Iesu Keriso—Misinari Tauna Badana
Iesu Keriso—Misinari Tauna Badana
“Ia dekena amo lau mai, bona ia ese lau ia siaia.”—IOA. 7:29.
1, 2. Misinari ena anina be dahaka, bona daika be Misinari Tauna badana?
INAI hereva “misinari taudia” oi kamonai neganai, dahaka oi laloa? Haida be Kerisendom ena misinari taudia idia laloa—idia momo be politikol bona idia noho tanona ena hepapahuahu lalonai idia vareai. To, oi be Iehova ena Witnes tauna dainai, oi be Hakaua Oreana ese idia siaia misinari taudia tano idauidau dekenai sivarai namona idia harorolaia totona oi laloa. (Mat. 24:14) Inai misinari taudia be edia nega bona goada idia henia taunimanima idia durua Iehova Dirava kahirakahira idia lao bona Ia idia tura henia totona.—Iam. 4:8.
2 Inai hereva “misinari” bona “misinari taudia” be Hiri Motu gado Baibel dekenai ia hedinarai lasi. To Greek gado Baibel ai, Efeso 4:11 dekenai be inai hereva “evanelia” ia noho bona ena anina ta be “misinari.” Iehova be Evanelia Tauna Hereadaena, to ia be Misinari tauna hereadaena ita gwauraia diba lasi badina tau ta be Iehova ia siaia diba lasi. Iesu Keriso be iena guba Tamana ia herevalaia neganai, ia gwau: “Ia dekena amo lau mai, bona ia ese lau ia siaia.” (Ioa. 7:29) Iehova be taunimanima ia lalokau henia bada dainai, iena Natuna tamona sibona ia vara bona tanobada dekenai ia siaia. (Ioa. 3:16) Iesu be Misinari Tauna badana, badina ta be tanobada dekenai Dirava ese ia siaia “hereva momokani gwauraia hedinarai totona.” (Ioa. 18:37) Ia ese Basileia ena sivarai namona harorolaia gaukara ia karaia namo herea, bona hesiai gaukara ia karaia dalana ese ita ia durua noho. Hegeregere, herevana ita be misinari taudia eiava lasi, to Iesu ena hadibaia dalana be iseda haroro gaukara lalonai ita badinaia diba.
3. Edena henanadai do ita laloa?
3 Iesu be Basileia ia harorolaia dainai, inai henanadai idia vara: Iesu be tanobada dekenai dahaka ia davaria? Dahaka dainai iena hadibaia karana be namo herea? Bona dahaka dainai iena haroro gaukara ai anina namona ia davaria?
Gabu Matamatana Dekenai Iesu be mai Ena Ura Bada ida Haroro Gaukara Ia Karaia
4-6. Tanobada dekenai, Iesu be dahaka gau haida ia haidaua?
4 Hari, gabu haida ai Basileia harorolaia taudia be momo lasi dainai, misinari taudia bona tadikaka taihu haida be unai gabu dekenai idia lao, to reana unai gabu ena noho dalana idia manadalaia totona be idia hekwarahi sisina. To Iesu be idau, badina guba dekenai, ia be ena Tamana bona aneru namodia ida ia noho. (Iobu 38:7) To tanobada dikana dekenai Iesu be kara dika taudia huanai ia noho! (Mar. 7:20-23) Iesu be ena hahediba taudia edia mama karana ia haheaukalaia. (Luka 20:46; 22:24) Ena be tanobada ai dahaka ia vara, to Iesu be kara goeva sibona ia badinaia.
5 Iesu be hoa dalana ai gado ta dekenai ia hereva matamaia lasi; lasi, to ia beibi neganai gado ta ia dibaia. Unai be idau momokani! Guba ai Iesu be aneru dekenai oda ia henia diba gaukara haida idia karaia totona! To tanobada ai, Iesu be “taunimanima edia gado” dekenai ia hereva. Unai gado be “aneru edia gado” bamona lasi. (1 Kor. 13:1) To iena haroro herevadia be mai edia siahu dainai, tau ta be Iesu bamona lasi.—Luka 4:22.
6 Dirava ena Natuna be tanobada dekenai ia mai neganai, ia haidaua gaudia haida mani oi laloa. Ena be Iesu be Adamu ena kara dika ia abia hanai lasi, to Iesu be taunimanima ta ai ia lao, iena “tadina taudia” o horoa tadikakadia bamona. (Heberu 2:17, 18 duahia.) Iesu ena tanobada maurina ena hanuaboi ginigabena ai, ia ura lasi iena guba Tamana ia noia “aneru orea 12, bona ma haida” do ia siaia ia idia durua totona. To mani oi laloa, Aneru Badana Mikaela, Iesu be mai ena siahu dainai aneru ibounai ia gunalaia! (Mat. 26:53; Iuda 9) Oibe, Iesu be hoa karadia ia karaia; to guba ai ia karaia gaudia ese tanobada ai ia karaia gaudia idia hereaia.
7. Iuda taudia be Taravatu idia laloa bada eiava lasi?
7 Guba dekenai Iesu be “Hereva,” bona reana Dirava ese ia gaukaralaia taunimanima idia noho lasi tano dekenai Israela taudia ia hakaua totona. (Ioa. 1:1; Eso. 23:20-23) To, Israela taudia be ‘aneru idia henia taravatuna idia abia vadaeni, to idia badinaia lasi.’ (Kara 7:53; Heb. 2:2, 3) Momokani, aposetolo edia negai, Iuda tomadiho gunalaia taudia be taravatu ena anina idia lalopararalaia namonamo lasi. Hegeregere, mani Sabati taravatuna ita laloa. (Mareko 3:4-6 duahia.) Taravatu hadibaia taudia bona Farisea taudia be ‘taravatu ena hereva badadia, kota henia, bona bogahisihisi, bona abidadama, idia negea.’ (Mat. 23:23) To, Iesu be ia hesiku lasi bona hereva momokani ia harorolaia noho.
8. Dahaka dainai Iesu be ita ia durua diba?
8 Iesu be mai ura ida ena gaukara ia karaia. Ia be taunimanima ia lalokau henia dainai, ia ura bada idia ia durua. Mai ura bada ida haroro gaukara ia karaia. Bona Iesu be tanobada ai ia noho neganai, ia be Iehova ia abidadama henia, unai dainai ia be “hegeregere vadaeni, ia dekenai idia kamonai henia taudia ibounai dekenai, be mauri hanaihanai do ia henidia” totona. Danu, “dibagani bona hisihisi ena mamina ia abia dainai, ia ese taunimanima ia durua diba, edia dibagani” idia hanaia totona.—Heb. 2:18; 5:8, 9.
Hadibaia Tauna Namona
9, 10. Iesu be tanobada dekenai ia do mai lasi neganai, dahaka treinini ia abia?
9 Hari, Hakaua Oreana be misinari taudia ia hadibaia murinai ia siaia lao tano haida dekenai haroro gaukara idia karaia totona. Iesu be haroro gaukara ia karaia totona, sikuli ta dekenai ia lao, a? Oibe, to ia be rabi taudia edia sikuli dekenai ia lao lasi bona ladana bada tomadiho gunalaia taudia haida ese idia hadibaia lasi. (Ioa. 7:15; Kara 22:3 hahegeregerea.) Dahaka dainai Iesu be ia hegeregere momokani taunimanima ia hadibaia totona?
10 Ena be Iesu be iena sinana Maria bona iena heubu tamana Iosepa amo gau haida ia dibaia, to haroro gaukara ia karaia totona, Iehova be iena hadibaia tauna badana. Iesu be unai ia herevalaia neganai, ia gwau: “Lau sibona egu siahu dekenai hereva lau gwauraia lasi, to lauegu Tamana, lau ia siaia Diravana, ese ia hereva lau dekenai dahaka hereva dahaka hereva do lau gwauraia, bona edena bamona do lau hereva.” (Ioa. 12:49) Unai siri ese ia hahedinaraia, Iesu be Tamana amo ia dibaia gaudia ia hadibaia. Iesu be tanobada dekenai ia do mai lasi neganai, nega bada lalonai ia be iena Tamana ena hadibaia herevadia ia kamonai henia. Iesu be treinini namo hereana ia abia?
11. Edena dala ai Iesu be iena Tamana ena haheitalai ia tohotohoa?
11 Iesu be Dirava ese ia havaraia negana amo, ia be Tamana ia tura henia namonamo. Tanobada dekenai ia do mai lasi neganai, Iesu be Dirava ese taunimanima ia kara henia dalana ia itaia. Dirava be taunimanima ia lalokau henia hegeregerena, Natuna danu be taunimanima ia lalokau henia. Unai dainai ia gwau: “Dirava ena tanobada, mai ena noho taudia ibounai dekenai lau moale noho.”—Aon. 8:22, 31.
12, 13. (a) Iesu be iena Tamana ese Israela taudia ia kara henia karana ia itaia amo dahaka ia dibaia? (b) Iesu ia abia dibana be edena bamona ia gaukaralaia?
12 Danu, Natuna be ena Tamana ese hekwakwanai ia hamaoromaoroa daladia ia itaia, unai amo diba ia abia. Hegeregere, Iehova ese Israela taudia ia kara henia dalana mani oi laloa. Nehemia 9:28 ia gwau: “Maino ma ia vara lou neganai, kara dika ma idia karaia lou. Unai dainai oi ese dagedage taudia edia siahu henunai, ma oi atodia lou. To edia lalona ma idia giroa, bona oi dekenai idia tai neganai, oi be guba dekena amo idia dekenai oi kamonai, bona nega momo oi ese idia oi hamauria, oiemu bogahisihisi hegeregerena.” Iesu be Iehova ida ia gaukara bona Iehova ena gaukara ia itaia dainai, ia danu iena haroro teritori ai idia noho taudia ia hebogahisi henia.—Ioa. 5:19.
13 Iesu be hebogahisi dalanai ena aposetolo taudia ia kara henia neganai, ia dibaia gaudia ia gaukaralaia. Iesu do idia hamasea hanuaboina ai, ia lalokau henidia aposetolo taudia ibounai “idia heau, ia sibona idia rakatania.” (Mat. 26:56; Ioa. 13:1) Petero be nega toi Iesu ia gorea! To, Iesu ese dala ia kehoa iena aposetolo taudia be ia dekenai idia giroa mai totona. Ia ese Petero ia hamaoroa: “Lau guriguri vadaeni oi dainai, oiemu abidadama do ia moru lasi totona. Vadaeni lau dekenai do oi giroa mai neganai, be oiemu tadikaka dekenai goada do oi henia.” (Luka 22:32) “Aposetolo taudia bona peroveta taudia” be lauma Israela taudia ginigunadia, bona Ierusalema Matamata ena magu ena haba nadidia dekenai be Iesu Keriso ena aposetolo taudia 12 edia ladana idia noho. Hari inai negai, horoa Keristani taudia bona edia bamodia “mamoe idaudia,” be Dirava ena siahu bona Iena lalokau Natuna ena gunalaia henunai Basileia ena sivarai namona idia harorolaia bona anina namona idia havaraia.—Efe. 2:20; Ioa. 10:16; Apok. 21:14.
Iesu Ena Hadibaia Daladia
14, 15. Edena dala ai Iesu ena hadibaia dalana be taravatu hadibaia taudia bona Farisea taudia amo ia idau?
14 Iesu be ena murinai idia raka taudia ia hadibaia neganai, edena dala ai ia dibaia gaudia ia gaukaralaia? Iesu ena hadibaia dalana ese Iuda tomadiho gunalaia taudia edia hadibaia dalana ia hereaia. Taravatu hadibaia taudia bona Farisea taudia be Dirava ena taravatu idia hadibaia lasi, to taunimanima edia taravatu idia hadibaia. To, Iesu be sibona ena hereva ia gwauraia lasi; ia be Dirava ena hereva sibona ia gwauraia. (Mar. 7:8, 9; Ioa 14:10) Ita danu be Iesu bamona ita karaia be namo.
15 Iesu ese tomadiho gunalaia taudia ia hereaia ena badina ma ta ia noho. Ia ese taravatu hadibaia taudia bona Farisea taudia ia herevalaia neganai, ia gwau: “Do idia hereva henia gaudia be do umui badinaia, bona do umui karaia. To idia karaia bamona do umui karaia lasi. Badina be idia hereva, to idia karaia lasi.” (Mat. 23:3) Iesu be ia hadibaia sibona lasi, to ia hadibaia gaudia ia badinaia danu. Unai ia hamomokania gauna ta mani ita itaia.
16. Dahaka dainai ita gwau diba Iesu be Mataio 6:19-21 ena hereva ia badinaia?
16 Iesu ese ena aposetolo taudia ia hamaoroa ‘edia kohu be guba dekenai do idia haboua.’ (Mataio 6:19-21 duahia.) Iesu be unai hereva ia badinaia danu, a? Oibe, badina ia gwau: “Uda sisia be mai edia nadi matuna, bona ataiai manu be mai edia ruma, to Taunimanima ena Natuna be iena kwarana atoa gabuna lasi.” (Luka 9:58) Iesu be gau momo ia tahua lasi. Ia be Basileia ena sivarai namona ia harorolaia goadagoada, bona ena kohu be tanobada ai ia haboua lasi dainai ia lalohekwarahi lasi. Bona Iesu ia gwau, guba dekenai kohu haboua be namo, badina “unuseni be manumanu bona raraka ese gau idia hadikaia lasi, unuseni danu henaoa taudia ese ruma idia makohia diba lasi, bona gau idia henaoa diba lasi.” Oi be Iesu ena hahegani oi badinaia dainai, guba dekenai emu kohu oi haboua, a?
Iesu Ena Kara Namodia Dainai Taunimanima be Ia Idia Laloa Bada
17. Dahaka kara namodia dainai Iesu be haroro tauna idauna momokani?
17 Dahaka kara namodia dainai Iesu be haroro gaukara tauna idauna momokani? Iesu be ia durua taudia ia laloa bada. Iesu be Iehova ena kara ia hahedinaraia, idia be manau, lalokau, bona hebogahisi. Edena dala ai Iesu be kara namodia ia hahedinaraia dainai, momo be ia dekenai idia lao?
18. Dahaka dainai ita gwau diba Iesu be manau tauna?
18 Iesu be Iehova ena ura ia abia dae bena tanobada dekenai ia mai. Bona Baibel ia gwau Iesu “ese sibona ena ura dainai, iena dagi badana ia negea, bona hesiai tauna momokani ia lao. Ia be taunimanima hegeregerena ia vara, bona taunimanima edia toana ia abia.” (Fili. 2:7) Unai be manau karana. Danu, Iesu be taunimanima edia namo ia laloa bada. Iesu ia gwau lasi ia be guba amo ia mai dainai, taunimanima ese ia idia kamonai henia be namo. Lasi, Iesu be mesia koikoidia bamona lasi, bona ia sibona ena Mesia dagina ia harorolaia lasi. Nega haida Iesu ese taunimanima ia hamaoroa iena sivarai be ma haida dekenai idia hadibaia lasi. (Mat. 12:15-21) Iesu ia ura taunimanima be ia karaia gaudia idia itaia, unai amo do idia abia hidi Iesu do idia badinaia eiava lasi. Iesu ena hahediba taudia idia moale badina edia Lohiabada be idia ia doria lasi guba aneru idia tohotohoa totona!
19, 20. Edena dala ai lalokau bona hebogahisi karana ese Iesu idia doria taunimanima ia durua totona?
19 Iesu Keriso be lalokau—iena guba Tamana ena kara badana ta—ia hahedinaraia danu. (1 Ioa. 4:8) Iesu be mai lalokau ida taunimanima ia hadibadia. Hegeregere, Iesu ena hemami lohia tauna matamata dekenai mani oi laloa. (Mareko 10:17-22 duahia.) Mareko ia gwau Iesu be unai lohia tauna matamata “ia ura henia” bona ia ura ia durua, to unai lohia tauna be ena kohu ia laloa bada dainai Iesu ena murinai ia raka lasi.
20 Iesu ena kara namona ta be hebogahisi. Goevadae lasi taudia ibounai bamona, Iesu ena hadibaia herevana idia badinaia taudia be hekwakwanai momo idia davaria danu. Iesu be unai ia diba dainai, mai hebogahisi ida idia ia hadibaia. Haheitalai ta be inai: Nega ta, Iesu bona iena aposetolo taudia be idia bisi bada dainai, nega be lasi idia aniani totona. To, hutuma be idia haboua neganai, Iesu be dahaka ia karaia? “Ia bogahisihisi idia dekenai, badina idia be mamoe hegeregere, bona naria tauna lasi. Vadaeni, ia ese mauri sivarai momo ia hadibaia.” (Mar. 6:34) Iesu ia itaia iena teritori dekenai idia noho taudia be idia noho namonamo lasi dainai ia hebogahisi, bona edia namo totona Iesu be idia ia hadibaia bona hoa karadia ia karaia. Haida be Iesu ena kara namodia bona hereva ese edia lalona ia veria dainai, iena hahediba taudia ai idia lao.
21. Stadi gabena ai dahaka do ita stadilaia?
21 Iesu ena haroro gaukara amo gau momo ita dibaia diba, bona stadi gabena ese unai do ia hahedinaraia. Edena dala ma haida ai Iesu Keriso, Misinari Tauna badana ita tohotohoa diba?
Edena Bamona Do Oi Haere?
• Iesu be tanobada dekenai ia do mai lasi neganai, dahaka treinini ia abia?
• Iesu ena hadibaia dalana be edena dala ai taravatu hadibaia taudia bona Farisea taudia edia ia hereaia?
• Iesu be dahaka kara namodia ia hahedinaraia dainai, taunimanima be ia idia laloa bada?
[Study Questions]
[Picture on page 15]
Iesu ese edena dala ai hutuma ia hadibaia?