“Kara Namo Dekena amo Dika Do Umui Halusia”
“Kara Namo Dekena amo Dika Do Umui Halusia”
“Namo lasi dika ese umui do ia halusia, to umui ese kara namo dekena amo dika do umui halusia.”—ROMA 12:21.
1. Dahaka dainai ita diba ita ese dika ita halusia diba?
TOMADIHO momokanina idia dagedage henia taudia ita halusia diba, a? Bema haida be ita idia veria tanobada dikana dekenai ita giroa lou totona, idia ita halusia diba, a? Oibe! Dahaka dainai ita gwau oibe? Badina aposetolo Paulo ese Roma taudia dekenai ia torea herevana be ita ia hagoadaia. Ia gwau: “Namo lasi dika ese umui do ia halusia, to umui ese kara namo dekena amo dika do umui halusia.” (Roma 12:21) Bema Iehova ita abidadama henia bona iseda lalona ita hadaia tanobada ita halusia, vadaeni tanobada ena dika danu be do ita halusia. Ma danu, ‘kara namo dekena amo dika do ita halusia’ diba bema ita hesiku lasi to kara dika ita dadaraia noho. To bema ta ia hesiku o ia naria namonamo lasi, vadaeni inai tanobada dikana bona tanobada ena lohia dikana Satani Diabolo ese unai tau do ia halusia.—1 Ioane 5:19.
2. Dahaka dainai Nehemia ena negai idia vara gaudia haida do ita itaia?
2 Lagani 500 gunanai—Paulo ena nega ia do vara lasi neganai—Ierusalema ai, Dirava ena hesiai tauna ta be dika ia halusia, unai be Paulo ena hereva bamona. Unai tau be Nehemia, bona ia be dagedage ia haheaukalaia sibona lasi, to, ena kara namo amo dika ia halusia danu. Nehemia be dahaka hahetoho ia abia? Dahaka dainai ia kwalimu? Edena dala ai Nehemia ita tohotohoa diba? Unai henanadai ita haerelaia totona, mani Nehemia ena negai idia vara gaudia haida ita itaia. *
3. Nehemia be edena bamona taudia huanai ia noho? Bona dahaka gaukara badana ia hagugurua?
3 Nehemia be Parasa ena King Aratasaseta ena ruma ai ia gaukara. Ena be Nehemia be Iehova idia tomadiho henia lasi taudia ida ia noho, to ia be unai negai idia noho ‘taudia edia kara bamona ia karaia lasi.’ (Roma 12:2) Bona nega ta ai, Nehemia ia ura Iuda taudia ia durua dainai, ia ese ena mauri namona ia rakatania, laolao aukana ta ia karaia ela bona Ierusalema dekenai ia ginidae, bona Ierusalema ena magu badana haginia gaukarana ia gunalaia. (Roma 12:1) Ena be Nehemia be Ierusalema ena gavana, to “dina ibounai, daba maragi dekena amo ela bona hisiu idia daekau neganai,” Nehemia be iena tadikaka ida ia gaukara hebou. Unai dainai, hua rua murinai, Ierusalema ena magu idia haorea! (Nehemia 4:21; 6:15) Unai be hoa gauna, badina Israela taudia be unai gaukara idia karaia lalonai hahetoho momo idia abia. Nehemia idia dagedage henia taudia be daidia, bona idia ura Nehemia be dahaka ia karaia?
4. Nehemia idia dagedage henia taudia edia ura badana be dahaka?
4 Dagedage taudia badadia be Sanubalata, Tobaia, bona Geseme, bona idia be Iuda kahirakahira ai idia noho bona ladana bada taudia. Idia be Dirava ena taunimanima idia dagedage henia taudia, bona “idia ura lasi [Nehemia] ese Israela hanamoa totona do ia mai.” (Nehemia 2:10, 19) Dagedage taudia idia ura bada Nehemia be magu ia haginia lasi. ‘Dika ese Nehemia do idia halusia,’ a?
“Idia Badu Momokani”
5, 6. (a) Nehemia ena gaukara dainai, dagedage taudia be dahaka idia gwau? (b) Dahaka dainai Nehemia be dagedage taudia dekenai ia gari lasi?
5 Nehemia be mai gari lasi ida Israela taudia ia hamaoroa: “Namona be Ierusalema ena magu ita haginia lou.” Israela taudia idia gwau: “Ita haginia lou.” Nehemia ia gwau: “Unai dainai unai gaukara namona idia hamatamaia,” to dagedage taudia be “ai dekenai idia kirikiri bona idia hereva dika, idia gwau, ‘Umui be dahaka umui karaia noho? Umui ese king Aratasaseta do umui dagedage henia, a?’ ” Nehemia be edia hereva bona koikoi herevadia dekenai ia gari lasi. To ia ese dagedage taudia ia hamaoroa: “Guba ena Dirava ese ai dekenai kwalimu do ia henia. Ai be iena hesiai taudia, bona haginia gaukara do ai karaia.” (Nehemia 2:17-20) Nehemia be unai ‘gaukara namona ia hamatamaia.’
6 Sanubalata “be ia badu momokani” bona hereva dikadia momo ia gwauraia. Ia gwau: “Inai Iuda, manoka taudia be dahaka idia karaia noho? . . . Lahi ese ia gabua ore nadi dikadia dekena amo, hanua idia haginia nadidia idia halaoa, a?” Bona Tobaia ia gwau: “Io, idia be dahaka idia haginia noho? Bema uda sisia ta be edia nadi maguna ena latanai ia daekau neganai ia ese do ia veria diho.” (Nehemia 4:1-3) Nehemia be dahaka ia karaia?
7. Ena be dagedage taudia be hereva dikadia idia gwauraia, to Nehemia be dahaka ia karaia?
7 Nehemia be dagedage taudia edia hereva ia laloa bada lasi. To, Dirava ena oda ia badinaia bona dagedage taudia edia dika davana ia henia lasi. (Levitiko 19:18) Nehemia ese gau ibounai be Iehova ena imana dekenai ia atoa, bona ia guriguri ia gwau: “Dirava e, edia hereva dika mani oi kamonai. Edia hereva dika be edia kwarana dekenai do oi hamorua diho.” (Nehemia 4:4) Nehemia be Iehova ena hereva ia abidadama henia, badina be Iehova ia gwau: “Lohiabada ese dika ena davana do ia henia, bona namo ena davana danu.” (Deuteronomi 32:35) Ma danu, Nehemia bona ena taunimanima be ‘magu idia haginia noho.’ Gau ta ese edia gaukara ia hadikaia lasi. Unai dainai, ‘nega daudau lasi lalonai magu ibounai ena ataiai lata korikori ena kahana be idia haorea, badina taunimanima idia gaukara goada, mai edia kudouna ibounai danu.’ (Nehemia 4:6) Tomadiho momokani idia dagedage henia taudia be magu haginia gaukarana idia koua lasi! Edena dala ai Nehemia ita tohotohoa diba?
8. (a) Bema dagedage taudia ese ita idia samania koikoi, ita be edena dala ai Nehemia ita tohotohoa diba? (b) Oi davaria ekspiriens ta eiava oi kamonai ekspiriens ta oi kikilaia, hegeregere oi hahedinaraia dahaka dainai ta ena dika davana ita henia lasi be aonega karana.
8 Hari, sikuli gabunai, moni gaukara gabunai, o iseda noho gabunai dagedage taudia be ita idia kirikirilaia bona samania koikoi. To, nega momo ita kwalimu badina ita be inai Baibel ena hakaua herevana ita badinaia, ia gwau: “Regerege lasi dekenai ita noho be mai ena nega.” (Hadibaia Tauna 3:1, 7) Nehemia bamona, ita be badu herevadia ita gwauraia lasi. (Roma 12:17) To, Dirava ita guriguri henia badina be Dirava ia gwau: “Dika ena davana be lau sibona ese do lau karaia.” (Roma 12:19; 1 Petero 2:19, 20) Unai bamona ita karaia badina ita ura lasi dagedage taudia ese iseda gaukara—Dirava ena Basileia ena sivarai namona ita harorolaia gaukarana bona hahediba taudia halaoa gaukarana—do idia koua. (Mataio 24:14; 28:19, 20) Nega ta ta ai, Nehemia bamona haroro gaukara ita karaia bona ita ura lasi dagedage karadia dainai ita manoka.
‘Idia Do Ita Alaia’
9. Dagedage taudia be dahaka idia karaia? To Nehemia be dahaka ia karaia?
9 Dagedage taudia be “Ierusalema ena magu ena matu bona ena makohia gabudia idia hanamoa noho sivarai idia kamonai neganai,” edia tuari kaia idia abia “Ierusalema do idia tuari henia . . . totona.” Reana Iuda taudia idia gari. Badina Samaria be not kahanai ia noho, Amono be ist kahanai ia noho, Arabia be saut kahanai ia noho, bona Asadoda be west kahanai ia noho. Ierusalema be unai hanua foa huanai ia noho; toana be magu do idia haginia taudia be do idia heau diba lasi! Dahaka do idia karaia? Nehemia ia gwau: “Ai ese aiemai Dirava dekenai ai guriguri.” Dagedage taudia idia gwau: ‘Idia do ita alaia, bona edia gaukara do ita hadokoa.’ To, Nehemia ese magu haginia taudia dekenai “tuari kaia, io, bona diba bona peva” ia henia, hanua idia gimaia totona. Reana haida idia gwau Iuda orea maragina be unai dagedage orea badana do idia halusia diba lasi, to Nehemia ia gwau: “Ita idia tuari henia gwauraia taudia dekenai umui gari lasi. Lohiabada umui laloa noho. Ia be mai siahu bada bona mai garina.”—Nehemia 4:7-9, 11, 13, 14.
10. (a) Dahaka dainai dagedage taudia idia tuari lasi? (b) Nehemia be dahaka kara haida ia karaia?
10 To karaharaga gau ibounai ia senisi. Dagedage taudia idia tuari lasi. Dahaka dainai? Nehemia ia gwau: “Dirava ese edia palani ia hadikaia vadaeni.” To, Nehemia ia diba dagedage taudia be hahetoho do idia havaraia noho. Unai dainai, ia ese Ierusalema ena magu idia haginia taudia edia gaukara ia haidaua sisina. Unai negai, “haginia totona kohu idia huaia taudia ese edia imana ta dekenai idia gaukara, ma edia imana ta dekenai tuari gaudia idia dogoatao.” Danu, Nehemia be ta ia abia hidi “kibi do ia hiriria” totona, unai amo magu haginia taudia do ia hadibaia tuari taudia be idia mai noho. Ma danu, Nehemia be Iuda taudia ia hagoadaia: “Iseda Dirava ese ita dainai do ia tuari.” (Nehemia 4:15-20) Unai dainai, Ierusalema ena magu idia haginia taudia be Nehemia ena hagoadaia hereva dainai, gaukara idia karaia noho. Unai sivarai amo dahaka ita dibaia diba?
11. Ena be tano haida dekenai gavamani ese haroro gaukara idia taravatua, to dahaka dainai Iehova ena Witnes taudia be idia haroro noho? Edena dala ai idia be kara namo dekena amo dika idia halusia?
11 Nega haida, Keristani taudia korikoridia be dagedage idia davaria. Tano haida ai, tomadiho momokani idia dagedage henia taudia edia siahu be ia bada. Madi, iseda tadikaka be unai bamona tanodia dekenai dika bada idia davaria noho. To, unai tadikaka bona taihu idia abia dae momokani ‘Dirava ese idia dainai do ia tuari.’ Momokani, nega momo unai tadikaka bona taihu idia mamia Iehova be edia guriguri ia haerelaia, bona dagedage taudia goadadia be ‘edia gaukara idia koua’ lasi. Ena be tano haida dekenai gavamani ese haroro gaukara idia taravatua, to Iehova ena Witnes taudia be dala idauidau ai sivarai namona idia harorolaia noho. Dika negana ai Ierusalema ena magu idia haginia taudia be edia gaukara idia haidaua hegeregerena, Iehova ena Witnes taudia danu be dika negadiai edia haroro daladia idia haidaua. Momokani, Iehova ena Witnes taudia be ala-ala kohudia idia gaukaralaia lasi. (2 Korinto 10:4) Bona dagedage karadia ese edia haroro gaukara ia koua diba lasi. (1 Petero 4:16) Unai dainai, unai tadikaka bona taihu goadadia be edia ‘kara namo dekena amo dika idia halusia.’
“Oi Mai . . . Do Ita Hebou”
12, 13. (a) Dagedage taudia be dahaka koikoi karana idia karaia? (b) Dahaka dainai Nehemia be dagedage taudia edia noinoi ia dadaraia?
12 Dagedage taudia idia itaia Nehemia be edia hereva dekenai ia kamonai lasi dainai, idia be koikoi daladia idia tohoa. Momokani, idia be dala toi idia gaukaralaia. Unai dala toi be dahaka?
13 Ginigunana: Dagedage taudia idia ura Nehemia idia koia. Idia gwau: “Oi mai, Ono ena tano palaka ena hanua ta dekenai do ita hebou.” Ono hanua be Ierusalema bona Samaria edia huanai ia noho. Unai dainai, dagedage taudia idia ura Nehemia bona idia be Samaria bona Ierusalema huanai idia hedavari, hepapahuahu idia hamaoromaoroa totona. Reana Nehemia ia gwau diba: ‘Unai be lalohadai namona. Herevahereva be namo bona tuari be dika.’ To Nehemia ia ura lasi. Badina ia gwau: “Idia ura lau do idia hadikaia.” Nehemia be edia koikoi dalana ia lalopararalaia dainai, edia tarapu dekenai ia moru lasi. Nega foa, Nehemia be dagedage taudia dekenai ia gwau: “Lau ese gaukara badana ta lau karaia noho, bona lau rakatania diba lasi. Inai gaukara do lau hadokoa, bona oi dekenai do lau lao, a?” Dagedage taudia idia ura Nehemia ena gaukara idia koua. To Nehemia be magu haginia gaukarana sibona ia laloa bada.—Nehemia 6:1-4.
14. Dagedage taudia be koikoi herevadia idia halasia neganai, Nehemia be dahaka ia karaia?
14 Iharuana: Dagedage taudia be koikoi hereva idia halasia, idia gwau Nehemia be King Aratasaseta ‘ia dagedage’ henia. Nega ta, ta be Nehemia dekenai ia gwau: “Unai dainai inai kara be oi bona lau do ita herevalaia hebou be namo.” To, Nehemia be dagedage taudia edia palani ia lalopararalaia dainai, edia hereva ia kamonai lasi. Bona ia gwau: “Idia ibounai idia ura ai idia hagaria momokani, ai ese magu gaukara dekenai do ai manoka bona gaukara do ai hadokoa totona.” Bona unai negai, Nehemia be dagedage taudia edia koikoi herevadia dainai ia gwau: “Oi gwauraia kara ta ai karaia lasi. Oi sibona ese oi laloa kava noho.” Unai sibona lasi, to Nehemia be Iehova ia guriguri henia ia gwau: “Dirava e, harihari egu imana oi ha-aukaia.” Nehemia ia diba Iehova ena heduru dainai ia be dagedage karadia do ia hanaia bona Ierusalema ena magu do ia haorea.—Nehemia 6:5-9; NW.
15. Semaia be dahaka ia gwau? Dahaka dainai Nehemia be Semaia ena hereva ia kamonai lasi?
15 Ihatoina: Dagedage taudia be Israela tauna Semaia idia hamaoroa, Nehemia ena lalona do ia veria Dirava ena taravatu ta ia utua totona. Semaia be Nehemia dekenai ia gwau: “Dirava ena Dubu Helaga lalonai do ita raka vareai, unuseni iduara do ita lokaia, bona Dubu ena lalonai do ita hunia, badina be hanuaboi lalonai oi alaia mase totona tau haida do idia mai.” Semaia ia gwau, haida be Nehemia do idia alaia mase to Nehemia do ia mauri bema dubu dekenai ia heau vareai. To, Nehemia be hahelaga tauna lasi. Unai dainai, bema Nehemia be dubu helaga dekenai ia vareai, unai be kara dikana. Nehemia be ena mauri do ia laloa bada bona dubu helaga lalonai do ia vareai bona ia komu, a? Nehemia ia gwau: “Lau hegeregerena tauna ta do ia heau bona hunia, a? Oi laloa tau ta, lau hegeregerena, bema Dubu Helaga ena lalonai ia hunia neganai mauri do ia davaria diba, a? Lau be do lau raka vareai lasi momokani.” Dahaka dainai Nehemia be Semaia ena tarapu dekenai ia moru lasi? Badina ia diba, ena be Semaia be Israela tauna ta, to “Dirava ese unai peroveta hereva ia siaia lasi.” Ma danu, peroveta tauna korikorina be Nehemia do ia hamaoroa lasi Dirava ena taravatu ia utua totona. Oibe, dagedage taudia be Nehemia idia halusia lasi. Gabeai, Nehemia ia gwau: “Iuda taudia ese magu haginia lou gaukara be dina 52 lalonai idia haorea, unai be hua ladana Elulu ena dina namba 25 dekenai idia haorea.”—Nehemia 6:10-15; Numera 1:51; 18:7.
16. (a) Eda turadia, samania koikoi taudia, bona tadikaka taihu haida ese ita idia dagedage henia neganai, dahaka ita karaia be namo? (b) Edena dala ai emu noho gabunai, sikuli gabunai, bona moni gaukara gabunai oi hahedinaraia, oi be Dirava ena taravatu oi badinaia noho?
16 Nehemia bamona, ita danu be nega haida eda turadia, samania koikoi taudia, bona tadikaka taihu haida ese ita idia dagedage henia. Haida be ita idia doria Dirava ena taravatu ta ita utua totona. Reana idia ura inai lalohadai ita abia: Bema Iehova ena hesiai gaukara ita hamaragia, vadaeni tanobada ena gau namodia ita tahua diba. To, iseda mauri lalonai Dirava ena Basileia ita tahua guna dainai, ita ura lasi Dirava ena taravatu ta ita utua. (Mataio 6:33; Luka 9:57-62) Danu, dagedage taudia be koikoi herevadia idia halasia. Nehemia ena negai, haida idia gwau ia be King ia gwau-edeede henia, unai hegeregerena tano haida ai, haida idia gwau ita be Gavamani ita hadikaia. Unai bamona koikoi herevadia haida be kota ese ia abia dae lasi. Herevana dahaka ia vara, to guriguri amo Iehova ita noia Iena ura hegeregerena ita ia hakaua totona. (Filipi 1:7) Iehova idia hesiai henia koikoi taudia haida ese ita idia dagedage henia danu. Iuda tauna ta ese Nehemia ia doria Dirava ena Taravatu ta ia utua hegeregerena, hari inai negai idia noho aposteit taudia o Witnes taudia gunadia haida be ita idia doria Dirava ena taravatu ta ita utua totona. To, aposteit taudia edia hereva ita kamonai lasi, badina ita diba bema Dirava ena taravatu ita badinaia noho, mauri do ita abia! (1 Ioane 4:1) Oibe, Iehova be ita ia durua dainai, ita be dika ita halusia diba.
Dagedage Lalonai Sivarai Namona Harorolaia
17, 18. (a) Satani bona ena orea edia ura badana be dahaka? (b) Oi be dahaka do oi karaia bona dahaka dainai?
17 Baibel ese Keriso ena horoa tadikakadia ia herevalaia neganai, ia gwau: “Hereva idia gwauraia dainai, Satani dekena amo idia kwalimu.” (Apokalupo 12:11) Oibe, Baibel ese Satani—dika ena badina—halusia karana bona Basileia sivaraina harorolaia karana be ia gwauraia hebou. Unai dainai, Satani ia hesiku lasi, to horoa taudia bona hutuma bada taudia ia tuari henidia noho!—Apokalupo 7:9; 12:17.
18 Ita itaia vadaeni, haida be edia hereva, edia botaia karana, bona koikoi daladia ma haida amo ita idia dagedage henia. Herevana dahaka ita davaria, to Satani be nega ibounai ia ura haroro gaukara ia koua. To, Satani do ia kwalimu lasi, badina be Dirava ena taunimanima be Nehemia bamona, edia lalona idia hadaia edia ‘kara namo dekena amo dika do idia halusia.’ Idia ura sivarai namona idia harorolaia noho ela bona Iehova ia gwau, haroro gaukara hadokoa!—Mareko 13:10; Roma 8:31; Filipi 1:27, 28.
[Footnote]
Oi Laloatao, A?
• Idaunegai bona hari, Dirava ena hesiai taudia be dahaka dagedage karana idia davaria noho?
• Nehemia idia dagedage henia taudia edia ura gauna badana be dahaka? Bona hari Witnes taudia idia dagedage henia taudia edia ura gauna badana be dahaka?
• Hari inai negai, ita be edena dala ai kara namo amo dika ita halusia?
[Study Questions]
[Box/Picture on page 29]
Baibel Bukana Nehemia Ia Hadibaia Gaudia
Haida ese Dirava ena hesiai taudia do idia
• kirikirilaia
• hagaria
• koia
Koikoi taudia haida be
• turadia
• samania taudia
• tadikaka taihu haida
Dirava ena hesiai taudia ese dika do idia halusia bema
• Dirava ena hesiai gaukara idia karaia noho
[Picture on page 27]
Herevana dagedage ia vara, to Nehemia bona ena tadikaka be Ierusalema ena magu idia haginia
[Picture on page 31]
Keristani taudia korikoridia be mai gari lasi ida sivarai namona idia harorolaia