Gima Kohorona Stadi Gauna Matamatana

HARI oi duahia noho Gima Kohorona be stadi gauna ginigunana. Hari, ai ura inai magasin ena kahana matamatadia haida ai herevalaia.

Stadi Gima Kohorona be kongrigeisen heboudia dekenai idia mai Baibel stiuden taudia bona Iehova ena Witnes taudia totona ai karaia. Hua ta ta lalonai inai magasin tamona tamona do ita abia, bona idia lalonai be stadi herevadia foa o faiv do idia noho. Magasin vairana dekenai be stadi sediual do ia hedinarai. Danu, unuseniai be laulau tamona sibona do idia gaukaralaia loulou, badina ia be haroro gaukara dekenai do ita hariharilaia lasi.

Rau 2 dekenai be stadi edia badina bona hereva ma haida do idia hedinarai. Unai ese Gima Kohorona Stadi naria taudia do idia durua idia hegaegae namonamo, kongrigeisen hebouna ai Gima Kohorona Stadi idia hakaua namonamo totona.

Do oi itaia, stadi ta ta edia paragraf be momo lasi, guna bamona lasi. Unai amo Gima Kohorona Stadi lalonai, nega bada ia noho siri badadia ita duahia bona herevalaia totona. Bona umui ai hagoadaia, magasin lalonai idia gwauraia siridia ibounai be pura ta ta ai umui itaia be namo. Siri haida edia badinai be inai hereva, “duahia,” do oi itaia, bona unai siri be Gima Kohorona Stadi lalonai do umui duahia bona herevalaia. Bema nega ia hegeregere, siri ma haida umui duahia danu. Siri ma haida edia badinai be inai hereva, “hahegeregerea,” do umui itaia. Unai siri be paragraf ena point badadia idia herevalaia lasi dainai, nega momo kongrigeisen hebouna dekenai do umui duahia lasi. To, “hahegeregerea” siridia ai be hereva namodia haida idia noho o ita do ia durua point badadia edia hereva haida ita lalopararalaia totona. Umui ai hagoadaia Gima Kohorona umui hegaegaelaia neganai, unai siri umui itadia be namo. Reana emui haere lalonai, unai siri edia hereva haida umui gwauraia diba.

Lagani ena ripoti be Gima Kohorona ai do ia hedinarai lasi. Lagani 2008 ia matamaia neganai, unai ripoti be Iseda Basileia Gaukara lalonai idia udaia pepana bona Yearbook ai do ia hedinarai. To, hereva ma haida be stadi Gima Kohorona lalonai do idia hedinarai. Herevana idia momo be kongrigeisen ena hebou ai do ita kikilaia lasi, to umui ai hagoadaia umui duahidia namonamo totona. Badina idia be “hesiai tauna mai ena kamonai, bona mai ena kara maoromaoro” oreana ese ia halasia lauma aniani danu.​​—⁠Mat. 24:​45-​47.

Stadi Gima Kohorona bona pablik Gima Kohorona be hegeregere. Idia ruaosi edia ladana be Gima Kohorona​​—⁠Iehova Ena Basileia Ia Harorolaia. Edia rau 2 ena ataiai be paragraf ta ia noho, unai ese Gima Kohorona ai karaia ena badina ia herevalaia. English gado gaudia (Stadi gauna bona pablik gauna) be volium dekenai do idia hakapua. Stadi gauna lalonai be kahana ta ladana, “Inai Oi Laloatao, A?” do oi itaia, unai ese Gima Kohorona (stadi gauna bona pablik gauna) edia kahana haida do ia herevalaia.

Lagani 1879 amo ema bona hari, ena be tuari, ogogami, bona dagedage idia vara, to Gima Kohorona be Dirava ena Basileia ena hereva momokanidia ia halasia noho. Ai noinoi Iehova ena heduru dainai, inai magasin matamatana be unai bamona ia karaia noho totona. Bona ai noinoi Iehova ese oi do ia durua stadi Gima Kohorona matamatana oi gaukaralaia namonamo totona.