana idia manadalaia bona haroro gaukara idia karaia goadagoada.

Ma haida be ful-taim hesiai gaukara idia karaia matamaia eiava sivarai namona idia harorolaia lasi gabudia dekenai idia lao. Adulfo be lagani 50 mai kahana lalonai Mexico ena gabu idauidau dekenai ful-taim hesiai gaukara ia karaia. Ia gwau: “Aposetolo Paulo bamona, lau bona egu adavana be noho daladia idauidau ai manadalaia karana ai dibaia vadaeni. Hegeregere, ai vadivadi henia kongregesen ta be taoni bona maketi amo ia daudau. Aniani negadia ta ta ai, tadikaka be beredi tamona, digara sisina, damena bona kofi kapusi tamona sibona idia abia, idia dekenai unai be hegeregere. Dina ta ta lalonai nega toi unai beredi sibona idia ania. Unai dainai tadikaka edia noho dalana ai manadalaia. Lagani 54 lalonai Iehova lau hesiai henia neganai, unai bamona ekspiriens momo lau moalelaia.”

Florentino bona ena ruma bese ese noho dalana aukana idia manadalaia dalana ia laloatao. Ena matamata negadia ia laloa neganai, ia gwau: “Lauegu tamana be taga bada bisinesi tauna. Tano ena kahana momo ia biagua. Emai aniani hoihoilaia sitoa dekenai ia noho maua ta lau do laloatao noho. Ena lababa be sentimita 50 bona ena dobu be sentimita 20, bona mai ena kahana foa. Unuseniai dina lalonai ai abia moni ai atoa. Dina ena dokonai, unai maua be moni amo ia honu momokani.

“Gabeai, moni dekenai hekwakwanai ai davaria bona guna kohu momo maurina ai noholaia, to hari ai ogogami. Gau ibounai ai haboioa, to emai ruma sibona ai haboioa lasi. Unai sibona lasi, egu tadikaka ta be aksiden ia davaria dainai ia raka diba lasi. Gau ibounai be guna bamona lasi. Nega sisina lalonai au huahuadia bona vamu lau hoihoilaidia. Danu kotini, vain huahua, bona rei ladana alfalfa lau haboudia, bona uma gabu dekenai ranu henia gaukarana lau durua. Taunimanima haida ese lau idia boiria gaukara idauidau ia diba tauna. Nega momo sinana ese ai ia hagoadaia, ia gwau taunimanima momo ese idia abia lasi lauma kohuna ita abia, hereva momokani unai. Unai dainai gau momo bona gau sisina lau abia eiava gau ta lau abia lasi karana lau manadalaia. Hari lagani 25 lalonai ful-taim hesiai gaukara lalonai Iehova lau hesiai henia vadaeni, unai dainai lau gwau diba ful-taim hesiai gaukara lalonai Iehova hesiai henia totona lau abia hidi mauri dalana be dala hereadaena.”

Baibel ese ita ia hamaoroa “inai tanobada, hari ia noho toana bamona, be kahirakahira do ia ore.” Unai dainai, ita ia hagoadaia danu, ia gwau: “Moale taudia be moale lasi taudia bamona do idia noho. Bona hoihoi taudia be kohu lasi taudia bamona do idia noho. Bona tanobada ena gau namodia idia abia noho taudia be do idia noho, inai gaudia be anina lasi bamona.”​​—⁠1 Korinto 7:​29-31.

Unai dainai hari be nega namona sibona emu mauri oi tahua namonamo totona. Bema emu kohu be momo lasi, namona be oi badu lasi, eiava oi mama lasi. To, herevana oi dekenai kohu bada ia noho eiava lasi, aonega karana be oi dekenai idia noho gaudia dekenai lalohadai maorona oi abia, unai amo oi do idia biagua lasi. Aposetolo Paulo ia hereva bamona, namona be ‘kohu do oi abidadama henia lasi, to Dirava sibona do oi abidadama henia. Badina inai tanobada ena kohu do ia dika haraga, to Dirava ese oi hamoalea totona, gau momo oi dekenai ia henia davana lasi.’ Bema unai bamona oi karaia, vadaeni oi danu oi gwau diba tauanina dalanai oi hegeregere dalana oi dibaia vadaeni.​​—⁠1 Timoteo 6:​17-19.

[Picture on page 29]

Paulo be ena imana amo gaukara ia karaia, unai amo ma haida dekenai metau do ia henia lasi

[Pictures on page 30]

Taunimanima tausen momo be moale idia davaria noho, badina edia mauri lalonai Dirava idia badinaia bona idia abia vadaeni gaudia dekenai edia lalona ia hegeregere