Iehova Ena Hereva be Ia Mauri Noho Esekiela Bukana Ena Hereva Badadia—1
Iehova Ena Hereva be Ia Mauri Noho Esekiela Bukana Ena Hereva Badadia—1
LAGANI 613 B.C.E. ai, peroveta tauna Ieremia be Iuda dekenai ia noho bona mai gari lasi ida Ierusalema ena moru bona Iuda tanona ena dika ia harorolaia noho. Babulonia ena King Nebukanesa ese Iuda taudia momo be igui hesiai taudia bamona ia abidia lao. Idia haida be Daniela bona iena bamodia toi, gabeai idia be Babulonia ena king ena ruma dekenai idia gaukara. Babulonia dekenai Iuda taudia momo be Kebara sinavai badinai idia noho. (Esekiela 1:1-3) Iehova ese unai igui hesiai taudia dekenai iena hereva gwauraia tauna ta ia siaia. Ia ese Esekiela be peroveta tauna ai ia halaoa. Unai nega ai Esekiela ena mauri lagani be 30.
Esekiela ena buka be lagani 22 lalonai idia vara gaudia edia sivarai ia herevalaia bona lagani 591 B.C.E. ai idia haorea. Esekiela ese unai sivarai ibounai ia torea namo herea. Ena peroveta herevadia ia gwauraia negadia edia dina, hua bona lagani ia torea. Esekiela bukana ena kahana ginigunana ese Ierusalema ena moru ia sivarailaia. Kahana iharuana be kahirakahira ai idia noho besedia edia hahemaoro herevadia ia torea, bona kahana ginigabena be Iehova ena tomadiho momokani idia haginia lou karana ia sivarailaia. Inai kahana 1 be Esekiela 1:1–24:27 lalonai ia torea gaudia, hegeregere Ierusalema ese dika do ia davaria ena matahanai, peroveta herevadia, bona haheitalai idauidau ia herevalaia.
“BESE ENA NARIA TAUNA BE OI DO LAU HALAOA”
Iehova ese Esekiela dekenai matahanai amo ena terona ia hahedinaraia murinai, Esekiela ena gaukara ia henia. Iehova ese ia hamaoroa: “Tanobada tauna e, lau ese Israela bese ena naria tauna be oi do lau halaoa. Oi dekenai lau henia sisiba be idia dekenai do oi hamaoroa.” (Esekiela 3:17) Dirava ese Esekiela ia hamaoroa haheitalai rua do ia karaia, unai amo ia hahedinaraia Ierusalema be do idia koua hagegea bona dika do ia davaria. Iehova ese Esekiela amo Iuda tanona ena dika ia gwauraia: “Lau ese tuari kaia ta do lau siaia diho, ia ese emui ataiai idia noho tomadiho gabudia, dirava koikoi tomadiho gabudia do ia hadikaia ore.” (Esekiela 6:3) Hanua taudia dekenai ia gwau: “Israela dekenai noho taudia e, umui dekenai dika ia ginidae.”—Esekiela 7:7.
Lagani 612 B.C.E. ai, matahanai lalonai Esekiela ese Ierusalema hanua ia itaia. Ia itaia Iehova ena dubu helaga dekenai kara dika rohoroho idia karaia noho! Iehova ese iena guba tuari oreana (“tau ibounai 6” ese ia laulaulaia) ia siaia, Iena badu be aposteit taudia latanai ia hahedinaraia totona, to “edia bagudia dekenai maka” idia abia taudia sibona do idia hamasea lasi. (Esekiela 9:2-6) To, “gida hururuhururu”—unai be Dirava ena hahemaoro hereva siahudia—be Ierusalema dekenai do ia bubua diho guna. (Esekiela 10:2) Ena be Iehova ese ‘kara dika rohorohodia idia ura henia taudia edia dika davana do ia henia,’ to ia gwauhamata bese idauidau edia huanai idia noho taudia do ia haboudia lou.—Esekiela 11:17-21.
Dirava ena lauma helaga ese Esekiela ia abia giroa lao Babulonia dekenai. Esekiela ese Ierusalema amo King Sedekaia bona Israela taudia do idia heau karana ia haheitalaia. Peroveta koikoi tatau bona hahine edia kara ia gwauraia dika. Ia hahedinaraia Iehova ese kaivakuku taudia ia dadaraia. Ia gwau, Iuda besena be anina lasi vain bamona. Ugava manu bona vain ena parabole amo Ierusalema be Aigupito dekenai ia lao heduru ia tahua totona ena dika ia haheitalaia. Unai parabole dokonai, Iehova ia gwauhamata ia ese ‘rigi maragina bona manokamanokana ta do ia abia, bona ia sibona be ororo bada herea bona lata herea ena ataiai do ia hadoa.’ (Esekiela 17:22) To, Iuda dekenai “king edia dagi audia” be do ia noho lasi.—Esekiela 19:14.
Baibel Henanadaidia Edia Haere:
1:4-28—Guba kariota be dahaka ia laulaulaia? Unai kariota be Iehova ena guba oreana, mai edia kamonai aneru ia laulaulaidia. Kariota be Iehova ena lauma helaga amo siahu ia abia. Unai kariota dekenai ia guia tauna be Iehova ia laulaulaia bona iena hairai be bada herea momokani. Iena maino be kevaru hairaina ese ia laulaulaia.
1:5-11—Unai mauri gaudia hani be daidia? Esekiela ese nega iharuana kariota ena matahanai ia itaia neganai, ia gwau unai mauri gaudia hani be kerubi. (Esekiela 10:1-11; 11:22) Gabeai, boromakau ena toana ia herevalaia neganai, ia gwau ia be “kerubi ena vairana.” (Esekiela 10:14) Unai be maoro badina boromakau ese siahu bona goada ia laulaulaia bona kerubi be mai edia siahu bada.
2:6—Dahaka dainai nega momo Dirava ese Esekiela ia gwauraia “tanobada tauna” [“taunimanima ena natuna,” NW ]? Iehova ese Esekiela be unai bamona ia gwauraia, badina ia ura unai peroveta tauna do ia diba ia be taunimanima sibona, unai amo Ia hahedinaraia Iehova, hereva ia henia Tauna Badana ese Iena hereva ia gwauraia tanobada tauna ia hereaia. Unai bamona hereva be Iesu dekenai idia gwauraia danu, bona Evanelia buka lalonai nega 80 bamona ia hedinarai. Unai ese ia hahedinaraia goevagoeva Iesu be taunimanima bamona ia mai.
2:9–3:3—Dahaka dainai Esekiela dekenai lalohisihisi bona taitai edia lokua bukadia edia mamina be hani bamona? Esekiela be iena gaukara ia ura henia bada, unai dainai unai lokua bukadia edia mamina be hani bamona. Esekiela ia moale badina ia be Iehova ena peroveta gaukara ia karaia.
4:1-17—Momokani Esekiela be haheitalai amo Ierusalema idia hagegea karana ia hahedinaraia, a? Esekiela ese Dirava dekenai aniani gabua gauna ma ta totona ia noinoi neganai, Iehova be ena noinoi ia kamonai ese ia hahedinaraia, Esekiela be unai haheitalai ia karaia momokani. Iuda besena be lagani 390 lalodiai ia karaia kereredia dainai, Esekiela be ena laurina kahana dekenai dina 390 ia hekure. Unai lagani 390 be lagani 997 B.C.E. amo ia hamatamaia ela bona Ierusalema idia hadikaia ore negana, lagani 607 B.C.E. Idibana kahana dekenai ia hekure karana ese Iuda ena kara dika laganidia 40 ia laulaulaia. Unai lagani 40 be Dirava ese Ieremia ia abia hidi peroveta tauna ai ia lao negana, lagani 647 B.C.E. amo ia hamatamaia ela bona lagani 607 B.C.E. Unai dina 430 lalodiai, Esekiela be aniani bona ranu sisina sibona ia inua, unai amo peroveta dalanai ia haheitalaia Ierusalema idia koua hegege neganai, doe do ia vara.
5:1-3—Esekiela ese lai dekenai do ia negea lao huina haida be iena dabua ena isena dekenai ia kwatua kau, ena anina be dahaka? Unai ese ia haheitalaia, Iuda tanona be lagani 70 lalonai ia noho kava murinai, haida do idia giroa lou bona tomadiho momokanina do idia badinaia lou.—Esekiela 11:17-20.
17:1-24—Ugava badadia rua be daidia, sida au ena ataiai ena rigi idia makohia bona Iehova ese ia abia “rigi maragina bona manokamanokana ta” be daika ia laulaulaia? Unai ugava rua be Babulonia bona Aigupito edia lohia taudia ia laulaulaia. Ugava ginigunana be sida au ena ataiai dekenai ia lao, unai sida auna be Davida ena bese ena lohia tauna ia laulaulaia. Unai ugava ese ataiai idia noho rigi ia makohia anina be, King Iehoiakini ia kokia bona Sedekaia be ena gabu dekenai ia atoa. Ena be Sedekaia ia gwauhamata Dirava do ia badinaia, to ia ese ugava ma ta, Aigupito ena lohia tauna ena heduru ia tahua, to ia hegeregere lasi. Sedekaia be igui hesiai tauna bamona idia abia lao Babulonia dekenai do ia mase totona. Iehova ese “rigi maragina bona manokamanokana ta” ia abia, unai be Mesia Pavapavana ia laulaulaia. Unai Rigi ia abia lao ‘ororo bada herea bona lata herea ena ataiai do ia hadoa.’ Unai ororo be guba Siona Ororona bona unuseniai unai Rigi be “sida auna namo herea” ai do ia lao bona tanobada dekenai hahenamo bada do ia mailaia.—Apokalupo 14:1.
Ita Dibaia Gaudia:
2:6-8; 3:8, 9, 18-21. Kara dika taudia dekenai do ita gari lasi, to Dirava ena hereva be idia dekenai do ita harorolaia, badina unai ese ia hadibadia danu dokona be kahirakahira. Bema idia ura lasi bona ita idia dadaraia, namona be daimon bamona ita auka bona ita hesiku lasi. To, namona be edia hemami ita laloa bona ita hebogahisi henidia. Iesu be ia haroro henia taudia ia hebogahisi henidia, bona ita danu unai bamona ita karaia be namo.—Mataio 9:36.
3:15. Esekiela be iena peroveta gaukara ia abia murinai, Telabibi dekenai dina 7 ia noho bona do ia harorolaia sivaraina ia laloa dobu bona ena “lalona ia hisihisi.” Namona be ita danu ese nega ita atoa Baibel ita stadilaia namonamo bona ita laloa dobu totona. Unai kara amo hereva momokani do ita lalopararalaia namonamo.
4:1–5:4. Esekiela be mai manau bona gari lasi ida unai peroveta herevadia rua ia haheitalaia. Ita danu be Dirava ena hesiai gaukara ta ita karaia neganai, mai manau bona gari lasi ida ita karaia be namo.
7:4, 9; 8:18; 9:5, 10. Namo lasi ita ese Dirava ena hahemaoro karana do idia abia taudia ita hebogahisi henidia.
7:19. Iehova ese inai tanobada dikana ia hahemaoro henia neganai, moni be siahu lasi taunimanima ia hamauria totona.
8:5-18. Aposteit karana ese ta ena hetura karana Dirava ida ia hadikaia diba. “Dirava ia gari henia lasi tauna ese, iena hereva dekena amo, iena badibadinai tauna ia hadikaia ore noho.” (Aonega Herevadia 11:9) Aonega karana be aposteit taudia edia hereva do ita dadaraia momokani.
9:3-6. “Hisihisi bada herea” amo ita roho mauri totona, maka do ita abia be mai anina bada. Maka ita abia anina be ita be Dirava dekenai ita gwauhamata bona bapatiso ita abia vadaeni hesiai taudia bona Keristani kara namodia ita hahedinaraia. (Mataio 24:21) Mai ena torea peni bona pepa tauna be Horoa Keristani taudia ia laulaulaia. Idia ese maka atoa gaukarana idia gunalaia—Basileia ena sivarai idia harorolaia bona kamonai taudia be hahediba taudia ai idia halaoa gaukara unai. Bema ita ura iseda maka do ita dogoatao noho, namona be unai gaukara lalonai idia do ita durua goadagoada.
12:26-28. Ia harorolaia herevana idia kirikirilaia taudia dekenai, Esekiela ese Iehova ena hereva ia gwauraia: “Do lau naria nega daudau lasi, to lau gwauraia vadaeni hereva ena anina do lau havaraia momokani.” Iehova be inai tanobada dikana ia do haorea lasi neganai, namona be ma haida ita durua Iehova do idia abidadama henia totona.
14:12-23. Namona be ita ta ta do ita hekwarahi hahemauri ita abia totona. Ma ta ese ita totona do ia karaia lasi.—Roma 14:12.
18:1-29. Ita sibona ita karaia abia hidi ta dainai, dika ita davaria neganai, unai be ita sibona iseda kerere.
“HADIKAIA, HADIKAIA! IO, HANUA BADANA DO LAU HADIKAIA ORE MOMOKANI”
Lagani 611 B.C.E. ai, Israela taudia be lagani 7 Babulonia dekenai idia noho vadaeni, bena Israela ena tau badadia be Esekiela dekenai idia lao ‘idia totona Lohiabada do ia nanadaia totona.’ Esekiela ese idia dekenai Israela ena gwau-edeede sivaraina ia gwauraia bona Iehova ena “tuari kaia dekena amo” idia do ia hamasea ena hadibaia herevana ia hamaorodia. (Esekiela 20:1; 21:3) Iehova ese Israela ena lohia tauna (Sedekaia) dekenai ia gwau: “Oiemu kwarana kumia dabua do oi ruhaia, bona oiemu korona do oi kokia. Oiemu dagi toana gaudia do oi karaia lou lasi. Henunai idia noho taudia be do idia abia isi ataiai, bona ataiai idia noho taudia be henunai do idia atoa. Hadikaia, hadikaia! Io, hanua badana do lau hadikaia ore momokani. Bona do idia hanamoa lou lasi, ela bona iena Biaguna korikori be do ia mai, unai neganai ia dekenai do lau henia.”—Esekiela 21:26, 27.
Ierusalema be ena kerere dainai hahemaoro ia abia vadaeni. Ohola (Israela) bona Oholiba (Iuda) edia kerere idia gwauraia hedinarai. Ohola be “ia ura henia taudia, inai Asuria taudia, ia ese ia matabodaga henidia taudia, edia imadia dekenai” ia atoa vadaeni. (Esekiela 23:9) Oholiba idia hadikaia negana be ia kahirakahira. Lagani 609 B.C.E. ai, Ierusalema idia koua hegege. Idia hadikaia neganai, Iuda taudia be idia gari bada dainai, idia taitai diba lasi. Esekiela be idia mauri igui hesiai taudia dekenai Dirava ena hereva ta do ia gwauraia lasi ela bona “heau mauri tauna ta” amo Ierusalema idia hadikaia ore sivaraina do ia kamonai.—Esekiela 24:26, 27.
Baibel Henanadaidia Edia Haere:
21:3—Iehova ese ia gaukaralaia “tuari kaia” be daika ia laulaulaia? Iehova ese Ierusalema bona Iuda ia hadikaia totona ia gaukaralaia “tuari kaia” be Babulonia ena King Nebukanesa bona iena tuari taudia ia laulaulaia. Dirava ena guba oreana, iena aneru goadadia ia laulaulaia danu.
24:6-14—Uro dikana ena raraka be dahaka ia laulaulaia? Ierusalema idia koua hegege neganai ia be uro dikana ta bamona. Ena raraka be ena kara mirodia, lebulebu mai matabodaga karana bona ala-ala karadia ia laulaulaia. Uro mai ena anina lasi be gida siahuna dekenai idia atoa raraka idia kokia totona, to ena kara mirodia be bada herea dainai, lahi ese raraka ia kokia diba lasi.
Ita Dibaia Gaudia:
20:1, 49. Israela ena tatau badadia be Esekiela ena hereva idia daradaralaia bona idia abia dae lasi. Namo lasi ita be Dirava ena hadibaia herevadia dekenai ita daradara.
21:18-22. Ena be Nebukanesa ese meamea karadia ia karaia, to Iehova ese dirava idaudia idia tomadiho henia lohia taudia ia gaukaralaia Ierusalema idia tuari henia totona. Unai ese ia hahedinaraia, Iehova be iena ura ia hagugurua totona ia gaukaralaia tuari oreana be demoni ese idia koua diba lasi.
22:6-16. Iehova ese ta ena ladana hadikaia herevadia, lebulebu mai matabodaga karadia, siahu gaukaralaia kerere karana bona laloani moni abia karana ia ura henidia lasi. Namona be iseda lalona ita hadaia unai bamona kara dikadia ita dadaraia totona.
23:5-49. Israela bona Iuda taudia be idau besedia idia tura henia dainai, unai bese taudia edia tomadiho daladia idia abia dae. Namona be iseda abidadama idia hadikaia diba tanobada taudia ita tura henidia lasi.—Iamesi 4:4.
Ia Mauri Noho Bona mai Ena Siahu Herevana Ta
Esekiela bukana ena karoa ginigunadia 24 amo gau namodia ita dibaia! Unai karoa ginigunadia 24 ese idia hahedinaraia Dirava be dahaka ia ura henia lasi, edena bamona iena hebogahisi ita abia diba bona dahaka dainai kara dika taudia be dika do idia davaria hadibaia herevana ita harorolaia be namo. Ierusalema do idia hadikaia ore peroveta herevana ese ia hahedinaraia, Iehova be iena taunimanima dekenai ‘gabeai do idia vara gaudia, do ia hamaoroa, idia do vara lasi neganai.’—Isaia 42:9.
Esekiela 17:22-24 bona 21:26, 27 dekenai idia noho peroveta herevadia be guba dekenai do ia gini Mesia Basileiana idia herevalaia. Kahirakahira, unai Basileia ese Dirava ena ura be tanobada dekenai do ia karaia. (Mataio 6:9, 10) Mai abidadama ida unai Basileia ena hahenamo ita naria diba. Oibe, “Dirava ena hereva be ia mauri noho, bona ia be mai ena siahu.”—Heberu 4:12.
[Picture on page 4]
Guba kariota ese dahaka ia laulaulaia?
[Picture on page 6]
Mai goada ida haroro gaukara ita karaia neganai, iseda “maka” ita dogoatao noho