Gilead Gradueisen Namba 123

Gilead Stiuden Taudia e, “Tano Umui Geia Hamatamaia”

SATURDAY, September 8, 2007 ai, taunimanima 6,352 be tano 41 amo idia mai, Gilead gradueisen namba 123 idia itaia totona. Daba 10 o’klok dekenai, program ena seamani, Hakaua Oreana tauna ta Anthony Morris be helai taudia ia welkam henidia. Iena hamatamaia herevana murinai, ia ese hereva henia tauna ginigunana, United States ena Brens Komiti tauna ta Gary Breaux ia boiria.

Tadikaka Breaux ese stiuden taudia ia hamaoroa, herevana edia toana be hairai o lasi, to Iehova vairanai Iena ura idia karaia taudia be hairai taudia. (Ier. 13:​11, BHğ) Tadikaka ese stiuden taudia ia hagoadaia, Iehova vairanai idia hairai noho be namo. Murinai, Hakaua Oreana tauna ta Gerrit Lösch ia gwau, bema Iehova ita hesiai henia badina ita ura hahenamo ta ita abia, unai be lalohadai kererena lasi. (Heb. 11:6) To, Iehova ita hesiai henia ena badina badana be ita sibona eda namo ita laloa lasi to Iehova ita lalokau henia.

Murinai, Tiokratik Sikuli Dipatmen * naria tauna, William Samuelson, be stiuden taudia ia hagoadaia, King Iesu ena sivarai idia harorolaia bona kara namodia idia karaia noho totona. Tiokratik Sikuli Dipatmen durua tauna ta, Sam Roberson, be stiuden taudia ia hagoadaia, nega ibounai ma haida edia namo idia tahua totona. Unai ese stiuden taudia do ia durua, ‘Keristani taudia ibounai do idia lalokau henia’ totona.​​—1 Pet. 2:​17.

Unai tok murinai, Gilead sikuli ena hadibaia tauna Mark Noumair be stiuden haida ia inteviu henia, bona idia ese Gilead sikuli negana lalonai idia karaia haroro ena ekspiriens haida idia gwauraia. Helai taudia be unai ekspiriens idia kamonai neganai, idia diba unai stiuden be haroro gaukara idia lalokau henia bona idia ura dikadika ma haida idia durua. Murinai, Patterson Betele opesi ai ia gaukara tauna ta, Kent Fischer, ese tano toi amo idia mai Brens Komiti taudia ia inteviu henia, bona unai tano toi dekenai be misinari idia noho danu. Unai Brens Komiti taudia be helai taudia ibounai o stiuden edia tama sina momo idia hamaoroa, brens opesi be misinari taudia idia durua bona naria namonamo. Murinai, Gado Hahanaia Taudia Idia Durua Dipatmen ai ia gaukara tauna ta, Izak Marais, be lagani daudau misinari gaukara idia karaia taudia haida ia inteviu henia bona edia ekspiriens amo misinari matamatadia idia hagoadaia edia gaukara dekenai moale do idia davaria.

Program ena tok badana be Hakaua Oreana tauna Geoffrey Jackson ese ia henia, iena sinado be: “Hereva Oi Kamonai Vadaeni​​—Dahaka Do Oi Karaia?” Tadikaka Jackson, kahirakahira lagani 27 lalonai South Pacific ena motumotu dekenai misinari gaukara ia karaia tauna, ese Mataio karoa 7 ai ia noho Ororo Harorona ia herevalaia. Unai karoa lalonai, Iesu be tatau rua ia herevalaia​—ta be aonega tauna bona ma ta be kavakava tauna, bona idia ruaosi be edia ruma idia karaia.  Tadikaka ia gwau reana unai ruma ruaosi be gabu tamona ai idia haginia. Kavakava tauna ese ena ruma be miri latanai ia haginia, to aonega tauna be tano ia geia ela bona nadi ia davaria, vadaeni ena ruma ia haginia. Vadaeni lai gubana ia ginidae neganai, nadi latanai ia gini rumana be ia moru lasi to miri latanai ia gini rumana be ia moru.​​—Mat. 7:​24-​27; Luka 6:​48.

Iesu ia gwau, ena hadibaia herevadia ia kamonai to ia badinaia lasi tauna be kavakava tauna bamona. To, ena hadibaia herevadia ia kamonai bona ia badinaia tauna be aonega tauna bamona. Tadikaka Jackson ese stiuden ia hamaoroa, “Emui misinari gaukara lalonai, Baibel umui stadilaia bona umui dibaia gaudia umui badinaia neganai, umui be unai aonega tauna bamona.” Tadikaka be ena hereva dokonai, stiuden ia hagoadaia edia misinari gaukara lalonai tano idia “geia hamatamaia” totona.

Dokonai, stiuden be edia setifiket idia abia bona edia misinari gabuna idia hadibaia murinai, Tadikaka Morris be hereva haida ia gwauraia. Ia ese stiuden ia hagoadaia, nega ibounai Iesu idia badinaia bona Iehova idia abidadama henia noho be namo. Bena, Gilead gradueisen program ia koua.

[Footnote]

[Box on page 31]

KLAS TAUDIA

Edia tano idauidau: 10

Idia lao henia tanodia idauidau: 24

Klas taudia iboudiai: 56

Edia mauri lagani edia averes: 33.5

Lagani hida hereva momokani lalonai, edia averes: 17.9

Lagani hida ful-taim hesiai gaukara idia karaia, edia averes: 13.8

[Picture on page 32]

Watchtower Bible School of Gilead Ena Klas Namba 123

Inai lista ai, laini edia namba be vairana kahana amo ia daekau murina kahana, bona edia ladadia be lauri kahana amo ela bona idiba kahana.

(1) Esparza, E.; Papaya, S.; Bilal, A.; Suárez, M.; Evers, E.; Dimichino, K. (2) Rosa, M.; Fujii, R.; Ratey, O.; Leveton, J.; Van Leemputten, M. (3) Boscaino, A.; Beck, K.; Budanov, H.; Braz, C.; Peltz, K.; Siaw, A. (4) Leveton, S.; Santikko, H.; Conte, S.; Wilson, J.; Rylatt, J.; Pierce, S.; Fujii, K. (5) Rosa, D.; Boscaino, M.; Austin, V.; Rodiel, P.; Bilal, P.; Dimichino, P. (6) Ratey, B.; Czyzyk, D.; Clarke, C.; Riedel, A.; Esparza, F.; Siaw, P.; Van Leemputten, T.​(7) Rodiel, J.; Evers, J.; Green, J.; Czyzyk, J.; Santikko, M.; Rylatt, M. (8) Peltz, L.; Austin, D.; Riedel, T.; Beck, M.; Pierce, W.; Conte, S.; Green, S. (9) Suárez, J.; Clarke, J.; Papaya, S.; Budanov, M.; Wilson, R.; Braz, R.