Hari Inai Tanobada ai Headava Ia Namo Diba

“Do umui lalokau henia, vadaeni do umui noho hebou namo herea, mai laloa tamona danu.”​​—⁠KOLOSE 3:​14.

1, 2. (a) Keristani kongrigeisen ita itaia neganai, dahaka ese ita ia hagoadaia? (b) Headava ia namo ena anina be dahaka?

KERISTANI kongrigeisen ita itaia neganai, ita moale badina headava taudia momo ita itaia, idia be lagani 10, 20, 30, eiava lagani momo lalonai edia adavadia idia badinaia. Nega aukadia dekenai danu.​​—⁠Genese 2:​24.

² Momo do idia gwau edia headava lalonai hekwakwanai idia davaria vadaeni. Hahine ta ia gwau: “Headava namodia lalonai danu hekwakwanai idia vara diba. Nega haida idia namo bona nega haida idia dika . . . To . . . unai taudia idia noho hebou ena be [heiriheiri] negana ai ita noho.” Edia headava ia namo taudia, bema idia be mai edia natudia, be mauri ena lalohekwarahi dainai idia vara heiriheiri bona lalometau hanaia dalana idia dibaia. Unai headava taudia dekenai ia vara gaudia ese idia ia hadibaia lalokau korikorina “be do ia noho hanaihanai.”​​—⁠1 Korinto 13:⁠8.

3. Headava bona headava hadokoa karana dekenai ripoti ese dahaka ia hahedinaraia, bona dahaka henanadai idia vara?

³ To, headava taudia milioni momo ese edia headava idia hadokoa. Ripoti ta ia gwau: “Hari inai negai, U.S. ena headava taudia 50 pesen ese edia headava do idia hadokoa. Bona unai [headava hadokoa] karana 50 pesen be edia headava lagani 7 bamona murinai edia headava idia hadokoa . . . Idia headava lou taudia 75 pesen huanai, 60 pesen ese edia headava idia hadokoa lou.” Guna headava hadokoa karana ia vara momo lasi tanodia ai, be hari ia vara badabada. Hegeregere, vanegai laganidia ai, Japan dekenai headava hadokoa karana be kahirakahira nega rua ia bada. Dahaka gaudia haida dainai unai ia vara, nega haida unai gaudia be Keristani kongrigeisen lalonai idia vara danu? Headava ia namo totona, dahaka be gau badana, ena be Satani ia hekwarahi headava ia hadikaia totona?

Tarapu Dadaraia

4. Dahaka gaudia haida ese headava idia hadikaia diba?

⁴ Dirava ena Hereva ese ita ia durua headava  idia hadikaia gaudia ita lalopararalaia totona. Hegeregere, aposetolo Paulo ese nega dokonai do idia vara gaudia ia herevalaia neganai, ia gwau: “Nega ena dokona dekenai, metau dikadia momo do idia vara. Badina taunimanima ese idia edia ura sibona do idia tahua [“sibodia do idia lalokau henia bada,” NW ], moni do idia mataganigani henia, do idia hekokoroku bona heagi. Do idia hereva dika, edia tamana bona sinana do idia kamonai henia lasi, tanikiu henia kara do idia diba lasi, bona helaga karadia do idia negea. Idia be lalokau do idia diba lasi, do idia bogahisihisi lasi, haida edia ladana do idia hadikaia kava, do idia lebulebu, do idia dagedage, kara namodia do idia ura henia lasi. Edia turana do idia samania henia, do idia kara kava. Do idia gwau idia be tau badadia momokani, vadaeni lebulebu karadia idauidau do idia ura henia bada, to Dirava do idia ura henia maragi. Dirava badinaia kara be toana sibona do idia hedinaraia, to iena anina momokani do idia negea. Inai bamona taudia ibounai dekena amo do oi raka siri.”​​—⁠2 Timoteo 3:​1-5.

5. Dahaka dainai ‘sibona ia lalokau henia bada’ tauna ese ena headava ia hadikaia noho, bona unai kara dekenai Baibel ena sisiba be dahaka?

⁵ Paulo ena hereva ita laloa neganai, ita itaia ia gwauraia gaudia momo ese headava idia hadikaia diba. Hegeregere, sibodia “do idia lalokau henia bada” taudia ese ma haida idia laloa lasi. Sibodia idia lalokau henia bada tatau eiava hahine ese edia lalona idia hamoalea dalana sibona idia laloa. Do idia ura lasi haida edia lalohadai idia abia dae. Unai bamona kara ese headava lalonai moale do ia havaraia, a? Lasi momokani. Aposetolo Paulo ese Keristani taudia, headava taudia danu, ia sisiba henidia: “Umui sibona emui ladana do umui habadaia gwauraia lasi, bona do umui hekokoroku lasi. To umui ibounai ta ta dekenai do umui manau. Umui ta ta nega ibounai inai bamona do umui laloa, ‘Haida be idia namo herea, to lau be namo lasi.’ Bona umui ese umui emui namo sibona do umui tahua lasi. Lasi, to umui ta ta ibounai ese haida edia namo do umui tahua, bona do umui durudia noho.”​​—⁠Filipi 2:​3, 4.

6. Edena dala ai moni mataganigani henia karana ese headava ia hadikaia diba?

⁶ Moni mataganigani henia karana ese tau bona hahine ia hapararaia diba. Paulo ia gwau: “Kohu momo idia ura henia taudia be dibagani dekenai idia moru diba. Bona boroma be tarapu dekenai ia moru bamona, ura dikadia bona ura kavakava ese unai kohu ura henia taudia do idia koia, bona hadikaia. Badina be moni ura henia kara ese dika idauidau ibounai ia havaraia noho. Bona moni idia ura bada taudia haida ese Iesu abidadama henia kara idia rakatania vadaeni, bona mai lalohisihisi momo danu, edia mauri idia hadikaia ore vadaeni.” (1 Timoteo 6:​9, 10) Madi, hari headava momo dekenai Paulo ena sisiba be ia momokani. Momo be moni idia ura henia bada dainai, edia adavadia edia namo idia laloa lasi, hemami dalanai idia durua lasi bona hanaihanai idia hebamo namonamo lasi.

7. Nega haida, dahaka kara ese headava lalonai badinaia lasi karana ia havaraia?

⁷ Danu, Paulo ia gwau inai nega dokona ai haida ese “helaga karadia do idia negea. . . . Lalokau do idia diba lasi, do idia bogahisihisi lasi.” Headava gwauhamatana ese headava taudia ia hatamonaia bena nega daudau lalonai do idia noho hebou, namo lasi idia koikoi bona unai gwauhamata idia makohia. (Malaki 2:​14-​16) Haida be edia adavadia dekenai idia hahedinaraia lalokauna be ma haida dekenai idia hahedinaraia. Mauri lagani 30 ia hanaia hahinena ta ia gwau, iena adavana ese ia do rakatania lasi neganai, hahine ma haida ia tura henia namonamo bona idia ia lalokau henia momokani. Ia laloparara lasi ia karaia karana be ia maoro lasi headava tauna totona. Ena hahine ese unai ia itaia neganai, ia lalohisihisi bada bona dala namona ai ena tau ia hadibaia unai kara dainai dika ia vara diba. To, ena tau ia heudahanai. Ena be mai hebogahisi ida hadibaia hereva ia abia, to ia kamonai lasi. Unai dainai tarapu lalonai ia moru.​​—⁠Aonega Herevadia 6:​27-​29.

8. Dahaka ese heudahanai ia havaraia diba?

⁸ Baibel ese heudahanai ia taravatua! Ia gwau: “Ia heudahanai noho tauna be mai ena aonega lasi. Ia ese sibona ena mauri ia hadikaia ore noho.” (Aonega Herevadia 6:​32) Nega momo,  heudahanai be ia vara kava karana ta lasi. Baibel torea tauna Iamesi ese ia hahedinaraia bamona, heudahanai karana be ta ese ia lalohadailaia loulou murinai ia karaia. (Iamesi 1:​14, 15) Unai kerere tau eiava hahine ese ena adavana​—⁠ia gwauhamata ena mauri ibounai lalonai do ia rakatania lasi​—⁠be metairametaira ia laloa maragi matamaia. Iesu ia gwau: “Umui kamonai vadaeni, sene taudia dekenai idia hamaoroa, idia gwau, ‘Umui heudahanai lasi.’ To lau ese umui lau hamaoroa, bema tau ta ese hahine ta do ia itaia noho matana dekenai, ela bona iena lalona dekenai do ia ura dikadika, iena kudouna dekenai unai tau be ia heudahanai vadaeni.”​​—⁠Mataio 5:​27, 28.

9. Aonega Herevadia 5:​18-​20 dekenai dahaka aonega sisibana ita davaria?

⁹ Unai dainai, Aonega Herevadia bukana ena hereva ita badinaia be aonega karana: “Unai dainai oiemu adavana korikori danu do umui moale, bona oiemu eregabe dinadia neganai, oi adavaia hahine do oi moalelaia. Ia be dia hahine, bona dia ena natuna namo herea bamona oi dekenai. Do oi ura henia momokani, vadaeni iena ratana ese oi do idia hamoalea nega ibounai. Iena lalokau dekenai do oi moale bada noho hanaihanai. Egu natuna e, anina be dahaka idau hahine dekenai do oi ura henia? Badina be dahaka tau ma ta ena adavana do oi rosia?”​​—⁠Aonega Herevadia 5:​18-​20.

Headava Haraga Lasi

10. Dahaka dainai aonega karana be nega ita atoa do ita adavaia gwauraia tauna ita diba namonamo totona?

¹⁰ Tau bona hahine idia headava haraga neganai, headava lalonai hekwakwanai idia vara. Reana idia be do matamata bona gau momo idia diba lasi. Eiava nega idia atoa lasi sibodia​​—⁠edia ura bona ura lasi gaudia, edia mauri lalonai idia tahua gaudia, edia ruma bese ena noho dalana​​—⁠idia diba totona. Aonega karana be ita haheauka, bona nega ita atoa do ita adavaia gwauraia tauna ita diba namonamo totona. Isako ena natuna, Iakobo, mani oi laloa. Iena ravana totona lagani 7 ia gaukara, unai murinai Rahela ia adavaia. Unai bamona ia karaia badina Rahela ia lalokau henia bada, to ena toana hairaina sibona dainai lasi.​​—⁠Genese 29:​20-​30.

11. (a) Headava ese dahaka ia hatamonaia? (b) Dahaka dainai headava taudia ese aonega dalanai edia lalohadai idia gwauraia be mai anina?

¹¹ Headava be tau ese hahine ia ura henia bona hahine ese tau ia ura henia karana sibona lasi. Headava ese ruma bese ena mauri dalana, kara, hemami bona edukeisen idauidau taudia rua ia hatamonaia. Nega haida tano bona gado rua taudia ia hatamonaia. Danu, lalohadai idauidau taudia rua ia hatamonaia, unai amo gau idauidau dekenai edia lalohadai idia gwauraia diba. Headava lalonai unai lalohadai idaudia rua be mai anina. Edia lalohadai idia gwauraia dalana amo hanaihanai ta ta idia maumauraia diba, eiava ta ta idia hagoadaia diba. Oibe, iseda hereva amo iseda adavadia ita hahisia eiava ita hagoadaia diba. Hereva biagua namonamo lasi karana ese headava ia hadikaia diba.​​—⁠Aonega Herevadia 12:18; 15:​1, 2; 16:24; 21:9; 31:⁠26.

12, 13. Headava dekenai dahaka lalohadai maorona ita abia be gau badana?

¹² Unai dainai, aonega dalana be nega ita atoa do ita adavaia gwauraia tauna ita diba namonamo totona. Nega daudau ia headava Keristani  taihuna ta ia gwau: “Oi ura adavaia gwauraia tauna oi laloa neganai, ia dekenai oi ura itaia kara 10 oi laloa. Bema 7 sibona oi itaia, oi sibona oi nanadaia, ‘Ia dekenai idia noho lasi kara toi do lau laloa lasi, a? Bema ai headava murinai, dina ta ta ai, idia do lau laloa lasi, a?’ Bema oi daradara, namona be oi laloa namonamo.” Oibe, gau badana be oi laloa maoromaoro. Bema oi ura oi headava, namona be oi diba, adavana goevadae ta do oi davaria lasi. Bona danu, gabeai do oi adavaia tauna dekenai oi be goevadae lasi danu!​​—⁠Luka 6:​41.

¹³ Headava lalonai edia ura gaudia haida do idia reaia diba. Paulo ese unai ia hahedinaraia, ia gwau: “Lau ura lasi laloa hekwarahi umui abia. Headava lasi tauna ese Lohiabada do ia hamoalea daladia ia laloa. To headava tauna ese tanobada gaudia ia laloa, badina be ia ura iena hahine do ia hamoalea. Unai dainai iena laloa be rua. Headava lasi hahine, bona tau ia diba lasi kekeni ese Lohiabada ena gaukara idia laloa, badina idia ura edia tauanina bona lauma be helaga. To headava hahine be tanobada gaudia ia laloa, badina be ia ura iena tau do ia hamoalea.”​​—⁠1 Korinto 7:​32-​34.

Headava Haida Idia Moru Ena Badina

14, 15. Dahaka ese headava idia hamanokaia diba?

¹⁴ Keristani hahinena ta be lagani 12 idia headava murinai, ena adavana ese ia rakatania bona hahine ma ta ia tura henia neganai, headava hadokoa karana ena hisihisi ia mamia. Edia headava idia do hadokoa lasi neganai, gau haida ia itaia, a? Ia gwau: “Guriguri gwauraia karana ia hadokoa. Ekskius idauidau ia gwauraia Keristani heboudia bona haroro gaukara ia reaia totona. Ia gwau ia bisi bada eiava ia hesiku dainai nega ia atoa lasi lau ida ia noho totona. Lau ia hereva henia lasi. Lauma gaudia ia herevalaia lasi. Madi, ena kara ia idau momokani. Ai headava matamata neganai ia hahedinaraia karadia be ia hahedinaraia lou lasi.”

¹⁵ Ma haida danu be unai bamona gaudia haida idia itaia hegeregere, Baibel stadilaia karana, guriguri, eiava Keristani heboudia lao henia karana idia rakatania. Anina be, edia adavadia idia rakatania taudia momo ese edia hetura karana Iehova ida idia rakatania. Unai dainai, lauma gaudia idia laloa bada lasi. Idia dekenai Iehova be mauri Diravana lasi. Bona idia dekenai Iehova ese ia gwauhamatalaia kara maoromaoro tanobada matamatana be gau korikorina lasi. Nega haida, ena adavana ia badinaia lasi tau eiava hahine be ma ta ia do tura henia matamaia lasi neganai, lauma dalanai ia manoka vadaeni.​​—⁠Heberu 10:​38, 39; 11:6; 2 Petero 3:​13, 14.

16. Dahaka ese headava ia hagoadaia?

¹⁶ To, idia moale headava tau bona hahine ta idia gwau edia headava ia noho namo badina lauma gaudia idia laloa bada. Idia guriguri bona stadi hebou. Tau ia gwau: “Baibel ai duahia hebou. Ai haroro hebou. Gau idauidau karaia hebou karana ai moalelaia.” Ita dibaia gauna be inai: Iehova ida hetura namonamo karana ese headava ia hagoadaia.

Laloa Maoromaoro Bona Herevahereva

17. (a) Dahaka gaudia rua ese headava namona idia havaraia? (b) Paulo ese Keristani lalokauna be edena bamona ia herevalaia?

¹⁷ Headava namona ia durua gaudia rua be inai: Keristani lalokauna bona herevahereva karana. Taunimanima rua be ta ta idia lalokau henia bada neganai, nega momo idia ura adavaia gwauraia tauna ena kerere do idia laloa lasi. Reana idia ruaosi do idia headava, to headava ena mauri korikorina do idia diba lasi, reana idia laloa headava be lalokau sivaraidia eiava muvi dekenai idia itaia gaudia bamona. To gabeai headava ena mauri korikori do idia mamia. Unai neganai kerere maragidia be hekwakwanai badadia ai idia lao diba. Bema unai ia vara, Keristani taudia ese lauma ena huahua idia hahedinaraia be namo, idia ta be lalokau. (Galatia 5:​22, 23) Lalokau be mai ena siahu bada. Paulo ese unai Keristani lalokauna be inai bamona ia gwauraia: “Lalokau be ia dekenai ia kara dika tauna davana ia laloa lasi. [Ia] be mai ena bogahisihisi, haida durua totona. . . . Sibona ena gau ia tahua lasi, ia badu haraga lasi. Haida ese idia kara dika henia, to [ia] ese edia dika ia laloatao noho lasi. . . . Taunimanima durua kara dekenai ia hesiku lasi. Nega ibounai iena abidadama ia goada noho. Nega ibounai Dirava ena gwauhamata ia naria noho mai moale danu. Bona metau ibounai  lalonai ia gini goada noho.” (1 Korinto 13:​4-7) Ia hedinarai goevagoeva, lalokau korikorina dainai ta ia diba ena adavana danu be mai ena manoka karadia. Ia diba ena adavana be goevadae lasi.​​—⁠Aonega Herevadia 10:⁠12.

18. Edena dala ai herevahereva karana ese hetura karana ia hagoadaia diba?

¹⁸ Herevahereva karana be mai anina bada danu. Herevana tatau bona hahine edia headava laganidia be hida, ta ta idia hereva henia bona kamonai henia be namo. Tau ta ia gwau: “Dala namona ai emai hemami ai gwauraia hedinarai.” Idia vara gaudia amo idia diba, tau eiava hahine be idia gwauraia gaudia sibona ia kamonai lasi, to idia gwauraia lasi gaudia danu idia diba. Anina be, lagani idia hanaia lalonai, mai moale ida idia noho headava tau bona hahine ese ta ta ena lalohadai eiava hemami ia dibaia matamaia, ena be ta ese ia gwauraia eiava ia hahedinaraia lasi. Hahine haida idia gwau edia adavadia ese idia kamonai henidia namonamo lasi. Tatau haida idia maumau idia gwau edia adavadia idia ura herevahereva negadia be nega maorodia lasi. Herevahereva karana lalonai hebogahisi bona laloparara ia noho be namo. Tau bona hahine dekenai herevahereva namonamo karana ese namo ia havaraia.​​—⁠Iamesi 1:​19.

19. (a) Dahaka dainai sori herevana gwauraia karana be auka? (b) Dahaka ese ita do ia hagoadaia sori herevana ita gwauraia totona?

¹⁹ Nega haida herevahereva hebou karana lalonai sori herevana oi gwauraia. Nega haida unai be auka. Ta be ena kerere ia hahedinaraia totona ia manau be namo. To, unai ese headava ia hagoadaia diba! Sori herevana gwauraia karana dainai gabeai unai hekwakwanai do idia hepapahuahulaia lasi, bona dala ia kehoa ta ese dika ia gwauatao momokani bona hekwakwanai ia hamaoromaoroa. Paulo ia gwau: “Bema tau ta ese iena bamona tauna ia maumauraia, ia kara dika henia dainai, namona be unai dika do ia gwauatao. Lohiabada ese umui emui dika ia gwauatao, vadaeni unai bamona do umui karaia danu. To unai kara ibounai ia hereaia kara be lalokau. Do umui lalokau henia, vadaeni do umui noho hebou namo herea, mai laloa tamona danu.”​​—⁠Kolose 3:​13, 14.

20. Keristani tauna be ena adavana sibona ida bona ma haida vairanai idia noho hebou neganai, edena bamona ia kara henia be namo?

²⁰ Danu, headava lalonai heduru heheni karana be mai anina bada. Keristani tau bona hahine ese ta ta idia abidadama henia bona tabekau henia be namo. Namo lasi ta ese ma ta ia laloa maragi eiava ta ena lalogoada karana ia hamanokaia.  Ita be headava taudia dainai, ita ura iseda adavadia ita hanamoa; ita ura lasi idia ita hadikaia. (Aonega Herevadia 31:28b) Idia ita matauraia dainai hevaseha hereva kavakavadia ita gwauraia lasi idia ita hahemaraia totona. (Kolose 4:⁠6) Hanaihanai ta ta dekenai lalokau ita hahedinaraia neganai, unai ese heduru heheni karana ia hagoadaia. Emu adavana oi rosia eiava lalokau herevana ta oi gwauraia, unai be hegeregere ia dekenai oi gwau: “Oi lau lalokau henia. Lau moale oi be lau ida oi noho.” Unai bamona kara haida ese emu hetura karana ia hagoadaia bona headava ia durua hari inai tanobada dekenai ia noho namo totona. Ma gau haida danu idia noho, bona stadi gabena ese headava namona havaraia dalana dekenai Baibel ena heduru hereva ma haida do ia hahedinaraia. *

[Footnote]

Anina Oi Gwauraia Diba, A?

• Dahaka gaudia haida ese headava idia hadikaia diba?

• Dahaka dainai headava haraga karana be aonega karana lasi?

• Edena dala ai lauma dalanai goada karana ese headava ia hagoadaia?

• Dahaka gaudia ese headava idia hanamoa?

[Study Questions]

[Picture on page 20]

Headava be tau ese hahine ia ura henia bona hahine ese tau ia ura henia karana sibona lasi

[Pictures on page 22]

Iehova hetura henia namonamo karana ese headava tau bona hahine ia durua edia headava ia namo totona