Tama Sina E, Emui Harihari Gaudia Namodia Umui Gimaia

“Aonega ese oi ia gimaia noho diba . . . Aonega ese aonega tauna ia hamauria noho.”​—HADIBAIA TAUNA 7:12.

1. Dahaka dainai tama sina ese edia natudia be harihari gaudia bamona idia laloa be namo?

TAMA SINA be edia toana bona kara hegeregerena ia hahedinaraia beibi matamatana ta idia havaraia. Baibel ese unai natudia ia gwauraia “Dirava ena harihari gaudia.” (Salamo 127:3) Iehova be Mauri Henia Tauna korikorina dainai, Ia ese tama sina dekenai Iena kohu ta ia henia, idia naria totona. (Salamo 36:9) Tama sina e, Dirava amo umui abia harihari gauna namona be edena bamona umui laloa?

2. Manoa ia kamonai ia be tamana ta ai do ia lao neganai, dahaka ia karaia?

² Momokani, unai bamona harihari gauna be mai hemataurai bona manau ida idia abia dae be namo. Lagani 3,000 gunanai, Israela tauna Manoa be unai bamona ia karaia. Manoa ia kamonai aneru ta ese ena adavana ia hamaoroa natuna ta do ia havaraia neganai, Manoa be inai bamona ia guriguri: “Lohiabada e, oi dekenai lau noinoi, mani emu kara, hari oi siaia tauna, ma do oi siaia mai lou, ia ese ai ma do ia hadibaia. Badina ai ura diba, inai mero ia vara neganai, ia dekenai dahaka do ai karaia.” (Gunalaia Taudia 13:8) Tama sina e, Manoa ena haheitalai amo dahaka umui dibaia diba?

Hari Dirava Ena Heduru Ita Abia be Gau Badana

3. Dahaka dainai hari inai negai natudia naria totona, Dirava ena heduru ita abia be gau badana?

³ Hari inai negai, tama sina be natudia naria gaukarana dekenai, Iehova ena heduru idia abia be gau badana. Dahaka dainai? Badina, Satani Diabolo bona ena demoni be guba amo idia negedia diho tanobada dekenai. Baibel ia gwau: “Tanobada bona davara, madi o, nega dika bada do umui davaria! Badina be Satani ese umui dekenai ia lao vadaeni, mai ena badu dikadika. Ia badu, badina ia diba iena nega be ia kwadogi sibona.” (Apokalupo 12:​7-9, 12) Baibel ia hahedinaraia Satani be “laiona mai ena boiboi bada bamona. Ia ese hunia dekenai ia raka loaloa noho, do ia ania ore taudia ia tahua noho.” (1 Petero 5:8) Vaia, nega momo laiona be idia goada lasi animal maragidia idia alaia. Unai dainai, aonega dalana be Keristani tama sina ese edia natudia idia gimaia totona, Iehova amo heduru idia tahua be namo.  Oi hekwarahi oiemu natudia oi gimaia totona, a?

4. (a) Bema tama sina idia diba laiona ia loaloa neganai, dahaka do idia karaia? (b) Natudia ese dika idia dadaraia totona dahaka be mai anina bada?

⁴ Bema oi diba oiemu noho gabuna ai laiona ta ia loaloa, do oi laloa bada gauna be inai: oiemu natudia do oi gimaia. Satani be dagedage animal ta bamona. Iena ura be Dirava ena taunimanima do ia hakereredia, bena Dirava ese idia do ia lalonamo henia lasi. (Iobu 2:​1-7; 1 Ioane 5:19) Satani be natudia ia tarapua haraga diba. Natudia be Diabolo ena tarapu amo idia heau siri totona, Iehova ena taravatu do idia diba bona idia badinaia be namo. Baibel amo diba idia abia be mai anina bada. Iesu ia gwau: “Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.” (Ioane 17:3) Bona danu, matamata taudia ese aonega​—idia dibaia gaudia idia lalopararalaia bona idia badinaia karana​—idia abia be namo. Tama sina e, “aonega ese aonega tauna ia hamauria” dainai, emui natudia edia kudouna lalonai hereva momokani umui atoa be namo. (Hadibaia Tauna 7:12) Edena bamona unai oi karaia diba?

5. (a) Natudia dekenai aonega be edena bamona ita henia diba? (b) Aonega Herevadia ese aonega be edena bamona ia herevalaia?

⁵ Emu natudia dekenai Dirava ena Hereva oi duahia diba​—bona namona be unai bamona oi karaia. To, oi durudia Iehova do idia lalokau henia bona kamonai henia sibona be hegeregere lasi​—dahaka dainai unai idia karaia idia lalopararalaia be gau badana. Haheitalai be inai: Natu ta idia hamaoroa dala kahana kahana do ia itaia guna, bena dala ia hanaia. To, natudia haida ese unai hereva idia badinaia lasi. Dahaka dainai? Reana, tama sina be natuna dekenai motuka ese do ia bampaia diba herevana be nega momo idia gwauraia hedinarai namonamo lasi. To, bema idia gwauraia hedinarai namonamo, natuna do ia laloparara aksiden ia davaria diba, bena ia aonega bona unai dika ia abia lasi. Natudia dekenai aonega idia henia totona, tama sina ese nega bada idia henia bona idia hesiku lasi. To aonega be dava bada gauna momokani! Baibel ia gwau: “Aonega ese oiemu mauri do ia hanamoa, bona aonega dainai, oiemu mauri be mai maino danu do oi noho. Aonega idia davaria taudia be idia moale, bona aonega ese mauri namona, idia dekenai do ia henia.”​—Aonega Herevadia 3:​13-18; 22:15.

Aonega Ia Havaraia Hahediba Dalana

6. (a) Dahaka dainai nega momo natudia idia kerere? (b) Edena bamona tuari ia vara noho?

⁶ Ena be tama sina ese matamata taudia dekenai gau maorodia idia hadibaia, to nega momo natudia be kerere idia karaia, badina unai hahediba dalana be natudia edia kudouna dekenai ia vareai lasi. Diabolo be matamata taudia edia kudouna ia biagua totona, ia tuari noho. Ia ura natudia ese ena tanobada ena kara dikadia idia diba. Bona natudia be goevadae lasi taudia dainai, Satani ese edia ura kereredia danu ia veria, kara dika idia karaia totona. (Genese 8:21; Salamo 51:5) Namona be tama sina idia laloparara, Satani be edia natudia edia kudouna ia biagua totona, ia tuari noho.

7. Dahaka dainai natuna dekenai dahaka be maoro eiava dahaka be kerere ita hamaoroa sibona be hegeregere lasi?

⁷ Nega momo tama sina ese natudia idia hamaoroa dahaka be maoro bona dahaka be kerere, bona idia laloa idia ese natudia dekenai hakaua herevana maorona ta idia hadibaia unai. Reana, tama sina ese natuna idia hamaoroa hereva koikoi, henaohenao, eiava idia adavaia lasi tauna ida idia mahuta hebou karana be kerere. To, tama sina idia hereva sibona be hegeregere lasi. Natuna ese unai hereva ia badinaia totona, lalona ia veria momokani gauna idia hadibaia be namo. Unai be Iehova ena taravatu. Namona be natuna idia hadibaia Dirava ena oda herevadia idia badinaia be aonega dalana.​—Aonega Herevadia 6:​16-19; Heberu 13:4.

8. Edena bamona hahediba dalana ese natudia ia durua aonega dalanai idia kara totona?

⁸ Tanobada bona guba edia heau daladia idauidau, mauri gaudia idauidau, medu, siahu, keru, eiava tubutubu gaudia idia vara lou negadia​—inai gaudia ibounai ese matamata tauna ia durua bena do ia abia dae diba, aonega ibounai Havaraia Tauna ia noho. (Roma 1:20; Heberu 3:4) Bona danu, namona be natuna do ita hadibaia Dirava ese ia lalokau henia dainai, Dirava ese dala ia karaia Iesu be boubou gauna bamona ia henia, bona unai dala amo natuna be mauri hanaihanai ia abia diba, bona ia ese Dirava ia gwauraia gaudia ia badinaia neganai, Dirava ia hamoalea diba. Unai hereva  dainai, herevana Diabolo ese do ia koua toho, to natuna do ia ura Iehova ia hesiai henia.​—Aonega Herevadia 22:6; 27:11; Ioane 3:16.

9. (a) Natudia hamauria totona, hadibaia dalana namona be dahaka? (b) Baibel ese tama ia hagania dahaka do idia karaia, bona unai ena anina be dahaka?

⁹ Natuna do ia gimaia bona ia veria kara maoromaoro ia karaia hahediba dalana namona ita badinaia totona, ita hegaegae, nega ita atoa, bona natuna ita durua be namo. Unai idia karaia totona, tama sina ese Dirava ena hakaua dalana idia abia dae be namo. Baibel ia gwau: “Umui, tama e, emui natudia [be] . . . Iehova ena matahakani bona lalona biagua karana ai do umui naridia.” (Efeso 6:​4, NW ) Unai hereva ena anina be dahaka? Greek gado korikorina ai, inai hereva “lalona biagua karana” ena anina be “lalona atoa.” Baibel be tama ia hagania Iehova ena lalohadai be edia natudia edia lalona dekenai do idia atoa. Momokani, unai ese matamata taudia do ia gimaia namonamo! Bema natudia be Dirava ena lalohadai idia abia bona hanaihanai Iena laloa dalana be edia lalona dekenai ia noho, kara dika do idia dadaraia.

Lalokau ese Ia Havaraia Urana

10. Oiemu natuna oi hadibaia namonamo totona, dahaka mai anina bada gauna oi diba be namo?

¹⁰ Namona be lalokau ese oi ia veria emu natuna be dala maorona ai oi naria totona. Herevahereva namonamo dalana be mai anina bada. Namona be oi tahua emu natuna ena lalohadai be dahaka bona ena mauri lalonai dahaka gaudia idia vara noho. Nega namona ai, aonega dalanai emu natuna oi hagoadaia ena lalohadai ia gwauraia totona. Reana do ia gwauraia gaudia haida dekenai do oi hoa. Naria namonamo, oi badu haraga lasi. To, namona be mai emu hebogahisi ida oi kamonai.

11. Tama sina ese edena dala amo Dirava ena lalohadai be natuna ena lalona dekenai idia atoa diba?

¹¹ Momokani, reana Baibel amo Dirava ena taravatu matabodaga karadia dekenai be emu natuna dekenai oi duahia vadaeni, bona nega momo unai bamona oi karaia danu. (1 Korinto 6:18; Efeso 5:5) Unai ese emu natudia ia hadibaia Iehova be dahaka ia moalelaia bona dahaka ia moalelaia lasi. To, Iehova ena lalohadai be natuna ta ena lalona dekenai oi atoa totona, gau ma haida oi karaia be namo. Tama sina ese natudia dekenai do idia hahedinaraia goevagoeva, Iehova ena taravatu be mai anina bada. Namona be idia abia dae momokani, Dirava ena taravatu be maoro bona namo, bona idia badinaia be dala maorona bona lalokau karana. Bema, emu natudia ese Dirava ena lalohadai idia abia dae badina Baibel amo oi hahedinaraia goevagoeva dainai, vadaeni ita gwau diba, oi ese Iehova ena lalohadai be natuna edia lalona dekenai oi atoa.

12. Tama sina ese edena dala ai natudia idia hadibaia mahuta hebou karana dekenai lalohadai maorona idia abia totona?

¹² Mahuta hebou karana umui herevalaia neganai, oi henanadai diba, “Oi laloa Iehova ena taravatu, headava lasi taudia do idia mahuta hebou lasi taravatuna, be ta ena moale dalana ia hadikaia, a?” Emu natuna oi noia ena haere ena anina ia gwauraia hedinarai totona. Iehova ese hoa dalanai natuna ia havaraia karana umui herevalaia murinai, oi nanadaia: “Oi laloa iseda lalokau Diravana ese taravatu do ia atoa, iseda mauri ita  moalelaia lasi totona, a? Eiava oi laloa Dirava ese ena taravatu ia atoa badina ia ura ita moale bona ita ia naria totona, a?” (Salamo 119:​1, 2; Isaia 48:17) Emu natuna ena lalohadai unai gaudia dekenai oi tahua. Bena matabodaga karadia dainai lalohisihisi bona hekwakwanai idia vara edia haheitalai haida oi gwauraia. (2 Samuela 13:​1-33) Oiemu natuna ese Dirava ena lalohadai ia lalopararalaia bona ia abia dae totona, unai bamona umui herevahereva neganai, oi ese Dirava ena lalohadai be natuna ena lalona dekenai do oi atoa. To, ma gau ta oi karaia danu be namo.

13. Natuna ese dahaka gau ia lalopararalaia neganai, unai ese do ia doria Iehova do ia kamonai henia totona?

¹³ Aonega dalana be, emu natuna be Iehova ena taravatu utua karana ena dika sibona oi hadibaia lasi, to danu oi hahedinaraia edena bamona iseda mauri dalana ese Iehova ena lalona ia hamoalea eiava hahisia diba. Baibel amo emu natuna dekenai oi hahedinaraia, Iehova be ia lalohisihisi bema ena ura ita karaia lasi. (Salamo 78:41) Reana oi nanadaia, “Dahaka dainai oi ura lasi Iehova ena lalona oi hahisia?” bena oi gwau: “Dirava ena inai tauna Satani ia gwau ita be Iehova ita lalokau henia lasi, to siboda eda ura gaudia ita abia totona Iehova ita tomadiho henia.” Bena, oi hadibaia edena bamona Iobu be kara maoromaoro ia badinaia dainai Dirava ia hamoalea, bona unai amo Satani ena hereva ia hakoikoia diba. (Iobu 1:​9-11; 27:5) Namona be oiemu natuna ia laloparara, iena kara amo ia ese Iehova ia hamoalea eiava ia hahisia diba. (Aonega Herevadia 27:11) Hadibaia Tauna Badana amo Diba Ita Abia bukana amo, iseda natudia dekenai ataiai herevadia bona mai anina bada gaudia ma haida ita hadibaia diba. *

Anina Namona Idia Vara

14, 15. (a) Hadibaia Tauna bukana lalonai, edena kahana ese natudia edia lalona ia veria? (b) Oi ese unai buka oi gaukaralaia amo dahaka namo haida oi davaria? (Rau 30-31 dekenai ia noho maua itaia danu.)

¹⁴ Croatia dekenai, tau buruka ta be iena tubuna merona, ena mauri lagani be 7 ida Hadibaia Tauna bukana ia duahia hebou. Unai tau buruka be revareva ia torea bona ia gwau ena tubuna be inai hereva ia gwauraia: “Sinagu ese lau ia hamaoroa gau ta lau karaia totona, to lau ura lasi. Bena ‘Kamonai Karana ese Oi Do Ia Gimaia’ ena karoa lau laloatao, unai dainai, lau giroa lao bona sinagu lau hamaoroa ia do lau kamonai henia.” Florida, U.S.A. ai, idia noho headava tau bona hahine be “Ita Koikoi Lasi Ena Badina” ena karoa idia herevalaia: “Unai karoa ena henanadai ese natudia edia lalona ia kehoa bona idia hunia kerere gunadia idia gwauraia hedinarai.”

¹⁵Hadibaia Tauna bukana be mai ena laulau 230 mai kahana, bona unai laulau ta ta eiava ibounai edia badinai be hereva maragina ta ia noho. Mai moale ida sina ta ia gwau: “Nega momo egu natuna mero be laulau ta do ia raraia nega daudau lalonai, bona ia ura lasi rau ma ta ai kehoa. Unai laulau namodia be maragidia edia matana ia veria  sibona lasi, to idia ese mai anina bada gaudia idia hadibaia, eiava natudia idia veria idia henanadai totona. Laulau ta lalonai, natu ta be daiutu diburana ta lalonai televisen ia raraia noho bona egu natuna mero be unai ia itaia neganai, ia henanadai, ‘Sinagu e, unai mero be dahaka ia karaia noho?’ bona iena gadona regena amo ia hahedinaraia, gau ta be ia kerere.” Unai laulau ena badinai ia noho henanadai ia gwau: “Daika ese ita karaia gaudia ibounai ia itaia diba?”

Hari Inai Negai Hadibaia Hereva Badana

16. Hari inai negai natudia be dahaka idia diba be gau badana, bona dahaka dainai?

¹⁶ Natudia be edia tauanina ena hehuni kahadia gaukaralaia dalana maorona bona kererena idia diba be namo. To, nega haida unai gaudia herevalaia totona be ia auka. Niuspepa torea hahinena ta ia gwau, ia matamata neganai, momo idia laloa tau bona hahine edia tauanina ena hehuni kahana ena ladana idia gwauraia be hereva dikana. Iena natudia hadibaia totona, ia gwau: “Unai gaudia herevalaia karana dekenai lau hemarai lasi be namo.” Momokani, bema tama sina be idia hemarai dainai mahuta hebou karana ena anina be edia natudia ida idia herevalaia lasi, unai ese natudia do ia gimaia lasi. Natudia be unai idia diba lasi neganai, taunimanima dikadia ese do idia koidia bona idia hadikaia. Hadibaia Tauna Badana amo Diba Ita Abia bukana be dala maorona ai mahuta hebou karana ena anina ia herevalaia. Natudia dekenai mahuta hebou karana ena anina ita hadibaia ese natudia edia goeva karana ia hadikaia lasi, to bema ita hadibaia lasi, reana idia diba lasi dainai hekwakwanai idia davaria diba.

17. Hadibaia Tauna Badana bukana ese edena dala ai tama sina ia durua natudia dekenai mahuta hebou karana ena anina idia hadibaia totona?

¹⁷ Karoa 10 ese aneru dikadia be tanobada ai idia mai bona natudia idia havaraia ia herevalaia neganai, natuna dekenai inai henanadai ia henia, “Mahuta hebou karana dekenai dahaka oi diba?” Buka be dala maorona amo haere ia henia. Gabeai, karoa 32 ese taunimanima dikadia amo natuna gimaia diba dalana ia herevalaia. Revareva momo idia gwau, unai bamona hadibaia karana be mai anina bada. Sina ta ia gwau: “Vanegai pura, egu natuna mero, Javan, be ena doketa dekenai ai abia lao neganai, doketa ia henanadai bema Javan dekenai ena tauanina ena hehuni kahana gaukaralaia dalana maorona ai hadibaia vadaeni. Doketa ia hoa badina unai buka matamatana amo emai natuna ai hadibaia vadaeni.”

18. Hadibaia Tauna Badana bukana ese bese abia isi gaudia tomadiho henia karana be edena bamona ia gwauraia?

 ¹⁸ Karoa ma ta lalonai, Baibel ese ia sivarailaia Heberu memero toi, Sataraka, Misaka, bona Abetenigo be Babulonia gavamani ena kaivakuku idia tomadiho henia lasi karana ia herevalaia. (Daniela 3:​1-30) Hadibaia Tauna bukana ese ia hahedinaraia bamona, haida idia laloa kaivakuku tomadiho henia karana be pepe saluti henia karana hegeregerena lasi. To, U.S. Catholic magasin ese toretore tauna, Edward Gaffney, idia inteviu henia neganai, ia gwauraia herevana mani oi itaia. Ia gwau, iena natuna kekeni be ena dina ginigunana sikuli amo ia giroa lou neganai ia gwau “sikuli dekenai guriguri matamatana ta” ia dibaia. Gaffney ese ia noia unai guriguri do ia gwauraia lou totona. Gaffney ia gwau: “Ena imana be kemena dekenai ia atoa, bena mai hekokoroku ida ia gwau, ‘Lau ese gwauhamata lau karaia pepe do lau badinaia . . . ’ ” Bena Gaffney ia gwau: “Karaharaga, gau ta lau lalopararalaia. Iehova ena Witnes taudia edia hereva be maoro. Eda sikuli dekenai natudia be maragi momokani lalonai bese abia isi karana idia hadibaia noho​—unai be badinaia karadia ibounai ia hereaia momokani.”

Emu Hekwarahi be mai Ena Hahenamo

19. Natudia hadibaia gaukarana ena namo be dahaka?

¹⁹ Oibe, emu natudia hadibaia totona oi hekwarahi be mai ena hahenamo. Kansas, U.S.A. dekenai, sinana ta be natuna merona amo revareva ta ia abia neganai, ia tai. Natuna merona ia gwau:  “Lau moale bada badina lau umui habadaia dalana dainai, lau be lalogoada bona laloa namonamo tauna ai lau lao. Oi bona tamagu be gaukara namo herea umui karaia.” (Aonega Herevadia 31:28) Hadibaia Tauna Badana amo Diba Ita Abia bukana ese tama sina momo do ia durua edia harihari gaudia namodia, natudia unai, idia hadibaia bona gimaia totona.

20. Tama sina ese nega ibounai dahaka idia laloatao be namo, bona unai dainai dahaka idia karaia be namo?

²⁰ Iseda natudia dekenai nega, heduru, bona goada ibounai ita henia be namo. Edia matamata negana be nega kwadogina sibona. Nega namodia idauidau oi gaukaralaia idia oi bamoa bona oi durua totona. Gabeai, do oi lalohisihisi lasi. Idia ese oi do idia lalokau henia. Oi laloatao, emu natudia be Dirava ese oi dekenai ia henia harihari gaudia. Idia be harihari gaudia namodia! (Salamo 127:​3-5) Unai dainai, namona be oi naridia namonamo, badina idia oi naria dalana dekenai Dirava ese oi do ia hahemaoro henia.

[Footnote]

Edena Bamona Do Oi Haere?

• Dahaka dainai hari inai negai tama sina ese edia natudia idia gimaia be mai anina bada?

• Edena bamona hahediba dalana ese aonega ia havaraia?

• Hari inai negai, dahaka hereva badadia be emui natudia ida umui herevalaia be namo?

• Edena dala ai Hadibaia Tauna bukana ese tama sina ia durudia edia natudia idia hadibaia totona?

[Study Questions]

[Box/Pictures on page 30, 31 ]

Taunimanima Ibounai Edia Buka

Hadibaia Tauna Badana amo Diba Ita Abia bukana idia hegaegaelaia, tama sina eiava taunimanima badadia ma haida do idia durua Iesu Keriso ena hadibaia herevadia be natudia ida idia duahia bona herevalaia totona. To, taunimanima badadia be unai buka idia duahia bona idia dibaia gaudia dainai, edia tanikiu herevadia idia gwauraia.

Texas, U.S.A. dekenai, tau ta ia gwau: “Hadibaia Tauna Badana amo Diba Ita Abia bukana be auka lasi dalanai idia torea bona mauri lagani idauidau taudia​—lau bamona, ena be egu mauri lagani be 76​—edia lalona ia veria. Lau maragi negana amo Iehova lau hesiai henia ema bona hari, bona lau gwau, tanikiu bada herea.”

London, England dekenai, buka ia duahia tauna ta ia gwau: “Idia torea laulau namodia ese tama sina bona natudia edia lalona do ia veria. Buka idia torea dalana bona ena henanadai be namo herea, bona mai anina bada gaudia idia gwauraia hedinarai dalana danu be namo herea, hegeregere, ‘Iesu Ia Gimaia Dalana,’ karoa 32 dekenai.” Ma ia gwau: “Ena be inai buka idia karaia Iehova ena Witnes taudia edia natudia totona, to lau diba tisa taudia bona ma haida do idia moale kopi ta idia abia totona. Lau moale badina, hari bona nega vaira lalonai do lau gaukaralaia noho.”

Massachusetts, U.S.A. dekenai, hahine ta ese “mai aonega ida idia torea laulau namodia” momo ia herevalaia. Ia gwau: “Lau diba ena be inai buka idia karaia natudia totona, to ia herevalaia gaudia ese ita taunimanima badadia ia durua diba, ita sibona iseda hetura karana Iehova ida ita laloa totona.”

Maine, U.S.A. dekenai, hahine ta ia gwau: “Namo herea! Unai be buka namona momokani! Ia be natudia maragidia sibona totona lasi, to ita, Dirava ena natudia ibounai totona. Ena hereva ese egu lalona ia gwadaia momokani, bona maino ia havaraia. Egu Tamana, Iehova, kahirakahira momokani dekenai lau lao bamona. Ia ese lagani momo lalonai lau dekenai idia vara lalohisihisi ibounai ia kokia, bona iena ura ia hahedinaraia goevagoeva.” Ia gwau: “Taunimanima ibounai lau hamaorodia, ‘Mani emui kara umui duahia.’ ”

Kyoto, Japan dekenai, hahine ta ia gwau ena tubudia dekenai unai buka ia duahia neganai, idia ese inai bamona henanadai idia henia: “ ‘Unai mero be dahaka ia karaia noho? Dahaka dainai unai kekeni maragi idia sisiba henia? Unai sina be dahaka ia karaia? Unai laiona be edena bamona?’ Unai buka ese ita laloa bada gaudia ia hadibaia, unai dainai inai buka lau ura henia bada.”

Calgary, Canada dekenai tama ta ia gwau, inai buka ia abia neganai, maoromaoro iena natuna kekeni ena mauri lagani be 6, bona natuna mero ena mauri lagani be 9 dekenai ia duahia matamaia. Ia gwau: “Haraga momokani inai buka idia ura henia. Idia kamonai namo herea bona edia kudouna amo idia haere. Idia mamia stadi lalonai idia be mai edia kahana ta, bona sibodia edia lalohadai idia gwauraia hedinarai. Unai ese edia lalona ia veria, bona egu natuna kekeni ia gwau ia ura hanuaboi ibounai unai buka matamatana do ai stadilaia.”

Stadi ta murinai, unai tama ia gwau: “Egu natuna mero bona lau be hora momo lalonai Iehova bona ena ura ai herevalaia. Buka lalonai ai duahia gaudia dainai ia be mai ena henanadai momo. Ia gwau: ‘Tamagu, ia namo bema unai bamona ita herevahereva lou? Lau be mai egu henanadai momo, bona lau ura Iehova ena kara ibounai lau diba.’ Lau dekenai ia gwau bamahuta, bona unai bamona ia henanadai neganai, egu matana ranu idia diho.”

[Picture on page 27]

Tama sina e, Manoa ena haheitalai amo dahaka umui dibaia?

[Picture on page 28]

Matamata taudia e, Heberu memero toi edia haheitalai amo dahaka umui dibaia?

[Pictures on page 29]

“Hadibaia Tauna” bukana edia laulau bona laulau badinai idia torea herevadia be hadibaia daladia namodia

Anania be Petero dekenai dahaka koikoi herevana ia gwauraia noho?

Daika ese ita karaia gaudia ibounai ia itaia diba?