Basileia Idia Abia Totona Idia Hegeregere Taudia
Basileia Idia Abia Totona Idia Hegeregere Taudia
“Inai umui karaia noho kara namodia ese idia hedinaraia, Dirava ena kota be maoromaoro momokani. . . . Dirava ese davana namona umui dekenai do ia henia iena Basileia lalonai.”—2 TES. 1:5.
1, 2. Dirava ese daika do ia abia hidi taunimanima ia kota henia totona?
LAGANI 50 C.E. bamona ai, aposetolo Paulo be Atena dekenai ia noho. To, ia moale lasi badina unai gabu ai kaivakuku tomadiho henia karadia be bada herea. Unai dainai ia ese haroro hereva namona ta ia henia. Iena hereva ia hadokoa neganai, gau ta ia gwauraia bona ena hereva idia kamonai Dirava diba lasi taudia be idia hoa bada. Paulo ia gwau: “Harihari [Dirava] ese taunimanima ibounai gabu ibounai dekenai ia hamaoroa, ia gwau, ‘Umui emui lalona umui giroa.’ Badina be Dirava ese dina ta ia abia hidi vadaeni, unai dina dekenai iena abia hidi Tauna ese tanobada ibounai do ia kota henia mai maoromaoro danu. Bona inai kara Dirava ese ia hamomokania taunimanima ibounai edia vairanai, unai Tau mase dekena amo ia hamauria dainai.”—Kara 17:30, 31.
2 Unai siri ese ia hahedinaraia Dirava be dina ta ia abia hidi vadaeni taunimanima ia kota henia totona, unai be mai anina bada herevana! Atena dekenai Paulo ese unai kota do ia karaia tauna ena ladana ia gwauraia lasi, to ita diba ia be mase amo ia toreisi lou tauna, Iesu Keriso. Iesu ese taunimanima ia kota henia neganai, haida do idia mauri bona haida do idia mase.
3. Dahaka dainai Iehova be Aberahamo ida gwauhamata ta ia karaia, bona daika ese unai gwauhamata do ia hagugurua?
3 Kota Badana Dinana ena lata be lagani 1,000. Iehova ese Iesu ia abia hidi Dirava ena Basileia ena King ai do ia lao bona unai kota gaukara do ia karaia. To ia sibona ia lohia lasi, Iehova ese taunimanima amo haida ia abia hidi Iesu ida do idia lohia bona lagani 1,000 lalonai kota gaukara do idia karaia. (Luka 22:29, 30 hahegeregerea.) Lagani 4,000 bamona gunana, Iehova ese Aberahamo ida gwauhamata ta ia karaia neganai, unai Kota Badana Dinana totona dala ta ia hegaegaelaia. (Genese 22:17, 18 duahia.) Unai gwauhamata be lagani 1943 B.C.E. ai idia karaia. Momokani, Aberahamo be ia diba namonamo lasi edena dala ai unai gwauhamata be taunimanima dekenai do ia guguru. To, hari inai negai, ita diba Dirava ese taunimanima ia kota henia neganai, Aberahamo ena garana be maduna badana ia huaia.
4, 5. (a) Aberahamo ena garana be daika, bona Basileia totona dahaka ia gwau? (b) Edena negai dala ia kehoa taunimanima be Dirava ena Basileia lalonai idia vareai totona?
4 Aberahamo ena garana be Iesu. Ia be lagani 29 C.E. ai lauma helaga ese ia horoa bona gwauhamata Mesia eiava Keriso ai ia lao. (Gal. 3:16) Iesu be lagani toi mai kahana Iuda besena dekenai Basileia ena sivarai namona ia harorolaia. Ioane Bapatiso be dibura ruma dekenai idia atoa murinai, Iesu ia hahedinaraia haida be unai Basileia lalonai do idia vareai diba, ia gwau: “Ioane Bapatiso ese iena haroro ia hamatamaia ia mai bona harihari, Guba Basileia abia totona be taunimanima ese idia heatu henia noho, bona heatu taudia ese idia ura dogoatao momokani.”—Mat. 11:12.
5 Iesu be Basileia do idia “dogoatao” taudia ia do herevalaia lasi neganai, ia gwau: “Umui lau hamaoroa momokani, hahine edia bogana dekena amo idia vara taudia ibounai be ta ese Ioane ia hereaia lasi, to Guba Basileia lalonai, tau maragina sibona ese Ioane ia hereaia.” (Mat. 11:11) Dahaka dainai unai bamona ia hereva? Badina unai nega ai taunimanima be Basileia lalonai idia vareai dalana ia do kehoa lasi ela bona lauma helaga be Pentekoste 33 C.E. ai aposetolo taudia edia latanai ia bubua. Unai nega ai, Ioane Bapatiso be ia mase vadaeni.—Kara 2:1-4.
Aberahamo Ena Garana be Kara Maoromaoro Taudia
6, 7. (a) Edena dala ai Aberahamo ena garana be “guba dekenai idia noho hisiu bamona” ai idia lao? (b) Aberahamo be dahaka hahenamo ia abia, bona iena garana danu be dahaka hahenamo idia abia?
6 Dirava ese Aberahamo ia hamaoroa iena garana be do ia momo ia lao bona edia momo be “guba dekenai noho hisiu” bona kone dekenai idia noho miri bamona. (Gen. 13:16; 22:17) Anina be, Aberahamo ena negai taunimanima idia diba lasi hida be unai garana taudia ai do idia lao. To, gabeai edia namba korikorina ia hedinarai. Iesu bona ia ida do idia lohia taudia be 144,000.—Apok. 7:4; 14:1.
7 Baibel be Aberahamo ena abidadama ia gwauraia: “Aberamo ese Lohiabada dekenai ia abidadama henia, unai dainai Lohiabada ia gwauraia, Aberamo be maoro.” (Gen. 15:5, 6) Oibe, tau ta be “ia goeva bona namo momokani” lasi. (Iam. 3:2) To, Aberahamo ena abidadama dainai, Iehova ese kara maoromaoro tauna bamona ia kara henia bona iena turana ia gwauraia. (Isa. 41:8) Aberahamo ena garana ai idia lao taudia ma haida bona Iesu be Dirava ese ia gwauraidia kara maoromaoro taudia, bona idia ese idia abia hahenamo be Aberahamo ena hahenamo ia hanaia.
8. Aberahamo ena garana taudia edia hahenamo be dahaka?
8 Horoa Keristani taudia be Dirava ese ia gwauraia kara maoromaoro taudia, badina Iesu ena mauri davalaia boubou gauna idia abidadama henia. (Roma 3:24, 28) Iehova ena matanai, idia be kara dika lasi bona Dirava ese lauma helaga amo ia horoa dainai, idia be Dirava ena lauma natudia, Iesu Keriso ena tadikaka ai idia lao. (Ioa. 1:12, 13) Gwauhamata matamatana lalonai idia vareai bona bese matamatana, “Dirava ena Israela” ai idia lao. (Gal. 6:16; Luka 22:20) Unai be hahenamo badana! Dirava ese unai hahenamo idauidau ia henia dainai, horoa Keristani taudia be tanobada dekenai do idia noho hanaihanai ena helaro idia abia lasi. To, idia be mai moale ida guba dekenai Iesu ida Kota Badana Dinana ai do idia lohia hebou.—Roma 8:17 duahia.
9, 10. (a) Dirava ese edena negai Keristani taudia ia horodia, bona edia vairanai dahaka ia noho? (b) Horoa Keristani taudia be dahaka heduru idia abia?
9 Pentekoste 33 C.E. ai, dala ia kehoa abidadama hesiai taudia haida be Iesu ida Kota Badana Dinana ai do idia lohia hebou totona. Unai negai, Iesu ena hahediba taudia 120 be lauma helaga amo idia bapatiso, bona horoa taudia ginigunadia ai idia lao. To, unai be matamana sibona. Unai nega amo, ena be Satani ese idia dekenai hahetoho ia henia, to do idia hamomokania idia be Iehova idia badinaia noho. Guba dekenai edia ahuna idia abia totona, namona be Iehova idia badinaia ela bona idia mase.—Apok. 2:10.
10 Horoa Keristani taudia be idia gini goada noho totona, Iehova ese iena Hereva bona Keristani kongrigeisen amo idia ia hagoadaia. Hegeregere, Paulo be horoa Keristani taudia Tesalonika dekenai ia tore henia neganai, ia gwau: “Ai ese umui ta ta ai durua, tamana ese iena natuna ia durudia hegeregerena. Ai ura umui emui noho be Dirava ena ura hegeregerena. Unai dainai aiemai hereva goada dekena amo emui laloa ai hagoadaia noho. Badina Dirava ese umui ia boiria vadaeni, iena Basileia bona iena hairaina do umui abia totona.”—1 Tes. 2:11, 12.
11. Dirava ena Israela besena durua totona, Iehova be dahaka ia henia?
11 Iehova ese horoa Keristani taudia ginigunadia ia abia hidi, bena lagani 60 mai kahana murinai dala ia karaia Iesu ena haroro gaukara ena sivarai bona Iehova ese horoa taudia dekenai ia henia sisiba herevadia be Baibel lalonai idia torea. Unai amo Iehova ese Keristani Greek Revarevadia be Heberu Revarevadia ida ia haboua. Heberu Revarevadia be Israela bese taudia totona idia torea, unai nega ai idia be Dirava ena bese taudia. To, Keristani Greek Revarevadia be “Dirava ena Israela” besena totona idia torea. Dirava ena lauma helaga amo idia ia horoa bena Keriso ena tadikaka bona Dirava ena natudia ai idia lao. To, idau bese taudia be Heberu Revarevadia idia stadilaia neganai, namo idia davaria diba. Unai hegeregerena, horoa lasi Keristani taudia be Keristani Greek Revarevadia idia stadilaia bona idia badinaia neganai, namo bada idia davaria diba.—Timoteo Iharuana 3:15-17 duahia.
12. Paulo ese dahaka sisiba be horoa taudia dekenai ia henia?
12 Keristani taudia ginigunadia be Dirava ese ia gwauraia kara maoromaoro taudia bona lauma helaga amo ia horodia, unai amo idia ese edia guba ahuna idia abia diba. Dirava ese ia horodia neganai, idia ese horoa Keristani tadikaka ma haida idia lohiaia lasi. To, Keristani taudia ginigunadia haida be unai idia laloaboio, bona idia ura kongrigeisen lalonai ladana bada idia abia. Unai dainai, Paulo ese ia sisiba henidia: “Harihari umui be boga kunu vadaeni, harihari umui be kohu momo taudia. Umui ese ai umui hereaia vadaeni, bona king hegeregere umui halaoa, ani? Bema umui be king momokani be namo, vadaeni ai danu king taudia do ai halaoa umui danu.” (1 Kor. 4:8) Unai dainai, Paulo be ena negai idia noho horoa taudia ia hadibaia: “Ai ese umui emui abidadama ai biagua lasi. Ai diba umui emui abidadama lalonai umui gini goada noho. Unai dainai ai be umui danu ita gaukara hebou, emui moale do ai havaraia totona.”—2 Kor. 1:24.
Idia Perovetalaia Namba Ia Guguru
13. Lagani 33 C.E. murinai, Iehova ese horoa taudia ia abia hidi dalana be edena bamona?
13 Dirava ese horoa Keristani taudia be Aposetolo edia negai sibona amo ia abidia hidi lasi. Unai nega ai Dirava ese horoa taudia momo ia abia hidi, to gabeai laganidia lalonai ta ta sibona ia abia hidi. Lagani momo lalonai unai bamona Ia karaia. (Mat. 28:20) Bena, lagani 1914 ai Iesu ia lohia murinai, Iehova ese horoa taudia momo ia abia hidi matamaia lou.
14, 15. Iseda negai horoa taudia abia hidi dalana mani oi herevalaia.
14 Iesu ese ia karaia gauna ginigunana be, guba ia hagoevaia bona Iehova ena lohia siahuna idia dadaraia taudia ibounai ia kokia. (Apokalupo 12:10, 12 duahia.) Bena, Basileia lalonai do idia lohia taudia oredia ia haboua, unai amo unai namba 144,000 ia guguru. Lagani 1935 bamona ai, horoa taudia haboua gaukara be kahirakahira ia ore, badina Basileia ena sivarai idia kamonai taudia momo edia helaro be tanobada paradaiso dekenai do idia noho. Dirava ena lauma helaga ese idia be Iena natudia bamona ia abidia hidi lasi. (Roma 8:16 hahegeregerea.) To, idia gwau idia be “mamoe idaudia,” tanobada paradaiso do idia noholaia taudia unai. (Ioa. 10:16) Unai dainai, lagani 1935 murinai haroro gaukara idia karaia ena badina badana be hutuma bada taudia haboua totona. Unai taudia be Ioane ese matahanai lalonai ia itaia bona idia be hisihisi badana amo do idia roho mauri.—Apok. 7:9, 10, 14.
15 To, lagani 1935 amo ema bona hari danu, Dirava ese horoa taudia ta ta ia do abia hidi noho. Dahaka dainai? Nega haida unai bamona ia karaia, badina horoa taudia haida be idia manoka bona matamatadia ia abia hidi edia gabu idia abia totona. (Apok. 3:16 hahegeregerea.) Paulo ia gwau iena bamodia haida be hereva momokani idia dadaraia. (Fili. 3:17-19) Iehova be daika do ia boiria unai taudia edia gabu idia abia totona? Oibe, Iehova sibona be abia hidi ia karaia. Bona, ia boiria taudia be hari sibona hereva momokani idia abia dae taudia lasi, to nega daudau Iehova idia hesiai henia bona Ia idia badinaia ema bona hari. Iesu be Anibou ginigunana ia karaia neganai, ia ida idia noho hahediba taudia bamona. *—Luka 22:28.
16. Dahaka dainai horoa taudia dekenai ita moale, bona dahaka ita abia dae momokani?
16 To, lagani 1935 murinai ia abia hidi horoa taudia ibounai be idia manoka horoa taudia edia gabu abia totona ia boiridia lasi. Iehova ia hahedinaraia horoa taudia be ita ida do idia noho ela bona “Babulonia badana” do ia moru. * (Apok. 17:5) Bona ita diba momokani Iehova ena nega hegeregerena, horoa taudia edia namba ibounai 144,000 be do ia guguru bona idia ibounai be guba Basileia lalonai do idia lohia. Danu, peroveta herevadia hegeregerena ita abia dae momokani hutuma bada taudia be edia abidadama do idia rakatania lasi. Kahirakahira, Satani ena tanobada dekenai do ia vara ‘hisihisi badana’ amo do idia roho mauri bona Dirava ena tanobada matamatana lalonai do idia vareai.
Basileia Ena Lohia Taudia Edia Namba be Kahirakahira Do Ia Guguru!
17. Tesalonika Ginigunana 4:15-17 bona Apokalupo 6:9-11 hegeregerena, abidadama horoa taudia idia mase neganai, dahaka ia vara?
17 Lagani 33 C.E. amo, horoa Keristani taudia tausen momo be idia gini goada bona idia haheauka ela bona mase. Unai horoa taudia be idia hegeregere Dirava ena Basileia lalonai idia vareai totona bona Keriso ena noho negana ai unai ahuna idia abia matamaia.—Tesalonika Ginigunana 4:15-17; Apokalupo 6:9-11 duahia.
18. (a) Tanobada dekenai idia do noho horoa taudia be dahaka idia diba momokani? (b) Mamoe idaudia ese edia horoa tadikaka be edena bamona idia lalodia?
18 Tanobada dekenai idia do noho horoa taudia be idia diba momokani, bema Dirava idia badinaia noho, idia danu be guba dekenai edia ahuna namona do idia abia. Mamoe idaudia milioni momo be edia horoa tadikakadia edia abidadama idia laloa neganai, aposetolo Paulo be Tesalonika dekenai idia noho horoa tadikaka dekenai ia gwauraia herevana idia abia dae, ia gwau: “Ai ese Dirava ena ekalesia oreadia edia vairanai umui ai herevalaia mai heagi danu. Ai moalelaia gauna be, dagedage bona hisihisi bada umui abia noho, to umui goada noho, bona Dirava dekenai umui abidadama henia noho. Oibe, inai umui karaia noho kara namodia ese idia hedinaraia, Dirava ena kota be maoromaoro momokani. Bona iena Basileia totona inai hisihisi umui abia noho dainai, Dirava ese davana namona umui dekenai do ia henia iena Basileia lalonai.” (2 Tes. 1:3-5) Tanobada dekenai horoa tauna ginigabena ia mase neganai, Dirava ena guba gavamani lalonai do idia lohia taudia edia namba do ia guguru. Oibe, guba bona tanobada ai moale bada do ia vara!
[Footnotes]
^ par. 15 March 1, 1992, Gima Kohorona, rau 20, paragraf 17 itaia.
^ par. 16 “Questions From Readers,” May 1, 2007, ena Watchtower itaia.
Anina Oi Gwauraia Diba, A?
• Dirava be Aberahamo dekenai dahaka ia gwau bona edena dala ai unai hereva be mai anina Kota Badana Dinana totona?
• Dahaka dainai Dirava ia gwau Aberahamo be kara maoromaoro tauna?
• Dirava ia gwau Aberahamo ena garana taudia be kara maoromaoro taudia dainai, dahaka ahuna do idia abia?
• Keristani taudia ibounai be dahaka idia abia dae momokani?
[Study Questions]
[Picture on page 20]
Iesu ese iena murinai idia raka taudia ia hagoadaia Basileia idia tahua guna totona
[Picture on page 21]
Pentekoste 33 C.E. ai, Iehova ese Aberahamo ena garana taudia ma haida ia abia hidi matamaia
[Pictures on page 23]
Mamoe idaudia idia moale badina inai dina dokodia ai horoa Keristani taudia be idia ida idia noho