Iehova Ena Hereva be Ia Mauri Noho

Samuela Ginigunana Bukana Ena Hereva Badadia

LAGANI be 1117 B.C.E. Iosua ese Gwauhamata Tanona ia abia bona unai nega amo lagani 300 mai kahana idia ore vadaeni. Israela ena tatau badadia be Iehova ena peroveta tauna dekenai idia mai, bona noinoi badana ta idia karaia. Peroveta tauna ese unai ia gurigurilaia, bona Iehova ese idia noia gauna ia henia. Unai nega amo Hahemaoro Taudia edia nega ia doko bona king taudia edia nega ia matamaia. Baibel bukana, Samuela Ginigunana, ese Israela besena ena histori ai idia vara gaudia badadia ia gwauraia hedinarai.

Samuela Ginigunana be Samuela, Natana bona Gadi ese idia torea, unai buka be lagani 102​—1180 ia lao 1078 B.C.E.​—lalonai idia vara gaudia ia sivarailaia. (1 Sivarai 29:29) Inai buka ese Israela ena hakaua taudia foa edia sivarai ia gwauraia. Rua be hahemaoro taudia bona ma rua be king; rua ese Iehova idia badinaia bona ma rua be lasi. Haheitalai namona idia hahedinaraia hahine rua bona ia gari lasi tuari tauna ta ena sivarai do ita diba. Unai bamona haheitalai ese ita ia hadibaia edena bamona laloa daladia bona karadia ita tohotohoa be namo, bona edena ita dadaraia. Samuela Ginigunana dekenai idia noho sivarai be mai ena siahu iseda lalohadai bona kara idia haidaua totona.​—Heberu 4:​12.

SAMUELA ESE ELI ENA GABU IA ABIA

(1 Samuela 1:1–​7:​17)

Nega ia ginidae Uma Ena Anina Oredia Haboua Ariana totona bona Rama dekenai ia noho hahinena, Hana, be ia moale bada. * Iehova ese ena guriguri ia haerelaia, bona natuna ta ia havaraia. Hana ese ena gwauhamata ia hamomokania totona, ena natuna Samuela be “Lohiabada ena Dubu” dekenai ia laohaia. Unuseniai ia be “Lohiabada ena hesiai gaukara ia karaia, hahelagaia tauna Eli ena vairana dekenai.” (1 Samuela 1:​24; 2:​11) Samuela be ia do maragi neganai, Iehova ese ia hereva henia, bona Eli ena ruma bese ia hahemaoro henia herevana be ia dekenai ia gwauraia. Samuela ia bada neganai, Israela taudia ibounai ese ia idia gwauraia Iehova ena peroveta tauna.

Gabeai, Pilistia taudia ese Israela taudia idia tuari henia. Maua idia abia bona Eli ena natudia rua idia alaia mase. Tau burukana Eli be unai sivarai ia kamonai neganai, ia mase, “Israela ia gunalaia vadaeni lagani 40 lalonai.” (1 Samuela 4:​18) Pilistia taudia ese Maua idia abia dainai dika bada herea idia davaria, unai dainai Israela taudia dekenai idia haloua. Samuela be Israela dekenai ena hahemaoro gaukarana ia hamatamaia bona taunimanima be maino dekenai idia noho.

Baibel Henanadaidia Edia Haere:

2:​10​—Dahaka dainai Hana ia guriguri Iehova ese “iena king dekenai siahu do ia henia,” to unai negai tanobada king ta be Israela ai ia do lohia lasi? Mose ena taravatu lalonai ia peroveta vadaeni, tanobada ai Israela taudia be king ta do idia abia. (Deuteronomi 17:​14-​18) Iakobo ia mase gwauraia neganai, ia peroveta: “Kepata, lohia ena toana, be Iuda ese do ia dogoatao, bona haida ese do idia kokia lasi.” (Genese 49:10) Danu, Iehova ese Sara​—Israela taudia edia tubuna hahine​—ia herevalaia neganai, ia gwau: “Iena tubuna haida be dohore king taudia.” (Genese 17:16) Vadaeni, Hana be vaira negana ena king totona ia guriguri.

3:3​—Samuela be momokani Helaga Herea Gabuna lalonai ia mahuta, a? Lasi. Samuela be hahelaga lasi Levi tauna, Kohata iduhu amo. (1 Sivarai 6:​33-​38) Unai dainai, ia “raka vareai kava, bona helaga gaudia do [ia] itaia” diba lasi. (Numera 4:​17-​20) Samuela be mai ena maoro palai dubu  ena ariara sibona ia gaukaralaia totona. Reana ia be unuseniai ia mahuta. Reana, Eli danu be ariara ena kahana ta dekenai ia mahuta. Inai hereva “Dirava ena Taravatu Maua ia noho gabuna” ese palai dubuna ena ariara ia herevalaia.

7:​7-9, 17​—Boubou gaudia be Iehova ese ia abia hidi gabuna sibona dekenai do idia henia, to dahaka dainai Samuela be Misipa dekenai gabua ore boubouna ia henia, bona Rama dekenai boubou patana ta ia haginia? (Deuteronomi 12:​4-7, 13, 14; Iosua 22:19) Silo dekenai ia noho palai dubuna amo Maua helagana idia kokia murinai, Iehova be unuseniai ia noho lasi. Samuela be Dirava ena gwaukau tauna dainai, Misipa dekenai gabua ore boubouna ia henia, bona Rama dekenai danu boubou patana ta ia haginia. Iehova ese reana unai kara ia abia dae.

Ita Dibaia Gaudia:

1:​11, 12, 21-​23; 2:​19. Hana ena guriguri karana, ena manau, ena tanikiu karana Iehova ena hebogahisi karana dekenai, bona ena lalokau be haheitalai namona Dirava idia gari henia hahinedia dekenai.

1:8. Elikana ese haheitalai namona ia hahedinaraia, ia ese ena hereva amo ma haida ia hagoadaia! (Iobu 16:5) Ia lalohisihisi hahinena, Hana ia nanadaia: “Dahaka dainai oiemu lalona ia hisihisi?” Unai ese ena lalona ia hagoadaia bena ena hemami ia gwauraia. Bena Elikana ese ena lalokau ia totona ia gwauraia, ia gwau: “Egu lalokau oi dekenai ese oiemu lalokau memero ibounai 10 dekenai ia hereaia lasi, a?”

2:​26; 3:​5-8, 15, 19. Bema Dirava ena amo ita abia gaukara ita karaia noho, lauma dalanai ita abia treinini ita laloa bada, bona bema kara namo bona hemataurai ita hahedinaraia, Dirava bona taunimanima ese ita do “idia ura henia.”

4:​3, 4, 10. Herevana Taravatu Mauana be helaga gauna, to unai ese idia ia gimaia lasi. Namona be ‘Dirava koikoidia dekenai ita naria namonamo.’​—1 Ioane 5:​21.

ISRAELA ENA KING GINIGUNANA​—IA KWALIMU EIAVA LASI?

(1 Samuela 8:1–​15:35)

Samuela be ena mauri ibounai lalonai Iehova ia abidadama henia, to ena natudia ese Dirava ena dala idia badinaia lasi. Israela ena tau badadia be king ta totona idia noinoi neganai, Iehova ese idia dekenai king ta ia henia. Samuela ese Iehova ena hakaua herevana ia badinaia bona Beniamina tauna hairaina, Saulo, ia horoa bona king ai ia halaoa. Saulo ese Amono taudia ia halusidia neganai, ena king dagina ia hagoadaia.

Saulo ena natuna goadana, Ionatana, ese Pilistia tuari taudia ia halusidia. Pilistia taudia be tuari orea badana ida idia mai Israela taudia idia tuari henia totona. Saulo ia gari bona mai kamonai lasi ida gabua boubouna ta ia henia. Ionatana be mai gari lasi ida ena kesi huaia tauna sibona danu, Pilistia taudia edia tuari oreana ma ta ia tuari henia. To, Saulo be taravatu ia karaia haraga dainai, Israela be tuari dekenai idia kwalimu momokani lasi. Saulo ia lao ia idia dagedage henia taudia ibounai ia “tuari henia.” (1 Samuela 14:47) To, Amaleka taudia ia halusia neganai, do ia “alaia mase” taudia be ia alaia lasi, unai amo ia hahedinaraia Iehova ia kamonai henia lasi. (Levitiko 27:​28, 29) Unai dainai, Iehova ese Saulo ena king dagina ia dadaraia.

Baibel Henanadaidia Edia Haere:

9:9​—Inai hereva “hari idia gwauraia ‘peroveta’ tauna, be gunaguna ‘mata hanai’ tauna idia gwauraia” ena anina be dahaka? Reana unai hereva ena anina be Samuela bona Israela ena king edia negai, peroveta taudia ese gaukara badana idia karaia, unai dainai inai hereva “mata hanai” tauna be “peroveta” tauna idia gwauraia. Samuela be peroveta tauna ginigunana.​—Kara 3:​24.

14:​24-​32, 44, 45​—Ionatana ese Saulo ena taravatu ia utua bona hani ia ania dainai, Dirava ena lalonamo ia haboioa, a? Ena be Ionatana ese unai kara ia karaia, to Dirava ese ia lalonamo henia. Gau ginigunana be, Ionatana be ena tamana ena taravatu ia diba lasi. Danu, mai ena koikoi ida eiava king siahuna dekenai lalohadai kererena ia abia dainai unai taravatu ia karaia, unai dainai taunimanima dekenai hekwakwanai ia havaraia. Dirava ese unai bamona taravatu be edena bamona ia abia dae diba? Ena be Ionatana ese unai taravatu ia makohia dainai ia abia dae kerere ena davana ia abia be maoro, to dika ta ia davaria lasi.

15:6​—Dahaka dainai Saulo ese Keni taudia ia hebogahisi henia? Keni taudia be Mose ena ravana  ena bese taudia. Israela taudia be Sinai Ororona idia rakatania murinai, Keni taudia ese idia durudia. (Numera 10:​29-​32) Kanana tanona dekenai, nega sisina lalonai Keni taudia be Iuda taudia danu idia noho. (Gunalaia Taudia 1:​16) Ena be gabeai idia be Amaleka taudia bona taunimanima ma haida ida idia noho hebou, to Keni taudia be Israela taudia edia turadia. Badina namona dainai, Saulo ese Keni taudia ia hadikaia lasi.

Ita Dibaia Gaudia:

9:​21; 10:​22, 27. Saulo be king ai ia lao neganai ia hahedinaraia manau karana ese ia gimaia dainai, “mai edia laloa namodia lasi taudia” ese ena king dagina idia abia dae lasi neganai, ia kara haraga lasi. Bema iseda lalohadai be unai bamona, unai ese ita do ia gimaia bena kava karana ta do ita karaia lasi!

12:​20, 21. Namo lasi dala ita kehoa “anina lasi gaudia,” hegeregere taunimanima eiava bese idauidau edia tuari oreana abidadama henia karana, eiava kaivakuku tomadiho henia karana ese iseda hesiai gaukara Iehova dekenai ia hadikaia.

12:24. Mai hemataurai ida Iehova ita gari henia bona mai iseda kudouna ibounai ida ia ita hesiai henia noho totona, gau badana be idaunegai bona hari ena taunimanima totona ia karaia “kara badadia” ita laloa.

13:​10-​14; 15:​22-​25, 30. Hekokoroku karana dainai ita naria namonamo​—herevana ia be gwau-edeede karadia amo eiava sibona laloa bada karana amo ita hahedinaraia.​—Aonega Herevadia 11:2.

MAMOE NARIA MERONA BE KING AI IDIA HALAOA

(1 Samuela 16:1–31:​13)

Samuela ese Iuda ena iduhu tauna, Davida, ia abia hidi king ai ia lao totona. Daudau lasi murinai, Davida ese nadi ta sibona amo Pilistia taudia edia tau badana ia hamasea. Davida be Ionatana ena turana ai ia lao. Saulo ese Davida be ena tuari taudia edia biaguna ai ia halaoa. Davida be tuari momo dekenai ia kwalimu dainai, Israela hahine idia ane: “Saulo ese iena 1000, 1000 ia alaia ore, to Davida ese iena 10,000, 10,000 ia alaia vadaeni.” (1 Samuela 18:7) Saulo ia mama dainai, dala ia tahua Davida ia alaia mase totona. Nega toi Saulo be unai bamona ia karaia murinai, Davida ia heau bona hehuni dekenai ia noho.

Davida be hehuni dekenai ia noho laganidia ai, nega rua Saulo ia hamasea lasi. Gabeai hairai hahinena, Abigaila, ia hedavari henia bona ia adavaia. Pilistia taudia ese Israela idia tuari henia neganai, Saulo ese Iehova ia guriguri henia. To Iehova ese ia rakatania vadaeni. Samuela be ia mase vadaeni. Saulo be babalau hahine ta ena heduru ia tahua, to unai hahine ese ia hamaoroa Pilistia taudia ia tuari henia neganai ia do idia hamasea. Unai tuari lalonai, Saulo ese bero badana ia abia bona ena natudia idia alaia mase. Unai sivarai ena dokonai, Saulo ia kwalimu lasi bena ia mase. Davida be hehuni dekenai ia do noho.

Baibel Henanadaidia Edia Haere:

16:14​—Dahaka “lauma dikana” ese Saulo ia hahisia? Saulo ena lalona ia hadikaia lauma dikana be ena lalona bona kudouna ai ia noho lalohadai dikana​—kara dika karaia urana unai. Iehova ese ena lauma helaga ia kokia neganai, Saulo ia gimaia lou lasi bona unai lauma dikana ese Saulo ia biagua. Dirava ese lauma helaga ia kokia bona Saulo ese unai lauma dikana ia abia neganai, unai lauma dikana idia gwauraia “Lohiabada ese ia siaia gauna.”

 17:​55-58​—Samuela Ginigunana 16:​17-​23 ena hereva hegeregerena, dahaka dainai Saulo be Davida ena tamana totona ia henanadai? Saulo be Davida ena tamana ena ladana sibona totona ia henanadai lasi. Toana be ia ura diba edena bamona tauna ese inai hoa karana ia karaia merona ia havaraia.

Ita Dibaia Gaudia:

16:​6, 7. Namo lasi ma haida edia toana ita laloa bada eiava idia ita hahemaoro henidia haraga, to namona be idia ita itaia Iehova ese idia ia itaia bamona.

17:​47-​50. Mai gari lasi ida Goliata bamona taudia edia dagedage karadia ita haheaukalaia diba, badina “tuari be Lohiabada ena.”

18:​1, 3; 20:​41, 42. Tura korikoridia be Iehova idia lalokau henia taudia huanai ita davaria diba.

21:​12, 13. Iehova ia ura iseda lalona bona diba ita gaukaralaia iseda mauri lalonai hekwakwanai aukadia ita hanaia totona. Ita dekenai ena lauma ese ia havaraia Hereva ia henia, unai ese aonega bona diba ia henia. (Aonega Herevadia 1:4) Idia abia hidi Keristani elda amo heduru ita abia danu.

24:6; 26:11. Davida be Iehova ese ia horoa tauna ia matauraia karana amo haheitalai namona ia hahedinaraia.

25:​23-​33. Laloa maoromaoro karana dekenai Abigaila ese haheitalai namona ia hahedinaraia.

28:​8-​19. Lauma dikadia ese taunimanima idia hakaua kerere eiava hadikaia totona, mase tauna ta bamona idia hedinarai diba. Namona be meamea karadia ibounai ita dadaraia.​—Deuteronomi 18:​10-​12.

30:​23, 24. Numera 31:27 ai, Davida ia karaia abia hidi amo ia hahedinaraia, Iehova ese kongrigeisen lalonai heduru idia henia taudia ia laloa bada. Herevana dahaka gaukara ita karaia, namona be ‘mai iseda kudouna ibounai ida do ita karaia. Do ita karaia, ia be tau ta ena gaukara lasi, to Lohiabada ena gaukara ita karaia.’​—Kolose 3:​23.

Dahaka Kara ese “Boubou Karadia Ia Hereaia”?

Eli, Samuela, Saulo bona Davida edia sivarai ese dahaka hereva momokani badana idia hahedinaraia? Gauna be inai: “Lohiabada kamonai henia kara, ese boubou karadia ia hereaia, bona Lohiabada ena hereva badinaia kara, ese mamoe namodia edia digara ia hereaia. Badina Lohiabada ena hereva utua kara, be meamea dikana ena kerere hegeregerena, bona dagedage ena dika, be dirava koikoi tomadiho henia kara hegeregerena.”​—1 Samuela 15:​22, 23.

Tanobada hegegemadai Basileia harorolaia bona hahediba taudia halaoa gaukarana ita karaia be hahenamo badana! Iehova dekenai “hanamoa momokani” ita henia noho lalonai, namona be ita hekwarahi ena Hereva bona ena tanobada oreana amo ia henia hakaua herevadia ita badinaia totona.​—Hosea 14:2; Heberu 13:15.

[Footnote]

[Picture on page 31]

Israela ena king ginigunana be guna manau lohia tauna, to gabeai ia be hekokoroku tauna ai ia lao

[Picture on page 32]

Goliata bamona taudia ese ita idia dagedage henia neganai, dahaka ita diba momokani?