Umui Heagi be Namo Badina Umui be Keristani Taudia!

“Daika tauna ia ura heagi, ia be Lohiabada ena kara sibona do ia heagilaia.”​​—⁠1 KORINTO 1:​31.

1. Taunimanima ese tomadiho be edena bamona idia laloa?

VANEGAI tomadiho edia niusi ia herevalaia tauna ta, ese taunimanima momo edia lalohadai edia tomadiho dekenai, be inai bamona ia herevalaia: “Hari inai negai, tomadiho dekenai ia vara badabada gauna be . . . ta ena tomadiho ia laloa bada lasi karana.” Ma ia gwau, taunimanima momo “idia abia dae Dirava ia noho . . . ; to ia idia laloa bada lasi.”

2. (a) Dahaka dainai taunimanima be lauma gaudia idia laloa bada lasi karana, ita hoalaia lasi? (b) Tomadiho laloa bada lasi karana ese Keristani taudia momokanidia dekenai dahaka dika ia havaraia diba?

² Baibel idia stadilaia taudia ese unai kara idia hoalaia lasi. (Luka 18:⁠8) Taunimanima ese tomadiho idia laloa bada lasi karana be do ia vara. Nega daudau lalonai tomadiho koikoi ese taunimanima dekenai lalohisihisi ia havaraia bona ia hakaudia kerere. (Apokalupo 17:​15, 16) To, Keristani taudia korikoridia dekenai, tanobada taudia edia lalorua bona tomadiho laloa bada lasi karana ese dika ia havaraia diba. Unai dainai bema iseda tomadiho, Dirava hesiai henia gaukarana bona Baibel ena hereva momokani ita laloa bada lasi, dika ita davaria diba. Iesu ese Laodikea dekenai idia noho Keristani ginigunadia ia sisiba henia neganai, unai bamona kara ia herevalaia: “Oi be keru lasi, bona siahu lasi. Lau ura oi be keru momokani, o siahu momokani! . . . Oi be siahu sisina sibona.”​​—⁠Apokalupo 3:​15-​18.

Iseda Toana Ita Diba

3. Edena gaudia dainai Keristani taudia idia heagi diba?

³ Keristani taudia be lauma gaudia idia laloa bada totona, edia Keristani toana idia diba, bona idia heagilaia be namo. Ita be Iehova ena hesiai taudia bona Keriso ena hahediba taudia dainai, Baibel ese iseda toana ia gwauraia hedinarai. Ita be ma haida dekenai “Sivarai Namona” ita harorolaia neganai, ita be “Dirava ena gaukara [ita] karaia” bona ena “hereva hamomokania taudia.” (Mataio 24:14; 1 Korinto 3:9; Isaia 43:10) Ita be “ta ta . . . lalokau henia” taudia. (Ioane 13:34) Keristani taudia momokanidia ta ta be “edia lalona idia hadibaia lou, hadibaia lou, ela bona idia manada vadaeni. Unai neganai idia be maoro bona kerere edia toana idia diba namonamo.” (Heberu 5:14) Ita be tanobada huanai ‘diari bamona ita hedinarai.’ (Filipi 2:​15) Ita hekwarahi “Dirava idia diba lasi taudia edia vairanai, kara namodia do [ita] karaia.”​​—⁠1 Petero 2:​12; 2 Petero 3:​11, 14.

4. Iehova ia tomadiho henia tauna be edena bamona tauna?

⁴ Iehova idia tomadiho henia taudia momokanidia be idia karaia lasi gaudia idia diba danu. Edia Hakaua Tauna, Iesu Keriso be tanobada ena lasi hegeregerena, “idia be tanobada ena lasi.” (Ioane 17:16) Idia be ‘Dirava diba lasi taudia’ amo idia parara, unai taudia ‘edia laloa be dibura, bona Dirava ena mauri idia davaria diba lasi.’ (Efeso 4:​17, 18) Unai dainai, Iesu murinai idia raka taudia ese ‘Dirava negea kara  bona lebulebu kara idia rakatania . . . idia noho namonamo, idia kara maoromaoro, bona Dirava idia matauraia.’​​—⁠Tito 2:​12.

5. Inai hahegani, ‘Iehova ita heagilaia’ ena anina be dahaka?

⁵ Iseda toana ita diba namonamo bona tanobada bona guba ena Siahu Ibounai Lohiana be iseda turana dainai, unai ese ita ia hagoadaia ‘Iehova ita heagilaia totona.’ (1 Korinto 1:​31) Unai heagi karana be dahaka? Ita be Keristani taudia momokanidia bona ita moale, badina Iehova be iseda Dirava. Ita be inai hahegani ita badinaia: “Bema tau ta ia ura hekokoroku, namona be inai sibona dekenai do ia hekokoroku: Ia be lau, Lohiabada ia diba, bona lauegu kara ena anina ia diba. Badina be lauegu lalokau, be noho hanaihanai lalokauna, bona lauegu kara be namo, bona maoromaoro danu.” (Ieremia 9:​24) Dirava ita diba bona ita ia gaukaralaia ma haida ita durua ena hahenamo dainai, ita “heagi.”

Hekwakwanai Idauidau

6. Dahaka dainai Keristani taudia haida ese edia toana idia dogoatao noho be mai ena hekwarahi?

⁶ Ita gwau diba, iseda Keristani toana ita dogoatao noho be mai ena hekwarahi. Keristani ruma bese lalonai ia tubu mero matamatana ta be nega sisina lalonai lauma dalanai ia manoka negana ia laloa lou. Ia gwau: “Nega haida, lau mamia lau diba lasi dahaka dainai lau be Iehova ena Witnes tauna ta. Lau beibi negana amo hereva momokani lau dibaia. Nega haida lau mamia inai be taunimanima ibounai ese idia abia dae tomadihona ta sibona.” Keristani taudia haida edia toana be tanobada ena moale karadia, televisen bona magasin ese idia halasia sitaelo bona Dirava diba lasi mauri dalana ese idia biagua. (Efeso 2:​2, 3) Ma haida be nega ta ta ai idia laloa daradara bona edia mauri lalonai idia laloa bada bona tahua gaudia idia lalohadailaia lou.

7. Dirava ena hesiai taudia be edena bamona sibodia edia kara idia tahua diba?

⁷ Sibona eda kara ita tahua namonamo be kerere, a? Lasi. Aposetolo Paulo ese Keristani taudia ia hagoadaia sibodia edia kara do idia tahua noho. Ia gwau: “Umui sibona emui kara do umui tahua, bona emui mauri do umui tohoa, umui be abidadama korikori taudia o lasi.” (2 Korinto 13:⁠5) Unai siri lalonai, aposetolo Paulo ese Keristani taudia ia hagoadaia sibodia edia kara do idia tahua bona bema lauma dalanai manoka gaudia idia itaia, kara haraga idia hamaoromaoroa be namo. Keristani tauna ta be ena abidadama ia goada eiava lasi ia tahua neganai, namona be ia itaia bema ena hereva bona kara be ia abia dae gaudia ida idia hegeregere. To, bema, sibona iseda “toana” ita tahua neganai, namo lasi tanobada taudia edia lalohadai ita tahua. Ita ura lasi eda “abidadama ia dika, vanagi be davara nadi dekenai ia kamokau, bona ia dika bamona”!​​—⁠1 Timoteo 1:​19.

Hekwakwanai Ita Davaria Danu

8, 9. (a) Mose be edena dala ai ena laloa daradara hemamina ia hahedinaraia? (b) Mose ia laloa ia hegeregere lasi, to Iehova ese edena bamona ia durua? (c) Iehova ena gwauhamata ese edena bamona oi ia durua diba?

⁸ Nega ta ta ai Keristani taudia idia laloa daradara bona idia mamia idia be hegeregere lasi. To, unai be hemami maorona, a? Lasi vaitani! Idia moale diba badina idia diba unai bamona hekwakwanai be gau matamatana lasi. Idaunegai Dirava ena kamonai hesiai taudia danu be unai bamona hemami idia abia. Mani Mose ita laloa, ia ese abidadama, kamonai, bona badinaia kara goadana ia hahedinaraia. Mose be gaukara badana ia abia neganai, mai hemarai ida ia henanadai: “Lau be daika?” (Esodo 3:​11) Ia laloa gauna be, ‘Lau be anina lasi tauna!’ eiava ‘Lau be hegeregere lasi!’ Reana Mose ena mauri lalonai idia vara gau idauidau dainai, ia laloa ia be ia hegeregere lasi: Ia be igui hesiai besena amo ia vara. Israela taudia ese ia idia dadaraia. Iena malana ia metau bona ia hereva namonamo lasi. (Esodo 1:​13, 14; 2:​11-​14; 4:​10) Guna ia be mamoe naria tauna, Aigupito taudia ese idia inai henia gaukarana unai. (Genese 46:34) Unai dainai ia laloa ia hegeregere lasi Dirava ena igui hesiai taudia ia hamauria totona!

⁹ Iehova ese Mose dekenai mai anina bada  gwauhamata rua ia henia: “Momokani, dohore lau durua oi, bona lau siaia oi ena toana be inai: Oi ese Israela taudia Aigupito tano dekena amo do oi hakaua siri murinai, inai ororo Sinai dekenai Dirava do umui tomadiho henia.” (Esodo 3:​12) Dirava ese ia daradara hesiai tauna ia hamaoroa Ia be hanaihanai ia danu do ia noho. Danu, Iehova ia hahedinaraia ia ese ena taunimanima do ia ruhaia momokani. Lagani momo idia hanaia lalodiai, Dirava ese unai bamona heduru do ia henia ena gwauhamata idauidau ia gwauraia. Hegeregere, Israela besena be Gwauhamata Tanona idia vareai gwauraia neganai, Iehova be Mose amo ia gwau: “Do umui goada, emui lalona do umui ha-aukaia, . . . Lohiabada, emui Dirava ese umui dekenai do ia noho. Ia ese umui do ia negea lasi, ia ese umui do ia rakatania lasi.” (Deuteronomi 31:⁠6) Danu, Iehova ese Iosua ia hamaoroa: “Iosua e, oiemu mauri dinadia ibounai lalonai tau ta ese oi do ia halusia diba lasi. Lau be oi dekenai do lau noho. . . . Nega ibounai oi do lau bamoa, bona oi do lau rakatania lasi.” (Iosua 1:⁠5) Bona Keristani taudia dekenai ia gwauhamata: “Lau ese umui do lau negea lasi, bona umui do lau rakatania lasi. Lasi bona lasi momokani.” (Heberu 13:⁠5) Ita Keristani taudia be unai bamona heduru goadana ita abia dainai ita heagi be namo!

10, 11. Levi tauna Asapa be edena bamona Iehova hesiai henia ena namo ia laloa maoromaoro lou?

¹⁰ Mose ia noho bena lagani 500 murinai, abidadama Levi tauna ta ladana Asapa ese kara maoromaoro badinaia karana ena namo ia daradaralaia. Ena be Asapa ese hedibagani bona hahetoho ia davaria, ia ese Dirava ia hesiai henia noho. To ia itaia Dirava idia dadaraia taudia haida edia siahu bona kohu idia habadaia. Asapa ena hemami be edena bamona? Ia gwau: “To egu aena be kahirakahira ia dedi. Lauegu kamonai be ia manoka lao, bona egu abidadama be kahirakahira ia ore. Badina be lau itaia, tau dikadia ese moni bona kohu momo idia abia, bona hekokoroku taudia idia kwalimu, vadaeni lau mama henidia.” Iehova tomadiho henia karana ena namo ia daradaralaia matamaia. Asapa ia laloa: “Lau ese lau kara kava, a? Nega ibounai lauegu lalona lau hagoevaia, bona kara dika ta lau karaia lasi. Inai kara dekena amo namo ta lau davaria, a? Badina be dina ibounai lau hisihisi noho.”​​—⁠Salamo 73:​2, 3, 13, 14.

¹¹ Asapa ese unai laloa daradara karana be edena dalana ai ia hamaoromaoroa? Ia hunia, a? Lasi. Salamo karoa 73 dekenai ita itaia bamona, guriguri amo Dirava dekenai ia gwauraia hedinarai. Asapa ese dubu ia vadivadi henia neganai, ena lalohadai ia haidaua. Unuseniai ia noho bona gau ibounai ia lalohadailaia murinai, ia laloparara Dirava badinaia karana be mauri dalana namona. Iehova hesiai henia karana ena namo ia laloa namonamo murinai, ia laloparara Iehova be kara dika ia inai henia, bona ena nega korikorina ai, kara dika taudia do ia panisia. (Salamo 73:​17-​19) Lalohadai maorona ia abia neganai, Asapa ese ena hahenamo, Iehova hesiai henia karana ia hagoadaia. Dirava dekenai ia gwau: “Lau be nega ibounai oi kahirakahira lau noho, bona oi ese egu imana oi dogoatao noho. Oi ese oiemu sisiba dekena amo lau oi hakaua noho. Dokona neganai oi ese lau do oi abia dae.” (Salamo 73:​ 23, 24) Asapa ese ena Dirava ia heagilaia lou.​​—⁠Salamo 34:⁠2.

Edia Toana Idia Diba

12, 13. Baibel lalonai Dirava idia tura henia karana idia heagilaia taudia edia sivarai oi gwauraia.

¹² Iseda Keristani toana be mai anina bada lalohadaina ita hagoadaia dalana ta be, Dirava idia badinaia taudia edia abidadama ita tahua bona ita tohotohoa. Idia be hahetoho negadiai edia hetura karana Dirava ida idia heagilaia bada. Iakobo ena natuna, Iosepa, mani oi laloa. Ia maragi neganai, mai koikoi ida ena kakadia ese igui hesiai tauna bamona idia hoihoilaia bona Aigupito dekenai ia lao. Unai be daudau herea ena tamana, Dirava gari henia tauna bona ena lalokau ruma besena amo. Aigupito dekenai ia noho lalonai, ia dekenai Dirava ena sisiba ia henia tauna be lasi, bona ena kara maoromaoro bona Dirava tabekau henia karana idia tohoa hahetoho ia davaria. To, ia hekwarahi bada Dirava ena hesiai tauna ena toana namona ia dogoatao noho bona kara maoromaoro ia badinaia. Ena be kara dika taudia huanai ia noho, to ia moale badina Iehova ia tomadiho henia, bona ia gari lasi unai ia hahedinaraia totona.​​—⁠Genese 39:​7-​10.

¹³ Lagani 800 bamona murinai, Suria ena ami jeneral Namana ena hesiai gaukara ia karaia Israela kekeni maragi, ia laloaboio lasi ia be Iehova tomadiho henia kekenina ta. Dala ia kehoa neganai, ia hahedinaraia Elisaia be Dirava momokani ena peroveta tauna, bona mai gari lasi ida ia hahedinaraia ia be Iehova ena witnes ta. (2 King Taudia 5:​1-​19) Lagani haida murinai, ena be King Iosaia be kara dika taudia huanai ia noho, taravatu ia karaia tomadiho dalana ia hagoevaia lou totona, Dirava ena dubu ia hanamoa, bona Israela besena be Iehova dekenai ia hakaua lou. Iena tomadiho karana ia heagilaia. (2 Sivarai, karoa 34, 35) Babulonia dekenai Daniela bona ena Heberu bamodia toi idia laloaboio lasi idia be Iehova ena hesiai taudia, bona hahetoho bona hedibagani lalonai edia abidadama idia dogoatao noho. Ia hedinarai goevagoeva, idia heagi badina idia be Iehova ena hesiai taudia.​​—⁠Daniela 1:​8-​20.

Oiemu Keristani Toana Dainai Oi Heagi

14, 15. Iseda Keristani toana dainai ita heagi ena anina be dahaka?

¹⁴ Unai Dirava hesiai henia taudia idia kwalimu, badina idia ese dala maorona ai Dirava vairanai edia gini karana idia heagilaia. Hari inai negai, ita be edena bamona? Iseda Keristani toana dainai ita heagi ena anina be dahaka?

¹⁵ Gau ginigunana be, ita moale badina ita be Iehova ena ladana, ena hahenamo bona ena lalonamo ita abia taudia. Dirava be ia daradara lasi daidia be iena taunimanima. Taunimanima be tomadiho idia daradaralaia negana ai ia noho tauna, aposetolo Paulo, ia gwau: “Lohiabada ia diba momokani, daika be iena taudia korikori.” (2 Timoteo 2:​19; Numera 16:⁠5) Iehova be “iena taudia korikori” dainai ia heagi. Ia gwau: “Umui ia daua toho tauna ese egu matana nadinadina ia daua toho.” (Sekaraia 2:​8, NW ) Oibe, Iehova be ita ia lalokau henia. Unai hegeregerena, namona be ita ese Iehova ita lalokau henia dainai ita tura henia. Paulo ia gwau: “Tau ta ese bema Dirava ia lalokau henia, Dirava be ia diba momokani unai tau be iena.”​​—⁠1 Korinto 8:⁠3.

16, 17. Dahaka dainai Keristani taudia matamatadia bona burukadia ese lauma dalanai idia abia ahuna idia heagilaia diba?

¹⁶ Namona be Iehova ena Witnes taudia edia ruma bese lalonai idia tubu daekau matamata taudia ese idia tahua, bema Dirava idia tura henia dainai edia Keristani toana be ia goada ia lao. Namo lasi edia tama sina edia abidadama  dekenai idia tabekau. Paulo ese Dirava ena hesiai taudia ta ta ia herevalaia neganai, ia gwau: “Iena Biaguna sibona ese do ia gwauraia ia be maoro o kerere.” Unai dainai, ma ia gwau: “Ita ibounai ta ta ese, iseda kara ena badina, be Dirava ena vairana dekenai do ita gwauraia hedinarai.” (Roma 14:​4, 12) Ita diba, bema iseda tama sina ita hamoalea sibona totona hereva momokani ita abia dae, unai ese Iehova tura henia hanaihanai karana ia hagoadaia lasi.

¹⁷ Histori ibounai lalonai, bese momo be Iehova ena witnes taudia ai idia lao. Idia be abidadama tauna Abela​​—⁠lagani 6,000 bamona gunanai​​—⁠ema bona hari inai negai idia noho “hutuma bada herea” Witnes taudia bona do ia lao ela bona nega vairai Iehova do idia tomadiho henia hanaihanai taudia. (Apokalupo 7:​9, Taravatu Matamatana; Heberu 11:⁠4) Ita be unai nega amo ema bona hari mai edia abidadama ida Dirava idia tomadiho henia besena. Unai be lauma ahuna namo hereana!

18. Edena dala ai ita badinaia kara bona taravatu ese tanobada amo ita ia hapararaia?

¹⁸ Iseda Keristani toana be mai ena kara bona taravatu maorodia. Unai ese idia hahedinaraia ita be Keristani taudia. Unai dala sibona be mauri dalana namona bona Dirava ese ia moalelaia. (Kara 9:​2, NW; Efeso 4:​22-​24) Keristani taudia be ‘hereva ibounai idia laloa namonamo bona hereva namodia idia dogoatao momokani’! (1 Tesalonika 5:​21) Ita diba Keristani taudia bona Dirava idia diba lasi tanobada taudia edia toana be idau momokani. Iehova ese tomadiho momokani bona koikoina edia idau ia hahedinaraia namonamo. Iena peroveta tauna Malaki amo, ia gwau: “Lauegu kara ena idau do umui itaia lou, kara maoromaoro taudia dekenai edena bamona do lau karaia, bona kara dika taudia dekenai edena bamona  do lau karaia. Oibe, do umui itaia Dirava ena gaukara idia karaia, bona iena gaukara idia karaia lasi taudia dekenai, dahaka do ia vara.”​​—⁠Malaki 3:​18.

19. Keristani taudia momokanidia be dahaka idia laloa bada?

¹⁹ Inai daradara tanobadana ai Iehova ita heagilaia karana be mai anina bada. Vadaeni, dahaka ese ita do ia durua iseda Dirava ita heagilaia bona Keristani kara ita badinaia totona? Heduru herevadia be stadi gabena dekenai do ita itaia. Unai ita stadilaia neganai, inai do oi diba momokani: Keristani taudia momokanidia be tomadiho idia laloa bada taudia.

Oi Laloatao, A?

• Edena dala ai Keristani taudia ese ‘Iehova idia heagilaia’?

• Mose bona Asapa edia haheitalai amo dahaka oi dibaia?

• Baibel lalonai Dirava idia hesiai henia dainai idia heagi taudia be daidia?

• Iseda Keristani toana dainai ita heagi ena anina be dahaka?

[Study Questions]

[Picture on page 5]

Nega sisina lalonai, Mose ia laloa daradara

[Pictures on page 7]

Iehova ena idaunegai hesiai taudia momo idia heagi badina idia be Keristani taudia