Duahia Taudia Edia Henanadai

Vabu ta ese Keristani kongrigeisen ena heduru ia abia totona, Paulo ia gwau “tau tamona ia adavaia” be namo. Unai ena anina be dahaka?​​—⁠1 Timoteo 5:⁠9.

Aposetolo Paulo be inai hereva “tau tamona ia adavaia” ia gwauraia neganai, ia be unai hahine ia do vabu lasi negana ia herevalaia. Anina be, unai vabu be nega tamona sibona ia headava, a? Eiava Paulo ena hereva ena anina be dahaka? *

Haida idia laloa Paulo ia herevalaia vabu be ena mauri lalonai nega tamona sibona ia headava. Gabu momo dekenai taunimanima idia laloa bema vabu ta ia headava lou lasi, unai be kara namona. To, unai lalohadai be Paulo ese ia torea revareva haida hegeregerena lasi. Hegeregere, Korinto Keristani taudia ia tore henia neganai, ia gwau bema vabu ta ia headava lou lasi, do ia moale bada, to ma ia gwau “unai hahine ese ia ura henia tauna do ia adavaia diba, taravatu lasi. To Keristani tauna sibona do ia adavaia.” (1 Korinto 7:​39, 40; Roma 7:​2, 3) Danu, Paulo ese Timoteo ia tore henia neganai, ia gwau: “Lau ura vabu hahine matamata taudia be do idia headava lou.” (1 Timoteo 5:​14) Unai dainai bema vabu ta ia ura ia headava lou, namona be ma haida ese ia idia maumauraia lasi.

Vadaeni, Paulo ena hereva Timoteo dekenai ena anina be dahaka? Baibel lalonai, inai hereva “tau tamona ia adavaia” be 1 Timoteo 5:9 sibona dekenai ia hedinarai. Greek gado ai unai hereva ena anina be “tau tamona ena adavana.” Unai hereva ena anina be Paulo ena revareva haida lalonai ia torea herevana, “hahine tamona ena adavana” ida ia hegeregere. (1 Timoteo 3:​2, 12; Tito 1:⁠6) Paulo ese elda bona hesiai taudia edia gaukara ia herevalaia neganai, inai hereva “hahine tamona ena adavana” ia gaukaralaia. Unai ese ia hahedinaraia, bema tau ta be Keristani kongrigeisen lalonai maduna ia ura abia bona ia be headava tauna, namona be ena adavana ia abidadama henia, ia badinaia bona ia kara namo henia. * Unai dainai, 1 Timoteo 5:9 danu be gau tamona ia herevalaia: Vabu ta be kongrigeisen amo heduru ia abia totona, namona be taunimanima idia diba ia be hanaihanai ia kara namo bona guna ena adavana ia mauri neganai ena adavana sibona ia badinaia. Bona unai bamona vabu ena kara namodia ma haida be Paulo ese siri gabena ai ia herevalaia.​​—⁠1 Timoteo 5:​10.

[Footnotes]