Mataio Bukana Ena Hereva Badadia
Iehova Ena Hereva be Ia Mauri Noho
Mataio Bukana Ena Hereva Badadia
IESU ena mauri bona ena haroro gaukara ena sivarai ia torea tauna ginigunana be Mataio—guna ia be takisi moni gogoa tauna ta, to gabeai Iesu ena turana ai ia lao. Mataio ena evanelia bukana be Heberu gado dekenai idia torea guna bena gabeai Greek gado dekenai idia hahanaia, bona lagani 41 C.E. bamona ai idia torea ore. Mataio bukana ese Heberu Revarevadia bona Keristani Greek Revarevadia ia hakapua.
Unai evanelia bukana be Iuda taudia totona idia torea, bona ia hahedinaraia Iesu be gwauhamata Mesiana, Dirava ena Natuna. Unai buka ena hereva ita tahua namonamo neganai, Dirava momokani, Iena Natuna, bona Iena gwauhamata dekenai iseda abidadama do ia hagoadaia.—Heb. 4:12.
“GUBA BASILEIA BE KAHIRAKAHIRA IA MAI VADAENI”
Mataio bukana ese Basileia bona Iesu ena hahediba herevadia ia sivarailaia, to idia vara gaudia be idia vara negadia hegeregerena ai ia torea lasi. Hegeregere, ena be Iesu ese Ororo Harorona be gabeai ia gwauraia, to Mataio ena buka lalonai be ia gwauraia guna.
Iesu be Galilea ai ia haroro neganai, hoa karadia ia karaia, iena aposetolo taudia 12 dekenai haroro dalana ia hadibaia, Farisea taudia ia gwau henia, bona Basileia ena parabole idauidau ia herevalaia. Bena, Galilea ia rakatania bona “Iudea kahana dekenai ia lao, Ioridane Sinavai unai kahana dekenai.” (Mat. 19:1) Dala dekenai idia raka neganai, Iesu ese iena hahediba taudia ia hamaoroa: ‘Ita be Ierusalema ita daekau inai. Taunimanima ena Natuna be do idia samania, bona do idia kota henia, do idia gwau ia mase, to dina toi murinai do ia toreisi lou.’—Mat. 20:18, 19.
Baibel Henanadaidia Edia Haere:
3:16—Iesu ia bapatiso neganai, ‘guba ia kehoa’ anina be dahaka? Unai ena anina be Iesu be guna guba dekenai ia noho maurina ia laloatao lou.
5:21, 22—Badu hahedinaraia karana ese lalona dekenai ta badu henia noho karana ena dika ia hanaia, a? Iesu ia gwau bema tau ta be ena lalona dekenai ena tadikaka ia badu henia noho, unai be kara dika badana. To, bema mai hereva dika ida ta dekenai ena badu ia hahedinaraia, unai be kara dika bada herea. Unai tauna be kota badana dekenai do idia abia lao.
5:48—‘Ita maoromaoro momokani, iseda Tamana guba dekenai ia noho ia maoromaoro momokani bamona,’ a? Oibe, ena be ita be goevadae lasi taudia, to dala haida ai kara maoromaoro ita hahedinaraia diba. Iesu be lalokau ia herevalaia murinai, inai siri ena hereva ia gwauraia, iena kamonai taudia ia hamaorodia Dirava idia tohotohoa bona lalokau momokani idia hahedinaraia be namo. (Mat. 5:43-47) Edena bamona do idia hahedinaraia? Lalokau karana do idia habadaia, anina be edia inai taudia danu do idia lalokau henia.
7:16—Tomadiho momokani ena “huahua” be dahaka? Unai huahua be iseda kara sibona lasi, to ita abia dae gaudia danu—ita badinaia hahediba herevadia unai.
10:34-38—Ita gwau diba Baibel ese ruma bese ia hapararaia, a? Lasi. To, ruma bese lalonai Witnes lasi taudia edia kara dainai ruma bese ia parara. Idia be Keristani tomadiho karana idia dadaraia eiava dagedage henia dainai, ruma bese ia parara.—Luka 12:51-53.
11:2-6—Dirava ia gwau Iesu be Mesia neganai, Ioane ese Dirava ena gadona ia kamonai, to dahaka dainai Iesu ia nanadaia ia be “do ia mai tauna” eiava idau tauna ta do ia mai? Reana, Ioane be unai bamona ia henanadai badina ia ura Iesu sibona ese do ia haere henia. To, unai sibona lasi, Ioane ia ura diba bema “idau tauna ta” be Basileia ena siahu danu do ia mai, bona Iuda taudia do ia hamauria. Iesu ena haere amo ia hahedinaraia ia murinai idau tauna ma ta do ia mai lasi.
19:28—Do idia kota henia “Israela edia iduhu 12” ese daidia idia laulaulaia? Idia be horoa taudia, “Dirava ena Israela momokani orea taudia” idia laulaulaia lasi. (Gal. 6:16; Apok. 7:4-8) Badina, Iesu ese ia hereva henia aposetolo taudia be Dirava ena Israela ena memba taudia, bona idia be sibodia edia memba taudia do idia kota henidia lasi. Iesu be idia ida Basileia ena gwauhamata ta ia karaia bona ‘idia be Basileia ta bona Dirava ena hahelagaia taudia’ ai do idia lao. (Luka 22:28-30; Apok. 5:10) Dirava ena Israela taudia ese “tanobada do idia kota henia.” (1 Kor. 6:2) Unai dainai, “Israela edia iduhu 12” ese tanobada taudia idia laulaulaia, bona idia be hahelaga taudia edia orea amo idia idau. Idia be Kara Dika Ena Davana Karaia Dinana ai idia noho Israela ena iduhu 12 bamona bona guba terona dekenai idia helai taudia ese do idia kota henia.—Levitiko karoa 16.
Ita Dibaia Gaudia:
4:1-10. Unai sivarai ese ia hahedinaraia Satani be lauma tauna korikorina, bona ia be kara dika ena siahu ta sibona lasi. Satani be “tauanina ena ura dikadia, matabodaga ena ura dikadia, bona hekokoroku” karadia ia gaukaralaia ita ia tohoa totona. To, Baibel ena hakaua herevadia ita badinaia neganai, ita do ia durua Dirava ita abidadama henia noho totona.—1 Ioa. 2:16.
5:1–7:29. Emu hetura karana Dirava ida oi laloa bada be namo. Maino karadia oi hahedinaraia. Matabodaga lalohadai oi dadaraia. Emu gwauhamata oi hagugurua. Oi guriguri neganai, Dirava ena ura oi gwauraia guna, bena gabeai tauanina gaudia oi herevalaia. Dirava vairanai oi taga. Dirava ena Basileia bona kara maoromaoro oi tahua guna. Taunimanima oi hahemaoro henidia lasi. Dirava ena ura oi karaia. Iesu be ena Ororo Harorona ai sisiba namodia ia henia!
9:37, 38. Ita be Biaguna ita noia “ia ese utua taudia ma haida do ia siaia, iena uiti do idia utua” dainai, namona be hahediba taudia halaoa gaukarana ita goadalaia.—Mat. 28:19, 20.
10:32, 33. Namona be mai gari lasi ida iseda abidadama ita herevalaia.
13:51, 52. Basileia ena hereva momokani ita diba neganai, iseda maduna be taunimanima ita hadibaia bona unai dava bada gaudia be idia dekenai ita henia.
14:12, 13, 23. Sibona oi noho negadia be nega namona oi laloa dobu totona.—Mar. 6:46; Luka 6:12.
17:20. Abidadama be mai anina bada iseda hetura karana Iehova ida idia hadikaia ororo bamona gaudia eiava hekwakwanai ita kokia totona. Namona be Iehova bona Iena gwauhamata herevadia dekenai iseda abidadama ia goada noho.—Mar. 11:23; Luka 17:6.
18:1-4; 20:20-28. Iesu ena hahediba taudia be goevadae lasi taudia bona guna Iuda tomadiho idia badinaia dainai, dagi idia laloa bada. Kara dika karaia urana ita dadaraia bona iseda hahenamo bona maduna dekenai lalohadai maorona ita abia totona, manau karana ita hahedinaraia be namo.
“TAUNIMANIMA ENA NATUNA ENA MASE DALA DO IDIA KARAIA”
Nisan 9, 33 C.E. ai, Iesu be “doniki ena doruna dekenai ia helai,” bona Ierusalema dekenai ia vareai. (Mat. 21:5) Nisan 10 ai, dubu dekenai ia lao bona dubu idia hamiroa taudia be dubu amo ia luludia. Nisan 11 ai, dubu dekenai ia haroro, taravatu hadibaia taudia bona Farisea taudia ia gwau henidia, bona unai murinai iena hahediba taudia dekenai ‘do ia giroa mai bona tanobada dokona ena toana’ ia gwauraia. (Mat. 24:3) Nisan 12 ai, ena hahediba taudia ia hamaoroa: “Umui diba, dina rua do idia ore, Pasova ena aria do idia karaia. Unai neganai Taunimanima ena Natuna ena mase dala do idia karaia, do idia hasatauroa.”—Mat. 26:1, 2.
Nisan 14 ai, Iesu be ena mase ena Memorial anibouna ia karaia murinai, ia idia samania, idia dogoatao, idia kota henia bona idia hasatauroa. Dina ihatoina ai, ia be mase amo ia toreisi lou. Iesu be guba dekenai ia do daekau lasi neganai, iena murinai idia raka taudia ia hagania: “Umui lao, bese ibounai be diba tahua taudia do umui halaoa.”—Mat. 28:19.
Baibel Henanadaidia Edia Haere:
22:3, 4, 9—Headava ariana ena boiboi hereva toi be edena negai idia siaia? Headava matamata kekeni ena orea taudia haboua totona, Iesu bona iena murinai idia raka taudia ese boiboi herevana ginigunana be lagani 29 C.E. ia lao lagani 33 C.E. ai idia boiboilaia. Boiboi herevana iharuana be Pentekoste 33 C.E. ai lauma helaga idia abia negana amo ia lao 36 C.E. ai idia boiboilaia. Unai boiboi herevadia be Iuda, Iuda tomadiho idia abia dae idau bese taudia bona Samaria taudia totona. To, boiboi herevana ihatoina be hanua ena murimurinai idia noho taudia totona, anina be kopina idia utua lasi idau bese taudia, hegeregere Roma tuari tauna Korenelio dekenai idia abia lao. Unai be lagani 36 C.E. ai idia hamatamaia ema bona hari.
23:15, BHğ—Dahaka dainai Farisea tomadiho ia abia dae idau bese tauna be ‘Gehena ena natuna idia halaoa,’ bona ia be Farisea taudia edia dika ia hanaia momokani? Farisea taudia ai idia lao idau bese taudia haida be guna kara dika badadia idia karaia. To, Farisea taudia ai idia lao neganai, edia kara dika ia bada herea, edia hahediba taudia edia ia hereaia. Unai dainai, idia be ‘Gehena ena natudia,’ bona edia kara dika ese Iuda Farisea taudia edia dika ia hanaia momokani.
27:3-5—Iuda be “ena lalona ia giroa” ena anina be dahaka? Iuda ena lalona ia giroa be helalo-kerehai momokani ena toana lasi. Ia ura lasi Dirava ia noia ena dika ia gwauatao totona, to hahelaga taudia badadia dekenai ia lao bona ena dika ia gwauraia hedinarai. Iuda be “lauma do ia hamasea kara dikana ta ia karaia” dainai, ena lalona ena mamina ia dika momokani. (1 Ioa. 5:16) Ia lalohisihisi bada badina ia diba Dirava ese ena kerere do ia gwauatao lasi.
Ita Dibaia Gaudia:
21:28-31. Iehova ia laloa bada gauna be ita ese iena ura do ita karaia. Hegeregere, namona be Basileia harorolaia bona hahediba taudia halaoa gaukarana ita karaia goadagoada.—Mat. 24:14; 28:19, 20.
22:37-39. Taravatu ena oda badadia rua ese Dirava ena ura iena tomadiho taudia dekenai ia hahedinaraia!
[Picture on page 31]
Haboua gaukarana oi karaia goadagoada noho, a?
[Credit Line]
© 2003 BiblePlaces.com
[Picture on page 31]
Mataio be Basileia ia herevalaia momo