Idia Hegeregere Mauri Ranuna Dekenai Ia Hakaudia Lao Totona
Idia Hegeregere Mauri Ranuna Dekenai Ia Hakaudia Lao Totona
“Mamoe ena Natuna . . . ese idia do ia naria. Ia ese mauri ranuna, ia lohilohi gauna, dekenai do ia hakaudia lao.”—APOK. 7:17.
1. Baibel ese edena dala ai horoa Keristani taudia ia gwauraia, bona Iesu ese dahaka maduna ia henidia?
BAIBEL ese Keriso ena kohu idia naria horoa Keristani taudia ia gwauraidia “hesiai tauna mai ena kamonai, bona mai ena kara maoromaoro.” Lagani 1918 ai, Keriso ese unai “hesiai tauna” ia sekea neganai, ia davaria tanobada ai horoa taudia be nega korikori ai ‘aniani idia henia’ noho. Unai dainai, Iesu, Biaguna unai, be mai moale ida idia ia abia hidi “iena kohu ibounai” idia naria totona. (Mataio 24:45-47 duahia.) Unai dala amo, horoa taudia be tanobada ai Iehova idia tomadiho henia taudia ma haida idia durua, bena gabeai guba dekenai edia ahuna idia abia.
2. Iesu ena kohu be dahaka dahaka?
2 Biaguna be mai ena maoro iena kohu be edena dala ai ia gaukaralaia totona. Iesu Keriso, Iehova ese ia abia hidi King, ena kohu be tanobada dekenai idia noho Basileia ena gaudia bona Basileia henunai do idia noho taudia ibounai. Unai taudia be Ioane ese matahanai amo ia itaia “hutuma bada” taudia. Ioane ia gwau: “Taunimanima momo herea lau itaia, duahia diba lasi. Idia be bese idauidau, iduhu idauidau, kopina idauidau, bona gado idauidau. Idia ibounai be helai gabuna badana ena vairanai bona Mamoe ena Natuna ena vairanai idia gini. Edia dabua be kurokuro, bona edia imana dekenai pama au rauraudia idia dogoatao.”—Apok. 7:9.
3, 4. Hutuma bada taudia edia hahenamo badana be dahaka?
3 Unai hutuma bada taudia be Iesu ese ia gwauraia “mamoe idaudia” taudia. (Ioa. 10:16) Edia helaro be tanobada paradaiso dekenai do idia noho ela bona hanaihanai. Idia diba momokani Iesu ese “mauri ranuna, ia lohilohi gauna, dekenai do ia hakaudia lao. Bona Dirava ese edia taitai ena ranu ibounai edia matana dekena amo do ia dahua ore.” Unai dainai, “edia dabua idia huria vadaeni Mamoe ena Natuna ena rarana lalonai, vadaeni edia dabua be kurokuro bona goeva momokani.” (Apok. 7:14, 17) Idia be Iesu ena boubou gauna idia abidadama henia, unai dainai Dirava ena matanai idia be ‘dabua kurokuro’ idia karaia. Dirava ia gwau idia be iena turadia bona idia be kara maoromaoro taudia, Aberahamo bamona.
4 Danu, Dirava ia gwau hutuma bada taudia be kara maoromaoro taudia dainai, idia be hisihisi badana amo do idia roho mauri. (Iam. 2:23-26) Idia be Iehova kahirakahira idia lao diba, bona Aramagedono ai do idia roho mauri. (Iam. 4:8; Apok. 7:15) Hutuma bada taudia be sibodia edia ura idia karaia lasi, to edia King guba dekenai bona tanobada ai horoa orena taudia edia hakaua dalana henunai idia gaukara.
5. Edena dala ai hutuma bada taudia ese edia horoa Keristani tadikaka idia durua?
5 Hari horoa Keristani taudia be Satani ena tanobada amo dagedage idia davaria noho. To, idia be hutuma bada taudia edia heduru dekenai idia tabekau diba. Horoa Keristani taudia edia namba ia maragi ia lao, to hutuma bada taudia be lagani ta ta ai edia namba ia bada daekau noho. Horoa taudia sibodia be tanobada hegegemadai idia noho Keristani kongrigeisen 100,000 idia naria diba lasi. Unai dainai, mamoe idaudia ese idia durua dalana ta be, kongrigeisen lalonai idia hegeregere tadikaka idia abia hidi elda gaukara idia karaia totona. Idia be “hesiai tauna mai ena kamonai, bona mai ena kara maoromaoro” taudia idia durua Keristani taudia milioni momo idia naria totona.
6. Isaia ese mamoe idaudia be horoa taudia idia durua dalana be edena bamona ia perovetalaia?
6 Mamoe idaudia be mai edia ura ida horoa Keristani taudia idia durua karana be Isaia ese ia perovetalaia vadaeni. Ia gwau: “Lohiabada ese Israela dekenai ia hereva, ia gwau, ‘Aigupito bona Etiopia edia kohu be do umui abia, bona tau latadia, Sabea taudia, be emui hesiai taudia mai guia danu do idia lao. Mai edia seini danu, umui emui murinai do idia raka.’ ” (Isa. 45:14) Laulau dalanai, tanobada dekenai do idia noho Keristani taudia be horoa hesiai taudia bona ena Hakaua Oreana murinai idia raka bona idia ibounai be edia biaguna idia badinaia. “Hesiai taudia mai guia danu,” mamoe idaudia unai, be mai edia lalona ibounai ida edia goada bona kohu idia gaukaralaia horoa taudia idia durua, Keriso ese ia henia haroro gaukara karaia totona.—Kara 1:8; Apok. 12:17.
7. Hari inai negai hutuma bada taudia be dahaka diba idia abia noho?
7 Hutuma bada taudia be Aramagedono murinai tanobada matamata ai do idia noho taudia ginigunadia. Unai dainai idia ese edia horoa tadikakadia idia durua neganai, kara namodia idia dibaia. Namona be unai hutuma bada taudia be Keristani taudia goadadia ai idia lao, bona idia ta ta be mai edia ura ida edia Biaguna ena hakaua herevadia idia badinaia. Hari, dala ia kehoa Keristani taudia ta ta do idia hahedinaraia idia be hegeregere edia King, Keriso Iesu ena gaukara idia karaia totona. Hari inai negai, bema Keristani tauna be Dirava ia badinaia bona ia abidadama henia, ia hahedinaraia tanobada matamata lalonai iena King ena hakaua herevadia do ia badinaia namonamo diba.
Hutuma Bada Taudia Edia Abidadama Idia Hamomokania
8, 9. Edena dala ai hutuma bada taudia ese edia abidadama idia hamomokania?
8 Mamoe idaudia, horoa Keristani taudia idia bamoa taudia, be dala idauidau ai edia abidadama idia hahedinaraia. Ginigunana be, idia be horoa Keristani taudia idia durua Dirava ena Basileia ena sivarai namona idia harorolaia totona. (Mat. 24:14; 28:19, 20) Iharuana be, mai edia ura ibounai ida Hakaua Oreana ese ia henia hakaua herevadia idia badinaia.—Heb. 13:17; Sekaraia 8:23 duahia.
9 Horoa taudia idia durua dalana ihatoina be, hutuma bada taudia ese Iehova ena kara maoromaoro taravatudia idia badinaia. Idia hekwarahi “lalokau, moale, maino, haheauka, bogahisihisi, kara maoromaoro, abidadama momokani kara, manau, tauanina ena ura koua karana” idia hahedinaraia totona. (Gal. 5:22, 23) Hari, ita be kara namodia ita hahedinaraia, bona “tauanina ena kara” ita dadaraia, to unai bamona ita karaia dainai, taunimanima momo be ita idia ura henia lasi. Hutuma bada taudia be edia lalona idia hadaia inai bamona kara do idia karaia lasi: “Heudahanai, kara mirodia, matabodaga, kaivakuku tomadiho henia kara, meamea, heai, mama, badu, sibona ena ura tahua kara, hepapahuahu, orea hapararaia kara, laloa dikadia, kekero, lebulebu, bona unai bamona kara ibounai.”—Gal. 5:19-21.
10. Hutuma bada taudia edia lalona idia hadaia dahaka idia karaia totona?
10 Ita be kara dika taudia dainai, lauma ena huahua ita hahedinaraia be auka, tauanina ena kara idauidau ita dadaraia be auka, bona Satani ena tanobada ena hahetoho idauidau dekenai ita moru diba. To, namona be iseda lalona ita hadaia, iseda manoka gauna ta, kerere maragina ta eiava gorere dainai do ita manoka bena Iehova lalokau henia karana do ita rakatania lasi. Ita diba Iehova be ia gwauhamata hegeregerena kara ta do ia karaia—hisihisi badana amo hutuma bada taudia do ia hamauria.
11. Satani be edena dala ia gaukaralaia Keristani taudia edia abidadama ia hadikaia totona?
11 Namona be nega ibounai ita gima noho, badina ita diba iseda inai henia tauna badana Satani Diabolo be ia hesiku haraga lasi. (Petero Ginigunana 5:8 duahia.) Ia ura aposteit bona dala ma haida ai iseda lalona ia veria, unai amo do ita laloa ita badinaia hereva momokani be koikoi. To, nega momo Satani be unai dekenai ia kwalimu lasi. Unai hegeregerena, ena be dagedage karadia ese nega sisina lalonai iseda haroro gaukara idia koua, to nega momo unai dagedage karana dainai tadikaka bona taihu idia goada. Unai dainai, Satani be iseda abidadama ia hadikaia diba dalana ta ia gaukaralaia momo. Ita lalomanoka neganai, ita ia dibagania toho. Paulo ese Keristani taudia ginigunadia dekenai unai ia herevalaia, ia gwau: “Iesu ena hisihisi do umui laloa namonamo: Kara dika taudia ese mai badu danu ia idia dagedage henia. To ia goada noho.” Dahaka dainai Iesu ena haheitalai do idia laloa? Unai idia karaia neganai, do idia hesiku lasi, bona do idia manoka lasi.—Heb. 12:3.
12. Edena dala ai Baibel ena sisiba ese lalomanoka taudia ia hagoadaia?
12 Nega haida oi ura Iehova hesiai henia karana oi rakatania, a? Nega haida oi laloa oi be anina lasi, a? Bema oibe, namo lasi Satani ese unai lalohadai amo emu lalona ia veria Iehova ena hesiai gaukara oi rakatania totona. Baibel oi stadilaia, oi guriguri goadagoada, hanaihanai hebou dekenai oi lao bona Keristani taudia oi bamoa, unai ese oi do idia durua oi goada noho bona oi “manoka lasi” totona. Iehova ia gwauhamata ena hesiai taudia dekenai goada do ia henia, bona unai do ia hagugurua. (Isaia 40:30, 31 duahia.) Basileia ena hesiai gaukara oi karaia goadagoada noho. Nega idia haorea kava gaudia oi dadaraia, bona taunimanima oi durua. Unai ese oi do ia hagoadaia lalomanoka negadiai oi haheauka totona.—Gal. 6:1, 2.
Hisihisi Badana amo Idia Roho Mauri Bona Tanobada Matamata Lalonai Idia Vareai
13. Aramagedono amo idia roho mauri taudia be dahaka gaukara do idia karaia?
13 Aramagedono murinai, do idia toreisi lou kara dika taudia milioni momo dekenai Iehova ena dala do ita hadibaia. (Kara 24:15) Idia dekenai Iesu ena mauri davalaia boubouna, unai boubou gauna do idia abidadama henia bona hahenamo do idia abia dalana do ita hadibaia. Idia ese guna idia abia dae tomadiho koikoi ena hahediba herevadia bona edia mauri gunana do idia dadaraia be namo. Namona be Keristani korikori taudia edia toana ia hahedinaraia dabua matamata idia hahedokilaia. (Efe. 4:22-24; Kol. 3:9, 10) Unai nega ai Aramagedono amo idia roho mauri mamoe idaudia be gaukara badana do idia karaia. Unai nega ai Iehova ena hesiai gaukara idia karaia be moale gauna, badina inai tanobada dikana ena hahetoho do idia davaria lasi!
14, 15. Hisihisi badana amo idia roho mauri taudia bona idia toreisi lou taudia be edena dala ai ta ta do idia durua?
14 Iesu be tanobada ai ia do mai lasi neganai idia noho abidadama taudia be Paradaiso ai gau momo do idia dibaia. Guna idia diba lasi Mesia be daika, to Paradaiso ai do idia diba. Guna, edia mauri lalonai idia hahedinaraia idia ura Iehova ese idia do ia hadibaia. Ia be hahenamo badana badina idia do ita durua Daniela ena peroveta herevadia idia lalopararalaia totona, unai amo idia ese Daniela dekenai idia gwauraia hedinarai diba!—Dan. 12:8, 9.
15 Oibe, idia toreisi lou taudia be ita amo gau momo do idia dibaia, to ita danu be idia dekenai henanadai momo do ita henia diba. Baibel ese ia herevalaia lasi gaudia haida be idia ese ita dekenai do idia hadibaia. Iesu ena kasin Ioane Bapatiso ese Iesu ena sivarai ma haida ia gwauraia dainai, do ita moale bada! Unai abidadama taudia amo ita dibaia gaudia ese ita do idia durua Dirava ena Hereva ita lalopararalaia namonamo totona. Iehova ena hesiai taudia, idia mase vadaeni taudia—nega dokona ai idia mase hutuma bada taudia danu—be “toreisi lou . . . namo herea” do idia abia. Satani ena tanobada ai idia ese Iehova ena hesiai gaukara idia karaia matamaia, bona tanobada matamata lalonai edia hesiai gaukara idia karaia noho dainai do idia moale bada!—Heb. 11:35; 1 Ioa. 5:19.
16. Peroveta hereva hegeregerena, Kota Badana Dinana ai dahaka do idia karaia?
16 Kota Badana Dinana ai, buka haida do idia kehoa. Unai buka matamatadia bona Baibel do idia gaukaralaia taunimanima idia kota henia totona, unai amo idia itaia daika be ia hegeregere mauri hanaihanai do ia abia. (Apokalupo 20:12, 13 duahia.) Kota Badana Dinana ena dokonai, taunimanima ta ta be edia lalona idia hadaia vadaeni daika ena lohia dalana do idia abia dae. Basileia do ia abia dae bona Mamoe Natuna ese “mauri ranuna” dekenai do ia hakaudia lao, a? Eiava do ia ura lasi Dirava ena Basileia henunai do ia noho, a? (Apok. 7:17; Isa. 65:20) Unai negai tanobada dekenai do idia noho taudia ibounai be goevadae bona abia hidi maorona idia karaia diba, badina gau dikana ta ese edia lalona do ia veria lasi. Iehova ena hahemaoro karana ginigabena be ta ese do ia hepapahuahulaia lasi. Ia ese kara dika taudia sibona do ia hadikaia ore momokani.—Apok. 20:14, 15.
17, 18. Horoa Keristani taudia bona mamoe idaudia be Kota Badana Dinana dekenai dahaka moale gauna idia naria?
17 Hari horoa taudia idia ura bada Basileia do idia abia, bona Kota Badana Dinana ai do idia lohia. Unai be hahenamo badana idia dekenai! Unai helaro ese idia ia hagoadaia Petero ese Keristani taudia ginigunadia dekenai ia henia sisiba idia badinaia totona: “Do umui gaukara goada, inai boiboi, bona inai abia hidi do umui hamomokania totona. Badina unai bamona umui karaia neganai, emui abidadama dekena amo do umui moru lasi. Inai dala dekenai, Dirava ese gwaumaoro momokani umui dekenai do ia henia, iseda Lohiabada bona Hamauria Tauna, Iesu Keriso ena noho hanaihanai Basileia lalonai do umui vareai.”—2 Pet. 1:10, 11.
18 Mamoe idaudia bona edia horoa tadikakadia be idia moale hebou. Mamoe idaudia edia lalona idia hadaia edia horoa tadikakadia idia durua totona. Hari, idia be Dirava ena turana dainai, unai ese idia ia hagoadaia Dirava ena hesiai gaukara idia karaia totona. Kota Badana Dinana ai, mai kudouna ibounai ida Dirava ena gaukara do idia durua bona Iesu ese mauri ranuna dekenai idia do ia hakaua lao. Bena dokonai, do idia hegeregere momokani tanobada ai Iehova ena hesiai taudia ai idia lao ela bona hanaihanai!—Roma 8:20, 21; Apok. 21:1-7.
Oi Laloatao, A?
• Iesu ena kohu be dahaka dahaka?
• Edena dala ai hutuma bada taudia ese edia horoa tadikakadia idia durua?
• Hutuma bada taudia be hari bona nega vaira ai dahaka hahenamo idia moalelaia?
• Kota Badana Dinana be edena bamona oi laloa?
[Study Questions]
[Picture on page 25]
Hutuma bada taudia be mamoe natuna ena rara amo edia dabua idia huria bona ia goeva momokani
[Picture on page 27]
Mase amo do idia toreisi lou abidadama taudia amo oi ura dahaka do oi diba?