Misinari Tauna Badana Tohotohoa

“Lau karaia bamona do umui karaia, Keriso ena kara lau karaia bamona.”​​—1 KOR. 11:1.

1. Dahaka dainai Iesu Keriso ita tohotohoa be gau badana?

APOSETOLO Paulo be Misinari Tauna badana, Iesu Keriso, ia tohotohoa. Paulo ese ena Keristani tadikaka ia hamaoroa: “Lau karaia bamona do umui karaia, Keriso ena kara lau karaia bamona.” (1 Kor. 11:1) Iesu be iena aposetolo taudia edia aena ia huria amo manau karana ia hadibaia murinai, ia gwau: “Dala lau hedinaraia vadaeni umui dekenai, vadaeni umui ese danu lau karaia bamona do umui karaia.” (Ioa. 13:​12-​15) Hari inai negai, ita Keristani taudia ese eda hereva bona kara amo Iesu ita tohotohoa be namo.​​—1 Pet. 2:​21.

2. Herevana Hakaua Oreana be oi idia abia hidi lasi tano ma ta dekenai misinari gaukara oi karaia totona, to dahaka oi karaia be namo?

² Vanegai stadi lalonai, ita itaia misinari tauna be ma haida dekenai sivarai namona ia abia lao o harorolaia. Unai dainai, Paulo be henanadai haida ia gwauraia. (Roma 10:​11-​15 duahia.) Siri dekenai Paulo ia henanadai: “Bema haroro tauna be lasi neganai, edena bamona do idia kamonai?” Bena Isaia ena peroveta herevana ia gwauraia: “Sivarai Namona ena moale idia mailaia taudia edia aena, be namo herea momokani.” (Isa. 52:7) Herevana Hakaua Oreana be oi idia abia hidi lasi tano ma ta dekenai misinari gaukara oi karaia totona, to Iesu bamona, mai emu ura ida sivarai namona oi harorolaia goadagoada. Vanegai lagani ai, tano 236 ai, pablisa ibounai 6,957,852 be ‘Sivarai Namona harorolaia gaukara idia karaia.’​​—2 Tim. 4:5.

“Ai be Gau Ibounai Ai Rakatania Oi Murinai Ai Raka Totona”

3, 4. Iesu be guba dekenai dahaka ia rakatania? Bona Iesu ena murinai ita raka totona dahaka ita karaia be namo?

³ Iesu be ena maduna tanobada ai ia hagugurua totona, guba ai “iena dagi badana ia negea, bona hesiai tauna momokani ia lao.” (Fili. 2:7) Herevana dahaka ita karaia Iesu ita tohotohoa totona, to ita karaia gaudia be Iesu ese tanobada  ai ia karaia gaudia ida ita hahegeregerea diba lasi. To, ita be Iesu ita badinaia noho taudia dainai, namona be ita gini goada bona Satani ena tanobada ai ita karaia kara gunadia ita laloa lou lasi bona ita lalohisihisi lasi.​​—1 Ioa. 5:​19.

⁴ Nega ta, aposetolo Petero ese Iesu ia hamaoroa: “Ai be gau ibounai ai rakatania, vadaeni oiemu murina dekenai ai raka.” (Mat. 19:27) Petero, Andrea, Iamesi, bona Ioane be karaharaga edia reke idia rakatania bona Iesu murinai idia raka. Haoda bisinesi idia rakatania bona haroro gaukara be edia gaukara badana ai idia halaoa. Luka ese ia torea hegeregerena, Petero ia gwau: “Ai be emai gau ibounai ai rakatania vadaeni, oiemu murina dekenai ai raka vadaeni.” (Luka 18:28) Iesu murinai ita raka totona, ita momo be ‘gau ibounai’ ita rakatania lasi. To, ‘sibona eda ura ita laloa lasi,’ bena Iesu murinai ita raka bona mai kudouna ibounai ida Iehova ita hesiai henia. (Mat. 16:24) Unai bamona ita karaia dainai, hahenamo momo ita davaria. (Mataio 19:29 duahia.) Keriso bamona, mai eda ura ida sivarai namona ita harorolaia o ta ita durua Dirava bona Iena lalokau Natuna kahirakahira idia lao neganai, ita moale.

5. Valmir be hereva momokani ia dibaia bona ia karaia karana ena ekspiriens oi gwauraia.

⁵ Brazil tauna Valmir be Suriname ai ia noho, bona ia be golo ia tahua tauna. Ia be inuinu kekero bona matabodaga karadia ia karaia. Nega ta ai, ia be siti ta dekenai ia lao neganai, Iehova ena Witnes taudia be ia ida Baibel stadi idia hamatamaia. Ia be dina ibounai ia stadi, ena kara momo ia haidaua, bona daudau lasi murinai bapatiso ia abia. Ia davaria ena gaukara dainai ia ese Baibel ena hahediba herevadia ia badinaia be auka. Unai dainai, ia ese ena bisinesia ia hoihoilaia bona Brazil dekenai ia giroa lou ena ruma bese ia durua hereva momokani idia davaria totona. Edia tano idia rakatania taudia momo be hereva momokani idia dibaia neganai, edia moni gaukara namodia idia rakatania. Bona edia tano dekenai idia giroa lou, badina idia ura edia varavara bona ma haida idia durua Iehova kahirakahira idia lao totona. Unai bamona Basileia harorolaia taudia be mai edia ura ida haroro gaukara idia karaia.

6. Bema ita be haroro taudia be momo lasi gabudia dekenai ita lao diba lasi, dahaka ita karaia diba?

⁶ Witnes taudia momo be Basileia harorolaia taudia be momo lasi gabudia dekenai idia lao. Haida be tano ma haida dekenai idia lao. Ita be reana tano ma ta dekenai do ita lao lasi, to nega ibounai iseda  haroro goadagoada karana amo Iesu ita tohotohoa diba.

Iehova ese Ita Ia Hadibaia

7. Idia ura edia Basileia harorolaia gaukara idia habadaia taudia be edena sikuli dekenai idia lao diba?

⁷ Iesu be iena Tamana amo diba ia abia bamona, Iehova ese ia hegaegaelaia sikuli idauidau amo diba ita abia be namo. Iesu ia gwau: “Peroveta taudia ese inai bamona idia torea, idia gwau, ‘Idia ibounai Dirava ese do ia hadibaia.’ ” (Ioa. 6:​45; Isa. 54:13) Hari inai negai, Basileia harorolaia taudia durua totona sikuli idauidau idia noho. Momokani, ita ibounai be iseda kongrigeisen ai ita karaia Tiokratik Haroro Sikuli amo namo bada ita abia. Painia taudia be Painia Gaukara Sikuli dekenai idia lao diba. Nega daudau lalonai painia gaukara idia karaia taudia be nega iharuana unai sikuli lalonai idia vareai. Elda bona hesiai taudia be edia hadibaia dalana bona tadikaka taihu durua daladia idia hanamoa totona, Basileia Hesiai Gaukara Sikuli dekenai idia lao. Idia headava lasi elda bona hesiai taudia momo be Hesiai Gaukara Hadibaia Sikulina dekenai idia lao vadaeni, bona unai sikuli ese idia ia durua haroro gaukara lalonai haida idia durua totona. Bona misinari gaukara idia karaia tadikaka bona taihu momo be Gilead Sikuli dekenai edia diba idia habadaia.

8. Haida ese Iehova ena hadibaia dalana be edena bamona idia laloa?

⁸ Iehova ena Witnes taudia momo be unai sikuli idauidau idia lao henia totona, gau momo idia haidaua. Yugu be Canada dekenai Hesiai Gaukara Hadibaia Sikulina dekenai ia lao totona, iena moni gaukara amo ia risain, badina laga-ani totona ia noinoi neganai iena biaguna ia ura lasi. Yugu ia gwau: “Lau lalohisihisi lasi. Momokani, bema gwaumaoro idia henia lau laga-ani totona, reana gabeai kampani taudia do idia gwau kampani oi badinaia hanaihanai bona oi rakatania lasi be namo. To hari lau moale badina lau hegeregere Iehova ese ia henia gaukara lau karaia totona.” Momo be Dirava ia hegaegaelaia sikuli dekenai idia lao totona, idia ura henia bada gaudia idia rakatania.​​—Luka 5:​28.

9. Baibel ena hereva ita hadibaia bona ita hekwarahi ena namo ena ekspiriens ta oi gwauraia.

⁹ Baibel ena hereva ita hadibaia neganai, ita hekwarahi be namo, badina unai amo ta do ita durua namonamo diba. (2 Tim. 3:​16, 17) Guatemala dekenai ia noho tauna Saulo dekenai ia vara gauna mani ita laloa. Ia vara neganai, ia be mai ena gorere kwarana dekenai. Saulo ena tisa ta ese Saulo ena sinana ia hamaoroa Saulo be ia badu momo dainai, duahiduahi karana idia hadibaia be auka. Saulo be sikuli ia rakatania bona ia be duahiduahi ia diba lasi. To, Witnes ta ese Duahiduahi Bona Toretore Dalana buklet amo Saulo ia durua duahiduahi karana ia diba totona. Gabeai, Saulo be duahiduahi ia diba bona Tiokratik Haroro Sikuli ai tok ia henia. Gabeai, Saulo ena sinana be ruma-ta-ruma-ta gaukara lalonai Saulo ena tisa ia davaria. Saulo ena sinana be tisa ia hamaoroa Saulo be duahiduahi ia diba neganai, tisa be ia gwau vaira pura ai Saulo do ia mailaia be namo. Pura gabena ai Saulo be tisa ena ruma dekenai ia lao neganai, tisa ese Saulo ia nanadaia, “Lau dekenai dahaka do oi hadibaia?” Saulo ese Baibel be Dahaka Ia Hadibaia? bukana amo paragraf ta ia duahia matamaia. Tisa ia gwau: “Lau hoa, badina oi ese lau oi hadibaia noho.” Unai tisa ia tai bona Saulo ia rosia.

Kudouna Ia Hamarerea Hadibaia Dalana

10. Taunimanima dekenai Baibel ena hereva momokani ita hadibaia totona, edena tulu namona ia noho?

¹⁰ Iesu be Iehova bona Baibel edia hereva hegeregerena taunimanima ia hadibaia. (Luka 4:​16-​21; Ioa. 8:​28) Bema ita be Iesu ena sisiba bona Baibel ita badinaia, ita be Iesu ita tohotohoa unai. Unai dainai, ita ibounai eda hereva bona lalohadai be hegeregere, bona ita lalotamona. (1 Kor. 1:​10) Ita moale badina “hesiai tauna mai ena kamonai, bona mai ena kara maoromaoro” be Baibel idia herevalaia bukadia idia karaia. Unai buka ese ita idia durua mai lalotamona ida taunimanima ita hadibaia bona iseda hesiai gaukara ita hagugurua totona! (Mat.  24:45; 28:​19, 20) Unai buka ta be Baibel Hadibaia bukana, bona gado 179 ai idia hahanaia vadaeni.

11. Ethiopia dekenai, taihu ta be edena dala ai Baibel Hadibaia bukana amo dagedage karana ia hanaia?

¹¹ Baibel Hadibaia bukana ese ita idia dagedage henia taudia edia lalona ia haidaua diba. Ethiopia dekenai, painia taihu Lula, be nega ta Baibel stadi ia karaia noho lalonai, Baibel stiuden ena varavara ta be mai badu ida ia mai bona ia gwau unai stadi idia hadokoa be namo. Lula be mai manau ida unai hahine ia hereva henia, bona Baibel Hadibaia bukana ena karoa 15 ai moni koikoina ena haheitalai ia gaukaralaia. Unai hahine be taihu ena hereva ia moalelaia dainai ia gwau stadi idia karaia lou. To, stadi gabena ai unai hahine be stadi lalonai ia helai danu bona taihu ia noia ia danu be Baibel stadi ia ura bona ia gwau unai stadi ena davana do ia henia! Ia be wiki ta lalonai nega toi ia stadi bona iena hetura karana Iehova ida ia goada ia lao.

12. Matamata taudia ese Baibel ena hereva momokani idia hadibaia namonamo diba ena ekspiriens ta oi gwauraia.

¹² Matamata taudia be Baibel Hadibaia bukana amo ma haida idia durua diba. Hawaii dekenai, mauri lagani 11 merona Keanu be sikuli ai unai buka ia duahia lalonai, iena klas turana ta ia henanadai: “Dahaka dainai holide dinadia oi moalelaia lasi?” Keanu be unai buka ena apendiks ai ia noho sinado “Dina Badadia Ita Moalelaia be Namo, Eiava?” amo haere ia duahia. Bena unai buka ena rau 2 ia kehoa bona unai mero ia nanadaia, ia be edena karoa ia ura henia bada. Gabeai, ia ese Baibel stadi ia hamatamaia. Vanegai lagani ai, Iehova ena Witnes taudia ese Baibel stadi ibounai 6,561,426 idia karaia, momo be Baibel Hadibaia bukana idia gaukaralaia. Oi be Baibel stadi oi karaia totona, unai tulu oi gaukaralaia, a?

13. Edena dala ai Baibel stadilaia karana ese taunimanima ia durua diba?

¹³ Baibel Hadibaia bukana ese idia ura Dirava ena ura idia karaia taudia edia mauri ia haidaua diba. Norway dekenai, spesel painia tadikaka bona ena adavana be Zambia famili ta idia stadi henia. Unai Zambia tau bona hahine edia natudia be kekeni toi bona idia ura lasi ma beibi ta idia abia. Unai dainai, hahine be ia rogorogo neganai, idia ura beibi be bogana lalonai idia hamasea. Dina haida idia do noho doketa idia itaia totona, idia be Baibel Hadibaia bukana ena karoa ladana, “Dirava Ena Lalohadai Mauri Dekenai Ita Abia,” idia stadilaia. Unai karoa ena rau 126 dekenai be ia do vara lasi beibi ena laulau ia noho bona unai ese edia kudouna ia hamarerea dainai, idia be bogana lalonai edia natuna idia hamasea lasi. Idia be hereva momokani lalonai idia goada idia lao bona edia beibi matamatana ia vara neganai, iena ladana be stadi naria tauna ena ladana idia hatoa.

14. Iseda hahediba herevadia hegeregerena ita noho ena ekspiriens ta oi gwauraia.

 ¹⁴ Iesu ena hadibaia dalana badana ta be, ia be ia hadibaia gaudia ia badinaia danu. Momo be Iehova ena Witnes taudia, Iesu idia tohotohoa taudia unai, edia kara namona idia moalelaia. New Zealand dekenai, bisinesi tauna ta ena motuka be raskol taudia ese idia hamakohia bona iena baege idia henaoa. Bisinesi tauna be pulisi dekenai ia hadibaia neganai, pulisi tauna ese ia hamaoroa: “Unai baege do oi davaria dalana tamona be, bema Iehova ena Witnes tauna ta ese ia davaria.” Niuspepa loalaia gaukara ia karaia Witnes taihu ta ese unai baege ia davaria. Pulisi taudia be bisinesi tauna idia hadibaia hahine ta be ena baege ia davaria neganai, bisinesi tauna be taihu ena ruma dekenai ia lao. Ia moale badina mai anina bada pepa ta be baege lalonai ia do noho. Unai taihu ese unai bisinesi tauna ia hamaoroa, “Unai gauna lau henia lou be maoro, badina lau be Iehova ena Witnes tauna ta.” Unai bisinesi tauna ia hoa, bona pulisi tauna ese dabai ia dekenai ia gwauraia herevana ia laloatao. Momokani, Keristani taudia korikori be Baibel ena hakaua herevadia idia badinaia bona Iesu idia tohotohoa.​​—Heb. 13:18.

Taunimanima Ita Kara Henia Neganai, Iesu Ita Tohotohoa

15, 16. Edena dala ai taunimanima edia lalona ita veria diba ita harorolaia sivaraina idia abia dae totona?

¹⁵ Iesu ena kara namodia dainai, taunimanima be iena hereva idia kamonai. Hegeregere, iena lalokau bona manau karadia dainai, ladana bada lasi taudia be ia dekenai idia mai. Bona ia hebogahisi henidia bona idia ia hagoadaia, bona gorere taudia ia hanamoa. (Mareko 2:​1-5 duahia.) Ita be hoa karadia ita karaia diba lasi, to ita be lalokau, manau, bona hebogahisi karadia ita hahedinaraia diba, badina unai kara ese taunimanima ia veria hereva momokani idia abia dae totona.

¹⁶ South Pacific ena motumotu ta Kiribati dekenai, spesel painia ta ladana Tariua be tau buruka ta ladana Beere ena ruma dekenai ia lao. Ena be Beere ia ura lasi sivarai namona ia kamonai, to taihu ia itaia Beere be ia raka namonamo lasi dainai ia hebogahisi henia. Ia ese Beere ia nanadaia: “Dirava ese gorere bona buruka taudia dekenai ia gwauhamatalaia gauna oi diba, a?” Bena Isaia ena peroveta herevana ta ia duahia. (Isaia 35:​5, 6 duahia.) Beere ia hoa bada bona ia gwau, “Lau be lagani momo lalonai Baibel lau duahia bona egu dubu ena misinari tauna ta be lau ia vadivadi henia hanaihanai, to lau be Baibel ai unai bamona hereva lau itaia lasi.” Beere be Baibel stadi ia hamatamaia, bona hereva momokani ia abia dae bona ia goada ia lao. Oibe, ena be Beere ia raka namonamo lasi, to ia bapatiso vadaeni, grup maragina ta ia naria, bona ia be unai motumotu dekenai sivarai namona ia harorolaia loaloa diba.

Keriso Tohotohoa Noho

17, 18. (a) Edena dala ai haroro gaukara tauna namona ai oi lao diba? (b) Haroro gaukara idia laloa bada taudia be dahaka hahenamo do idia abia?

¹⁷ Tadikaka taihu edia haroro gaukara ena ekspiriens namodia ese idia hahedinaraia, ita be eda hesiai gaukara ita karaia namonamo diba bema Iesu ena kara ita diba bona hahedinaraia. Unai dainai, iseda haroro gaukara ita karaia goadagoada neganai, ita be Iesu ita tohotohoa unai!

¹⁸ Aposetolo edia negai, haida be Iesu ena hahediba taudia ai idia lao neganai, Petero ia henanadai: “Ai be dahaka do ai abia?” Bena Iesu ia gwau: “Ruma, o iena tadikakana, o iena taihuna, o iena tamana, o iena sinana, o iena adavana, o iena natuna, o tano, lau totona ia rakatanidia tauna ese unai do ia abia lou, ma momo herea momokani danu. Bona mauri hanaihanai danu do ia abia.” (Mat. 19:​27-​29) Unai hahenamo do ita abia bema nega ibounai Misinari Tauna badana, Iesu Keriso ita tohotohoa.

Edena Bamona Do Oi Haere?

• Iehova be edena bamona ita ia hadibaia haroro gaukara ita karaia totona?

• Dahaka dainai iseda haroro gaukara ai Baibel Hadibaia bukana ese anina namona ia havaraia?

• Taunimanima ita kara henidia neganai, edena bamona Iesu ita tohotohoa diba?

[Study Questions]

[Picture on page 17]

Iesu ese Petero, Andrea, Iamesi, bona Ioane ia boiria neganai, idia be karaharaga Iesu murinai idia raka

[Picture on page 19]

Buka idauidau, hegeregere “Baibel Hadibaia” buka, ese ita idia durua iseda tadikaka taihu ida hadibaia karana ita karaia namonamo totona