“Umui Naria Noho”

IDAUNEGAI, geiti idia naria taudia be geiti bona dubu helaga ena vareai gabudia, bona nega haida, ruma ena iduara dekenai idia gini. To unai sibona lasi, namona be hanuaboi ai idia itaia bema geiti idia koua eiava, geiti idia naria taudia be gima taudia danu. Unai be gaukara badana momokani, badina hanua taudia ese dika idia davaria lasi totona, gima taudia ese taunimanima idia hadibaia haraga be gau badana.

Iesu Keriso be geiti naria taudia eiava iduara naria taudia edia gaukara ia diba. Nega ta, Iesu ese ena hahediba taudia be iduara naria taudia ida ia hahegeregerea bona Iuda taudia edia nega dokona ia kahirakahira dainai, ia hagoadadia do idia gima noho totona. Ia gwau: “Umui naria namonamo, umui noga noho, badina be inai gaudia idia mai nega umui diba lasi. Ia be tau ta hanua daudau dekenai ia lao bamona, iena ruma ia rakatania. . . . Bona ruma biaguna ese iduara naria tauna dekenai ia hamaoroa, ia naria namonamo. Unai dainai, umui naria noho, badina umui diba lasi edena negai ruma biaguna do ia mai.”​​—⁠Mareko 13:​33-​35.

Unai hegeregerena, lagani 125 mai kahana lalonai, Gima Kohorona ese Iesu ena hereva “umui naria noho” herevana ia halasia noho. Edena dala ai? Inai magasin ena rau 2 ese ia hahedinaraia bamona, “Inai magasin ese Baibel ena peroveta herevadia hamomokania gaudia ia gwauraia hedinarai. Taunimanima iboudiai edia lalona ia hagoadaia, ia gwau nega daudau lasi murinai Dirava ena Basileia ese taunimanima hahisia taudia iboudiai do ia haoredia bona tanobada be paradaiso ai do ia halaoa.” Tanobada hegegemadai ai Gima Kohorona magasin ena kopi 26,000,000 be gado 150 ai idia halasia, bona ia be tanobada hegegemadai ai idia hariharilaia momo tomadiho bukana ta. Unai amo, Iehova ena Witnes taudia be idaunegai geiti idia naria taudia bamona, idia ese gabu ibounai dekenai taunimanima idia hadibaia lauma dalanai idia “naria noho” totona, badina edia Biaguna, Iesu Keriso, be kahirakahira do ia mai bona inai tanobada dikana do ia hahemaoro henia.​​—⁠Mareko 13:​26, 37.