Iehova be Oiemu Kamonai Karana Ia Laloa Bada
Iehova be Oiemu Kamonai Karana Ia Laloa Bada
“Egu natuna e, do oi aonega, vadaeni do lau moale.”—AONEGA HEREVADIA 27:11.
1. Hari inai nega ai dahaka kara be bada herea?
INAI tanobada lalonai gwau-edeede bona sibona ena ura badinaia karadia be idia bada herea. Aposetolo Paulo ese Efeso taudia dekenai ena revareva ia torea neganai, unai kara ena badina ia gwauraia hedinarai: “Unai neganai inai tanobada ena kara dika dalana umui raka. Umui ese lauma dikadia edia biaguna umui kamonai henia. Inai lauma dika ese Dirava idia kamonai henia lasi taudia edia lalona dekenai harihari ia gaukara noho.” (Efeso 2:1, 2) Oibe, Satani Diabolo, “lauma dikadia edia biaguna” be tanobada ibounai lalonai gwau-edeede karana ia havaraia. Aposetolo taudia edia negai unai bamona ia karaia bona tanobada dekenai idia negea diho neganai, unai kara ia habadaia momokani.—Apokalupo 12:9.
2, 3. Dahaka dainai Iehova ita kamonai henia be maoro?
2 Ita be Keristani taudia dainai, ita diba mai iseda kudouna ibounai ida Iehova Dirava ita kamonai henia be maoro, badina ia be iseda Havaraia Tauna, Mauri Ia Henia Tauna, Siahu Ibounai Lohiabadana, bona iseda Hamauria Tauna. (Salamo 148:5, 6; Kara 4:24; Kolose 1:13; Apokalupo 4:11) Mose ena negai idia noho Israela taudia idia diba Iehova be edia Mauri Ia Henia Tauna bona idia ia Hamauria Tauna. Unai dainai, Mose ese idia ia hamaoroa: “Israela taudia e, do umui naria namonamo, Lohiabada emui Dirava ena Taravatu ibounai do umui badinaia.” (Deuteronomi 5:32) Oibe, Iehova idia kamonai henia be maoro. To, karaharaga idia ese edia Siahu Ibounai Lohiabadana idia gwau-edeede henia.
3 Dahaka dainai iseda Havaraia Tauna ita kamonai henia be mai anina bada? Guna, peroveta tauna Samuela be King Saulo ia hamaoroa: “Lohiabada kamonai henia kara, ese boubou karadia ia hereaia.” (1 Samuela 15:22, 23) Dahaka dainai Samuela be unai bamona ia hereva?
Kamonai Karana “ese Boubou Karadia Ia Hereaia” Dalana
4. Edena dala ai Iehova dekenai boubou gauna ta ita henia diba?
4 Iehova be Havaraia Tauna dainai, ita dekenai idia noho gaudia ibounai be iena. Unai dainai, ia dekenai gau ta ita henia diba, a? Oibe, Dirava dekenai mai anina bada gauna ta ita henia diba. Unai be dahaka? Haere be inai sisiba amo ita davaria diba: “Egu natuna e, do oi aonega, vadaeni do lau moale, bona unai dainai, bema tau ta ese lau ia gwauraia kerere neganai, lau ese iena hereva do lau halusia diba.” (Aonega Herevadia 27:11) Oibe, Dirava ita kamonai henia diba. Satani ia gwau taunimanima be hahetoho idia davaria neganai, Dirava do idia rakatania. To, herevana iseda mauri daladia be idauidau, bema Dirava ita kamonai henia, ita ta ta be Satani Diabolo ena hereva ita hakoikoia diba. Unai be hahenamo badana ta!
5. Ta be ia kamonai lasi neganai, Havaraia Tauna ena hemami be edena bamona? Haheitalai gwauraia.
5 Dirava be ita abia hidi gaudia ia laloa bada. Bema ita kamonai henia lasi, ia moale lasi. Hegeregere, bema tau ta be abia hidi kererena ia karaia, Iehova do ia lalohisihisi. (Salamo 78:40, 41) Mani ita laloa, suga gorerena ia abia tauna be iena doketa ese ia gwauraia aniani namodia ia ania lasi, to aniani kereredia ia ania neganai, iena doketa be dahaka do ia laloa? Ita diba Iehova be do ia lalohisihisi danu bema taunimanima ese mauri dalana namona idia dadaraia, badina ia diba unai idia karaia neganai, dika do idia davaria.
6. Dahaka ese ita do ia durua Dirava ita kamonai henia totona?
6 Ita ta ta be Dirava ita kamonai henia totona, dahaka ese ita do ia durua? Solomona ia karaia bamona namona be ita ta ta be Dirava ita noia “kamonai kudouna” ia henia totona. Solomona be unai bamona kudouna totona ia noinoi, unai amo ia ese Israela taudia do ia gunalaia bona “namo bona dika edia idau ia lalopararalaia totona.” (1 King Taudia 3:9, NW ) “Kamonai kudouna” ita abia be namo, inai gwau-edeede tanobadana lalonai dika bona namo edia toana do ita diba. “Kamonai kudouna” ita abia totona, Dirava ese ita dekenai Baibel, Baibel stadi bukadia, Keristani heboudia, bona elda taudia ia henia ita idia durua totona. Ita be unai gaudia ita gaukaralaia namonamo, a?
7. Dahaka dainai Iehova ia gwau kamonai karana be mai anina bada?
7 Ita laloatao, Iehova ese guna Israela taudia dekenai ia hahedinaraia, kamonai karana ese animal boubou karadia ia hereaia. (Aonega Herevadia 21:3, 27; Hosea 6:6; Mataio 12:7) Dahaka dainai Dirava be unai bamona ia hereva, bema Ia ese guna ia oda henidia boubou gaudia do idia henia? Vadaeni, namona be ita tahua, dahaka dainai ta ia ura boubou gauna ia henia? Boubou gauna ia henia badina ia ura Dirava ia hamoalea, a? Eiava, ia ese tomadiho karana ta ia badinaia sibona? Bema, Iehova ia tomadiho henia tauna be ia ura momokani Iehova ia hamoalea, ia ese Dirava ena taravatu ibounai do ia badinaia be namo. Animal boubou be Dirava dekenai namo ta idia havaraia lasi, to iseda kamonai karana be mai anina bada.
Ita Ia Hadibaia Haheitalai Ta
8. Dahaka dainai Dirava ese King Saulo ia dadaraia?
8 King Saulo ena sivarai ese ia hahedinaraia kamonai karana be mai anina bada. Guna, ia be manau lohia tauna ta. To gabeai, hekokoroku bona lalohadai kereredia dainai abia hidi kereredia ia karaia. (1 Samuela 10:21, 22; 15:17) Nega ta Saulo be Pilistia taudia danu do idia tuari. Peroveta tauna Samuela ese Saulo ia hamaoroa ia do ia naria, bona ia mai neganai Iehova dekenai boubou gauna do ia gabua bona Saulo do ia hamaoroa dahaka do ia karaia. To, Samuela ia mai haraga lasi dainai, Israela taudia be idia giroa lao edia ruma dekenai. Saulo be unai ia itaia neganai, “ia ese gabua boubouna ia karaia.” Iehova be unai kara ia moalelaia lasi. Samuela ia ginidae neganai, King Saulo be iena kamonai lasi karana dainai ekskius herevadia ia gwauraia. Ia gwau Samuela ia mai haraga lasi bona ia laloa momo dainai, Iehova ena lalonamo ia abia totona boubou gauna ia gabua. King Saulo be boubou gauna ia laloa bada, to Samuela ena hereva badinaia karana ia laloa maragi. Samuela ese ia hamaoroa: “Oi be kara kavakava oi karaia vadaeni. Lohiabada, oiemu Dirava ena oda hereva, oi dekenai ia henia gauna, be oi kamonai henia lasi.” Saulo be Iehova ia kamonai lasi dainai iena lohia dagina ia haboioa.—1 Samuela 10:8; 13:5-13.
9. Edena dala ai Saulo be Dirava ia kamonai henia lasi?
9 King Saulo be unai kerere ia karaia murinai, ena kara ia haidaua, a? Lasi! Gabeai, Amaleka besena be Israela taudia ia tuari henia neganai, Iehova ese Saulo ia oda henia unai bese do ia haorea. Edia animal danu do ia alaia ore. “Saulo ese Amaleka taudia ia halusia, idia tuari lao Havila hanua dekena amo ela bona Suru hanua.” Samuela ia mai neganai, Saulo ia kwalimu dainai mai moale ida ia gwau: “Lohiabada ese oi do ia hanamoa, lau ese Lohiabada ena oda hereva lau karaia vadaeni.” Ena be Saulo be Iehova ena oda herevana ia diba, to ia bona ena tuari taudia ese King Agaga bona “mamoe bona boromakau namodia, bona boromakau natudia bona mamoe natudia namodia be idia alaia lasi. Gau namodia be idia hadikaia ore lasi.” King Saulo be iena kamonai lasi karana dainai, inai ekskius herevana ia gwauraia: “Tuari taudia ese . . . mamoe bona boromakau namodia sibona idia alaia lasi, Lohiabada, oiemu Dirava dekenai boubou gauna do idia henia totona.”—1 Samuela 15:1-15.
10. Saulo be dahaka kara ia karaia lasi?
10 Unai nega ai, Samuela be Saulo ia hamaoroa: “Edena kara be Lohiabada ia ura henia bada, a? Idia gabua boubou, bona boubou idauidau ia ura henia, a? Lasi, Lohiabada ena hereva idia kamonai henia taudia, be ia ura henia, ani? Oi laloa namonamo: Lohiabada kamonai henia kara, ese boubou karadia ia hereaia, bona Lohiabada ena hereva badinaia kara, ese mamoe namodia edia digara ia hereaia.” (1 Samuela 15:22) Iehova ia gwau vadaeni, unai animal be do idia alaia mase, unai dainai idia be hegeregere lasi Iehova dekenai idia bouboulaia totona.
Gau Ibounai Dekenai Kamonai Karana Hahedinaraia
11, 12. (a) Iseda hekwarahi Iehova ita tomadiho henia totona, be Ia ese edena bamona ia laloa? (b) Edena dala ai Keristani tauna be sibona ia koia diba?
11 Iehova ia moale bada badina ia itaia ena kamonai hesiai taudia be dagedage lalonai idia gini goada, Basileia sivaraina idia harorolaia, ena be taunimanima idia ura lasi kamonai, bona Keristani heboudia dekenai idia lao ena be moni dalanai idia hekwarahi bada! Unai gaudia dekenai iseda kamonai karana ita hahedinaraia neganai, Iehova ia moale bada! Ita hekwarahi mai lalokau ida Iehova ita tomadiho henia neganai, iseda hekwarahi ia laloa bada. Reana, taunimanima ese iseda hekwarahi idia laloa bada lasi, to Dirava ese iseda lalona ibounai ida ita karaia boubou gaudia ia itaia bona ia laloatao.—Mataio 6:4.
12 To, Iehova ita hamoalea momokani totona, namona be iseda mauri lalonai, gau ibounai dekenai Ia do ita kamonai henia. Namo lasi ita laloa, iseda mauri lalonai Iehova tomadiho henia karadia haida ita karaia dainai, ia maoro ena taravatu haida ita utua totona. Hegeregere, Keristani tauna be sibona ia koia diba, bona ia laloa hebou dekenai ia lao bona ia haroro dainai, ia namo matabodaga karadia eiava kerere badadia ma haida ia karaia totona. Unai be lalohadai kererena!—Galatia 6:7, 8.
13. Ruma ai sibona ita noho neganai, edena hahetoho ese iseda kamonai karana ia hadikaia diba?
13 Unai dainai, sibona ita nanadaia: ‘Dina ta ta ai lau karaia gaudia bona sibona lau noho neganai, lau be Iehova lau kamonai henia noho, a?’ Iesu ia gwau: “Gau maragina ia karaia maoro tauna ese gau badadia do ia karaia maoro, to gau maragina ia karaia kerere tauna ese gau badadia do ia karaia kerere danu.” (Luka 16:10) ‘Iseda ruma dekenai’ ena be ta ese ita ia itaia lasi, to ‘kara maoromaoro dalana sibona ita badinaia, a?’ (Salamo 101:2) Oibe, sibona iseda ruma lalonai ita noho neganai, hahetoho ita davaria diba danu. Lagani haida gunanai, laulau dikadia be matabodaga moale gabudia sibona dekenai idia itaia. To, hari tano momo ai ruma bese momo be mai edia kompiuta bona laulau dikadia idia hedinarai haraga diba. Iesu ena hereva do ita laloatao bona inai kara do ita dadaraia, a? Ia gwau: “Tau ta ese hahine ta do ia itaia noho matana dekenai, ela bona iena lalona dekenai do ia ura dikadika, iena kudouna dekenai unai tau be ia heudahanai vadaeni.” Oibe, matabodaga laulaudia danu do ita dadaraia. (Mataio 5:28; Iobu 31:1, 9, 10; Salamo 119:37; Aonega Herevadia 6:24, 25; Efeso 5:3-5) Televisen dekenai idia hedinarai dagedage laulaudia do ita raraia eiava lasi? Dirava be dagedage karana ia ura lasi momokani—ita be unai bamona danu, a? (Aonega Herevadia 3:31, 32) Eiava ruma ai sibona oi noho neganai, kekero muramura bada herea oi inua karana be edena bamona? Baibel ese inuinu kekero karana ia taravatua, bona Keristani taudia ia sisiba henidia namona be “inuinu kekero ese idia do ia biagua lasi.”—Tito 2:3; Luka 21:34, 35; 1 Timoteo 3:3.
14. Moni ita gaukaralaia neganai, edena dala ai Dirava kamonai henia karana ita hahedinaraia?
14 Ita naria namonamo karana ma ta be moni ita gaukaralaia dalana. Hegeregere, ita ura moni bada ita abia haraga totona, idia maoro lasi bisinesi karadia dekenai moni ita atoa, a? Takisi moni henia karana ita dadaraia totona ita koikoi, a? Baibel ia gwau: “Ibounai ta ta dekenai edia davana do umui henidia. Takisi gogoa tauna dekenai takisi do umui henia.” Ita be mai iseda lalona ibounai ida unai oda hereva ita badinaia, a?—Roma 13:7.
Lalokau Dainai Dirava Ita Kamonai Henia
15. Dahaka dainai oi ese Iehova ena oda herevadia oi badinaia?
15 Dirava ena hakaua herevadia badinaia karana ese hahenamo ia mailaia. Hegeregere, kuku ita ania lasi, matabodaga karadia ita karaia lasi bona rara ita abia hanai lasi dainai, ita be gorere idauidau momo ita abia lasi. Danu, Baibel ena hereva hegeregerena ita noho neganai, moni dekenai ita hegeregere, iseda mauri ia namo bona iseda ruma bese idia moale. (Isaia 48:17) Unai gaudia ese idia hahedinaraia, Dirava ena taravatu ita badinaia karana ese hahenamo ia mailaia. Sibona iseda ura gaudia abia totona Dirava ita hesiai henia lasi. (Iobu 1:9-11; 2:4, 5) To, ita ese Iehova ita kamonai henia, badina be Ia ita lalokau henia. Dirava ese ita dekenai ura kwalimu ia henia, unai amo daika ita ura kamonai henia ita abia hidi diba. Abia hidi ita karaia vadaeni Iehova ita kamonai henia totona, badina ita ura Ia ita hamoalea bona dala maorona ita badinaia.—Roma 6:16, 17; 1 Ioane 5:3.
16, 17. (a) Edena dala ai Iesu be lalokau dainai Dirava ia kamonai henia? (b) Edena dala ai Iesu ita tohotohoa diba?
16 Iesu be lalokau bada dainai Iehova ia kamonai henia, bona ia be haheitalai namona ita dekenai. (Ioane 8:28, 29) Iesu be tanobada dekenai ia noho neganai, ia davaria “hisihisi ese Dirava kamonai henia dalana ia hadibaia.” (Heberu 5:8, 9) Edena dala ai? “Keriso ese iena hairai ia laloa lasi, to ia manau momokani. Bona ia ese Dirava ia kamonai henia ela bona ia mase, oibe, satauro dekenai ia mase.” (Filipi 2:7, 8) Ena be Iesu be guba ai kamonai karana ia dibaia vadaeni, to tanobada dekenai ia mai neganai, Dirava kamonai henia karana dekenai hahetoho ia davaria. Ita diba momokani, Iesu be ia hegeregere iena horoa tadikaka bona ia idia abidadama henia taudia ma haida totona, Hahelaga Tauna Badana ena gaukara do ia karaia.—Heberu 4:15; 1 Ioane 2:1, 2.
17 To, ita be edena bamona? Namona be ita ese Iesu ena haheitalai ita tohotohoa bona iseda mauri lalonai Dirava ena hesiai gaukara do ita atoa guna. (1 Petero 2:21) Hedibagani ita davaria neganai, Iehova ita lalokau henia dainai iena taravatu ita badinaia karana ese lalomaino ia havaraia. (Roma 7:18-20) Unai ena anina be, iseda orea lalonai gunalaia gaukara idia karaia taudia do ita kamonai henidia, ena be idia be goevadae lasi taudia. (Heberu 13:17) Iehova vairanai, iseda mauri lalonai Iena oda herevadia ita badinaia karana be mai anina bada.
18, 19. Dirava ita kamonai henia dainai dahaka hekwakwanai ita davaria? To, dahaka namo ita davaria danu?
18 Hari inai negai, Iehova ita kamonai henia totona iseda abidadama do ita dogoatao auka bona dagedage do ita haheaukalaia be namo. (Kara 5:29) Danu, Iehova ena oda haroro bona hahediba gaukara ita karaia totona, namona be ita haheauka ela bona inai tanobada dikana ia ore. (Mataio 24:13, 14; 28:19, 20) Ena be tanobada amo hekwakwanai momo ita davaria, to namona be iseda tadikaka ida ita hebou karana do ita goadalaia noho. Iseda lalokau Diravana ia diba unai negadia ai ita hekwarahi bada Ia ita badinaia noho totona. To, Dirava ita kamonai henia totona, namona be ita hekwarahi iseda tauanina ena ura bona kara dikadia ita dadaraia bona kara namodia do ita ura henia.—Roma 12:9.
19 Bema mai lalokau ida bona kudouna ibounai ida Iehova ita hesiai henia, Dirava ese davana namona ita dekenai do ia henia. (Heberu 11:6) Iehova dekenai boubou gaudia namodia ita henia diba, to Iehova ia moalelaia bada gauna be inai: Lalokau dainai Ia ita kamonai henia.—Aonega Herevadia 3:1, 2.
Edena Bamona Do Oi Haere?
• Dahaka dainai ita gwau diba ita be Iehova dekenai gau ta ita henia diba?
• Saulo be dahaka kerere ia karaia?
• Edena dala ai oi hahedinaraia kamonai karana be boubou karana ia hereaia?
• Dahaka dainai Iehova oi kamonai henia?
[Study Questions]
[Picture on page 12]
Doketa be dahaka do ia laloa iena hereva ia kamonai lasi gorere tauna dekenai?
[Picture on page 15]
Dahaka dainai Iehova be King Saulo ia badu henia?
[Pictures on page 16]
Ruma lalonai oi sibona oi noho neganai, Dirava ena taravatu oi badinaia, a?