Haida be Edia Mauri Idia Hanamoa​​—⁠Unai Bamona Oi Karaia Diba, A?

CANADA dekenai, tadikaka Marc be robot masini idia karaia kampani ta dekenai ia gaukara, bona idia karaia gaudia be kampani badadia ese idia gaukaralaia. Marc be pat-taim moni gaukara bona regula painia gaukara ia karaia. To gabeai, bosi ia ura Marc be ful-taim moni gaukara ia karaia, ena pei be bada. Marc be dahaka ia karaia?

Philippines dekenai, taihu Amy be ia sikuli noho bona regula painia gaukara ia karaia. Sikuli ena gradueisen murinai, ia be ful-taim moni gaukara namona ta mai ena pei badana ia davaria, to unai gaukara ai nega bada do ia halusia. Amy be dahaka abia hidi ia karaia?

Marc bona Amy edia abia hidi bona ekspiriens ese idia hahedinaraia, idaunegai Korinto taudia ese idia abia sisibana ita badinaia be mai anina bada. Aposetolo Paulo ia gwau: “Tanobada ena gau namodia idia abia taudia ese gau momo idia abia lasi.”​​—⁠1 Kor. 7:​29-​31, BHğ.

Tanobada Ena Gau Abia, to Gau Momo Abia Lasi

Marc bona Amy edia sivarai ita do herevalaia lasi lalonai, namona be 1 Korinto 7:31 ai inai hereva “tanobada ena gau” (o Greek gado ai be koʹsmos) ena anina ita herevalaia sisina. Baibel dekenai inai hereva, koʹsmos ena anina be tauanina durua gaudia, hegeregere ruma, aniani, bona dabua. * Unai bamona gaudia ita abia totona, moni gaukara ta ita karaia be  namo. Oibe, inai tanobada ena gau ita abia be namo, badina unai amo Baibel ena hereva hegeregerena, ita sibona bona iseda ruma bese ita naria diba. (1 Tim. 5:⁠8) To danu, namona be ita laloparara inai ‘tanobada, be kahirakahira do ia ore.’ (1 Ioa. 2:​17) Unai dainai, tanobada ena gau ita abia, to ‘gau momo ita abia lasi.’​​—⁠1 Kor. 7:​31.

Tadikaka bona taihu momo be 1 Korinto 7:​31 ena sisiba idia badinaia dainai, edia noho dalana idia sekea, edia moni gaukara idia hamaragia, bona noho dalana idia haidaua. Unai idia karaia neganai, karaharaga idia itaia edia mauri be namo herea, badina idia be mai edia nega edia ruma bese ida idia moale hebou, bona Iehova ena hesiai gaukara idia karaia totona. To danu, noho dalana idia haidaua dainai, idia be tanobada gaudia dekenai idia tabekau lasi to Iehova dekenai idia tabekau. Oi danu oi ura emu noho dalana oi haidaua, unai amo nega bada oi henia Iehova hamoalea karadia oi karaia totona, a?​​—⁠Mat. 6:​19-​24, 33.

“Ai Mamia Ai be Iehova Kahirakahira Ai Noho”

Marc, matamanai ita herevalaia tadikakana, be 1 Korinto 7:31 ena sisiba ia badinaia dainai, ia ura lasi tanobada ena gau momo ia abia. Ia be ena bosi ese ia gwauraia dagina ia abia dae lasi. Dina haida murinai, bosi ese Marc ia hamaoroa, ena pei do ia habadaia, bema unai gaukara matamatana ia abia dae. Marc ia gwau, “Unai be hahetoho ta, to bosi ena ura lau dadaraia.” Bona Marc ese unai bamona ia karaia ena badina ia herevalaia, ia gwau: “Lau bona egu adavana Paula, ai ura emai nega bada bona goada ai henia Iehova do ai hesiai henia badabada totona. Unai dainai, emai lalona ai hadaia emai noho dalana ai haidaua totona. Iehova ai noia aonega do ia henia abia hidi maorona ai karaia, bona dina ta ai makaia Iehova ai hesiai henia badabada totona.”

Paula ia gwau: “Wiki ta ta lalonai, lau be dina toi hospital dekenai seketere gaukara lau karaia, bona pei namona lau abia. Bona danu lau be regula painia gaukara lau karaia. To, Marc bamona, lau ura Basileia idia harorolaia taudia lau durua Iehova ai hesiai henia totona. To, egu risain pepana lau atoa neganai, egu bosi ia gwau, ia ura lau be seketere badana ena dagi do lau abia. Herevana unai be pei bada gaukarana, to lau gwau lau be do lau risain. Bona egu bosi dekenai unai dagi lau abia dae lasi ena badina lau herevalaia neganai, ia ese Dirava lau abidadama henia karana ia hanamoa.”

Daudau lasi murinai, brens opesi ese Marc bona Paula be Canada dekenai idia siaia gwauraia, kongrigeisen maragina ta ai spesel painia gaukara idia karaia totona. Unai abia hidi idia karaia dainai, dahaka ia vara? Marc ia gwau: “Lagani momo lalonai lau karaia moni gaukara namona lau rakatania neganai, lau gari bona daradara sisina, to Iehova ese emai hesiai gaukara ia hanamoa. Ma haida ai durua Iehova idia hesiai henia be moale bada gauna. To danu, ful-taim hesiai gaukara ese emai headava ia hanamoa. Emai herevahereva lalonai, ai  be Iehova hesiai henia karadia ai herevalaia momo. Bona ai mamia ai be Iehova kahirakahira ai noho.” (Kara 20:35) Paula ia gwau: “Emu moni gaukara bona noho gabuna namona oi rakatania neganai, namona be Iehova oi abidadama henia. Ai be unai bamona ai karaia bona Iehova be ai ia hanamoa. Emai kongrigeisen matamatana ai, tadikaka bona taihu ese ai idia lalokau henia. Guna egu goada be moni gaukara dekenai lau halusia kava, to hari lau gaukaralaia taunimanima lau durua Dirava idia diba totona. Unai hesiai gaukarana lau moalelaia bada.”

‘Edia Kohu Bona Moni be Momo, to Idia Moale Lasi’

Amy, matamanai ita herevalaia taihuna, be abia hidi idauna ia karaia. Ia ese pei bada ful-taim moni gaukara ia abia dae. Amy ia gwau: “Lagani ginigunana ai, lau be haroro gaukara lau goadalaia noho, to lau itaia metairametaira Iehova hesiai henia gaukarana lau rakatania, to lau gaukara goada dagi badana lau abia totona. Moni gaukara lau karaia dainai, nega be bada lasi haroro gaukara lau karaia totona. To gabeai, lau be haroro gaukara lau hadokoa.”

Amy be unai nega ia laloa lou neganai, ia gwau: “Egu moni be momo. Lau loaloa momo bona egu ladana be bada. To, lau moale lasi. Ena be egu moni be momo, to hekwakwanai momo lau davaria. Lau gwau, dahaka dainai lau moale lasi. Gabeai lau laloparara, inai tanobada lalonai dagi lau tahua momo dainai, ‘Iesu abidadama henia kara lau rakatania.’ Bona Baibel ena hereva hegeregerena, “lalohisihisi momo” lau davaria.​—⁠1 Tim. 6:10.

Amy be dahaka ia karaia? Ia gwau: “Elda taudia lau noia lau do idia durua Iehova lau tura henia totona, bona hebou lau lao henia matamaia. Ane lalonai, lau tai matamaia. Lau laloatao, guna lagani faiv lalonai painia gaukara lau moalelaia, ena be lau be ogogami hahinena. Lau diba moni gaukara dekenai egu nega lau halusia kava be anina lasi, to Basileia gaudia lau atoa guna be namo. Lau noinoi egu moni gaukara idia haidaua​​—⁠herevana egu pei do idia hamaragia​​—⁠bona haroro gaukara lau hamatamaia lou.” Amy ia gwau: “Lagani haida lalonai painia gaukara lau karaia bona lau moalelaia. Hari egu mamina ia namo, guna moni gaukara lau karaia neganai egu mamina be unai bamona lasi.”

Emu noho dalana oi haidaua diba, a? Bema emu nega oi gaukaralaia Basileia gaudia oi tahua totona, oiemu mauri do oi hanamoa danu.​​—⁠Aon. 10:⁠22.

[Footnote]

[[Blurb on page 19]

Emu noho dalana oi haidaua diba, a?

[Box/​Picture on page 19]

“Unai Gaukara Lau Ura Henia!”

United States dekenai, Keristani elda tauna ta ladana David be ia ura ena adavana bona natuna ida painia gaukara idia karaia. Iena kampani ena bosi ia noia pat-taim moni gaukara ia karaia totona, bena regula painia gaukarana ia karaia matamaia. Unai ese ena mauri ia hanamoa, a? Hua haida murinai, David be ena turana ta ia tore henia neganai, ia gwau: “Egu famili ida Iehova ai hesiai henia dainai ai moale bada herea. Lau laloa painia gaukara do lau manadalaia haraga lasi, to hari unai gaukara lau ura henia! Unai be gaukara hereadaena.”

[Picture on page 18]

Marc bona Paula haroro gaukara ai