Emu “Hadibaia” Karana Oi Naria Namonamo
Emu “Hadibaia” Karana Oi Naria Namonamo
“Sivarai Namona do oi harorolaia . . . Taunimanima do oi sisiba henia, bona oiemu hereva dekena amo edia kudouna do oi pidia, ela bona edia lalona idia giroa. Taunimanima edia lalona do oi hagoadaia, bona idia do oi hadibaia, mai oiemu haheauka danu.”—2 TIM. 4:2.
1. Iesu ese dahaka hahegani be ena hahediba taudia dekenai ia henia? Bona Iesu be dahaka haheitalai ia hahedinaraia?
HEREVANA tanobada ai Iesu be gorere taudia ia hanamoa, to taunimanima ese Iesu ena ladana idia gwauraia lasi doketa o hoa karadia karaia tauna; lasi, to idia gwau ia be hadibaia tauna. (Mar. 12:19; 13:1) Iesu be Dirava ena Basileia harorolaia gaukarana ia laloa bada, bona hari inai negai, Iesu ena hahediba taudia be unai bamona idia karaia. Iesu be Keristani taudia ia hagania hahediba taudia halaoa gaukarana idia karaia noho be namo, anina be idia ese taunimanima do idia hadibaia Iesu ia henia hereva ibounai idia badinaia totona.—Mat. 28:19, 20.
2. Haroro gaukara ena maduna ita hagugurua totona, dahaka ita karaia be namo?
2 Iesu ena hahegani ita hagugurua totona, nega ibounai iseda hadibaia karana ita hanamoa be namo. Paulo be Timoteo ia tore henia neganai, ia hahedinaraia taunimanima hadibaia karana be mai anina bada. Ia gwau: “Oi sibona oiemu kara do oi naria namonamo, oiemu hadibaia hereva danu. Inai kara namodia do oi karaia noho, badina unai dekena amo, oi sibona ese mauri do oi davaria, bona oi dekenai idia kamonai taudia danu ese mauri do idia davaria.” (1 Tim. 4:16) Paulo be taunimanima ma ta dekenai diba henia hanai karana ia herevalaia lasi. To Keristani hadibaia taudia namodia be Baibel ena hereva momokanidia amo taunimanima edia kudouna idia hamarerea bona idia durua edia mauri idia haidaua be namo. Oibe, unai gaukara ita karaia namonamo be namo. To Dirava ena Basileia ena sivarai namona be ma haida dekenai ita harorolaia neganai, edena dala ai eda “hadibaia” karana ita hanamoa diba?—2 Tim. 4:2.
Hadibaia Dalana Hanamoa
3, 4. (a) Edena dala ai eda hadibaia dalana ita hanamoa diba? (b) Edena dala ai Tiokratik Haroro Sikuli ese ita ia durua hadibaia taudia namodia ai ita lao totona?
3 Diksenari ta ia gwau, bema ta ia ura gau ta ia karaia namonamo, namona be unai gauna ia stadilaia, ia tohoa loulou, eiava ia itaia namonamo. Sivarai namona idia hadibaia taudia namodia ai ita lao totona, unai dala toi ita badinaia be namo. Bema ita guriguri murinai gau ta ita stadilaia namonamo, unai gauna ita lalopararalaia namonamo diba. (Salamo 119:27, 34 duahia.) Bema hadibaia taudia namodia edia hadibaia dalana ita itaia namonamo, unai ese ita ia durua edia hadibaia dalana ita dibaia bona tohotohoa totona. Bona ita dibaia gaudia be hanaihanai ita tohoa loulou neganai, eda hadibaia karana do ita hanamoa.—Luka 6:40; 1 Tim. 4:13-15.
4 Iehova be iseda Hadibaia Tauna Hereadaena. Ia ese ena orea amo iena hesiai taudia ia hadibaia, edena dala ai haroro gaukara idia hagugurua namonamo totona. (Isa. 30:20, 21) Hegeregere, wiki ta ta ai, kongrigeisen ta ta be Tiokratik Haroro Sikuli idia karaia, bona unai sikuli ese momo ia durua Dirava ena Basileia idia harorolaia namonamo totona. Unai sikuli ai idia gaukaralaia buka badana be Baibel. Unai buka ese ita ia hadibaia dahaka gaudia ita hadibaia be namo. Danu, ita ia hadibaia edena hadibaia daladia be namo bona maoro. Tiokratik Haroro Sikuli ese ita ia hadibaia loulou gauna be inai: Ita be hadibaia taudia namodia ai ita lao diba, bema iseda hadibaia herevadia be Baibel amo, henanadai ita gaukaralaia namonamo, auka lasi dalanai ita hadibaia, bona taunimanima dekenai lalokau ita hahedinaraia. Namona be unai point ta ta ita herevalaia guna. Gabeai, ita be taunimanima edia kudouna hamarerea dalana do ita herevalaia.
Iseda Hadibaia Herevadia be Baibel Amo
5. Hadibaia gaukarana lalonai dahaka ita gaukaralaia momo be namo, bona dahaka dainai?
5 Hadibaia tauna badana Iesu be Baibel ena hereva ia gaukaralaia momo. (Mat. 21:13; Ioa. 6:45; 8:17) Ia hadibaia herevadia be iena lasi, to Iehova ena. (Ioa. 7:16-18) Iesu ena haheitalai ita tohotohoa be namo. Momokani, ruma-ta-ruma-ta haroro gaukara o Baibel stadi lalonai, Baibel ita gaukaralaia be namo. (2 Tim. 3:16, 17) Baibel be iseda aonega herevadia ia hereaia. Baibel be mai ena siahu. Bema ita ura stiuden be point ta ia lalopararalaia, dala namona be ia ita noia unai point ia hamomokania sirina ia duahia totona.—Heberu 4:12 duahia.
6. Edena dala ai hadibaia tauna ia hegaegae diba, stiuden be stadi ena point ia lalopararalaia totona?
6 Keristani hadibaia tauna be Baibel stadi ta ia karaia totona, ia hegaegae guna be gau badana. Hegeregere, namona be hadibaia tauna ese ia abia hidi, stadi lalonai ia be edena siri do ia duahia bona ena stiuden be edena siri do ia duahia. Oibe, iseda hadibaia herevadia idia hamomokania siridia ita duahia be namo. To danu, stiuden oi durua ia duahia siri ta ta edia anina ia lalopararalaia totona.—1 Kor. 14:8, 9.
Henanadai Namodia Ita Gaukaralaia
7. Dahaka dainai henanadai ita gaukaralaia namonamo be namo?
7 Henanadai gaukaralaia namonamo karana ese stiuden ia durua gau ta ia lalohadailaia, bona hadibaia tauna ia durua stiuden ena lalohadai ia dibaia totona. Unai dainai, namona be oi ese siri edia anina oi herevalaia lasi, to stiuden oi noia oi dekenai siri edia anina ia herevalaia totona. Nega haida henanadai ta o haida oi henia, unai amo emu stiuden oi durua ia laloparara namonamo totona. Unai dala amo stiuden oi hadibaia noho neganai, ia be oi hadibaia gaudia edia badina ia lalopararalaia sibona lasi to ia itaia oi hadibaia gaudia be maoro.—Mat. 17:24-26; Luka 10:36, 37.
8. Edena dala ai stiuden ena lalohadai ita lalopararalaia diba?
8 Iseda stadi bukadia lalonai henanadai bona haere idia noho. Unai dainai, oi stadi henia taudia momo ese henanadai edia haere be paragraf amo idia henia haraga diba. To, hadibaia tauna namona ese stiuden ena haere maorona sibona ia kamonai be namo lasi. Hegeregere, stiuden ia haere Baibel be heudahanai bona sihari kava karana ia taravatua. (1 Kor. 6:18) To, hadibaia tauna ese henanadai haida ia henia diba, unai amo do ia diba stiuden be ia dibaia gaudia ia abia dae o lasi. Reana ia henanadai: “Dahaka dainai Baibel be heudahanai bona sihari kava karana ia taravatua? Unai taravatu be edena bamona oi laloa? Bema Dirava ena taravatu oi badinaia, dahaka namo do oi davaria?” Stiuden be unai bamona henanadai ia haerelaia neganai, ena lalohadai maorona do oi lalopararalaia.—Mataio 16:13-17 duahia.
Auka Lasi Dalanai Ita Hadibaia
9. Baibel ena hadibaia herevadia ita kikilaia neganai, dahaka ita laloatao be namo?
9 Baibel ena hereva momokanidia momo be auka lasi. To, ita stadi henia taudia be tomadiho koikoi ena hadibaia herevadia dainai idia daradara. Iseda maduna be unai stiuden ita durua Baibel ena hadibaia herevadia ia lalopararalaia namonamo totona. Hadibaia taudia be auka lasi dalanai taunimanima idia hadibaia goevagoeva. Unai dala ita badinaia neganai, ita be hereva momokani do ita hadibaia namonamo. To gau maragimaragidia momo ita herevalaia lasi. Ita duahia sirina ibounai ita herevalaia be anina lasi. Namona be point ia durua herevadia sibona ita herevalaia. Stiuden ena diba ia bada ia lao neganai, ia be Baibel ena hereva momokanidia momo do ia lalopararalaia danu.—Heb. 5:13, 14.
10. Edena dala ai ita diba stadi ta ta ai paragraf hida ita stadilaia be namo?
10 Stadi ta ta ai, paragraf hida ita stadilaia be namo? Unai ita diba totona, gau haida ita laloa guna be namo. Ena be stiuden ena diba bona noho daladia be iseda amo ia idau, to ita ura bada stiuden ena abidadama ita hagoadaia. Unai dainai, nega bada ita henia stiuden ese Baibel ena hereva momokanidia ia duahia, lalopararalaia, bona abia dae totona. Stadi tamona lalonai paragraf momo ita karaia lasi, badina reana stiuden do ia laloparara lasi. To danu, ita ura stadi ia heau noho. Bema ita itaia stiuden ia laloparara, vadaeni paragraf ma ta dekenai ita hanaia diba.—Kol. 2:6, 7.
11. Paulo ena haheitalai amo dahaka ita dibaia?
11 Paulo be kamonai taudia matamatadia ia hadibaia neganai, ia be auka lasi dalanai sivarai namona ia harorolaia. Ena be Paulo be sikuli badana ena diba ia abia, to ena hereva be taunimanima ese idia lalopararalaia diba. (Korinto Ginigunana 2:1, 2 duahia.) Kudou-maoro taudia be Baibel ena hereva momokanidia idia lalopararalaia neganai, idia moale. Herevana ta ena diba be bada o maragi, to ia be Baibel ena hereva momokanidia ia lalopararalaia diba.—Mat. 11:25; Kara 4:13; 1 Kor. 1:26, 27.
Stiuden Durua Idia Dibaia Gaudia Idia Badinaia Totona
12, 13. Edena dala ai stiuden oi durua ia dibaia gaudia ia badinaia totona? Haheitalai ta gwauraia.
12 Iseda hadibaia namonamo karana ese stiuden ena kudouna ia hamarerea be namo. Hegeregere, gau badana be stiuden ese inai ia lalopararalaia: Edena hereva be mai anina bada ia dekenai? Edena hereva ese ia do idia durua? Bema Baibel ena hakaua herevana ia badinaia, edena bamona ena mauri do ia haidaua?—Isa. 48:17, 18.
13 Hegeregere, hadibaia tauna be stiuden ida Heberu 10:24, 25 idia duahia hebou, unai siri be Keristani taudia ia hagoadaia edia tadikaka ida idia hebou totona. To bema stiuden be kongrigeisen heboudia dekenai ia do lao lasi, reana hadibaia tauna be hebou ta ta idia karaia dalana o hebou dekenai do ia kamonai tok ia herevalaia diba. Reana ia gwau: ‘Kongrigeisen heboudia be tomadiho ena kahana ta, bona ai ia durua bada.’ Bena stiuden ia boiria toho, hebou dekenai ia mai totona. Bema stiuden sibona ia ura Iehova ia badinaia dainai Baibel ena hereva ia badinaia bona hebou ia lao be namo herea, to hadibaia tauna hamoalea totona hebou ia lao be namo lasi.—Gal. 6:4, 5.
14, 15. (a) Stiuden be Iehova dekenai dahaka idia dibaia diba? (b) Bema stiuden ta be Iehova ena kara ia dibaia, unai ena namo be dahaka?
14 Stiuden taudia ese Baibel idia stadilaia bona idia badinaia neganai, idia be Iehova idia diba bona lalokau henia. (Isa. 42:8) Iehova be Tamana namona, Havaraia Tauna, bona iunives ena Biagua Tauna sibona lasi, to danu, Ia ese ia idia lalokau henia bona hesiai henia taudia dekenai ena kara bona diba ia hahedinaraia. (Esodo 34:6, 7 duahia.) Mose ese Israela taudia be Aigupito amo ia hakaua siri gwauraia neganai, Iehova be inai hereva ia gwauraia: “Dahaka ai Lau sibona do Lau halaoa be do Lau halaoa.” (Eso. 3:13-15) Unai ena anina be inai: Bema Iehova ia ura ena hesiai taudia totona gau ta do ia karaia, vadaeni ia laloa gauna ia karaia sibona. Unai dainai, Israela taudia idia diba Iehova be Hamauria Tauna, Tuari Tauna, Hariharibada Tauna, gwauhamata herevadia ia hagugurua Tauna, bona dala idauidau ai idia ia durua Tauna.—Eso. 15:2, 3; 16:2-5; Ios. 23:14.
15 Reana iseda stiuden taudia ese Iehova ena heduru be hoa dalanai do idia itaia lasi, Mose dekenai ia vara bamona. To, bema idia ese edia abidadama idia habadaia bona idia dibaia gaudia idia laloa bada bona badinaia matamaia neganai, vadaeni do idia itaia Iehova ese idia dekenai boga auka, aonega bona hakaua herevadia ia henia be gau badana. Danu, do idia diba Iehova be Sisiba Tauna hereadaena, Gimaia Tauna, bona Hariharibada Tauna.—Sal. 55:22; 63:7; Aon. 3:5, 6.
Taunimanima Dekenai Lalokau Ita Hahedinaraia be mai Anina Bada
16. Herevana iseda diba be bada o maragi, to dahaka dainai unai be gau badana lasi?
16 Bema oi laloa hadibaia gaukarana oi diba namonamo lasi, namona be oi lalomanoka lasi. Badina Iehova bona Iesu be hari tanobada hegegemadai idia karaia hadibaia gaukarana idia biagua noho. (Kara 1:7, 8; Apok. 14:6) Idia ruaosi ese iseda gaukara idia hanamoa diba, unai amo eda hereva be kudou-maoro tauna ena kudouna ia hamarerea diba. (Ioa. 6:44) Momokani, herevana hadibaia tauna ena diba be bada o maragi, to bema ia ese stiuden ia lalokau henia, vadaeni ena gaukara do ia karaia namonamo. Paulo ia laloparara, ita hadibaia taudia ita lalokau henia be gau badana.—Tesalonika Ginigunana 2:7, 8 duahia.
17. Edena dala ai ita hahedinaraia diba ita be stiuden ita laloa bada?
17 Unai hegeregerena, bema nega ita atoa stiuden ena mauri ita diba namonamo totona, vadaeni ita hahedinaraia ita be ia ita laloa bada. Ia ida Baibel ita stadilaia neganai, reana ena noho dalana do ita lalopararalaia namonamo. Reana ita itaia ena mauri lalonai ia be Baibel amo ia dibaia point haida ia badinaia noho. To, ma gau haida ia haidaua be namo. Bema stiuden ita durua stadi lalonai gau haida ia dibaia bona badinaia dalana ia diba, vadaeni ita be mai lalokau ida ia ita durua diba Keriso ena hahediba tauna ta ai ia lao totona.
18. Dahaka dainai iseda stiuden ida ita guriguri hebou o guriguri lalonai stiuden ena ladana ita gwauraia be namo?
18 Gau badana be, iseda stiuden ida ita guriguri hebou o guriguri lalonai ena ladana ita gwauraia. Namona be ia diba, ita be ia ita durua ena Havaraia Tauna ia diba namonamo, Ia kahirakahira ia lao, bona Dirava ena hakaua herevadia amo namo ia abia totona. (Salamo 25:4, 5 duahia.) Bema Iehova ita noia stiuden ia durua ia dibaia gaudia do ia badinaia, unai hereva ese stiuden ia durua ‘Dirava ena hereva ia badinaia’ totona. (Iam. 1:22) Bona stiuden be iseda guriguri ia kamonai neganai, ia danu be Iehova guriguri henia dalana do ia dibaia. Bema stiuden ita durua Iehova ena turana ai ia lao totona, unai be moale gauna!
19. Stadi gabena ese dahaka henanadai do ia haerelaia?
19 Ita moale badina ita itaia tanobada ibounai, Iehova ena Witnes taudia 6 milioni mai kahana be “hadibaia” gaukarana idia goadalaia bona idia ura bada kudou-maoro taudia idia durua Iesu ia henia hereva ibounai idia badinaia totona. Iseda haroro gaukara ese dahaka namo ia havaraia diba? Stadi gabena ese unai henanadai do ia haerelaia.
Oi Laloatao, A?
• Dahaka dainai Keristani taudia ese edia hadibaia dalana idia hanamoa be namo?
• Edena dala ai iseda hadibaia dalana ita hanamoa diba?
• Herevana eda diba be bada o maragi, to dahaka ita karaia be gau badana?
[Study Questions]
[Picture on page 9]
Tiokratik Haroro Sikuli lalonai oi vareai vadaeni, a?
[Picture on page 10]
Dahaka dainai emu stiuden oi hagoadaia Baibel ia duahia be gau badana?
[Picture on page 12]
Emu stiuden ida oi guriguri hebou bona guriguri lalonai iena ladana oi gwauraia