Matamata Taudia Dekenai Kara Namodia Idia Hadibaia be Namo

ARGENTINA ena hanua Mendoza ai, Gladys be sikuli ta dekenai ia gaukara. Dina ta ai, Gladys be klasrum ta badinai ia raka hanai neganai, ia itaia greid-foa tisa ta be ena stiuden taudia dekenai Lauegu Baibel Sivarai Bukana ia duahia. * Gladys be tisa dekenai ia lao bona ia gwau ia be Iehova ena Witnes hahinena ta, bona tisa dekenai unai buka ena namo ia herevalaia. Tisa ia moale bada bona ia gwau stiuden ese unai buka idia gaukaralaia hanaihanai be namo. To, ia gwau sikuli ena administreisen amo gwaumaoro ia abia guna be namo. Bona tisa ia moale badina sikuli ena administreisen ese gwaumaoro idia henia unai buka ia gaukaralaia totona.

Gabeai, sikuli ai Buka Duahia dinana ta ia ginidae neganai, tisa ese iena stiuden taudia ia abia hidi unai buka ena karoa ta be edia sikuli turadia vairanai do idia duahia. Unai duahiduahi karana ese namo bada ia havaraia dainai, televisen steiseni ta ese unai tisa idia boiria TV program ta ai do idia inteviu henia totona. Tisa ese stiuden edia kara ia herevalaia neganai, TV program naria tauna ia henanadai, “Edena bamona emu stiuden oi durua dainai klasrum dekenai oi idia kamonai henia?” Tisa ia gwau, ia be buka ta ladana Lauegu Baibel Sivarai Bukana ia gaukaralaia stiuden ia hadibaia totona. Tisa ma ia gwau, ena be ia ese stiuden taudia dekenai tomadiho ena hahediba herevadia ia hadibaia lasi, to unai buka amo kara namodia hegeregere, hemataurai, manau, lalotamona, gaukara hebou, kamonai bona lalokau ia hadibaia. Ibounai idia gwau, matamata taudia dekenai kara namodia idia hadibaia be namo.

Oi ura emu natudia dekenai unai bamona kara namodia oi hadibaia, a? Iehova ena Witnes tauna ta oi noia diba, Lauegu Baibel Sivarai Bukana ta oi abia totona.

[Footnote]