Iseda Keristani Toana Ita Gimaia

“Umui be lauegu hereva hamomokania taudia.”​—⁠ISAIA 43:⁠10.

1. Iehova be ia dekenai edena bamona taudia ia veria mai?

OI BE Kingdom Hall ta dekenai oi helai neganai, idia noho taudia ibounai oi raraia. Inai tomadiho gabuna dekenai daidia oi itaia? Reana matamata taudia oi itaia, mai edia lalona ibounai ida Baibel ena aonega herevadia idia kamonai noho. (Salamo 148:​12, 13) Reana oi itaia, ruma bese kwaradia idia hekwarahi bada Dirava idia hamoalea totona, ena be ruma bese maurina ia matauraia lasi tanobadana ai ita noho. Eiava buruka taudia madi oi itaia, mai goada ida Iehova dekenai edia gwauhamata idia badinaia noho, ena be edia tauanina ia manoka. (Aonega Herevadia 16:31) Idia ibounai ese Iehova idia lalokau henia bada. Bona Iehova ia itaia idia be hegeregere iena turana ai idia lao totona. Dirava ena Natuna ia gwau: “Lauegu Tamana, lau ia siaia Diravana, ese do ia veria mai tauna sibona lau dekenai do ia mai diba.”​​—⁠Ioane 6:​37, 44, 65.

2, 3. Dahaka dainai iseda Keristani toana ita dogoatao noho be auka?

² Ita moale badina ita be Dirava ena lalo-namo bona ena hahenamo ita abia. To, inai “metau dikadia momo” negana ai, iseda Keristani toana ita dogoatao noho be auka. (2 Timoteo 3:⁠1) Keristani ruma bese lalonai idia tubu matamata taudia dekenai unai hereva be momokani.  Mero matamata ta ia gwau: “Ena be Keristani heboudia dekenai lau lao, to lauma dalanai lau tahua gaudia lau atoa lasi, bona Iehova hesiai henia urana ia noho lasi.”

³ Ena be haida idia ura Iehova idia hesiai henia, to reana edia turadia edia laloani karadia, tanobada ena lalona veria gaudia, bona kara dika karaia urana ese idia ia koua. Unai gaudia ese ita idia tohoa neganai, iseda Keristani toana ita haboioa diba. Hegeregere, hari tanobada taudia momo idia laloa, hari inai negai Baibel ena kara maoromaoro taravatudia be anina lasi. (1 Petero 4:⁠4) Haida idia laloa Dirava ese ia abia hidi dalana ai ia idia tomadiho henia be gau badana lasi. (Ioane 4:​24) Paulo ese Efeso taudia ia tore henia neganai, ia gwau tanobada be mai ena “lauma” dikana eiava lalohadai mai siahuna. (Efeso 2:⁠2) Unai lauma dikana ese taunimanima ia veria Iehova idia diba lasi taudia edia lalohadai idia abia dae totona.

4. Edena dala ai Iesu ese ia hahedinaraia iseda Keristani toana ita gimaia be namo?

⁴ To, ita be Iehova ena gwauhamata hesiai taudia dainai, ita diba bema ita​​—⁠matamata eiava buruka​​—⁠ese iseda Keristani toana ita haboioa, unai be dika bada. Iehova ena taravatu bona ia ura ita karaia gaudia ita diba neganai, iseda Keristani toana ita laloa maoromaoro diba. Badina ita be iena toana hegeregerena ia karaia. (Genese 1:​26; Mika 6:⁠8) Baibel ese iseda Keristani toana be dabua ida ia hahegeregerea, ita hahedokilaia taunimanima ibounai ese idia itaia totona. Iesu ese iseda nega ia herevalaia neganai, ia gwau: “Kamonai! Lau be henaoa tauna bamona umui dekenai do lau mai. Ia noga noho, bona iena dabua ia atoa hegaegae noho tauna be namo. Ia namo lasi, mai kopina kavakava do ia loaloa, badina be unai bamona iena hemarai do ia hedinaraia garina.” * (Apokalupo 16:15) Ita ura lasi iseda Keristani kara bona kara maoromaoro taravatudia ita kokia bona dala ita kehoa Satani ena tanobada ese ita ia biagua totona. Bema unai bamona ia vara, unai “dabua” ita haboioa diba, bena do ita lalohisihisi bona hemarai.

5, 6. Dahaka dainai lauma dalanai ita goada be gau badana?

⁵ Ta ese Keristani toana ia lalopararalaia neganai, unai ese ena mauri dalana ia haidaua diba. Edena dala ai? Bema Iehova ia tomadiho henia tauna ta ese ena Keristani toana ia haboioa, do ia laloa namonamo lasi, ia diba lasi dahaka do ia karaia bona tahua gaudia namodia do ia atoa lasi. Baibel be unai bamona daradara karana dekenai nega momo sisiba ia henia. Hahediba tauna Iamesi ia gwau: “Daradara tauna be davara ena hurehure bamona. Lai ese ia doria lao, doria mai, ia be gini gabuna lasi. Bema daradara tauna ia laloa, gau ta Lohiabada dekena amo do ia abia diba, iena laloa be anina lasi. Badina be laloa rua tauna be iena kara ibounai lalonai, ia ese dala tamona sibona ia badinaia diba lasi.”​​—⁠Iamesi 1:​6-8; Efeso 4:​14; Heberu 13:⁠9.

⁶ Edena dala ai iseda Keristani toana ita gimaia diba? Dahaka ese ita do ia durua ita be Atai Momokani Diravana ita tomadiho henia ena hahenamo ita laloa bada totona? Mani inai dala haida ita laloa.

 Sibona Dekenai Emu Keristani Toana Oi Hamomokania

7. Dahaka dainai Iehova ita noia ita ia tahua totona be namo?

⁷Hanaihanai emu hetura karana Iehova ida oi hagoadaia. Keristani tauna dekenai mai dava bada gauna be iena hetura karana Dirava ida. (Salamo 25:14; Aonega Herevadia 3:​32) Bema iseda Keristani toana ita daradaralaia matamaia, namona be iseda hetura karana ena goada bona ena badina ita tahua. Salamo torea tauna ia gwau: “Lohiabada e, lau do oi tahua bona tohoa, bona egu kara do oi itaia. Egu ura bona egu laloa danu do oi tahua.” (Salamo 26:⁠2) Dahaka dainai unai bamona tahua karana be mai anina bada? Badina iseda lalona momokani dekenai idia noho ura korikorina be ita sibona ese ita gwauraia hedinarai diba lasi. Iehova sibona ese iseda lalona​​—⁠ura, lalohadai, bona hemami​​—⁠ia lalopararalaia diba.​​—⁠Ieremia 17:​9, 10.

8. (a) Iehova ese ita ia tohoa karana ese edena bamona ita ia durua diba? (b) Edena dala ai heduru oi abia diba Keristani tauna goadana ai oi lao totona?

⁸ Bema Iehova ita noia ita ia tahua, anina be ita ese Ia ita boiria ita ia tohoa totona. Reana iseda ura korikorina bona kudouna dekenai idia noho hemami idia tohoa hahetoho do ia koua lasi. (Heberu 4:​12, 13; Iamesi 1:​22-​25) Unai bamona hahetoho be namo, badina unai ese iseda Iehova badinaia karana ena badina ia tohoa. Unai ese do ia hahedinaraia bema iseda ‘kara be namo, bona Dirava ena dala hegeregerena ita raka.’ (Iamesi 1:​2-4) Unai ia vara neganai, lauma dalanai ita tubu diba.​​—⁠Efeso 4:​22-​24.

9. Dahaka dainai ita sibona dekenai Baibel ena hereva ita hamomokania be mai anina bada?

⁹Baibel ena hereva momokani be oi sibona dekenai oi hamomokania. Iseda Keristani toana ita haboioa diba, bema Baibel amo diba ita abia lasi. (Filipi 1:​9, 10) Namona be Keristani taudia ibounai​​—⁠matamata eiava buruka​​—⁠be sibona dekenai idia hamomokania idia abia dae gaudia be Baibel lalonai idia noho hereva momokanidia. Paulo ese abidadama tamona taudia ia hamaoroa: “Hereva ibounai do umui laloa namonamo, idia be Dirava dekena amo idia mai o lasi, bona hereva namodia do umui dogoatao momokani.” (1 Tesalonika 5:​21) Namona be Keristani ruma bese lalonai idia tubu matamata taudia idia diba, idia be edia tama sina edia abidadama dainai lauma dalanai do idia goada lasi. Davida ese ena natuna, Solomona, ia hagoadaia: “Oiemu tamana ena Dirava dekenai do oi manada momokani, bona iena hesiai gaukara do oi karaia mai oiemu kudouna ibounai.” (1 Sivarai 28:⁠9) Solomona ese ena tamana ena abidadama Iehova dekenai ia itaia sibona be hegeregere lasi. Namona be Solomona ese Iehova ia dibaia, bona ia be unai ia karaia. Dirava ia noia: “Mani emu kara, aonega bona diba lau dekenai do oi henia, oiemu bese taudia do lau biagua mai maoromaoro danu totona.”​​—⁠2 Sivarai 1:​10.

10. Dahaka dainai mai eda lalohadai maorona ida ita henia henanadaidia be kerere lasi?

¹⁰ Diba ese iseda abidadama ia hagoadaia. Paulo ia gwau: “Abidadama ia vara, be Sivarai Namona kamonaia dekena amo.” (Roma 10:17) Iena hereva ena anina be dahaka? Iena hereva  ena anina be, Dirava ena Hereva ita stadilaia neganai, Iehova, ena gwauhamata, bona ena orea dekenai iseda abidadama ita hagoadaia. Mai momokani ida Baibel oi tahua neganai, emu abidadama hagoadaia haeredia do oi davaria. Ma danu, Roma 12:2 ai, Paulo ena sisiba ia gwau: “Dirava ena ura be do umui diba momokani. Do umui diba edena kara be namo, edena kara Dirava ia ura henia, bona edena kara be goeva momokani.” Edena bamona unai ita karaia diba? “Hereva momokani” ita dibaia maoromaoro karana amo. (Tito 1:⁠1) Iehova ena lauma ese ita ia durua diba hereva aukadia ita lalo-pararalaia totona. (1 Korinto 2:​11, 12) Gau ta ita lalopararalaia lasi neganai, Dirava ena heduru ita noia be namo. (Salamo 119:​10, 11, 27) Iehova ia ura ena Hereva ita lalopararalaia, abia dae bona badinaia. Mai eda lalohadai maorona ida ita gwauraia henanadaidia ia abia dae.

Emu Lalona Oi Hadaia Dirava Oi Hamoalea Totona

11. (a) Dahaka ura ese ita ia hamorua diba? (b) Dahaka ese ita ia durua diba mai gari lasi ida taunimanima edia laloani herevadia ita dadaraia totona?

¹¹Dirava ita hamoalea, taunimanima lasi. Orea ta lalonai ita noho be iseda toana ita hahedinaraia karana ta. Taunimanima ibounai be mai edia turadia be namo, bona ita idia abia dae karana ese iseda lalona ia hamoalea. Matamata taudia dekenai turadia edia laloani herevadia be mai ena siahu, bona unai ese ma haida tohotohoa eiava hamoalea lalohadai goadana ia havaraia. To iseda turadia be nega momo iseda namo idia laloa momokani lasi. Nega haida idia ura kara dika ta idia karaia, bona idia ura ta ese idia ia bamoa. (Aonega Herevadia 1:​11-​19)  Keristani tauna be ena bamodia edia laloani herevadia ia abia dae neganai, nega momo ena Keristani toana ia hunia. (Salamo 26:⁠4) Aposetolo Paulo ia gwau: “Inai tanobada taudia edia kara bamona do umui karaia lasi.” (Roma 12:⁠2) Iehova ese ita dekenai lalogoada ia henia, unai amo taunimanima edia laloani karadia ita dadaraia diba.​​—⁠Heberu 13:⁠6.

12. Iseda Dirava badinaia karana dekenai hahetoho ita davaria neganai, edena hakaua herevana bona daika ena haheitalai ese ita ia hagoadaia diba ita gini goada totona?

¹² Taunimanima edia laloani karadia ese iseda Keristani toana ia hadikaia gwauraia neganai, namona be ita laloatao Dirava badinaia karana be mai anina bada, to taunimanima edia lalohadai be anina lasi. Esodo 23:2 ena hereva be hakaua hereva namona: “Taunimanima momo idia kerere, edia laloa do umui abia dae lasi.” Israela taudia momo ese Iehova ena gwauhamata hagugurua karana idia daradaralaia neganai, Kaleba be mai goada ida hutuma edia lalohadai ia dadaraia. Ia diba Dirava ena gwauhamata ia abidadama henia diba, bona ia gini goada dainai hahenamo ia abia. (Numera 13:30; Iosua 14:​6-​11) Unai hegeregerena, emu hetura karana Dirava ida oi gimaia totona, taunimanima edia lalohadai oi dadaraia, a?

13. Dahaka dainai iseda Keristani toana ita gwauraia hedinarai be aonega karana?

¹³Emu Keristani toana oi gwauraia hedinarai. Taunimanima idia gwau tuari neganai namona be mai aonega danu oi tuari. Iseda Keristani toana ita dogoatao totona unai hereva be momokani. Esera ena negai, Iehova ena ura idia karaia dainai dagedage idia davaria neganai, abidadama Israela taudia idia gwau: “Ai be guba bona tanobada ena Dirava ena hesiai taudia.” (Esera 5:​11) Bema dagedage taudia edia kara bona samania herevadia ita laloa bada, gari dainai ita manoka diba. Bema ita ura taunimanima ibounai ita hamoalea, namo ta do ita havaraia lasi. Unai dainai oi gari lasi. Nega ibounai ma haida dekenai oi hahedinaraia goevagoeva oi be Iehova ena Witnes tauna ta. Hemataurai dalanai ma haida dekenai emu Keristani kara bona oi abia dae gaudia oi gwauraia hedinarai. Ma haida oi hadibaia emu lalona oi hadaia vadaeni Iehova ena kara maoromaoro taravatudia oi badinaia totona. Oi hahedinaraia goevagoeva emu lalohadai Keristani kara maoromaoro dekenai do oi haidaua lasi. Oi hahedinaraia oi badinaia kara maoromaoro taravatudia oi moalelaia. (Salamo 64:10) Emu Keristani gini goada karana ese oi do ia hagoadaia, gimaia, bona ma haida do ia veria Iehova bona ena taunimanima idia dibaia totona.

14. Ita idia kirikirilaia eiava dagedage henia dainai, ita lalomanoka be namo, a?

¹⁴ Oibe, haida ese oi do idia kirikirilaia eiava dagedage henia. (Iuda 18) Bema haida dekenai oi abia dae gaudia oi ura oi gwauraia hedinarai, to idia abia dae lasi, namona be oi lalohisihisi lasi. (Esekiela 3:​7, 8) Herevana oi hekwarahi bada, to laloauka taudia edia lalona do oi haidaua diba lasi. Farao oi laloa. Ena be hisihisi eiava hoa gauna ta ia vara​—⁠ena vara guna natuna ia mase danu​—⁠to Farao ia abia dae lasi Mose be Iehova ena ladanai ia hereva. Unai dainai, namo lasi taunimanima dekenai oi gari dainai oi manoka. Dirava kamonai bona abidadama henia karana ese ita do ia durua ita gari lasi totona.​​—⁠Aonega Herevadia 3:​5, 6; 29:⁠25.

Idaunega amo Diba Abia Bona Vaira Negana Totona Hegaegae

15, 16. (a) Iseda lauma ahuna be dahaka? (b) Dirava ena Hereva lalonai iseda lauma ahuna ita laloa dobu karana amo, dahaka namo ita abia diba?

¹⁵Emu lauma ahuna oi laloa bada. Keristani taudia ese Dirava ena Hereva amo edia lauma ahuna idia laloa dobu neganai, namo do idia abia. Unai ahuna be Iehova ena Hereva ena hereva momokani, mauri hanaihanai ena helaro, bona Dirava ena gwaukau taudia bamona sivarai namona ita harorolaia ena hahenamo. Dirava ese taunimanima ia hamauria totona, Iehova ena Witnes taudia ia abidia hidi Basileia ena sivarai do idia harorolaia, unai orea lalonai oiemu maduna oi lalopararalaia, a? Laloaboio lasi, Iehova ia gwau: “Umui be lauegu hereva hamomokania taudia.”​​—⁠Isaia 43:⁠10.

¹⁶ Sibona oi nanadaia: ‘Inai lauma ahuna be mai anina bada gauna lau dekenai, a? Lau laloa bada dainai, Dirava ena ura be egu mauri lalonai  lau atoa guna, a? Egu lauma ahuna lau laloa bada dainai, unai ese lau ia hagoadaia hedibagani lau dadaraia totona, a?’ Iseda lauma ahuna dainai lauma dalanai ita noho namo, bona Iehova ena orea sibona lalonai unai ita mamia diba. (Salamo 91:​1, 2) Hari inai negai, Iehova ena orea dekenai idia vara hoa karadia ita laloa lou karana ese ita ia hadibaia, tau ta eiava gau ta ese Iehova ena taunimanima be tanobada amo do ia hadikaia ore diba lasi.​​—⁠Isaia 54:17; Ieremia 1:​19.

17. Iseda lauma ahuna sibona lasi, to dahaka ita laloa bada danu be namo?

¹⁷ Oibe, iseda lauma ahuna sibona dainai do ita gini goada lasi. Namona be ita ta ta ese Dirava do ita tura henia namonamo. Paulo ia hekwarahi Filipi Keristani taudia edia abidadama ia hagoadaia murinai, idia dekenai ia gwau: “Lauegu lalokau taudia e, umui dekenai lau noho neganai lau umui kamonai henia. Vadaeni harihari umui dekenai lau noho lasi neganai danu lau do umui kamonai henia, inai be gau badana. Mai gari bona mai heudeheude danu emui hamauria do umui tahua noho.” (Filipi 2:​12) Ita roho mauri totona ma ta dekenai ita tabekau diba lasi.

18. Edena dala ai Keristani gaukara idauidau ese iseda Keristani toana ia hagoadaia?

¹⁸Keristani gaukara idauidau oi karaia. Taunimanima idia gwau “gaukara ese ta ena kara ia hahedinaraia.” Hari inai negai, Keristani taudia be mai anina bada gaukarana idia abia, idia ese Dirava ena Basileia ena sivarai namona idia harorolaia. Paulo ia gwau: “Lau be umui Iuda lasi taudia totona aposetolo gaukara lau karaia noho, bona inai dagi lalonai lau moale bada.” (Roma 11:13) Iseda haroro gaukara dainai tanobada amo ita idau, bona ita haroro neganai iseda Keristani toana ia hagoadaia. Tiokratik gaukaradia, hegeregere, Keristani heboudia, tomadiho rumadia haginia gaukarana, heduru idia ura abia taudia durua karana, bona unai bamona gaukara ma haida be mai iseda lalona ibounai ida ita karaia neganai, unai ese iseda Keristani toana ia hagoadaia.​​—⁠Galatia 6:​9, 10; Heberu 10:​23, 24.

Iseda Keristani Toana ese Ia Havaraia Hahenamo

19, 20. (a) Oi be Keristani tauna dainai, dahaka hahenamo oi moalelaia? (b) Iseda Keristani toana ena badina be dahaka?

¹⁹ Ita be Keristani taudia momokanidia dainai, ita moalelaia hahenamo idauidau, be mani nega sisina lalonai ita laloa. Ita moale badina Iehova be ita ta ta ia diba. Peroveta tauna Malaki ia gwau: “Lohiabada dekenai idia gari henia taudia ese idia ta ta dekenai idia herevahereva, bona Lohiabada ese edia hereva ia kamonai. Vadaeni Lohiabada ese guba dekenai oda ia gwauraia, bona buka ta lalonai be Lohiabada idia gari henia taudia, bona Lohiabada idia matauraia noho taudia edia ladana idia torea.” (Malaki 3:​16) Dirava ena matana ai ita be ena turadia. (Iamesi 2:23) Iseda mauri ia namo badina ia be mai ena anina bona gaukara namodia ita karaia. Bona mauri hanaihanai ena helaro be ita dekenai ia henia.​​—⁠Salamo 37:⁠9.

²⁰ Laloaboio lasi, Dirava ese oi ia laloa bada karana be mai anina bada, to taunimanima edia lalohadai be anina lasi. Reana ma haida ese taunimanima edia lalohadai hegeregerena ita idia gwauraia. To Dirava ese ita ia laloa bada bona ena lalokau karana dainai iseda mamina be hegeregere​​—⁠ita be ia ena. (Mataio 10:​29-​31) Bona danu, Dirava ita lalokau henia dainai, iseda Keristani toana ita lalopararalaia bona iseda mauri lalonai dahaka do ita karaia ita diba. “To tau ta ese bema Dirava ia lalokau henia, Dirava be ia diba momokani unai tau be iena.”​​—⁠1 Korinto 8:⁠3.

[Footnote]

Oi Laloatao, A?

• Dahaka dainai Keristani taudia ese edia Keristani toana idia gimaia be gau badana?

• Edena dala ai iseda Keristani toana ita hamomokania diba?

• Bema ita daradara daika do ita hamoalea, dahaka ese ita do ia durua abia hidi maorona ita karaia totona?

• Iseda Keristani toana ita dogoatao goada dainai, iseda vaira negana be edena bamona?

[Study Questions]

[Pictures on page 11]

Mai iseda lalona ibounai ida Keristani gaukara idauidau ita karaia ese iseda Keristani toana ia hagoadaia diba