Emu Headava Dinana Ena Moale Habadaia
Emu Headava Dinana Ena Moale Habadaia
GORDON, kahirakahira lagani 60 ia headava tauna ia gwau: “Lau headava neganai unai dina be mai anina bada bona lau moale bada.” Dahaka dainai Keristani taudia momokanidia dekenai, headava dinana be mai anina bada? Badina unai dina ai, idia lalokau henia bada taudia—edia adavana bona Iehova dekenai gwauhamata idia karaia. (Mataio 22:37; Efeso 5:22-29) Oibe, idia headava gwauraia tau bona hahine be idia ura edia headava dinana idia moalelaia, to mai anina bada gauna be headava Ia Hamatamaia Tauna, Iehova Dirava idia hanamoa danu.—Genese 2:18-24; Mataio 19:5, 6.
Edena dala ai headava tauna ese mai hemataurai ida ena headava ia karaia diba? Hahine ese ena adavana bona Iehova Dirava ia matauraia totona, dahaka ia karaia be namo? Edena dala ai headava dekenai idia lao taudia ese headava dinana ena moale idia habadaia diba? Baibel ena hakaua herevadia ese ita do ia durua, unai henanadai do ita haerelaia bona unai hakaua herevadia badinaia karana ese unai dina dekenai idia vara diba hekwakwanai ia koua diba.
Daika Ena Maduna?
Tano momo dekenai, Iehova ena Witnes tauna ta ese tau bona hahine edia headava ia karaia. Ena be gabu haida dekenai gavamani ese ia abia hidi tauna ta ese headava ia karaia, to reana tau bona hahine be do idia ura unai murinai Baibel amo tok ta do idia kamonai. Unai hereva ese headava tauna do ia hagoadaia Dirava ese ia henia maduna, ruma bese ena kwarana, do ia laloa totona. (1 Korinto 11:3) Unai dainai ia be mai ena maduna headava dinana ai do idia vara gaudia ibounai do ia naria totona. Oibe, headava dinana bona headava aria dekenai do idia karaia gaudia be nega badana lalonai idia hegaegaelaia. Dahaka dainai unai gaudia hegaegaelaia totona be mai ena hekwarahi?
Badina ta be, headava tau bona hahine edia varavara do idia ura headava ena palani do idia karaia. Headava momo ia karaia tauna ta Rodolfo, ia gwau: “Bema varavara taudia be headava ena aria totona moni bada idia negea, reana unai dainai ia headava gwauraia tauna do ia lalohekwarahi. Badina do idia ura headava ariana dekenai gau haida be edia ura hegeregerena do idia karaia. Unai kara dainai ia headava gwauraia tauna be ena kwara dagina ena maduna do ia huaia lasi.”
Lagani 35 lalonai headava ia karaia tauna, Max ia gwau: “Lau itaia headava momo dekenai ia headava gwauraia hahine be headava aria dekenai idia vara gaudia totona palani ia karaia, bona headava matamata tauna be hereva momo ia gwauraia lasi.” Headava momo ia karaia tauna ma ta, David ia gwau: “Headava tatau be maduna huaia karana idia manadalaia lasi dainai, headava ena palani karaia karana idia durua momokani lasi.” Edena dala ai headava gwauraia tauna ese ena maduna ia huaia namonamo diba?
Herevahereva Karana ese Moale Ia Habadaia
Ia headava gwauraia tauna be ena headava ia palanilaia namonamo totona, herevahereva namonamo karana be gau badana. Baibel ia gwau: “Sisiba momo do oi tahua noho, bona do oi kwalimu.” (Aonega Herevadia ) Badu ia vara lasi totona, do ia headava gwauraia tauna ese headava ena palani be ia adavaia gwauraia hahine, ruma bese taudia, bona Baibel amo sisiba namodia idia henia taudia ma haida ida ia herevalaia be namo. 15:22
Oibe, idia maoheni vadaeni tau bona hahine ese edia palani bona do idia karaia diba gaudia idia herevalaia guna be namo. Dahaka dainai? Ivan bona Delwyn be tano idaudia rua amo, to idia headava bona lagani momo lalonai mai moale ida idia noho hebou. Edia headava idia palanilaia neganai, Ivan ia gwau: “Lau diba egu headava dinana dekenai dahaka do lau karaia, egu headava aria dekenai egu turadia ibounai do idia mai, headava keke do ia noho, bona egu adavana be dabua kurokurona do ia karaia. To Delwyn ia ura lasi taunimanima momo ia boiria bona headava keke be lasi. Bona ia ura dabua ma ta ia karaia, to dabua kurokurona ia karaia lasi.”
Edena dala ai edia lalohadai idauidau idia hamaoromaoroa? Mai manau bona momokani ida herevahereva namonamo karana ese idia ia durua. (Aonega Herevadia 12:18) Ivan be ma ia gwau: “Ai be headava idia herevalaia Baibel magasin ai stadilaia, hegeregere January 1, 1985 Gima Kohorona. * Unai ese ai ia durua Dirava ena lalohadai headava dekenai ai laloa totona. Aiemai noho daladia be idauidau dainai, emai lalohadai ai haidaua bona gau haida dekenai ai lalotamona.”
Aret bona Penny be unai bamona idia karaia danu. Edia headava dinana idia laloa neganai, Aret ia gwau: “Emai lalohadai ai herevalaia bona headava aria dekenai do ai karaia gaudia dekenai ai lalotamona. Iehova ai noia unai dina do ia hanamoa. Emai tama sina bona kongrigeisen ai lagani daudau idia headava taudia edia heduru ai tahua danu. Edia heduru herevadia ese ai idia durua bada. Unai dainai, emai headava ai moalelaia bada.”
Mai Hemataurai ida Dabua Karaia
Ita diba headava matamata taudia idia ura edia headava dinana ai dabua namodia idia karaia. (Salamo 45:8-15) Edia nega, goada bona moni do idia haorea unai dabua namodia idia tahua totona. Edena Baibel ena hakaua herevadia ese idia do ia durua diba hairai bona hemataurai idia hahedinaraia dabua idia abia hidi totona?
Mani ia headava gwauraia hahine ese ia karaia dabua oi laloa. Ena be tano idauidau ai taunimanima edia dabua sitaelo be idauidau, to idia ibounai ese Baibel ena sisiba idia badinaia be namo. Baibel ia gwau: “Hahine taudia ese mai manau bona mai mataurai 1 Timoteo 2:9; 1 Petero 3:3, 4) Unai sisiba ita badinaia neganai moale do ita davaria!
danu edia dabua do idia kwatua.” Keristani hahine ese nega ibounai bona headava dinana ai danu unai sisiba ia badinaia. Momokani headava namona totona “davana bada dabua” karaia be anina lasi. (Guna ita herevalaia tauna David, ia gwau: “Headava taudia momo be Baibel ena hakaua herevadia idia laloa bada, unai dainai idia ita hanamoa be namo. Ia headava gwauraia hahine bona ia badinai idia gini kekeni be hemataurai dalanai edia dabua idia karaia lasi.” Keristani elda tauna ta be idia headava gwauraia tau bona hahine ida ia hebou neganai, idia ia durua lalohadai maorona idia abia totona. Edena dala ai? Idia ia nanadaia bema unai dabua be Keristani hebou dekenai idia karaia diba. Oibe, headava dinana ai do idia karaia dabua be hebou dekenai idia karaia dabua amo ia idau. Reana headava dinana ai idia hahedokilaia dabua be edia kastom hegeregerena, to namona be Keristani taravatudia idia badinaia bona mai hemataurai ida edia dabua idia karaia. Ena be tanobada taudia haida idia laloa Baibel ena kara maoromaoro taravatudia idia badinaia be auka, to Keristani taudia ese tanobada taudia edia lalohadai idia badinaia lasi be namo.—Roma 12:2; 1 Petero 4:4.
Penny ia gwau: “Lau bona Aret ese headava dabua bona headava ena aria ai laloa bada lasi, to ai dekenai Kingdom Hall ai idia gwauraia headava herevana be mai anina bada. Lau karaia dabua eiava lau ania aniani be anina bada lasi, to unai dina dekenai lau bamoa taudia bona lau lalokau henia tauna lau adavaia dainai lau moale bada.” Keristani tau bona hahine ese edia headava totona palani idia karaia neganai, unai hakaua herevadia idia laloa be namo.
Kingdom Hall—Hemataurai Gabuna
Keristani taudia momo idia ura Kingdom Hall dekenai idia headava. Dahaka dainai? Headava tau bona hahine ta idia gwau: “Ai diba headava be Iehova ese ia karaia gauna bona ia be helaga. Unai dainai, Kingdom Hall dekenai ai headava bona ai laloparara unai nega amo Iehova be emai headava lalonai ia noho be gau badana. Kingdom Hall lalonai ai headava ena namo ta be, unai ese emai headava dekenai idia mai Witnes lasi varavara dekenai ia hahedinaraia, Iehova tomadiho henia karana be mai anina bada.”
Bema kongrigeisen ena elda taudia ese gwaumaoro idia henia Kingdom Hall idia gaukaralaia totona, namona be nega bada ia do noho lalonai idia palanilaia gaudia be elda taudia dekenai idia gwauraia. Headava dekenai idia lao taudia vairanai hemataurai idia hahedinaraia totona, namona be headava tau bona hahine be headava ena tok totona nega korikori ai idia ginidae. Bona headava tau bona hahine idia ura headava dinana ai idia vara gaudia be dala maorona ai do idia karaia. * (1 Korinto 14:40) Bona tanobada taudia edia kara idia tohotohoa lasi.—1 Ioane 2:15, 16.
Headava dekenai idia lao taudia idia hahedinaraia idia ese Iehova ena lalohadai headava dekenai idia abia dae. Namo lasi idia laloa Keristani headava ese headava ma haida ia hereaia. Lo Keristani taudia idia laloparara Kingdom Hall dekenai Baibel ena hereva idia kamonai totona idia lao be mai anina bada, to headava ariana dekenai idia lao be gau badana lasi. Bema nega bona noho dalana dainai, unai hebou rua amo ta do oi abia hidi, namona be Kingdom Hall dekenai idia karaia hebouna dekenai oi lao. Elda ta ladana William ia gwau: “Bema idia boiria taudia be Kingdom Hall dekenai idia lao lasi to headava ena aria dekenai idia noho, unai ese ia hahedinaraia headava ena tok Kingdom
Hall dekenai idia laloa bada lasi. Bema headava ena tok kamonai totona sibona ita idia boiria to headava ena aria dekenai lasi, namona be ita lao, unai amo Witnes lasi varavara dekenai do ita hahedinaraia ita be headava ena tok ita laloa bada.”Headava Dinana Murinai Moale Noho
Bisinesi taudia ese headava be bisinesi badana ai idia halaoa. Ripoti ta ese ia hahedinaraia, United States ai headava momo dekenai idia negea moni ena bada be “K60,000 bamona, unai be America ai ruma bese ta be lagani tamona idia abia pei ena kahana ta hegeregerena.” Bisinesi edia laloani karadia dainai, idia headava gwauraia taudia momo bona edia ruma bese taudia be unai dina tamona totona abitorehai badana idia karaia, bona lagani momo lalonai unai abitorehai ena davana idia henia. Ta ena headava be unai dala amo ia hamatamaia be aonega karana, a? Baibel ena hakaua herevadia idia diba lasi taudia be unai bamona do idia karaia, to Keristani taudia momokanidia be idia idau!
Keristani taudia momo be edia moni hegeregerena edia headava idia palanilaia bona Iehova ena lalohadai headava dekenai idia laloa bada dainai, edia nega bona kohu idia gaukaralaia diba edia gwauhamata Iehova dekenai idia hagugurua totona. (Mataio 6:33) Lloyd bona Alexandra be edia headava murinai lagani 17 lalonai ful-taim hesiai gaukara idia karaia, mani edia haheitalai ita laloa. Lloyd ia gwau: “Haida be idia laloa emai headava be headava maragina, to lau bona Alexandra be ai moale bada. Ai mamia emai headava dinana dekenai moni totona ai lalohekwarahi lasi, to Iehova ese taunimanima rua hamoalea totona ia karaia dalana ai moalelaia.”
Alexandra ma ia gwau: “Lau do headava lasi neganai, lau painia, unai dainai lau ura lasi headava badana dainai egu ful-taim hesiai gaukara do lau rakatania. Emai headava dina be do ai laloaboio diba lasi. To, ia be emai headava maurina ena matamana sibona. Do ai headava negana ai laloa bada lasi to emai headava maurina lalonai Iehova ena sisiba ai badinaia karana ai laloa bada. Unai amo ai be Iehova ena hahenamo ai abia.” *
Oibe, emu headava dinana be dina badana. Unai dainai unai dina ai oi karaia karadia be mai anina bada. Heduru totona Iehova dekena oi tabekau be namo. (Aonega Herevadia 3:5, 6) Gau badana be Kingdom Hall dekenai idia henia headava ena tok oi laloa bada. Dirava ese ia henia maduna umui huaia neganai ta ta umui durua. Unai amo emui headava be badina aukana latanai umui haginia bona Iehova ese umui ia hanamoa dainai, emui moale be do ia noho daudau.—Aonega Herevadia 18:22.
[Footnotes]
^ par. 11 Hereva ma haida be Awake! February 8, 2002, ai do oi davaria diba, Iehova ena Witnes taudia ese idia karaia.
^ par. 20 Bema headava tau bona hahine idia ura ta ese edia laulau do idia abia eiava Kingdom Hall ai idia henia headava ena tok idia rekodia, namona be dala maorona ai idia karaia.
^ par. 25 Ruma Bese Ena Moale Havaraia, bukana ena rau 26 itaia, Iehova ena Witnes taudia ese idia karaia.
[Picture on page 19]
Idia headava gwauraia taudia be mai momokani bona hemataurai ida edia headava totona palani idia karaia
[Picture on page 21]
Namona be do idia headava taudia ese Kingdom Hall dekenai idia henia headava ena tok idia laloa bada