“Kudou-Maoro Taudia” be Sivarai Namona Idia Abia dae
“Kudou-Maoro Taudia” be Sivarai Namona Idia Abia dae
“Mauri hanaihanai idia ura kudou-maoro taudia ibounai be abidadama taudia ai idia lao.”—KARA 13:48.
1, 2. Iesu ia peroveta sivarai namona be tanobada ibounai dekenai do idia harorolaia dainai, Keristani taudia ginigunadia be dahaka idia karaia?
IESU ia peroveta, Basileia ena sivarai namona be tanobada ibounai dekenai do idia harorolaia, bona Baibel bukana Kara lalonai be Keristani taudia ginigunadia ese unai sisiba idia badinaia dalana ia herevalaia. (Mat. 24:14) Idia haroro goadagoada taudia edia haheitalai namona ese idia murinai idia raka taudia ibounai ia hagoadaia bada. Iesu ena hahediba taudia be Ierusalema dekenai idia haroro goadagoada dainai, taunimanima tausen momo, “hahelagaia taudia momo danu,” be kongrigeisen ginigunana lalonai idia vareai.—Kara 2:41; 4:4; 6:7.
2 Aposetolo edia negai, misinari taudia be momo idia durua Keristani taudia ai idia lao totona. Hegeregere, Filipo be Samaria dekenai ia lao, bona momo be ena haroro herevana idia kamonai. (Kara 8:5-8) Paulo bona turana haida be Kupro, Asia Minor, Makedonia, Greece, bona Italy dekenai Keriso ena sivarai namona idia harorolaia. Bona unai hanua dekenai, Iuda taudia bona Helene taudia momo be Keristani taudia ai idia lao. (Kara 14:1; 16:5; 17:4) Tito be Kerete dekenai ia haroro loaloa. (Tito 1:5) Petero be Babulonia ai haroro gaukara ia karaia, bona lagani 62-64 C.E. ai ena revareva ginigunana ia torea neganai, Ponto, Galatia, Kapadokia, Asia, bona Bitunia ai idia noho taudia be Keristani taudia edia gaukara idia diba vadaeni. (1 Pet. 1:1; 5:13) Unai be moale negadia! To, haroro gaukara idia inai henia taudia idia gwau unai Keristani taudia be “gabu ibounai dekenai kerere idia havaraia.”—Kara 17:6; 28:22.
3. Hari pablisa taudia be edia haroro gaukara lalonai dahaka anina namona idia havaraia noho, bona emu hemami be edena bamona?
3 Hari inai negai, Keristani kongrigeisen be ia tubu daekau noho. Lagani ena ripoti bona tanobada hegegemadai Iehova ena Witnes taudia edia namba ia bada daekau karana oi itaia neganai, unai ese oi ia hagoadaia bada, ani? Hesiai laganina 2007 lalonai, pablisa taudia be Baibel stadi 6 milioni mai kahana idia karaia, unai be moale gauna, ani? Danu, vanegai lagani ena ripoti ese ia hahedinaraia, taunimanima 10 milioni bamona be sivarai namona idia kamonai bona Iesu Keriso ena Anibou dekenai idia mai. Momokani, gaukara bada herea ia do noho.
4. Daidia be Basileia ena sivarai namona idia abia dae noho?
4 Hari, “mauri hanaihanai idia ura kudou-maoro taudia” be hereva momokani idia abia dae noho. (Kara 13:48, NW ) Iehova be unai bamona taudia ia boiria ena orea lalonai idia vareai totona. (Hagai 2:7 duahia.) Haroro gaukara ita karaia namonamo totona, dahaka kara namodia ita karaia be namo?
Taunimanima Ibounai Dekenai Ita Haroro
5. Daidia be Dirava ese do ia abia dae?
5 Keristani taudia ginigunadia idia laloparara, “Dirava ese taunimanima edia toana ia laloa lasi. To bese ibounai lalonai, Dirava dekenai idia gari, bona kara maoromaoro idia karaia taudia, be Dirava ese do ia abia dae.” (Kara 10:34, 35) Momokani, ta be Dirava ena turana namona ai ia lao totona, Iesu ena mauri davalaia boubouna ia abidadama henia be namo. (Ioa. 3:16, 36) Bona Dirava ia ura “taunimanima ibounai ese mauri do idia davaria, bona hereva momokani do idia diba.”—1 Tim. 2:3, 4.
6. Basileia harorolaia taudia ese dahaka lalohadai kererena idia abia lasi be namo, bona dahaka dainai?
6 Bema ita be ta ena dagi, kala, toana, tomadiho o gau ma ta ita laloa dainai ita haroro henia lasi, unai be kerere. Mani oi laloa: Oi moale badina oi dekenai Baibel ena hereva momokanidia ia hadibaia tadikaka eiava taihu ginigunana be unai bamona lalohadai kererena ia abia lasi, ani? Unai dainai, kamonai taudia ibounai dekenai hahemauri sivaraina ita harorolaia be namo.—Mataio 7:12 duahia.
7. Dahaka dainai ita haroro henia taudia ita hahemaoro henia be maoro lasi?
7 Iesu be Iehova ese ia abia hidi Hahemaoro Tauna. Momokani, ita be “taunimanima edia toana” ita laloa bona ita “kamonai hereva sibona” dainai hahemaoro ita karaia be maoro lasi, to Iesu be taunimanima edia lalona bona kudouna ia diba dainai hahemaoro do ia karaia be maoro.—Isa. 11:1-5; 2 Tim. 4:1.
8, 9. (a) Saulo be Keristani tauna ta ai ia do lao lasi neganai, ena kara be edena bamona? (b) Paulo ena haheitalai amo dahaka ita dibaia?
8 Taunimanima idauidau be Iehova ena hesiai taudia ai idia lao. Idia ta be Taso tauna Saulo, bona gabeai idia gwauraia aposetolo Paulo. Matamanai, ia be Farisea tauna. Ia be Keristani taudia ia dagedage henia, badina ia laloa idia be Iehova idia tomadiho henia lasi. (Gal. 1:13) Reana taunimanima idia laloa, Saulo be Keristani tauna ai do ia lao lasi. To, Iesu be Saulo ena kudouna lalonai gau namona ta ia itaia dainai, ia ese Saulo ia abia hidi gaukara badana ta ia karaia totona. Aposetolo edia negai ia noho Keristani kongrigeisen lalonai, Saulo be haroro goadagoada tauna ta ai ia lao.
9 Paulo ena haheitalai amo dahaka ita dibaia? Reana iseda teritori dekenai, haida be sivarai namona idia kamonai lasi. Herevana ita laloa, idia ta be Iehova ena Witnes taudia ai do ia lao lasi, to ita hesiku lasi bona idia ita haroro henia noho be namo. Nega haida, unai bamona taudia be sivarai namona idia kamonai. Baibel be ita ia hagania taunimanima ibounai dekenai ita haroro noho bona ‘inai gaukara ita hadokoa lasi.’—Kara 5:42 duahia.
Haroro Gaukara Idia “Hadokoa Lasi” Taudia be Hahenamo Idia Abia
10. Dahaka dainai ita gari lasi to taunimanima ita haroro henia be namo? Haheitalai ta gwauraia.
10 Iseda matana ese ita ia koia diba. Hegeregere, Ignacio * be South America hanuana ta ena dibura rumana ai ia noho neganai, ia be Iehova ena Witnes taudia ida Baibel ia stadilaia matamaia. Momo be ia dekenai idia gari badina ia be dagedage tauna. Unai dainai, gau haida idia karaia bona hoihoilaia dibura taudia be Ignacio idia noia idia abiatorehai taudia ia hagaria, edia abiatorehai moni ia abia totona. To, Ignacio be Baibel ia stadilaia goadagoada bona ia dibaia gaudia ia badinaia neganai, dagedage karana ia hadokoa bona manau tauna ai ia lao. Ignacio be abiatorehai gogoa karana ia karaia lou lasi, to ia moale badina Baibel ena hereva momokanidia ia diba bona Dirava ena lauma helaga ese ena kara ia haidaua. Danu, tadikaka be mai gari lasi ida Ignacio ia stadi henia dainai, Ignacio be unai kara ia moalelaia.
11. Dahaka dainai taunimanima ita vadivadi henia loulou be namo?
11 Sivarai namona ia kamonai vadaeni tauna ita vadivadi henia loulou ena badina ta be inai: Ta ena noho dalana bona lalohadai be ia haidaua diba. Reana eda vadivadi gunana murinai, haida be gorere badana ta idia abia, moni gaukara idia haboioa, edia lalokau tauna ta ia mase. (Hadibaia Tauna 9:11 duahia.) Tanobada ai idia vara hekwakwanai idauidau dainai, taunimanima be vaira negana idia laloa momo. Unai gaudia idia vara neganai, guna ia kamonai lasi tauna—o dagedage tauna—be sivarai namona ia abia dae diba. Unai dainai, nega idauidau ai, ma haida dekenai mai moale ida sivarai namona ita harorolaia be namo.
12. Haroro gaukara lalonai dahaka lalohadai ita abia be namo, bona dahaka dainai?
12 Nega momo ita be ma haida edia mauri dalana ita laloa momo dainai, lalohadai kererena ita abia. To, Iehova be ita ta ta eda kara namodia ia itaia. (Samuela Ginigunana 16:7 duahia.) Unai dainai, haroro gaukara ai, Iehova ena lalohadai ita abia be namo. Ekspiriens momo ese idia hahedinaraia, unai bamona ita karaia neganai, ita haroro henia taudia be sivarai namona do idia abia dae.
13, 14. (a) Sandra be Ruth ia davaria neganai, dahaka lalohadai kererena ia abia? (b) Unai ekspiriens amo dahaka ita dibaia?
13 Caribbean dekenai, painia taihu ta ladana Sandra be haroro gaukara lalonai Ruth ia davaria. Ruth be moale karana ta lalonai ia vareai momo, bona nega rua ia be kwini dagi ia abia. Ruth be Sandra ena haroro herevana ia moalelaia bada dainai, Sandra ida Baibel stadilaia dalana idia herevalaia. Sandra ia gwau: “Ena ruma dekenai lau vareai neganai, Ruth ia kwalimulaia troufi idauidau sibona lasi to ena foto ta lau itaia, ia be dabua namona ta ia hahedokilaia. Vadaeni lalohadai kererena lau abia, lau gwau Ruth be moale karadia lalonai ia vareai momo bona ladana bada kekenina dainai, reana hereva momokani do ia ura henia lasi. Unai dainai, Ruth lau vadivadi henia lou lasi.”
14 Nega ta ai, Ruth be Kingdom Hall dekenai ia lao, bona hebou murinai Sandra ia nanadaia: “Dahaka dainai egu stadi oi karaia lasi?” Sandra ese Ruth ia sori henia, bona ia gwau stadi do ia karaia lou. Ruth be stadi ia goadalaia, ena foto ia kokidia, kongrigeisen ena gaukara idauidau ia durua matamaia, bona ena mauri be Iehova dekenai ia gwauhamatalaia. Gabeai, Sandra ia gwau: ‘Guna, lau laloa Ruth be hereva momokani do ia ura henia lasi, to unai be lalohadai kererena.’
15, 16. (a) Joyce be ena nakimi ia haroro henia dainai, dahaka ia vara? (b) Ena be eda varavara edia kara be namo lasi, to dahaka dainai ita haroro henia noho be namo?
15 Tadikaka taihu momo be edia famili idia haroro henia bona anina namona idia havaraia, herevana toana be sivarai namona do idia kamonai lasi. Hegeregere, taihu Joyce ena ekspiriens ita laloa, ia be United States ai ia noho. Iena nakimi be pulisi ese dibura ruma dekenai idia atoa loulou. Joyce ia gwau: “Taunimanima idia gwau egu nakimi ena mauri be anina lasi, badina drag ia ania, ia henaohenao, bona kara dikadia ma haida ia karaia. To lagani 37 lalonai, lau ese egu nakimi dekenai Baibel ena hereva momokanidia lau herevalaia loulou.” Joyce ena haheauka bona hekwarahi dainai, ena nakimi be Iehova ena Witnes taudia ida Baibel ia stadilaia bona ena mauri ia haidaua haraga. Vanegai, California, U.S.A. dekenai, Joyce ena nakimi be distrik hebouhebou ta dekenai bapatiso ia abia, ena mauri lagani be 50. Joyce ia gwau: “Mai moale ida lau tai. Lau moale badina lau hesiku lasi to ia lau durua!”
16 Reana emu varavara be edia tomadiho idia goadalaia dainai, oi ura lasi idia dekenai Baibel ena hereva momokanidia oi herevalaia. To, Joyce be unai ese ia koua lasi, ia be ena nakimi ia haroro henia. Momokani, ita be taunimanima edia lalohadai ita diba lasi, ani? To reana ta be tomadiho momokanina ia tahua noho. Unai dainai, dala ita kehoa ia ese tomadiho momokanina ia davaria totona.—Aonega Herevadia 3:27 duahia.
Buka Namona Ta
17, 18. (a) Edena ripoti ese idia hahedinaraia Baibel be Dahaka Ia Hadibaia? bukana be namo herea? (b) Unai buka oi gaukaralaia neganai, dahaka ekspiriens namodia oi davaria?
17 Tanobada hegegemadai, ripoti ese idia hahedinaraia, kudou-maoro taudia momo herea be Baibel be Dahaka Ia Hadibaia? bukana ese ia durudia noho. United States ai, painia taihu ta ladana Penni be unai buka amo stadi haida ia hamatamaia. Penni be buruka taudia rua ia stadi henia, idia be edia dubu idia badinaia auka. Penni ia daradara, unai buruka taudia rua be Baibel Hadibaia bukana lalonai Baibel ena hadibaia herevadia do idia abia dae eiava lasi. Gabeai, Penni ia gwau, “Unai buka be namo herea bona auka lasi dainai, idia be hereva momokani idia abia dae haraga bona idia hepapahuahu lasi.”
18 Britain dekenai, pablisa ta ladana Pat be Asia hahine ta ia stadi henia. Unai hahine be ena hanua ia heautania, badina ena adavana bona natuna memerodia be gavamani idia gwau-edeede henia tuari taudia ese idia abia murinai, ia itadia lou lasi. Unai hahine be idia hagaria, ena ruma idia gabua, bona tatau momo ese idia reipia. Unai hekwakwanai idauidau dainai, unai hahine ia laloa ena mauri be anina lasi bona nega haida ia ura sibona ia hamasea. To, Baibel stadi amo heduru bada ia abia. Pat ia gwau: “Baibel Hadibaia bukana ena hereva bona laulau lalopararalaia totona be auka lasi, bona unai ese unai hahine ena mauri ia haidaua haraga.” Unai hahine be stadi ia goadalaia ela bona bapatiso lasi pablisa ai ia lao, bona gabeai ia gwau ia ura hebouhebou gabena dekenai bapatiso ia abia. Ita moale bema ta ita durua Baibel ese ia gwauraia gaudia ia lalopararalaia bona abia dae!
Kara Namo Karaia Totona Hesiku Lasi
19. Dahaka dainai haroro gaukara ita karaia noho be gau badana?
19 Nega be ia heau haraga dainai, haroro bona hahediba taudia halaoa haheganina ita badinaia be mai anina bada. Lagani ta ta ai, iseda haroro gaukara dainai, kudou-maoro taudia tausen momo be sivarai namona idia abia dae. To “Lohiabada ena dina badana be ia kahirakahira vadaeni,” anina be Dirava bona ena ura idia dadaraia taudia be kahirakahira do idia “mase.”—Sep. 1:14; Aon. 24:11.
20. Namona be ita ta ta be eda lalona ita hadaia dahaka ita karaia totona?
20 Unai bamona taudia ita durua noho diba. To unai ita karaia totona, Keristani taudia ginigunadia edia kara ita tohotohoa be gau badana, badina idia ese “taunimanima idia hadibaia noho, bona Iesu Keriso ena Sivarai Namona idia gwauraia noho. Inai gaukara idia hadokoa lasi.” (Kara 5:42) Hegeregere, hahetoho lalonai haroro gaukara ita karaia hanaihanai, iseda hadibaia dalana ita naria namonamo, bona haroro gaukara dekenai taunimanima ibounai ita haroro henia be namo! Kara namo ita karaia bona ita hesiku lasi be namo, unai amo Dirava ena lalonamo do ita abia.—2 Tim. 4:2; Galatia 6:9 duahia.
[Footnote]
^ par. 10 Ladana haida ai haidaua.
Edena Bamona Do Oi Haere?
• Daidia be sivarai namona idia abia dae noho?
• Dahaka dainai ita haroro henia taudia ita hahemaoro henia be maoro lasi?
• Baibel be Dahaka Ia Hadibaia? bukana ese dahaka namo ia havaraia noho?
[Study Questions]
[Pictures on page 13]
Kudou-maoro taudia tausen momo be sivarai namona idia abia dae noho
[Pictures on page 15]
Aposetolo Paulo ese ena kara ia haidaua amo dahaka ita dibaia?
[Picture on page 16]
Sivarai namona idia harorolaia taudia ese lalohadai kererena idia abia lasi be namo