Ita Sibona Iseda Ura Ita Laloa Lasi

“Keriso ese taunimanima ibounai dainai ia mase. Unai dainai . . . , ita sibona iseda mauri bona iseda ura do ita laloa lasi.”​—2 KORINTO 5:15.

1, 2. Edena siri ese Iesu murinai idia raka taudia ginigunadia ia doria sibona laloa karana idia dadaraia totona?

INAI be Iesu ena hanuaboi ginigabena. Hora haida murinai, ia idia abidadama henia taudia ibounai totona ena mauri do ia atoa diho. Unai hanuaboi ai, Iesu ese ena aposetolo taudia dekenai mai anina bada hereva haida ia gwauraia. Ia ese kara ta ia gwauraia, unai ese do ia hamomokania idia be iena murinai idia raka taudia. Ia gwau: “Taravatu matamatana lau henia umui dekenai, inai bamona: Umui ta ta dekenai umui lalokau henia. Lau ese umui dekenai lau lalokau henia hegeregerena, umui danu ta ta dekenai umui lalokau henia. Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.”​—Ioane 13:​34, 35.

² Keristani taudia momokanidia be sibona edia ura dadaraia lalokauna do idia hahedinaraia ta ta dekenai, bona edia tadikaka edia namo do idia atoa guna. Namona be ‘edia turana totona edia mauri do idia atoa diho’ danu. (Ioane 15:13) Keristani taudia ginigunadia ese unai taravatu matamatana be edena bamona idia laloa? Tertullian ena buka (Apology) lalonai ia ese taunimanima haida edia hereva Keristani taudia dekenai ia torea: ‘Itaia, idia be ta ta idia lalokau henia bada bona idia hegaegae ta ta dainai do idia mase.’

3, 4. (a) Dahaka dainai sibona laloa bada karana ita dadaraia be namo? (b) Inai stadi lalonai dahaka do ita herevalaia?

³ Namona be ‘ita ta ta iseda metau do ita huaia, bona inai dala dekenai Keriso ena taravatu do ita badinaia.’ (Galatia 6:2) To, Keriso ena taravatu ita badinaia bona ‘mai iseda lalona, lauma, bona kudouna ibounai ida iseda Dirava Iehova bona iseda badibadinai taudia ita lalokau henia’ karana ia koua gauna badana ta be sibona laloa karana. (Mataio 22:​37-39) Ita be goevadae lasi dainai, vaia sibona eda ura ita laloa  guna. Unai latanai be ma dina ta ta ena hekwarahi, kara helulu karadia sikuli eiava gaukara gabuna dekenai, bona tauanina durua gaudia abia ena hekwarahi ese sibona eda ura laloa guna karana idia habadaia. Sibona ena ura laloa guna karana be ia bada ia lao noho. Aposetolo Paulo be inai hadibaia herevana ia gwauraia: “Nega ena dokona dekenai, . . . taunimanima ese idia edia ura sibona do idia tahua.”​—2 Timoteo 3:​1, 2.

⁴ Tanobada ai, Iesu ena hesiai gaukara dokonai, ia ese ena hahediba taudia dekenai sibona laloa bada karana idia dadaraia daladia toi ia hadibaia. Unai gaudia toi be dahaka dahaka, bona iena sisiba amo dahaka namo ita davaria diba?

Hanaia Dalana Namona!

5. Galilea ena not kahana dekenai idia haroro neganai, Iesu ese ena hahediba taudia dekenai dahaka ia hadibaia, bona dahaka dainai idia hoa?

⁵ Iesu be Galilea ena not kahana, Kaisarea Filipi kahirakahira dekenai ia haroro noho. Reana, inai mai hairai gabuna dekenai taunimanima be idia laga-ani bona sibodia edia ura idia tahua. To, unuseniai idia noho neganai, Iesu ese iena hahediba taudia dekenai ia hadibaia “ia be Ierusalema dekenai do ia lao, vadaeni hanua tau badadia bona dubu biagudia bona taravatu hadibaia taudia ese hisihisi momo do idia henia, bona do idia alaia mase. To dina toi murinai be do ia toreisi lou.” (Mataio 16:21) Reana, Iesu ena hahediba taudia be idia hoa bada, badina ela bona unai negai, idia laloa edia Hakaua Tauna ese ena Basileia be tanobada ai do ia haginia!​—Luka 19:11; Kara 1:6.

6. Dahaka dainai Iesu ese Petero ia gwau henia?

⁶ Karaharaga, “Petero ese Iesu ia hakaua siri, ia sisiba henia hamatamaia, ia gwau, ‘Lohiabada e, unai bamona lasi. Unai bamona do idia karaia lasi oi dekenai.’ ” Iesu be edena bamona ia haere? “Iesu ena vairana be ia giroa, Petero dekenai ia gwau henia, ia gwau, ‘Satani e, lauegu murina kahana oi lao. Lau hamorua totona oi hereva, badina oiemu laloa be Dirava ena lasi, to taunimanima edia.’ ” Idia ruaosi edia lalohadai be idau! Iesu be Dirava ese ia henia gaukarana, sibona ena ura do ia dadaraia gaukarana ia abia dae, unai gaukara dainai ia be hua haida murinai do ia mase. Petero be auka lasi dalana ia abia hidi, ia gwau: “Lohiabada e, unai bamona lasi.” Momokani, Petero be Iesu ia hebogahisi henia. To, Iesu ese Petero ia gwau henia badina ia ese Satani ena lalohadai ia hahedinaraia. Petero ena “laloa be Dirava ena lasi, to taunimanima edia.”​—Mataio 16:​22, 23.

7. Mataio 16:24 lalonai Iesu ese edena dala ia gwauraia ena hahediba taudia do idia badinaia totona?

⁷ Hari inai negai, Petero ese Iesu dekenai ia gwauraia herevana ita kamonai danu. Nega momo tanobada taudia ese tau ta dekenai do idia gwau, ‘oi sibona emu ura oi karaia’ eiava ‘auka lasi dalana oi abia hidi.’ To, Iesu be lalohadai idauna ia abia hidi. Ena hahediba taudia ia hamaoroa: “Tau ta bema ia ura lauegu murina dekenai do ia raka, ia sibona ena ura do ia laloa lasi, to iena satauro do ia huaia, lauegu murina dekenai do ia raka.” (Mataio 16:24) Buka ta (The New Interpreter’s Bible) ia gwau: “Unai hereva be murimuri taudia ia boiria hahediba taudia ai do idia lao totona lasi, to ia be hahediba taudia edia maduna ena anina ia hahedinaraia bona Keriso ena boiboi idia abia dae vadaeni taudia dekenai ia gwauraia.” Iesu ese unai siri lalonai ia gwauraia dala toi be abidadama taudia ese do idia badinaia. Mani unai dala ta ta ita herevalaia.

8. Oi sibona emu ura oi laloa lasi karana ena anina oi gwauraia hedinarai.

⁸ Dala ginigunana be, ita sibona iseda ura ita laloa lasi be namo. Greek herevana, ‘sibona iseda ura ita laloa lasi’ anina be ta be mai ena ura ida sibona ena ura ia koua, eiava ia sibona dekenai namo ia mailaia gauna ia dadaraia. Namo lasi ita gwau, sibona iseda ura ita laloa lasi  karana ena anina be nega ta ta ai ita moalelaia karadia ita dadaraia, eiava ita sibona dekenai hisihisi ita havaraia. Ia be unai bamona lasi. ‘Iseda mauri be ita eda lasi,’ anina be mai eda ura ida iseda mauri bona gau ibounai ita henia Iehova dekenai. (1 Korinto 6:​19, 20) Ita ese sibona eda ura ita laloa lasi, to iseda mauri lalonai Dirava ena ura ita atoa guna. Ita sibona iseda ura ita laloa lasi anina be ena be iseda goevadae lasi tauanina ena ura be idau, to iseda lalona ita hadaia Dirava ena ura do ita karaia. Gwauhamata ita karaia bona bapatiso ita abia neganai, ita hahedinaraia ita be Dirava ita badinaia momokani. Vadaeni, iseda mauri lalonai ita goada karaia iseda gwauhamata ita hagugurua totona.

9. (a) Iesu be tanobada ai ia noho neganai, satauro be dahaka ia laulaulaia? (b) Edena dala ai ita ese iseda satauro ita huaia?

⁹ Dala iharuana be, iseda satauro do ita huaia be namo. Aposetolo edia negai, satauro be hisihisi, hemarai bona mase ia laulaulaia. Unai nega ai, taravatu idia utua taudia sibona be satauro dekenai idia hamasedia eiava satauro ai edia tauanina idia tauadae. Unai hereva amo, Iesu ese ia hahedinaraia Keristani tauna be tanobada ena lasi dainai, do ia hegaegae dagedage, hereva dika, eiava mase ia haheaukalaia totona. (Ioane 15:​18-20) Iseda Keristani dala be idau dainai, tanobada taudia ese ita do idia “hereva dika henia.” (1 Petero 4:4) Sikuli, gaukara gabuna, eiava ruma bese lalonai unai ia vara diba. (Luka 9:23) To, tanobada ese ita ia ura henia lasi karana ita haheaukalaia diba, badina ita sibona iseda ura ita laloa bada lasi. Iesu ia gwau: “Bema egu murinai umui raka dainai idia hadikaia umui, bona idia hisihisi henia umui, bona hereva dika mai koikoi danu idia gwauraia loaloa umui totona lau dainai, umui danu namo. Umui moale bada momokani, badina emui davana guba dekenai ia bada.” (Mataio 5:​11, 12) Momokani, Dirava ena lalonamo ita abia be mai anina bada gauna.

10. Iesu ena murina dekenai do ita raka noho ena anina be dahaka?

¹⁰ Dala ihatoina be, Iesu Keriso ia gwau iena murina dekenai do ita raka be namo. W. E. Vine ese ia torea diksenari ta (An Expository Dictionary of New Testament Words) lalonai ia gwau, ta ena murina dekenai raka anina be tau ta ia bamoa tauna​—“oi ida dala tamona dekenai ia raka lao tauna.” Ioane Ginigunana 2:6 ia gwau: “Bema tau ta ia hereva, ia gwau, ‘Lau be Dirava ena lalona dekenai lau noho,’ vadaeni unai tau ese Keriso ena mauri dalana hegeregerena do ia noho [“raka,” NW ] be namo.” Iesu be edena bamona ia raka? Iesu ese iena guba Tamana bona iena hahediba taudia ia lalokau henidia dainai, iena mauri lalonai sibona ena ura ia laloa bada lasi. Paulo ia gwau: “Keriso ese sibona ena namo ia tahua lasi.” (Roma 15:3) Ena be Iesu ia hesiku eiava ia hitolo, to ma haida edia namo ia laloa guna bona iena namo ia laloa lasi. (Mareko 6:​31-34) Danu, Iesu be Basileia harorolaia bona hadibaia gaukarana ia karaia goadagoada. Unai dainai, ‘bese ibounai be diba tahua taudia do ita halaoa bona ita hadibaia Iesu ese ia henia hereva ibounai be do idia badinaia’ gaukarana lalonai, Iesu ita tohotohoa be namo. (Mataio 28:​19, 20) Iesu ena kara ibounai lalonai, haheitalai namona ia hahedinaraia bona ita ese ‘iena aena gabudia dekenai do ita raka’ be namo.​—1 Petero 2:21.

11. Dahaka dainai ita sibona iseda ura ita laloa bada lasi, iseda satauro ita huaia, bona Iesu Keriso murinai ita raka noho be gau badana?

¹¹ Ita sibona iseda ura ita laloa lasi, iseda satauro ita huaia, bona iseda Haheitalai Tauna murinai ita raka noho be gau badana. Unai bamona ita karaia neganai, sibona iseda ura dadaraia lalokauna ita habadaia bona sibona iseda ura laloa karana ia koua. Danu, Iesu ia gwau: “Sibona ena mauri do ia dogoatao noho tauna be iena mauri do ia halusia, to sibona ena mauri do ia halusia lau totona tauna, be iena mauri do ia davaria. Bema tau ta ese tanobada ibounai ia abia, to iena mauri ia halusia, be edena bamona namo do ia abia? Tau ta be dahaka davana do ia henia iena mauri do ia davaria lou totona?”​—Mataio 16:​25, 26.

Biaguna Rua Ita Hesiai Henia Diba Lasi

12, 13. (a) Sisiba totona Iesu ia noia lohia tauna be dahaka ia lalohekwarahilaia? (b) Iesu ese unai tau matamata dekenai dahaka sisiba ia henia, bona dahaka dainai?

¹² Iesu ese iena hahediba taudia ia hadibaia sibodia  edia ura idia dadaraia totona murinai, lohia tau matamata mai ena kohu momo ese Iesu ia nanadaia: “Hadibaia tauna e, dahaka kara namona do lau karaia, mauri hanaihanai abia totona?” Iesu ese ia haere henia ‘taravatu do ia badinaia’ noho, bena unai taravatu haida ia gwauraia. Unai tau matamata ia gwau: “Unai ibounai be lau badinaia namonamo vadaeni.” Iena hereva be momokani bona ia hekwarahi bada unai Taravatu ia badinaia totona. Unai dainai ia henanadai: “Ma dahaka dohore lau karaia?” Iesu ia haere neganai, unai tau matamata ia boiria mai anina bada kara ta ia karaia totona: “Bema oi ura oi namo herea momokani, oiemu kohu oi lao hoia, ogogami taudia dekenai oi henia, guba ena kohu oi abia. Vadaeni lauegu murina dekenai oi raka mai.”​—Mataio 19:​16-21.

¹³ Iesu ia laloparara bema unai tau matamata ia ura mai ena lalona ibounai ida Iehova ia hesiai henia, ena lalona ia veria gauna badana​—kohu momo​—ia dadaraia be namo. Keriso ena hahediba tauna momokanina be biaguna rua ia hesiai henia diba lasi. Ia be “Dirava bona kohu momo danu nega tamona edia hesiai gaukara do [ia] karaia diba lasi.” (Mataio 6:24) Namona be iena “matana ia namo,” lauma gaudia sibona ia itaia. (Mataio 6:22) Ogogami taudia dekenai iena kohu ia henia be sibona ena ura dadaraia karana. Bema unai tau matamata ese ena kohu ia dadaraia, Iesu be ia dekenai guba ai mai dava bada kohu do ia haboua dalana ia kehoa​—anina be mauri hanaihanai do ia abia bona guba ai Keriso ida do ia lohia. Unai tau matamata be ia hegeregere lasi sibona ena ura ia dadaraia totona. “Mai lalohisihisi danu ia raka siri, badina ia be kohu momo tauna.” (Mataio 19:22) To, Iesu ena murinai idia raka taudia ma haida edia kara be idau.

14. Iesu ese haoda taudia hani ia boiridia neganai, dahaka idia karaia?

¹⁴ Lagani rua idia ore vadaeni, Iesu ese haoda taudia hani, Petero, Andrea, Iamesi bona Ioane be unai bamona ia boiridia danu. Unai neganai, rua be idia haoda noho bona rua be edia reke idia turia noho. Iesu be idia dekenai ia gwau: “Lauegu murinai umui raka, lau be taunimanima haoda henia totona taudia do lau halaoa umui.” Oibe, idia hani be edia haoda bisinesi idia rakatania bona edia mauri ibounai lalonai Iesu murinai idia raka.​—Mataio 4:​18-22.

15. Inai negai ia noho Iehova ena Witnes hahinena ta be Iesu murinai ia raka totona, dahaka gaudia ia dadaraia?

¹⁵ Keristani taudia momo hari inai negai ese haoda taudia hani edia kara idia tohotohoa, to tau matamata idia tohotohoa lasi. Iehova idia hesiai henia totona, inai tanobada ena kohu bona ladana badana idia dadaraia. Deborah ia gwau: “Lauegu mauri lagani be 22 neganai, mai anina bada abia hidi ta lau karaia. Hua 6 lalonai Baibel lau stadilaia bona lau ura egu mauri be Iehova dekenai lau gwauhamatalaia, to egu famili taudia idia ura lasi. Idia be moni momo taudia, bona idia laloa bema lau be Witnes ta ai lau lao edia ladana do lau hadikaia. Idia gwau hora 24 lalonai egu lalona do lau hadaia, kohu momo mauri eiava hereva momokani do lau abia hidi. Bema Witnes taudia lau dadaraia lasi, egu famili ese lau do idia dadaraia. Iehova ese  lau ia durua abia hidi maorona lau karaia bona lau ia hagoadaia lau badinaia totona. Lagani 42 lalonai ful-taim hesiai gaukara lau karaia vadaeni, bona lau lalohisihisi lasi. Sibona ena ura laloa bada bona moale karadia tahua guna maurina lau dadaraia dainai, egu famili taudia ese idia noholaia anina lasi maurina amo lau heau mauri. Egu adavana ida ai be taunimanima handred mai kahana ai durua hereva momokani idia diba totona. Unai lauma natudia be dava bada kohudia lau dekenai, idia ese tanobada ena kohu idia hereaia.” Iehova ena Witnes taudia milioni momo edia lalohadai be unai bamona. Oiemu lalohadai be edena bamona?

16. Edena dala ai ita hahedinaraia ita be sibona iseda ura ita laloa lasi?

¹⁶ Sibona edia ura laloa bada lasi karana ese Iehova ena Witnes taudia tausen momo edia lalona ia veria painia gaukara, eiava ful-taim Basileia harorolaia gaukara idia karaia totona. Unai bamona idia karaia diba lasi taudia ma haida be painia urana idia hahedinaraia, bona mai edia goada ibounai ida Basileia harorolaia gaukarana idia durua. Tama sina danu be unai bamona idia karaia, lauma dalanai edia natudia idia hadibaia totona idia ese edia nega bada idia henia bona sibodia edia ura idia laloa lasi. Dala idauidau ai, ita ibounai ita hahedinaraia diba iseda mauri lalonai Basileia gaudia ita tahua guna.​—Mataio 6:33.

Daika Ena Lalokau ese Ita Ia Biagua?

17. Dahaka ese ita ia biagua sibona iseda ura ita dadaraia totona?

¹⁷ Sibona eda ura dadaraia lalokauna ita hahedinaraia be auka. To, iseda lalona ia biagua gauna mani ita laloa. Paulo ia gwau: “Keriso ena lalokau ese ai ia biagua noho, badina be hari ai diba momokani Tau tamona ese taunimanima ibounai dainai ia mase. . . . Oibe, Keriso ese taunimanima ibounai dainai ia mase. Unai dainai ia dekena amo mauri ita davaria taudia, be ita sibona iseda mauri bona iseda ura do ita laloa lasi, to ita dainai ia mase, ma ia toreisi lou tauna, ena mauri bona iena ura gaudia do ita laloa bona karaia.” (2 Korinto 5:​14, 15) Keriso ena lalokau ese ita ia biagua dainai ita sibona iseda ura ita laloa bada lasi. Unai be ita ia hagoadaia gauna badana! Keriso be ita totona ia mase dainai, iena ura ita karaia be gau badana. Oibe, Dirava bona Iesu ese idia hahedinaraia lalokau bada karana ita moalelaia bona unai ese ita ia biagua dainai, iseda mauri be Dirava dekenai ita gwauhamatalaia bona Keriso ena hahediba taudia ai ita lao.​—Ioane 3:16; 1 Ioane 4:​10, 11.

18. Dahaka dainai sibona iseda ura ita dadaraia dalana be mai ena namo?

¹⁸ Sibona iseda ura ita dadaraia maurina be mai ena namo, a? Unai tau matamata be Iesu ena boiboi ia dadaraia bona ia raka murinai, Petero ese Iesu dekenai ia gwau: “Ai be gau ibounai ai rakatania, vadaeni oiemu murina dekenai ai raka. Unai dainai ai be dahaka do ai abia?” (Mataio 19:27) Oibe, Petero bona hahediba taudia ma haida be sibodia edia ura idia dadaraia vaitani. Vadaeni, dahaka hahenamo do idia abia? Iesu ese guba dekenai ia ida do idia lohia ena hahenamo ia gwauraia guna. (Mataio 19:28) Bena, Iesu ese iena murinai idia raka taudia ibounai ese do idia moalelaia hahenamona ia gwauraia. Ia gwau: “Bema tau ta ese iena ruma ia rakatania, o iena tadikakana, o taihuna, o sinana, o tamana, o natuna, o tano, bema lau dainai bona Sivarai Namona dainai inai gaudia ia rakatania, hari inai mauri neganai, iena gau do ia habadaia nega 100 bamona, . . . [bona] vaira neganai, mauri hanaihanai do ia abia.” (Mareko 10:​29, 30) Ita abia hahenamo ese ita rakatania gaudia idia hereaia. Lauma dalanai ita davaria tama, sina, tadikaka, taihu bona natudia edia namo  ese Basileia ita tahua guna dainai ita rakatania gaudia idia hereaia momokani. Petero ena mauri ese tau matamata mai ena kohu momo ena mauri ia hereaia.

19. (a) Moale korikorina be edena bamona ita davaria diba? (b) Hereva gabena lalonai dahaka do ita herevalaia?

¹⁹ Iesu ena hereva bona ena kara amo ia hahedinaraia, henia karana bona hesiai gaukara amo moale ita davaria. Sibona eda ura laloa bada karana ese moale ia havaraia lasi. (Mataio 20:28; Kara 20:35) Sibona iseda ura ita laloa lasi bona Iesu ena murinai ita raka noho neganai, hari iseda mauri lalonai moale bada ita davaria bona vaira negana ai mauri hanaihanai do ita abia. Oibe, ita sibona iseda ura ita dadaraia neganai, Iehova be iseda Biaguna ai ia lao. Unai dainai ita be Dirava ena hesiai taudia. Dahaka dainai unai hesiai maurina be mai ena hahenamo? Dahaka dainai unai ese iseda mauri lalonai ita karaia abia hidi karana ia biagua? Hereva gabena ese unai henanadai do ia haerelaia.

Oi Laloatao, A?

• Dahaka dainai sibona iseda ura ita karaia urana ita koua be namo?

• Ita sibona iseda ura ita laloa lasi, iseda satauro ita huaia, bona Iesu murinai ita raka hanaihanai ena anina be dahaka?

• Dahaka ese ita ia veria ita sibona iseda ura ita laloa bada lasi totona?

• Dahaka dainai sibona iseda ura ita dadaraia maurina be mai ena namo?

[Study Questions]

[Picture on page 9]

“Lohiabada e, unai bamona lasi”

[Picture on page 11]

Dahaka ese lohia tau matamata ia koua bona Iesu murinai ia raka lasi?

[Pictures on page 13]

Lalokau dainai Iehova ena Witnes taudia be Basileia harorolaia goadagoada taudia ai idia lao